Skip to main content

உடற்பயிற்சியென்றால் என்ன தெரியுமா? வழியெல்லாம் வாழ்வோம் #11 

Published on 09/05/2018 | Edited on 09/05/2018
VV 11



உங்கள் குழந்தைகள் நலமா - பாகம் 9

குழந்தைகளுக்கான உடற்பயிற்சிகள்

குழந்தைகளுக்கான உடற்பயிற்சி என்றதும், அது ஏதோ நமக்குத் தெரியாத ஒன்று என்றும், வேறு யாரோ ஒருவர் வந்துதான் அதை அவர்களுக்கு கற்பிக்கவேண்டும் என்றும் பலர் நினைத்துக் கொள்கின்றனர். ஆனால், குழந்தைகளுக்கான உடற்பயிற்சி என்பது குழந்தைகளை அவர்கள் விரும்பும்படியாகவும், பாதுகாப்பாகவும் விளையாட அனுமதித்தல் ஆகும். ஆனால் இன்றைய சூழலில் பாதுகாப்பு என்பது தலைகீழ் அர்த்தமாய் மாறி “வீடியோ கேமில்” வந்து நிற்கிறது. முதலில் குழந்தைகள், அவர்களது உடற்பயிற்சி ஆசிரியர் சொல்லிக் கொடுக்கும் பயிற்சிகளை மேற்கொள்ள வேண்டும். [அதன் முன், இப்போதெல்லாம் பள்ளிகளில் உடற்பயிற்சி வகுப்புகள் நடை பெறுகின்றனவா என்பதை அறிய வேண்டும்]

உடற்பயிற்சியின் வகைகள்:

பொதுவாக உடற்பயிற்சிகளை

1. நுரையீரல், இதயத்துக்கான உடற்பயிற்சிகள் (Aerobic, Cardio Exercises) 

2. உடல் புறத்தசைகளுக்கான பயிற்சிகள் (Anaerobic Muscle Fitness & building up) என பிரிக்கலாம்.

குழந்தைகளுக்கான பயிற்சி என்பது, குழந்தைகளின் வயதுக்கு உட்பட்டு, திறனுக்கு உட்பட்டு இருத்தல் அவசியம்.

I. மூட்டு அசைவுகளுக்கான பயிற்சி:

 

kids workout



உடலின் ஒவ்வொரு மூட்டும் குறிப்பிட்ட கோணம் வரை அசையக் கூடியது. எடுத்துக்காட்டாக தோள்பட்டை மூட்டு 360 டிகிரி  அசையக்கூடியது. அதே போல் ஒவ்வொரு மூட்டும் தனக்கான பிரத்யேக சுற்றும் தன்மையையும், அசையும் தன்மையையும் கொண்டது. எல்லா மூட்டுகளும் அதற்கே உரித்தான முழு கோணத்தையும் அடைகின்ற வகையில் பயிற்சிகள் அமைய வேண்டும். இத்தகைய பயிற்சிகள் மூட்டின் அசையும் தன்மையை உறுதி செய்வதுடன் மூட்டைச் சுற்றியுள்ள தசைகளின் நீட்சித்தன்மை, சுருங்கி விரியும் தன்மை ஆகியவற்றைப் பாதுகாக்கிறது.

II. தசைகளை வலுவேற்றும் பயிற்சி:

 

kids exercise



இந்த வலுவேற்றும் பயிற்சியும் எல்லா வயதுக்கு குழந்தைகளுக்கும் பொதுவானதாய் இருப்பதில்லை. தசை வலுவேற்றும் பயிற்சியின் முக்கிய அங்கம், எடை தூக்கும் பயிற்சியாகும். குழந்தைகள் எந்த அளவு எடை தூக்க வேண்டும், எத்தனைமுறை தூக்க வேண்டும் என்பதை இயன்முறை மருத்துவமே முடிவு செய்ய முடியும். ஏனெனில் எலும்பின் வளர்ச்சியைப் (Epiphyseal) பொருத்தும் தசைகளின் தன்மை மாறுபடுகிறது. குழந்தைகளின் வயதை பொருத்தும் எடை தூக்கும் பயிற்சிகள் மாறும். குழந்தைகளுக்கு உடற்பயிற்சி கொடுக்கிறோம் என்று நாமாக அவர்களை எடை தூக்க வைப்பது அவர்களது இயற்கையான உடல் வளர்ச்சியை பாதிக்கும்.

