Skip to main content

அப்பாவி கணவனை தெருவில் அலைய வைத்த மனைவி - வழக்கறிஞர் சாந்தகுமாரியின் வழக்கு எண்: 47

Published on 27/02/2024 | Edited on 27/02/2024
advocate-santhakumaris-valakku-en-47

தான் சந்தித்த பல்வேறு வழக்குகள் குறித்தும் அதை நடத்திய விதம் குறித்தும் நம்மோடு பிரபல வழக்கறிஞர் சாந்தகுமாரி பகிர்ந்து கொள்கிறார்.

ரமேஷ்பாபு  என்பவரின் வழக்கு இது. அப்பா இல்லாமல் அம்மா வளர்ப்பில் ஏழ்மை நிலையிலிருந்து வளர்ந்து வேலை தேடி கஷ்டப்பட்டு வயது சற்றே அதிகம் ஆன பின்பு தான் திருமணம் செய்து கொள்கிறார். இவருக்கு குழந்தையும் பிறக்க, நான்கு வருடம் கழித்து திடீரென்று சற்றும் எதிர்பாராமல் மனைவியிடம் இருந்து விவாகரத்து நோட்டீஸ் வர, பதட்டமாக வந்து என்னை சந்திக்கிறார். அந்த இரண்டு நோட்டீசில் ஒன்று விவாகரத்து கேட்டும் இன்னொன்று குழந்தைக்கு பராமரிப்பு பணம் கேட்டும் இருந்தது. என்னதான் பிரச்சனை என்று ரமேஷ்பாபுவிடம் கேட்ட பின்னே மெல்ல சொல்கிறார். 

ஒண்ணுமே இல்லாத நிலையிலிருந்து வீடு வசதி இல்லாமல் சிரமத்துடன் வளர்ந்ததால், தன் அம்மாவிற்காக சொந்த வீடு கட்டி முடிக்கையில் வயதும் அதிகம் ஆகிவிட்டது. இதை சொல்லித்தான் திருமணமும் நடந்தது. நாங்கள் சந்தோஷமாகத்தான் இருந்தோம். ஒரு குழந்தை கூட பிறந்திருக்கிறது என்றார். பின் எதற்காக உங்கள் மனைவி விவாகரத்து நோட்டீஸில், நீங்கள் இரவு மிகவும் லேட்டாக வருவதாகவும், கெட்ட வார்த்தை பேசுவதாகவும் குறிப்பிட்டிருக்கிறார் என்று கேட்டேன். ரமேஷ்பாபுவுக்கு தான் வேலை பார்க்கும் அலுவலகத்தில் மாதத்தின் முதல் வாரம் மட்டும் கொஞ்சம் நிறைய வேலைகள் இருக்கும் என்பதால், அந்த வாரம் மட்டுமே வீடு திரும்ப நள்ளிரவு ஆகிவிடும் என்றும், தான் சத்தியமாக ஒரு கெட்ட வார்த்தை கூட பேசியது இல்லை. வேண்டுமென்றால் என் மனைவியிடமே ரெக்கார்டு எதுவும் இருந்தால் கேட்டுப் பாருங்கள் என்றார். என் மனதிற்கு இவர் பேசுவது உண்மை என்றுதான் பட்டது. அவர் மனைவி நோட்டீசுடன் குழந்தைக்கு பராமரிப்பு பணம் கேட்டிருப்பதால் அவர் வருமான விவரம் கேட்டோம். 

ஓரளவு லட்சத்தில் சம்பாதிக்கும் ரமேஷ்பாபு அதை வைத்து தன் தாய்க்காக கட்டியிருக்கும் வீட்டின் கடனை மாதாமாதம் அடைப்பதாகவும், மேலும் தன் மனைவிக்கும் சர்ப்ரைஸாக ஊரப்பாக்கத்தில் ஒரு வீடும் கட்டிக்கொண்டிருக்கிறார். அதற்கான ஆதாரத்தையும் சமர்ப்பிக்கிறார். நான் செய்யாமல் இருந்தால் தானே நான் மெயின்டனன்ஸ் பணம் கொடுக்க வேண்டும்.  நான் தான் ஏற்கனவே என் குழந்தைக்கு ஸ்கூல்ல பீஸ் முதல் அவர்கள் குடியிருக்கும் வீடு வாடகை முதல் கட்டிக்கொண்டுதானே இருக்கிறேன் என்றார். 

