Skip to main content

ஒரு பந்தில் மாறிய ஆட்டம்! - சூப்பர் 4ல் இலங்கை

Published on 06/09/2023 | Edited on 06/09/2023

 

SriLanka Vs Afghanistan asia cup

 

இந்தியா, பாகிஸ்தான், இலங்கை, வங்கதேசம், ஆப்கானிஸ்தான், நேபாளம் ஆகிய அணிகள் பங்கேற்கும் ஆசியக் கோப்பை கிரிக்கெட் 2023 தொடர் நடைபெற்று வருகிறது. இதன் ஆறாவது கடைசி லீக் ஆட்டத்தில் நேற்று (05-09-2023) இலங்கை-ஆப்கானிஸ்தான் அணிகள் மோதின. இந்த ஆட்டதில் இலங்கை நிர்ணயித்த 292 ரன் இலக்கை, ஆப்கானிஸ்தான் 37.1 ஓவரில் எட்டினால் சுப்பர் 4 சுற்றுக்கு முன்னேறும். இதனால் போட்டி முடியும் வரை சுவாரஸ்யமாக சென்றது.

 

ஆசியக் கோப்பை 2023ன் கடைசி லீக் ஆட்டம் நேற்று கடாபி ஸ்டேடியத்தில் இலங்கை-ஆப்கானிஸ்தான் இடையே நடந்தது. முதல் ஆட்டத்தில் ஆப்கானிஸ்தான் வங்கதேசத்துடனான போட்டியில் தோற்றது. இதனால், இலங்கையுடனான ஆட்டத்தில் வெற்றிபெற வேண்டும் என்ற சூழல் உருவாகியது. டாஸ் வென்ற இலங்கை கேப்டன் தசன் சனாக பேட்டிங்கை தேர்வு செய்தார். தொடக்கத்தில் நிஷான்ங்க-கருணரத்னே கூட்டணி களமிறங்கியது. ஆரம்பம் முதலே இருவரும் நிலையான ஆட்டத்தை வெளிபடுத்தினர். பின்னர், கருணரத்னே 32 ரன்களில் ஆட்டம் இழக்க, குசால் மென்டிஸ் இறங்கினார். தொடர்ந்து, நிஷாங்க 41 ரன்கள் சேர்த்து நயிப் வீசிய பந்தில் கேட்ச்அவுட் ஆகினார். அடுத்து, சமர விக்ரமா சொற்ப ரன்களில் வெளியேறி ஏமாற்றம் அளித்தார். 

 

இருப்பினும், நான்காவது விக்கெட்டுக்கு அசலாங்க-குசால் மென்டிஸ் இணை ஆட்டத்தை ஒழுங்குபடுத்தினர். அசலங்கா ஒரு பக்கம் நிதானமாக விளையாட, மறுபுறம் மென்டிஸ் அதிரடியாக ஆடத் தொடங்கினார். இதனையடுத்து, அசலங்கா 36 ரன்களும், சில்வா 14 ரன்களும் எடுத்து வெளியேறினர். அடுத்து வந்த கேப்டன் சனாக 5 ரன்கள் எடுத்து ரஷித் கானின் சுழலில் சிக்கி கிளீன் போல்ட் ஆனார். ஆனால், குசால் மென்டிஸின் சிறப்பான ஆட்டத்தால் அணிக்கு 84 பந்தில் 92 ரன்கள் குவித்து ரன் அவுட் ஆகி சதம் அடிக்கும் வாய்ப்பை தவறவிட்டார். 

 

இதனால் இலங்கை கணிசமான ஸ்கோரை எட்டியது. இறுதி வரிசையில் களமிறங்கிய துணித் வெல்லகல்லே 33 ரன்களுடன் களத்தில் நிற்க. தீக்சனா 28 ரன்களில் போல்ட் ஆனார். 50 ஓவரை முழுமையாக விளையாடிய இலங்கை அணி 8 விக்கெட்டுக்கு 291 ரன்கள் சேர்த்தது. ஆப்கானிஸ்தான் பந்துவீச்சில் குல்பதின் நயிப் 4 விக்கெட்டும், ரஷித்கான் 2 விக்கெட் எடுத்திருந்தனர்.