III. இதய நுரையீரலுக்கான பயிற்சிகள்:

நடனமாடுதல், நீச்சல், ஓடுதல், வேகமாக நடத்தல் ஆகியவை இதய நுரையீரல் பயிற்சிகளுக்கு அவசியமாகின்றன. இதுபோன்ற பயிற்சிகளை பொறுத்தமட்டில் சிறிது சிறிதாக பயிற்சியின் அளவை அதிகரிப்பது நல்லது. முதல் நாளே அதிக தூரம் ஓடச் செய்வது, அதிக நேரம் நீச்சல் அடிக்கச் செய்வது தசைகளை சோர்வடையச் செய்துவிடும்.
 

தனியாகப் பயிற்சி செய்யாமல், குழுக்களாக பயிற்சி செய்யும் போது, குழந்தைகளின் நுண்திறன் வளரும். எடுத்துக்காட்டாக 10 குழந்தைகளை ஓடச்செய்தால்,  ஒருவர் மேல் ஒருவர் இடிக்காமல் அடுத்தவர்களை இடையூறு செய்யாமல் எப்படி ஓடுவது என்று குழந்தைகளின் மூளையும் உடலும் ஒருங்கிணைந்து செயல்படத்தொடங்கும். குழந்தைகளின் சமச்சீர் செயல்பாடும் (Balanced Activity) அதிகரிக்கும்.

காலச்சூழல் காரணமாக ஒரு வீட்டுக்கு ஒரு குழந்தை என்று ஆகிப்போனது. உறவினர்களோடு சேர்ந்து வகிப்பது குறைந்துவிட்டது. எனவே விளையாடும் திறனும், விட்டுக்கொடுக்கும் அறமும் தானாகவே பிள்ளைகளுக்கு வரும் வாய்ப்பில்லை. அனைத்தையும் நாம் தான் கற்பிக்க வேண்டும்.

இந்த உடற்பயிற்சி பகுதியில் குழந்தைகளுக்கான விளையாட்டுகளை நாம் சேர்க்கவில்லை. ஏனெனில் விளையாட்டு வெற்றியைக் குறிக்கோளாகக் கொண்டது. ஆனால் உடற்பயிற்சி, உடல் நலத்தை முதன்மையாகக் கொண்டது. விளையாட்டில் வெற்றி பெற உடற்பயிற்சியே முதல்படி.

 

 

Next Story

கம்ப்யூட்டர் வேலைய விட்டுட்டு கடலைமிட்டாய் விக்கப் போறாராம்! - சந்தேகப்பட்ட உலகம், சாதிக்கும் சாஃப்ட்வேர் எஞ்சினியர்கள்! 

Published on 28/10/2020 | Edited on 31/10/2020
kadalaimittai

 

 

தனது சொந்த ஊரை பிரிந்து இன்னொரு நகரத்திலோ, நாட்டிலோ பணி நிமித்தமாக வாழ்பவர்கள் ஒவ்வொருவருமே தனது ஊரை மிஸ் பண்ணுவார்கள். அப்படி மிஸ் பண்றதுக்கான காரணங்கள் என்னென்ன? ஊர்... ஊரிலிருக்கும் உறவுகள்... அடுத்ததா, ஊருக்கே உரிய உணவுகள். உண்மைதான், இப்போதும் ஊருக்கு சென்று வரும் ஒருவர் தன் ஊரின் ஸ்பெஷல் உணவு/இனிப்பை அலுவலக நண்பர்களுக்கு வாங்கி வர வேண்டுமென்பது எல்லா அலுவலகங்களிலும் எழுதப்படாத விதி. உணவு சம்மந்தமாக இன்னும் நூறு யூ-ட்யூப் சேனல்கள் தொடங்கப்பட்டாலும் மில்லியன் வ்யூஸ் கொடுக்க ரெடியாக இருப்பவர்கள் நம்மவர்கள். இப்படி, உணவோடு உணர்வுபூர்வமான உறவு கொண்ட பெருமைமிகு 'ஃபுட்டி'க்கள் (foodies) நம் மக்கள். இப்படிப்பட்டவர்களுக்கு, வரப்பிரசாதமாக ஒரு வெப்சைட் இருக்கிறது. 'நேட்டிவ் ஸ்பெஷல்' (www.nativespecial.com) தான் அது. உள்ளே சென்று பார்த்தால், சுரக்கும் எச்சிலில் லேப்-டாப்/மொபைல் ஃபோன் நனைந்துவிடும், உருவாகும் கூஸ்பம்ப்ஸில் உடம்பு சிலிர்க்கும். திருநெல்வேலி அல்வா, திருவில்லிப்புத்தூர் பால்கோவா, கருப்பட்டி மைசூர்பாக், கரூர் தேங்காய் மிட்டாய்... என நீண்டுகொண்டே போகிறது ஸ்வீட் லிஸ்ட். நீங்கள் எந்த நாட்டில் இருந்தாலும் உங்கள் ஊர் பண்டத்தை அதே ருசியோடு, அதே தயாரிப்பாளர்களிடம் வாங்கி அனுப்புகிறார்கள். எவ்வளவு பெரிய சேவை இது? எங்கு தொடங்கியது இது? தொடங்கியவர்களை தேடிப்பிடித்துப் பேசினோம்.