மேலும் அந்தப் பெண் இவரை வீட்டை விட்டுத் துரத்திவிட்டார் என்பதும் தெரிய வருகிறது. என்னவென்று கேட்டபோது தான் தெரியவந்தது, இவருக்கும் மனைவிக்கும் எந்த ஒரு பிரச்சனையும் இல்லை என்றும், அந்தப் பெண்ணின் அம்மாவினால் தான் இந்த நிலைமை என்றும் மேலே சொல்கிறார். செங்கல்பட்டிலிருந்து வந்திருக்கும் அவர் மனைவி கர்ப்பமான பின், சென்னையிலேயே பிரசவம் பார்த்து கொள்ளலாம் என்று ரமேஷ்பாபு கூறி இருக்கிறார். ஆனால் அந்த பெண்ணின் அம்மா செங்கல்பட்டிலேயே பிரசவம் பார்க்க வைக்க, அதில் சில சிக்கல்கள் வந்து யாராவது ஒரு உயிரை மட்டுமே காப்பாற்ற முடியும் என்று ஆகியிருக்கிறது. ரமேஷ்பாபுவும் அதிக விலை கொடுத்து தனியார் மருத்துவமனையில் கொண்டு போய் சிசிச்சை பார்க்க வைத்து காப்பாற்றி இருக்கிறார். குழந்தை பிறந்தபோது சிக்கல் வந்ததால், அந்த பெண்ணின் தாயாரும் இவர்கள் வீட்டில் கூடவே தங்கி இருக்கிறார். 

இது இயல்புதானே என்று ரமேஷ்பாபுவும் விட, ஆனால் வந்த தாயார் திரும்பி செல்லவே இல்லை. மேலும் இந்த அம்மா, கணவன் மனைவிக்குள் நிறைய பிரச்சனைகளை ஏற்படுத்தி விடுகிறார். லேட்டாக வந்தால் கதவை திறக்காதே என்றும், தன் மகளின் அதிர்ஷ்டமே இப்படி மேலே வந்ததற்கு காரணம் என்றும், அவரை உருவ கேலி வரை செய்கிறார். அந்த பெண்ணின் தம்பியும் மாதக் கணக்கில் இவர்கள் கூடவே தங்கி விடுகிறார். ரமேஷ்பாபுவுக்கு டிப்ரெஷன் அதிகமாகி புகைப் பழக்கமும் அதிகம் ஆகிறது. மனைவியும் விலகிப் போக, தன் மாமியாரிடமும் பேசிப் பார்க்கிறார். ஆனால் அதுவும் தவறாக போகிறது. மேலும் மனைவியின் தம்பியும் இவரை அடித்து வெளியே துரத்தி விடுகிறார். இந்த நிலையில் தான் அவருக்கு நோட்டீஸ் வருகிறது.

இதையெல்லாம் நாங்கள் கோர்ட்டில் நீதிபதியிடம் சொல்ல, ரமேஷ்பாபுவையும் அந்த பெண்ணையும் மீடியேஷனுக்கு அனுப்பினார்கள். குழந்தையைப் பார்க்க ரமேஷ்பாபுவை அனுமதிக்க வேண்டும் என்று கேட்டு பெட்டிஷன் போட்டு அதன்படி பார்க்க போனாலும், குழந்தையை வாசலிலேயே காண்பித்து அவரை மரியாதை குறைவாக நடத்தி அனுப்பி விடுகின்றனர். 