 

SriLanka Vs Afghanistan asia cup

 

முதல் போட்டியில் ஆப்கானிஸ்தான் தோற்றுள்ளதால் இந்த போட்டியில் வெல்ல வேண்டும். மேலும், இந்த ஆட்டத்தில் இலங்கை நிர்ணயித்த 292 ரன் இலக்கை, ஆப்கானிஸ்தான் 37.1 ஓவரில் எட்டினால் சுப்பர் 4 சுற்றுக்கு முன்னேறும். இதனால் போட்டி முடியும் வரை சுவாரஸ்யமாக சென்றது. இந்த சவாலை எதிர்கொள்ள தொடக்கக் ஆட்டக்காரர்கள் குர்பான்-இப்ராஹிம் களமிறங்கினர். முதல் ஓவர் முதலே வேகமாக ரன்கள் சேர்க்க முயன்று குர்பான் 4 ரன்னிலும், இப்ராஹிம் 7 ரன்னிலும் வெளியேறினர். பின்னர், ரஹ்மத் நிதானமாக விளையாடி 40 பந்துகளில் 45 ரன்களோடு விடைபெற்றார். அடுத்து கேப்டன் ஹஸ்மதுல்லா அருமையான ஆட்டத்தால் 59 ரன்களை அணிக்கு சேர்த்து ஆட்டம் இழந்தார். 

 

விக்கெட்டுகள் சரியத் தொடங்கியதால் ஆப்கானிஸ்தான் அதிரடி ஆட்டத்தை கையில் எடுத்தது. அதிலும், முகமது நபி ஆறு பவுண்டரிகள், ஐந்து சிக்சர் என 32 பந்தில் 65 ரன்கள் எடுத்தார். இலங்கை அணி சற்றுத் தடுமாற ஆரம்பித்தது. ஆட்டத்தின் மிகமுக்கியமான கட்டத்தில் முகமது நபி, தீக்சனாவிடம் ஆட்டம் இழந்தார். மறுபடியும் ஆட்டம் இலங்கை வசம் வந்தது. இருந்தாலும் இறுதியில், கரீம் 22 ரன், நஜிபுல்லா 23, ரஷித் கான் 27 என விளாசத் தொடங்கினர். சூப்பர் 4 சுற்றுக்கு ஆப்கானிஸ்தான் முன்னேறி விடும் என்ற நிலை உருவானது.

 

ஆப்கானிஸ்தான் 37 ஓவரில் 289 எடுத்து 8 விக்கெட்டுகளை இழந்து கைவசம் 2 விக்கெட்டுகளை வைத்திருந்தது. சூப்பர் 4க்கு தகுதி பெற 1 பந்தில் மூன்று ரன்கள் ஆப்கானிஸ்தானுக்கு தேவை. இதனால், பார்வையாளர்கள் இருக்கை நுனிக்கு வரும் சூழல் உருவானது. ஆனால், 38வது ஓவரை வீசிய தனஞ்செய டி சில்வா, 37.1 பந்தில் ஒரு விக்கெட்டையும் 37.4 பந்தில் மறு விக்கெட்டையும் வீழ்த்தி அணியை வெற்றி பெற வைத்தார். இதனால், இலங்கை அணி ஆப்கானிஸ்தானை 2 ரன்கள் வித்தியாசத்தில் வீழ்த்தி த்ரில் வெற்றி பெற்றது. 37.1 பந்தில் விக்கெட் விழாமல் பந்து பவுண்ட்ரியை நோக்கிச் சென்றிருந்தால் ஆப்கானிஸ்தான் சூப்பர் 4க்கு முன்னேறியிருக்கும். ஆனால், அந்தப் பந்தில் விக்கெட் வீழ்ந்ததால், ஆப்கானிதான் ரசிகர்கள் சோகம் அடைந்தனர். 