 

நீங்கள் எந்த நாட்டில் இருந்தாலும் உங்கள் ஊர் பண்டத்தை அதே ருசியோடு, அதே பாரம்பரிய மணத்துடன் ஐந்தே நாட்களில் உங்கள் வசிப்பிடத்தில் ஹோம் டெலிவரி செய்கிறார்கள். எவ்வளவு பெரிய அசாத்தியச்  சேவை சங்கிலி இது? எப்படி சாத்தியமாயிற்று? எங்கு தொடங்கியது இது? தொடங்கியவர்களை தேடிப்பிடித்துப் பேசினோம்.


"என்ஜினியர் டிகிரி,  சாஃப்ட்வேர் வேலை, அமெரிக்க பயணம்  என்ற ரெகுலர் நடுத்தர குடும்ப இளைஞர்களின் போக்கில் பயணித்த இளைஞர்கள் என்றாலும் நம் மொழி மற்றும் மண் சார்ந்த சிந்தனையில்  இயல்பாகவே அதிக நாட்டம்  கொண்டிருந்தோம். தூர தேச வாழ்வியல் நமது ஊரின் சிறப்புகளை நிறைய உணர்த்தியிருந்த காலகட்டம். அங்கு அலுவலகத்தில் அனைத்து நாட்டுக்காரர்களும் அவரவர் ஊர் சென்று திரும்பும் பொழுது அவர்களுது ஊரின் உணவுப் பண்டங்களைக் கொணர்ந்து தருவது வழக்கம். அது போல் ஒரு நாள் இத்தாலியில் இருந்து வந்த ஒரு குறிப்பிட்ட பதார்த்தம் அனைவரது கவனத்தையும் ஈர்த்து மிகுந்த வரவேற்பினைப் பெற்றது.  சரி நாமும் முயற்சி செய்து பார்க்கலாம் என்று ருசித்துப் பார்த்தால் அது நம்ம ஊர் தேங்கா மிட்டாய்தான்.  அந்த குறிப்பிட்ட தருணத்தில் சிறு புள்ளியாக துவங்கிய சிந்தனைதான் பிறகு இந்தியா திரும்பியதும் நேட்டிவ் ஸ்பெஷல் என முழுமைப் படுத்தப்பட்டு நண்பர்களுடன் சேர்ந்து செயல்படத் துவங்கியது.

வணிக ரீதியான தொழில் சார்ந்த சிந்தனை அடிப்படை இல்லாமல் நம்ம ஊர் பாரம்பரிய பண்டங்களுக்கு ஒரு பொருளாதார அடிப்படையினை உருவாக்க வேண்டும் அதனைச் சார்ந்து இருக்கும் நம்ம ஊர் கிராமத்து உற்பத்தியாளர்களுக்கு ஒரு வாய்ப்பாக அது அமைய வேண்டும் என்ற சிந்தனையில் செயல்படத் துவங்கியதால் லாபத்தினை பெரியதாகக் கொள்ளாமல் வருமானம் இல்லாத போதிலும் தொடர்ந்து இதில் செயல்படத் துவங்கினோம்.  வேலை செய்து கொண்டே இதனைச் செய்ததால் வார இறுதி நாட்களில் தமிழகம் முழுக்க பயணிப்பது,  மாலை நேரங்களில் வரும் ஆர்டர்களை அனுப்புவது என மூன்று ஆண்டுகள் எந்த ஒரு பொழுது போக்கும் இன்றி இதற்காகவே இயங்கினோம்.  வருமானம் இல்லை என்றாலும் இப்படி ஒரு பிளாட்பார்மினை நிறுவுவது நம்ம ஊர் பாரம்பரிய உற்பத்தியாளர்களுக்கு எவ்வளவு உறுதுணையாக இருக்கும் என்ற சிந்தனை ஒன்று மட்டுமே எம்மை உந்தித் தள்ளியது" என தங்களது அனுபவத்தினை சிரித்த முகத்துடன் பகிர்ந்தனர் அதன் இயக்குனர்கள்.