பின்னர் விசிட்டிங் ரயிட்ஸ் வாங்கியும், அந்த பெண்ணும் குழந்தையும் வீட்டை விட்டே சென்றதாக தகவல் வர, ஊரப்பாக்கத்தில் இருப்பதாக அறிந்து கொள்கிறார். கடைசியாக கோர்ட்டில் அந்த பெண் எதற்கும் ஒத்து வரவில்லை. ஏதாவது செட்டில் பண்ணுமாறு கூற, அந்த பெண்ணும் குழந்தையை பார்க்க அனுமதிக்க வேண்டும் என்றால் ஊரப்பாக்கத்தில் ஒரு பிராப்பர்ட்டியை தனது பெயரில் எழுதித் தருமாறு கேட்கிறாள். ஆனால் அவளுக்குத் தெரியவில்லை அது அவளுக்காகத் தான் ரமேஷ்பாபு வங்கியிருக்கார் என்று. இறுதியில் அவரும் இதற்கு ஒத்துக்கொண்டு சொத்தையும் அவள் பெயரில் ரிஜிஸ்டர் செய்த பின், மியூச்சுவல் கன்சென்ட்டில் டைவோர்ஸ் வாங்கியும், அந்த பெண்  குழந்தையை காட்டவே இல்லை. அதற்கு பெட்டிஷன் போட்டு, நோட்டீஸை அந்த பெண்ணுக்கு அனுப்பினாலும், சரியான ரெஸ்பான்ஸ் இருக்காது. அந்த குழந்தை பள்ளிக்கு போய் வரும்போது மட்டும் பார்த்து வருகிறார் ரமேஷ்பாபு. இப்போது அவர் தன் அம்மா இருக்கும் பாண்டிச்சேரிக்கே சென்றுவிட்டார்.

கணவனை என்றுமே வெறும் பணம் காய்க்கும் மரமாக மட்டுமே பார்க்காமல், அன்போடும் அரவணைப்போடும் பார்த்துக் கொள்ளும் பெண்கள் இருக்கும் குடும்பம் முன்னேற்றம் அடையும். அப்படியில்லாத குடும்பம் முன்னேற்றம் அடையாது.

Next Story

விவாகரத்தான பெண்ணை திருமணம் செய்ததால் பிரச்சனை; கதறிய அப்பாவி கணவன் - வழக்கறிஞர் சாந்தகுமாரியின் வழக்கு எண்: 53

Published on 04/04/2024 | Edited on 04/04/2024
 advocate-santhakumaris-valakku-en-53

தான் சந்தித்த பல்வேறு வழக்குகள் குறித்தும் அதை நடத்திய விதம் குறித்தும் பிரபல வழக்கறிஞர் சாந்தகுமாரி நம்மோடு பகிர்ந்து கொள்கிறார்.

அவசரமாக ஒரு நபர் ஒருநாள் என்னுடைய அலுவலகத்தில் வந்திருந்தார், அப்பாயின்மென்ட் இல்லாமல் பார்க்கமுடியாது என்பதால், நான் அனுமதிக்காமல் இருக்க, சிறிது நாள் கழித்து அப்பாயின்மென்ட் வாங்கியபின் நான் அவரை சந்தித்தேன். அவரும் மிக பதற்றமாக என்னிடம் பேசினார். தான் ஒரு விவாகரத்து ஆன பெண்ணை திருமணம் செய்தவர் என்றும், இப்போது அந்த பெண் தன்னை வீட்டினுள்ளே விடுவதில்லை என்றும் பதற்றமாக பேசினார். என்ன ஆனது என்று கேட்டபின் தான் சொல்ல ஆரம்பித்தார். 