 

இலங்கை பந்து வீச்சில் கசன் ரஜிதா 4 விக்கெட்டும், துணித் மற்றும் டி சில்வா தலா 2 விக்கெட்டும் எடுக்க தீக்சனாவும் பதிரனாவும் தலா 1 விக்கெட் எடுத்தனர். ஆட்ட நாயகன் விருது 92 ரன்களை எடுத்த குசால் மெண்டிஸுக்கு வழங்கப்பட்டது.

 

சூப்பர் 4 சுற்றுக்கு ஏ பிரிவில் இந்தியா, பாகிஸ்தானும். பி பிரிவில் இலங்கை, வங்கதேசமும் முன்னேறியது. இன்று (06-09-2023) கடாபி ஸ்டேடியத்தில் நடக்கும் முதல் சுப்பர் 4 போட்டியில் பாகிஸ்தான்-வங்கதேசம் மோத உள்ளது. சூப்பர் 4 சுற்றின் இறுதியில் முதல் 2 இடம் பெறும் அணிகள் இறுதிப் போட்டிக்கு முன்னேறும். 

 

 

 

Next Story

“இலங்கை அரசின் சதித்திட்டத்தை முறியடிக்க வேண்டும்” - ராமதாஸ் வலியுறுத்தல்

Published on 01/07/2024 | Edited on 01/07/2024
Ramadoss condemns  filing of a  case against 10 Tamil Nadu fishermen

தமிழக மீனவர்கள் 10 பேர் மீது கொலை வழக்குப் பதிவு செய்யப்பட்டதற்கு பாமக நிறுவனர் ராமதாஸ் கடும் கண்டனம் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், “வங்கக்கடலில் மீன்பிடிக்கச் சென்ற நாகை மற்றும் கடலூர் மாவட்ட மீனவர்கள் 10 பேரை கைது செய்து அவர்கள் மீது கொலை வழக்குப் பதிவு செய்துள்ள இலங்கைக் கடற்படையினர், அவர்களுக்கு மிகக் கடுமையான தண்டனை பெற்றுத் தருவதற்கான நடவடிக்கைகளை தொடங்கியுள்ளனர். ஒரு குற்றமும் செய்யாத தமிழக மீனவர்கள் மீது பொய்யான கொலை வழக்குப் பதிவு செய்திருப்பது கண்டிக்கத்தக்கது.

நாகை மாவட்டம் அக்கரைப்பேட்டை மீன்பிடி துறைமுகத்திலிருந்து ஆனந்த் என்பவருக்கு சொந்தமான  விசைப்படகில் நாகை மாவட்டத்தைச் சேர்ந்த 7 மீனவர்கள், கடலூர் மாவட்ட மீனவர் ஒருவர், ஆந்திர மாநிலத்தைச் சேர்ந்த இரு மீனவர்கள்  என மொத்தம் 10 பேர் கடந்த ஜூன் 23 ஆம் நாள் வங்கக்கடலில் மீன்பிடிக்கச் சென்றனர். நடுக்கடலில் மீன் பிடித்துக் கொண்டிருக்கும் போது அங்கு வந்த இலங்கை கடற்படையினர், தங்களின் சுற்றுக்காவல் படகை தமிழக மீனவர்களின் படகு மீது மோதியுள்ளனர்.

அதில் சுற்றுக்காவல் படகில் இருந்த ரத்னாயகா என்ற வீரர் கடலில் விழுந்து காயமடைந்தார். உடனடியாக அவர் காப்பாற்றப்பட்டு மருத்துவமனையில் சேர்க்கப்பட்டார். தமிழக மீனவர்கள் 10 பேரும் கைது செய்யப் பட்டு சிறையில் அடைக்கப்பட்டனர். அடுத்த நாளே கடலில் விழுந்து மீட்கப்பட்ட கடற்படை வீரர் ரத்னாயகா உயிரிழந்து விட்டதால் தமிழக மீனவர்கள் மீது இலங்கை அரசால் கொலை வழக்குப் பதிவு செய்யப்பட்டது.