 

 

murukku

 

 

பிறர் எண்ணத் துணியாததையும், எண்ண மட்டுமே துணிவதையும் செய்பவர்கள்தானே சாதிக்கிறார்கள்?  2015 வரை இப்படித்தான் அவர்களின் தொழில்முயற்சி தொடர்ந்தது. ஏற்கனவே  வாங்கிய வாடிக்கையாளர்கள் மீண்டும் மீண்டும் ஆடர் செய்தது, இவர்களுக்கு மேலும் ஊக்கத்தை அளித்தது.

 

இன்னும் இதனை வீரியமாக முன்னெடுக்க 'இதை முழு நேரத் தொழிலாக செய்தால் என்ன?' என்ற கேள்வி எழும்ப அதற்கான முயற்சிகளைத் துவங்கினர். "மெல்ல குடும்பத்தாருடன் இதனைப் பகிரத் துவங்கினோம் இப்பொருளினை ஆன்லைனில் விற்க முடியும்  என்பதை  யாரும்  நம்பவில்லை. அவர்களுக்கு அது புதிதாக இருந்தது. ஆனாலும் நாங்கள் ஏற்கனவே பார்ட்-டைமாக இதை செய்யும்போது ஒரு சின்ன நம்பிக்கையை உருவாக்கியிருந்ததால் யாரும் தடுக்கவோ எதிர்க்கவோயில்லை."

 

மெல்ல 'நேட்டிவ் ஸ்பெஷல்'லில் விற்கப்படும் பண்டங்களின் எண்ணிக்கை வகைகளை அதிகரித்தனர். ஒவ்வொரு பண்டத்தையும் சேர்க்கும் முன் அவர்கள் செய்யும் களப்பணி ஆச்சரியப்பட வைக்கிறது. "மணப்பாறை முறுக்கு வாங்க மணப்பாறை போய் இறங்கினோம். முறுக்கு செய்றவங்க 200 பேருக்கு மேல இருந்தாங்க. அதுல நாம எதிர்பாக்குற தரத்தை யார் தருவாங்கன்னு தேர்ந்தெடுக்குறதுதான் நம்ம பிஸினஸோட முக்கிய பகுதி. ஒவ்வொரு ஐட்டம் புதுசா சேக்குறதுக்கு முன்னாடி நிறைய வேலை பாக்குறோம்.  அதனால் குவாலிட்டியில் எந்தக் குறையும் வராமல் பார்த்துக்க முடியுது" என்று ஊர் ஊராக சுற்றி உணவு வகைகளை சுவைத்த கதை சொல்கிறார்கள்.
 

 

srivilliputhoor palkova

 