அந்த பெண்ணை அவர் முதலில் ஒரு தெரிந்த விழாவில் சந்தித்ததாகவும், பிடித்திருந்ததால் விசாரித்ததில் அந்த பெண்ணிற்கு ஏற்கனவே கோர்ட்டில் விவாகரத்து கேஸ் போய்க்கொண்டு இருக்கிறது என்று தெரிகிறது. பின்னர் கேஸ் முடிந்தவுடன் இருவரும் திருமணம் செய்து கொள்கிறார்கள். அவளுக்கு முதல் கணவனால் வந்த குழந்தையையும் ஏற்று கொள்கிறார். திருமணம் ஆன பின்னர் இவர்களுக்கும் ஒரு குழந்தை பிறக்கிறது. இருவரையும் அவர் ஒன்றாக தான் வைத்து வளர்க்கிறார், ஆனால் மற்றவர்கள் சும்மா இல்லாது, அவர் தன்னுடைய குழந்தையை மட்டும் எப்படி கொஞ்சுகிறார் பார். தன் மகனை மட்டும் நன்றாக வளர்க்கிறார் என்று ஏற்றி விட, இவளுக்கும் கொஞ்சம் கொஞ்சமாக மனம் மாறி விடுகிறது.

இவர் வெளியில் சென்று சாதாரணமாக  நண்பர்கள் என்று சந்தித்து  வந்தாலும், உன் கணவனை நான் வேறொரு பார்ட்டியில் பார்த்தேன் என்றெல்லாம் அவளின் நண்பர்கள் கூற கூற இவளுக்கு தேவையில்லாத சந்தேகம் தானாக வருகிறது. வீட்டிற்கு வந்ததும் கணவனிடம் ஒழுங்காக பேசுவதில்லை, எது பேசினாலும் சரியாக பதிலளிப்பதில்லை. பார்ட்டி என்று சென்று வருவதை சொல்லிக் காட்ட, இவர் தனக்கு அது வெறும் பொழுதுபோக்கு தான் என்று சொல்லிவிட்டு, அடுத்தமுறை அவளையும் கூட்டி போவதாகச் சொல்கிறார். ஆனால் அவளை அழைத்துப் போக ஆபிசில் அதுவரை எந்த பார்டியும் நடக்கவில்லை. அதனை புரிந்துகொள்ளாமல் மேலும் கோவப்படுகிறாள்.

எல்லாரும் இல்லாததை சொல்ல சொல்ல, அந்த முதல் கணவனின் பதினாறு வயது மகன் அவரை வெறுக்கிறான். ஒருநாள் குடித்துவிட்டு வந்ததில், அந்த பதின்வயது பையன் மரியாதை இல்லாமல் பேச பிரச்சனை பெருசாக ஆகிறது. 

கையை ஓங்குவது என்று அவரை அடக்கும் அதிகாரம் எடுத்துக் கொள்கிறான். அவருக்கென்று அவருடைய காரும் கொடுக்காமல், வாங்கிக் கொள்வது, பணத்தை எண்ணி பார்ப்பது போன்ற வேலையை எல்லாம் செய்கிறான். எல்லை மீறி அடிப்பது வரை ஆகிறது. ஒருநாள் அந்த பையனே குடிக்க ஆரம்பித்து விடுகிறான். தந்தை தடுக்க போய், பாட்டிலாலே அடித்து விடுகிறான். சின்ன பையனையும் அடக்கி வைத்திருக்கிறார்கள். இவருக்கு வீட்டில் மரியாதை இல்லை என்று தெரிய வருகிறது. வீட்டில் பணம் வைப்பதை நிறுத்தி விடுகிறார். சாப்பாடு போடுவது, கவனிக்கிறது என்று கிடையாது. தகராறு ஆகி வெளியே வந்து அப்போது தான் தனக்கு பாதுகாப்பு வேண்டும் என்று என்னிடம் வந்தார். போலீஸ் கம்ப்ளெயிண்ட் கொடுக்கச் சொல்ல, அங்கு கவனிக்காததால், கமிஷனருக்கு மெயில் அனுப்பினார். பின்னரே நடவடிக்கை எடுக்கப்பட்டது.  

