Skip to main content

ரெய்னாவின் இடத்தை இவரை வைத்து நிரப்பலாம் - வாட்சன் கருத்து!!! 

Published on 11/09/2020 | Edited on 11/09/2020

 

watson

 

 

கரோனா காரணமாக ஒத்திவைக்கப்பட்ட 13-வது ஐபிஎல் தொடர் இந்த மாதம் 19-ம் தேதி தொடங்க இருக்கிறது. முதல் போட்டியாக சென்னை அணி மும்பை அணியுடன் மோதுகிறது. இரு அணி வீரர்களும் இப்போட்டிக்காக தீவிர பயிற்சியில் ஈடுபட்டு வருகின்றனர். சென்னை அணியின் முக்கிய வீரர்களான ரெய்னா மற்றும் ஹர்பஜன்சிங் தங்களுடைய சொந்தக் காரணங்களுக்காக இத்தொடரில் இருந்து விலகியுள்ளனர். ஹர்பஜன்சிங் இடத்தை நிரப்ப சென்னை அணியில் பிற சுழற்பந்துவீச்சாளர்கள் இருப்பதால் அவரது விலகல் பெரிய இழப்பாக இருக்கப்போவதில்லை. அதே நேரத்தில் ரெய்னாவின் இடத்தை நிரப்ப யாரைத் தேர்வு செய்வது என்று தெரியாமல் சென்னை அணி தடுமாறி வருகிறது. தொடர் தொடங்குவதற்கு இன்னும் 10 நாட்களுக்கும் குறைவான நாட்களே இருப்பதால் சென்னை அணி துரிதமாக முடிவெடுக்க வேண்டிய கட்டாயத்தில் உள்ளது. இந்நிலையில் சென்னை அணி வீரர் வாட்சன் இது குறித்து கருத்து தெரிவித்துள்ளார்.

 

அதில் அவர், "ரெய்னாவின் இடத்தை நிரப்புவது கடினம். கடந்த கால தொடர்களில் அவரது பங்களிப்பு சிறப்பாக இருந்தது. அதிக போட்டிகளில் விளையாடியுள்ள வீரர் என்றால் அது ரெய்னா தான். அமீரக மைதானங்கள் சுழற்பந்து வீச்சுக்கு உகந்ததாக உள்ளது. ரெய்னா இது போன்ற மைதானங்களில் சிறப்பாக விளையாடக் கூடியவர். அந்த இடத்திற்கு முரளி விஜய் சரியான தேர்வாக இருப்பார் என்று நினைக்கிறேன். கடந்த சில ஆண்டுகளாக அவருக்கு சரியான வாய்ப்பு கிடைக்கவில்லை. ஆனால் அவர் சிறந்த வீரர் என்பதில் எந்த சந்தேகமும் இல்லை. இந்தாண்டு அவருக்கு நிறைய போட்டிகளில் விளையாட வாய்ப்பு கிடைக்கலாம்" என்றார்.

 

 

 

Next Story

இரண்டாவது முறையாக கௌரவ டாக்டர் பட்டம் பெற்றார் ஷங்கர்

Published on 05/08/2022 | Edited on 05/08/2022

 

Shankar and cricketer raina received honorary doctorate

 

இயக்குநர் ஷங்கர், கிட்டத்தட்ட தமிழ் சினிமாவின் முன்னணி நடிகர்களான ரஜினி, கமல், விஜய், விக்ரம் உள்ளிட்டோர்களை இயக்கி அப்படங்களை வசூல் மற்றும் விமர்சனம் ரீதியாகவும் வெற்றி படங்களாக்கியவர். இயக்குவது மட்டுமில்லாமல் 'காதல்', 'வெயில்', 'கல்லூரி' உள்ளிட்ட நல்ல படங்களை தயாரித்தும் உள்ளார். ரசிகர்களால் பிரமாண்ட இயக்குநர் என்று அழைக்கப்படும் ஷங்கர் தற்போது ராம்சரணின் 'ஆர்சி 15' படத்தை இயக்கி வருகிறார். இதனிடையே கமல்ஹாசன் நடிக்கும் 'இந்தியன் 2' படத்தையும் விரைவில் தொடங்கவுள்ளார்.