இந்த நிலையில், கொழும்பில் உள்ள இந்திய தூதரகத்தில் இருந்து இந்திய வெளியுறவுத்துறை உயர் அதிகாரி ஒருவரை அழைத்த இலங்கை வெளியுறவுத்துறை அதிகாரிகள், நடுக்கடலில் நடந்த சண்டையில் தான் இலங்கை கடற்படை வீரர் ரத்னாயகா கொல்லப்பட்டதாகக் கூறி, அதற்கு கண்டனம் தெரிவித்து உள்ளனர். தமிழக மீனவர்கள் இலங்கை கடல் எல்லைக்குள் நுழைந்து தடை செய்யப்பட்ட வலைகளை பயன்படுத்தி, மீன் பிடிப்பதற்கும் கண்டனம் தெரிவித்துள்ளனர். அதேபோல்,  இந்தியாவுக்கான இலங்கை தூதர் சேனுகா செனவிரத்னே தில்லியில் இந்திய வெளியுறவுத்துறை அமைச்சர் ஜெய்சங்கரை  சந்தித்து இலங்கை கடற்படை வீரர் கொல்லப்பட்டது குறித்து சிங்கள அரசின் கண்டனத்தைப் பதிவு செய்திருக்கிறார். கொலை வழக்குப் பதிவு செய்யப்பட்டுள்ள மீனவர்களுக்கு கடுமையாக தண்டனையை  பெற்றுத்தருவதன் தொடக்கமாகவே இலங்கை வெளியுறவு அமைச்சகத்தின் செயல்பாடுகள் தெரிகின்றன.

இலங்கை கடற்படை வீரர் ரத்னாயகாவின் உயிரிழப்புக்கு தமிழக மீனவர்கள் எந்த வகையிலும் காரணம் அல்ல. அவர்கள் அப்பாவிகள். வங்கக்கடலில் பிழைப்புக்காக மீன்பிடித்துக் கொண்டிருந்த மீனவர்களை  கைது செய்யும் நோக்குடனும், தாக்கும் நோக்குடனும் அவர்களின் படகுகள் மீது இலங்கைக் கடற்படை வீரர்கள், தங்களின் ரோந்து படகுகளை அதிவேகமாக ஓட்டி வந்து மோதினார்கள்.

அதனால் ஏற்பட்ட நிலைகுலைவில் தான் இலங்கை கடற்படை வீரர் ரத்னாயகா முதுகுத் தண்டில் காயமடைந்து, மருத்துவமனையில் சேர்க்கப்பட்டு மருத்துவம் பயனின்றி உயிரிழந்தார்.  இது முழுக்க முழுக்க விபத்து. அதுவும் இலங்கைக் கடற்படையினரால் ஏற்படுத்தப்பட்ட விபத்து. அதற்கு எந்தத் தவறும் செய்யாத அப்பாவி தமிழக மீனவர்களை பொறுப்பாக்குவதும், தண்டிக்கத் துடிப்பதும் நியாயமல்ல.

இலங்கை கடற்படை வீரர் ரத்னாயகா கொலை வழக்கில் தமிழக மீனவர்களை தொடர்புப்படுத்தி இலங்கை வெளியுறவுத்துறை தெரிவித்த குற்றச்சாட்டுக்கு இந்திய வெளியுறவு அமைச்சர் ஜெய்சங்கரும்,   கொழும்பில் உள்ள இந்திய தூதரக அதிகாரியும் என்ன பதில் கூறினார்கள்? என்பது தெரியவில்லை. வங்கக்கடலில் தமிழக மீனவர்கள் காலம் காலமாக மீன்பிடித்து வரும் பகுதிகளில் தொடர்ந்து மீன்பிடிக்க தமிழக மீனவர்களுக்கு உள்ள உரிமைகளைப் பறிக்க இலங்கை தொடர்ந்து சதி செய்து வருகிறது.

அதற்காக தமிழக மீனவர்கள் போதை மருந்து கடத்தலில் ஈடுபடுகின்றனர், இலங்கை வீரர்களை கொலை செய்கின்றனர் என்பன போன்ற பொய்யான குற்றச்சாட்டுகளைக் கூறி வருகின்றனர். அவற்றை மத்திய அரசு ஏற்கக் கூடாது. இன்னும் கேட்டால் இதுவரை 800&க்கும் கூடுதலான தமிழக மீனவர்கள் இலங்கைக் கடற்படையினரால் கொடூரமாக சுட்டுக் கொல்லப்பட்ட நிலையில், அதற்கு காரணமான சிங்கள வீரர்களை தமிழக காவல்துறையிடம் ஒப்படைக்கும்படி தான் இந்திய அரசு வலியுறுத்த வேண்டும்.