காவலர்கள் வீட்டிற்கு சென்று விசாரிக்க, இதனால் மேலும் அந்த அம்மா, பையன் என்று இவரிடம் அதிகமாக தகராறு செய்ய, மீண்டும் என்னிடம் வந்து என்ன செய்வது என்று நின்றார். எனக்கு தெரிந்த போலீஸ் அதிகாரியை வைத்து அவர்கள் தரப்பில் பேச வைக்க ஏற்பாடு செய்யச் சொல்ல, அவர்கள் இருவருக்கும் கவுன்சிலிங் முடிவானது. போய் பேசவைப்பது என்று வாரக்கணக்கு ஆனது. ஆனாலும் அந்த அம்மாவிற்கு இவருடன் வாழ விருப்பமே இல்லை என்று தெரிய வந்தது. சரி வாழப் பிடிக்கவில்லை என்றால் விட்டு விடலாமே என்று பேச, நான் இவரை விட்டு வெளியே தெருவிலா நிற்க முடியும். எனக்கும், என் பையனுக்கும் செய்ய வேண்டிய செட்டில்மென்டை கொடுக்கச் சொல்லுங்கள் என்றாள். சட்டப்படி அந்த பையனுக்கு பதினெட்டு வயது ஆனதால், அவனுக்கு இவர் செட்டில் செய்யவேண்டிய அவசியம் இல்லை. அவனே தான் வேலைக்கு போய் பார்த்து கொள்ளவேண்டும்.  பையனுக்கு நான் லீகல் கார்டியனாக இருக்கிறேன் என்று உறுதி அளித்தார்.

எனக்கு நிரந்தர ஜீவனாம்சம் எழுபது லட்சம் வேண்டும் என்று கேட்டாள். அவ்வளவு பணம் முடியாது என்று முழுமனதாக இவர் நிராகரிக்க கடைசியாக முப்பது லட்சம் வாங்கிக்கொள்ள ஒத்துக்கொள்கிறாள். அவரும்  பையனை தன்னுடன் அனுப்புமாறு கேட்டு, எப்போது வேண்டுமோ அவள் வந்து பார்க்கலாம் என்றும் தான் அனுமதிப்பதாகவும் சொல்கிறார். ஆனால் மாறாக, தன்னுடைய பிளாட்டிலிருந்து அவர்கள் வெளியேற வேண்டும் என்றார். முடிந்தவரை மறுத்தாலும், இறுதியாக ஒத்துக்கொண்டு செங்கல்பட்டு கோர்ட்டில் முதல் தவணை செட்டில்மென்ட் குடுத்து, இருவர் பேரில் இருந்த வீட்டின் ஒரு பாதி தொகையை இவர் பெறுமாறு பெட்டிஷன் போட்டு, எல்லாம் தொகை குடுத்து முடிக்க ஆறு மாத காலம்  ஆனது. டிவோர்ஸ் ஆன அன்று மாலையே வீட்டின் சாவியை கோர்ட்டில் வந்து சமர்ப்பிக்குமாறு உத்தரவு சொல்லப்பட்டு கடைசியாக வழக்கு முடிந்தது. 

Next Story

தவறி விழுந்த மனைவி; தற்கொலை முயற்சியாக மாற்றிய கணவன் - வழக்கறிஞர் சாந்தகுமாரியின் வழக்கு எண்: 52

Published on 26/03/2024 | Edited on 26/03/2024
advocate-santhakumaris-valakku-en-52

தான் சந்தித்த பல்வேறு வழக்குகள் குறித்தும் அதை நடத்திய விதம் குறித்தும் பிரபல வழக்கறிஞர் சாந்தகுமாரி நம்மோடு பகிர்ந்து கொள்கிறார்.