 

இந்நிலையில் ஷங்கருக்கு வேல்ஸ் பல்கலைக்கழகம் கௌரவ டாக்டர் பட்டம் வழங்கியுள்ளது. ஆண்டு தோறும் துரை ரீதியாக சாதனை படைத்து வரும் நபர்களுக்கு வேல்ஸ் பல்கலைக்கழகம் கௌரவ டாக்டர் பட்டம் வழங்கி வருகிறது. அந்த வகையில் இந்த வருடம் இயக்குநர் ஷங்கர் மற்றும் கிரிக்கெட் வீரர் ரெய்னா ஆகியோருக்கு வழங்கவுள்ளதாக சில தினங்களுக்கு முன்பு அறிவித்தது. இந்நிலையில் இன்று தமிழக ஆளுநர் ஆர்.என் ரவி மற்றும் ஐசரி கணேஷ் கலந்து கொண்டுள்ள நிகழ்ச்சியில் ஷங்கர் மற்றும் ரெய்னாவிற்கு கௌரவ டாக்டர் பட்டம் வழங்கி கௌரவித்துள்ளது வேல்ஸ் பல்கலைக்கழகம். 

 

இதன் மூலம் ஷங்கர் இரண்டாவது முறையாக கௌரவ டாக்டர் பட்டம் வாங்கியுள்ளார். இதற்கு முன்பு எம்.ஜி.ஆர் பல்கலைக்கழகம் கடந்த 2007-ஆம் ஆண்டு ஷங்கருக்கு டாக்டர் பட்டம் வழங்கி கௌரவித்தது என்பது குறிப்பிடத்தக்கது. 

 

 

Next Story

34 -வது பிறந்தநாள்... ரெய்னாவின் அறிவிப்பு! குவியும் பாராட்டுகள்!

Published on 23/11/2020 | Edited on 23/11/2020

 

raina

 

இந்திய கிரிக்கெட் வீரரான சுரேஷ் ரெய்னா வரும் 27 -ஆம் தேதி தன்னுடைய 34 -ஆவது பிறந்தநாளைக் கொண்டாடுகிறார். இதனை முன்னிட்டு உத்தரப்பிரதேசம், ஜம்மு, டெல்லி பகுதிகளில் உள்ள 34 அரசுப் பள்ளிகளுக்கு அடிப்படை சுகாதார வசதி மற்றும் குடிநீர் வசதி ஏற்படுத்திக் கொடுக்க இருப்பதாக அவர் அறிவித்துள்ளார். ரெய்னா இந்த நலத்திட்ட உதவியைத் தன்னுடைய 'கிரேசியா ரெய்னா' அறக்கட்டளை மூலம் வழங்கவிருக்கிறார்.

 

இது குறித்தான ரெய்னா பதிவில், "என்னுடைய 34 -ஆவது பிறந்தநாளை, இவ்வகையிலான நகர்வுடன் கொண்டாடுவது எனக்கு மகிழ்ச்சியளிக்கிறது. ஒவ்வொரு குழந்தையும் தரமான கல்விபெரும் தகுதிக்குரியவரே. இதுதரமான குடிநீர் வசதி, சுகாதாரமான கழிப்பிட வசதிகளையும் உள்ளடக்கியது. இந்த உதவியை 'யுவா அன்ஸ்டாபபிள்' உடன் இணைந்து 'கிரேசியா ரெய்னா' அறக்கட்டளை மூலமாக வழங்குகிறோம். இதன்மூலம் ஆயிரக்கணக்கான குழந்தைகள் பயனடைவதைப் பார்க்க மகிழ்ச்சியாக உள்ளது. இது சிறந்த தொடக்கம். எதிர்வரும் காலங்களில் நிறைய பள்ளிகளை மேம்படுத்த எதிர்பார்த்து இருக்கிறோம்" எனக் குறிப்பிடப்பட்டுள்ளது.