இலங்கை வெளியுறவுத்துறை அமைச்சகத்திற்கு அழுத்தம் கொடுத்து, தமிழக மீனவர்கள் 10 பேர் மீதான கொலை வழக்கை திரும்பப் பெறச் செய்யவும், அவர்களை விடுதலை செய்து தாயகத்திற்கு அழைத்து வரவும் மத்திய அரசு நடவடிக்கை எடுக்க வேண்டும். இவை அனைத்துக்கும் மேலாக வங்கக் கடலில் எல்லைகளைக் கடந்து தமிழ்நாடு மற்றும் இலங்கை மீனவர்கள் முறை வைத்து மீன்பிடிக்கும் வகையில் ஒப்பந்தம் செய்து கொள்ள மத்திய அரசு நடவடிக்கை எடுக்க வேண்டும் என வலியுறுத்துகிறேன்.” எனக் குறிப்பிட்டுள்ளார். 

Next Story

25 மீனவர்கள் கைது; காப்பாற்றக்கோரி மண்டியிட்டு கதறி அழும் பெண்கள்

Published on 01/07/2024 | Edited on 01/07/2024
25 fishermen arrested; Women who kneel and cry to be saved

அண்மையாகவே தொடர்ந்து தமிழக மீனவர்கள் இலங்கை கடற்படையால் கைது செய்யப்பட்டு வரும் நிலையில் மிக அண்மையில் தமிழக மீனவர்கள் 20 பேர் கைது செய்யப்பட்டிருந்தது பரபரப்பை ஏற்படுத்தி இருந்தது. இந்நிலையில் இன்று மேலும் 25 பேரை இலங்கை கடற்படை கைது செய்துள்ளது அதிர்ச்சியை ஏற்படுத்தியுள்ளது.

ராமேஸ்வரம் தனுஷ்கோடியில் இருந்து மீன் பிடிக்கச் சென்ற மீனவர்கள் 25 பேர் எல்லை தாண்டி மீன்பிடித்ததாக இலங்கை கடற்படை கைது செய்துள்ளது. 25 மீனவர்கள் கைது செய்யப்பட்டதோடு அவர்கள் நாட்டு படகுகளையும் இலங்கை கடற்படை பறிமுதல் செய்துள்ளது. தற்போது 25 மீனவர்களையும் இலங்கை காங்கேசன் துறைமுகத்தில் வைத்து இலங்கை கடற்படை விசாரணை நடத்தி வருவதாக முதற்கட்ட தகவல்கள் வெளியாகியுள்ளது.

25 fishermen arrested; Women who kneel and cry to be saved

தொடர்ந்து ராமநாதபுரம் மீனவர்கள் சிறைபிடிக்கப்பட்டு வருவது அந்த பகுதி மீனவர்களுக்கு அதிர்ச்சி கொடுத்திருக்கும் நிலையில் இன்று  இலங்கை கடற்படை 25 மீனவர்களை விரட்டிப்பிடித்து கைது செய்திருப்பதாக வெளியான செய்தி அந்த பகுதி மக்களுக்கு மேலும் பேரதிர்ச்சியை கொடுத்துள்ளது. இந்நிலையில் கைது செய்யப்பட்ட மீனவர்களின் உறவினர்கள் மற்றும் அவர்களுடைய குடும்பத்தை சேர்ந்தவர்கள் தேசிய நெடுஞ்சாலையில் இறங்கி கண்ணீர் விட்டு மண்டியிட்டு அழுதபடி ஆர்ப்பாட்டத்தில் ஈடுபட்டுள்ளனர். அதேபோல் மீனவ அமைப்புகள் இன்று பாம்பன் வட கடல் பகுதியில் கடலில் இறங்கி ஆர்ப்பாட்டத்தில் ஈடுபட்டு வருகின்றனர்.