சுசித்ரா என்ற வடநாட்டு பெண்ணின் வழக்கு இது. திருமணம் செய்து கொள்ளும் அந்த பையன் மிகவும் ஜாலியான டைப், எப்போதுமே கலகலப்பான ஆள். சுசித்ராவோ கொஞ்சம் தேவைக்கு மட்டும் பேசும் அமைதியான குணம். திருமணமானவுடன் தன் மனைவி தன்னைப் போல இருக்க வேண்டும் என்று எதிர்பார்க்கிறார். ஆனால் அவள் அப்படி மாறவில்லை. அது அவருக்கு கொஞ்சம் வருத்தமாக இருக்கிறது. அந்த பெண்ணை ஏதாவது குறை சொல்லி காயப்படுத்தி வந்திருக்கிறார். போதாக் குறைக்கு கூட இருந்தவர்களும், பார்ப்பவர்களும் என்ன இந்த பெண்ணை திருமணம் செய்திருக்கிறீர்கள், குள்ளமாக இருக்கிறதே என்று ஏற்றி வேறு விடுகிறார்கள். இருவருக்கும் இரண்டு குழந்தைகள் என்றாகி ஐந்தாறு வருடங்கள் ஆகியும் தனக்கேற்ற மனைவி அமையவில்லையே என்று இவரிடம் நீங்கா குறை இருந்து வருகிறது. 

ஒருநாள் மாடி பால்கனியில் அந்த பெண் தனியாக உட்கார்ந்திருக்கும்போது தனது வளையல் தவறி கீழே விழ, பதறிப் போய் எடுக்கப்போன போது அங்கிருந்து விழுந்து பலமான அடிப்பட்டுவிட்டது. மருத்துவமனையில் சேர்த்தபோது, போலீசில் புகாரளிக்க வேண்டும் என்று சொல்லி இருக்கிறார்கள். அதன்படியே அவள் கணவனும் தவறி விழுந்து விட்டதாக எழுதி கொடுக்க, அந்த பெண்ணிடம் விசாரித்தபோது, இல்லை யாரும் தள்ளிவிடவில்லை இது தெரியாமல் நடந்த விபத்து தான் என்று நடந்ததை சொல்லி விடுகிறாள். முதுகுத் தண்டு, இடுப்பெலும்பு என்று அடிப்பட்டு நடக்க முடியாமல் வீல் சேரில் தான் இருக்க முடியும் என்று ஆகிவிடுகிறது. கணவனுக்கு மருத்துவமனை செலவு என்று ஆகியதில் ஏற்கனவே இருந்த வெறுப்பு அதிகமாகி மேலும் ஒரு அலட்சியம் வந்துவிடுகிறது. தனியாக விட்டு விடுகிறார். மருத்துவமனையில் கூட ஒரு ஹெல்ப் வைத்துக்கொள்ளுமாறு சொல்லியும் தொடர்ந்து வைக்கவில்லை. இந்த பெண்ணோ பாத்ரூம் கூட போக முடியாமல் சிரமப்பட்டு கணவனிடம், தான் கொஞ்ச நாள் அம்மா வீட்டில் இருந்து வருகிறேன் என்று கேட்க, இதற்காக காத்துக் கிடந்தவர் போல அனுப்பி விடுகிறார். 

மீண்டும் பத்து நாள் கழித்து வந்தபோது, அவளது மாமியார் உள்ளே விடவே இல்லை. உன் கணவன் இருக்கும் நேரம் கேட்டு அவர் இருக்கும் போது வா. இப்போது போய் விடு என்று அனுப்பி விடுகிறார். இவளுக்கு அப்போதுதான் ஏதோ தவறாக இருப்பதாக நினைக்கிறாள். அவரிடமும் பதில் இல்லை. மூன்று மாதம் கழித்து வந்தபோதும் அவர், நீ அன்று செய்தது தற்கொலை முயற்சி. இதுபோன்று மேலும் மேலும் நீ செய்தால் என்னால் உன் கூட வாழ முடியாது. எனவே நீ உன் அம்மா வீட்டிற்கே சென்று விடு என அனுப்பி விடுகிறார். இவள் போன பின்பு அவர் குடும்ப நீதிமன்றத்தில், அவள் என்னை கொடுமைப் படுத்துகிறாள். அடிக்கடி தற்கொலை முயற்சி செய்து கொள்கிறாள். என் குடும்ப வாழ்க்கையே போயிற்று எனவே டிவோர்ஸ் வேண்டும் என்று பொய் வழக்கு போட்டு விடுகிறார்.

இவர்களும் ஒரு வக்கீல் வைத்து வழக்கை நடத்தி பார்க்கிறார்கள். ஆனால் அவர்களால் வக்கீலுக்கு பணம் செலுத்த முடியவில்லை. அவள் நீதிமன்றம் வரும் போதெல்லாம், அவளை நோகடித்து அவர் பேசுகிறார். குழந்தைகளையும் பார்க்க அனுமதிப்பதில்லை. அவளுடைய வக்கீலையும் காசு கொடுத்து வாங்கி விட்டதாக சொல்லி விடுகிறார். இப்படி வேறு வழி இல்லாமல் அந்த பெண் இருந்தபோது தான், ஒருவருடைய சிபாரிசு மூலம் எனக்கு இந்த வழக்கு வருகிறது. அந்த பெண்ணின் பரிதாப நிலைக்கு ஏற்ப அவளுக்காக கோர்ட்டில் வழக்கை மேற்கொண்டு நாங்கள் நடத்தினோம். முதல் கேள்வியாக, அந்த நபரிடம் இந்த பெண் தற்கொலை முயற்சி செய்தாள் என்ற குற்றச்சாட்டு வைத்ததால், எங்கு நீங்கள் பார்த்தீர்கள்? எப்படி செய்தாள்? என்ன மாதிரி முயற்சி செய்தாள் என்றெல்லாம் கேட்கிறோம், அவரிடம் ஒன்று கூட சரியான பதில் இல்லை. எனக்கு தெரியாது என்றே தான் பதில் வருகிறது. அதுபோக அவள் அடிப்பட்ட போது அவள் கணவன் தான் போலீசில் புகார் அளித்திருந்தார். அதிலும் கூட தற்கொலை என்று குறிப்பிடவே இல்லை. விழுந்து விட்டதாகத்தான் குறிப்பிட்டிருந்தார். அதை கோர்ட்டில் கூட தாக்கல் செய்யவில்லை. அதை வைத்து நாங்கள் பேசினோம்.

இது ஒரு மெடிக்கல் லீகல் கேஸ் என்பதால், கண்டிப்பாக மருத்துவமனையில் மனைவியிடம் ஸ்டேட்மெண்ட் வாங்கப்பட்டிருக்குமே என்று பார்த்தால், அதிலும் மனைவி போலீஸ் கம்பளைண்ட்டில் தெளிவாக, வளையல் விழப் போய்த்தான் விழுந்து விட்டதாக தெளிவாகச் சொல்லி இருக்கிறாள். எனவே அதற்கும் அந்த நபரால் ஒன்றும் செய்ய முடியவில்லை. அடுத்ததாக இரண்டாவது வக்கீலாக நான் அவள் வழக்கை எடுப்பதால், மீண்டும் ஒருமுறை அவளுக்கு ஒரு அசிஸ்டன்ட் வைத்திருந்ததாக சொல்லப்பட்ட பெண்ணை விசாரிக்க வேண்டி வந்தது. ஆனால் அந்த கணவர் முதல் முறை வேறொரு அசிஸ்டன்ட் பேர் சொல்கிறார், இப்போது வேறொரு பெயர் சொல்கிறார். அந்த அசிஸ்டண்டையும் அவர்கள் வந்து காட்டவில்லை. ஒன்றிலும் உண்மை இல்லை. இதுபோக தன் பிள்ளைகளையும் அம்மாவிடம் அனுப்பாமல், கோர்ட்டில் அவளுக்கு எதிராகப் பேச வைத்திருக்கிறார். 

இதற்கிடையில் அந்த பெண்ணிடம் எதிர் வக்கீல், கணவனோடு சேர்ந்து வாழ வேண்டும் என்று மனு போட்டாயா என்று கேட்டு அதை வாங்கிப் படிக்கச் சொன்னார். ஆனால் எத்தனை முறை படித்தாலும் அதில் அப்படி ஒரு வார்த்தையே இல்லை. அவளும் தான் எழுதியதாகச் சொல்லி அழுகிறாள். ஆனால் அது எடுபடவில்லை. அங்கேயே அப்போதே நிறுத்திவிட்டு நான் நீதிபதியிடம் அவரிடம் இருக்கும் ஒரிஜினல் மனுவை படிக்குமாறு மெமோ போட்டேன். அடுத்த செஷன் வரும்போது வக்கீல் மீண்டும் அதையே கேட்டபோது, நான் நீதிபதியிடம் இருக்கும் ஒரிஜினலை கேட்டு படிக்குமாறு சொல்ல அவரும் படிக்க அதில் அந்த வார்த்தை இருந்தது. மேலும் தனக்கு ஒரு பைசா கூட காசு வேண்டாம், எனக்கு என் கணவருடன் வாழ வேண்டும் என்று தெளிவாக குறிப்பிட்டிருக்கிறாள்.

ஆனால் இவரோ பணம் பறிக்கத்தான் இப்படி செய்கிறாள். ஐந்து வருடமாக எத்தனை செலவு செய்கிறோம் என்று சொல்கிறார். இன்னொரு பக்கம் என்னிடம் நிறைய ஆட்களை பலமுறை அனுப்பி, பணம் கொடுத்து செட்டில் பண்ணி டிவோர்ஸ் வாங்க சொல்லுங்கள் என்றும் அனுப்புகிறார். ஒரு வக்கீலாக நான் என்னுடைய கிளைன்ட்டிடம் காசு செட்டில் பண்ணி டிவோர்ஸ் கொடுத்து விடுங்கள் என்று சொல்ல முடியாது. அது அவரவர் விருப்பம். அந்த பெண்ணிடம் உனக்கு விருப்பம் இருந்தால் செய் என்று விட்டுவிட்டேன். அந்த பெண் மீது தவறில்லை என்றாலும், தன்னுடைய தாம்பத்திய வாழ்க்கை பாதிப்பதால், அந்த நபர் இப்படி டிவோர்ஸ் வேண்டும் என்று இப்படியெல்லாம் செய்கிறார் என்று புரிந்தது. ஆனால் இந்த பெண் பணம் வாங்க ஒத்துக்கொள்ளவே இல்லை. கடைசியாக வழக்கு மேல் வாதம் என்று போக ஒரு வழியாக தீர்ப்பு வந்தது. ஆனால், அந்த நபருக்கு டிவோர்ஸ் கொடுத்து விடவேண்டும் என்று தான் தீர்ப்பு வந்தது. மிகவும் அதிர்ச்சியாக இருந்தது.

நாங்கள் மேற்கொண்டு உயர்நீதிமன்றத்தில் அப்பீல் போட்டுக் காத்திருக்க, பெண் பக்கம் எந்தவித தவறும் இல்லை. தற்கொலை முயற்சி செய்து கொள்கிறாள் என்று தான் இவர் காரணம் காட்டி டிவோர்ஸ் கேஸ் போட்டிருக்கிறார். ஆனால் அப்படி ஒரு விஷயம் எதுவுமே நடக்கவில்லை. அவரிடமும் அதற்கான ஆதாரம் இல்லை என்றும் அந்த பெண் தன் கணவனோடு சேர்ந்து வாழ வேண்டும் என்றுதான் கேட்டிருக்கிறாள் எனவே, அவர் தன் மனைவியோடு சேர்ந்து வாழ வேண்டும் என்று தீர்ப்பு மாறி வந்தது. ஆனால் என்னதான் ஐந்து வருடம் கழித்து தீர்ப்பு வந்தாலும், அவர்கள் இப்போது சேர்ந்து வாழவில்லை. அவர் தன் குழந்தைகளை எந்த குறையும் இல்லாமல் நன்றாக படிக்க வைத்து லண்டன் அனுப்பி வைத்துள்ளார். ஆனால் இருவரும் தனித்து தான் வாழ்கிறார்கள்.