"நிறைய டிராவல் பண்ணோம். எல்லா ஊரும் சுத்தினோம்... ஒவ்வொரு ஊரிலும் ஒவ்வொரு சுவை... கிடைச்ச பொருளை, இவ்வளவு தூரம் கொண்டு சேர்க்கணும்னா, அதை அவர்களது வழக்கத்தை விட அதிகமான தரத்தில் செய்யணும். அதுக்கு நிறைய பேர் ஒத்துக்க மாட்டாங்க. 'இவ்வளவு மெனக்கிட்டு தயார் செய்வது கஷ்டமாச்சே?'னு சிலர் தயங்குவாங்க. சிலர் ரொம்ப ஆர்வமாகி அவுங்களே ஆராய்ச்சி பண்ணி பல வகைகள் அனுப்புவாங்க. நாங்க எதிர்பார்க்குற உயர்ந்த தரத்துக்கு ஒத்துக்கொள்பவர்களைத்தான் செலக்ட் பண்ணுறோம். கன்னியாகுமரில சுட்ட முந்திரின்னு ஒரு ஐட்டம் இருக்கு, வெள்ளியணைல அதிரசம். மணல்மேடு முறுக்குன்னு ஒரு ஐட்டம். ஒரு காலத்துல கிராமம் முழுக்க அதுதான் தொழில். ஆனா, நாங்க போனப்போ ஒரே ஒருத்தர்தான் அதை செஞ்சார். அவர்கிட்ட வயசான நாலுபேர்தான் வந்து செஞ்சு கொடுத்தாங்க. முதலில் பயந்தார். நாங்க நம்பிக்கை கொடுத்து செய்யச் சொன்னோம். இப்போ இன்னும் கொஞ்ச பேர் வந்து செய்றாங்க. அழிவின் விளிம்பில் இருந்த, தன்னை அடுத்த காலத்துக்கு நகர்த்திக்கொள்ள முடியாத பல உணவுப்பொருட்கள் போயிருச்சு. அதுல சில விஷயங்களை நாங்க மீட்டோம் என்பது பெரிய திருப்தி" என்று அவர்கள் சொல்லும்போது நாம் அறியாத இந்தத் தொழிலின் பரிமாணம் விரிந்தது.

 

வெளிநாடு வரை சுவையைக் கொண்டு சேர்ப்பது சரி... தரத்தையும் சிந்தாமல் சிதறாமல் சென்றடைவதையும் எப்படி உறுதி செய்கிறார்கள்?

"பேக்கிங்ல அமெரிக்காவின் ஸ்டாண்டர்டில் அதிக பட்ச தரத்தை கடைபிடிக்குறோம், அதே தரத்தில்தான் இந்தியாவுக்கும் பண்றோம். ஆரம்பத்தில் முறுக்கு உடைந்து தூள் தூளாகப் போய் சேர்ந்திருக்கு. பஞ்சாமிர்தம் கீழே ஊத்தியிருக்கு... இப்படி சில தவறுகள். ஒரு முறை மும்பைல இருந்து ஒரு ஆடர். தனது கணவரின் பிறந்தநாளுக்காக விருந்தினர்களுக்குப் பஞ்சாமிர்தம் கொடுக்கவேண்டுமென்று ஆசை ஆசையாக ஆடர் பண்ணாங்க ஒரு அம்மா. ஆனா, எதிர்பாராவிதமா பஞ்சாமிர்தம் பேக்கிங் உடைஞ்சு ஊத்திருச்சு. முதலில் மனைவி கூப்பிட்டு புகார் செஞ்சாங்க, ரொம்ப கோபமாகப் பேசுனாங்க. எங்களுக்கு ரொம்ப கஷ்டமாயிடுச்சு. ஆனா பின்னாடியே கணவர் கால் பண்ணி, 'இது இவ்வளவு தூரம் வந்ததே பெரிய விஷயம். நீங்க ஆரம்ப கட்டத்தில் இருக்கீங்கன்னு தெரியும். அதுனால, என் மனைவி சொன்னதை வச்சு எதுவும் முடிவுக்கு வந்துறாதீங்க. இன்னும் நல்லா பண்ணுங்க..." என்று கூறி ஊக்கப்படுத்தினார். எங்களுக்கே அது புதுசா இருந்தது. அதன் பிறகு பேக்கிங்கில் சின்ன தவறு கூட நடக்கக்கூடாது என்பதில் மிக கவனமா இருக்கோம்.

 

ஒவ்வொரு முறையும் கஸ்டமர்கள் தந்த ஃபீட்பேக்தான் எங்களை நகர்த்தியது. UKயில் இருந்து ஒரு பெண்மணி பேசுனாங்க. 'இரவு 12 மணி, லேட் ஆய்டுச்சுன்னு தெரியும், இருந்தாலும் நாளைக்கு தள்ளிப்போட வேண்டாமென்று கூப்பிட்டேன். 30 வருஷமா நாங்க இங்க செட்டிலாகிட்டோம். இதை கண்ல பார்த்ததே பெரிய விஷயம். இளந்தவடை என்று ஒரு தின்பண்டம் இருக்கிறதென்பதே என் பொண்ணுக்கு தெரியாம போயிடுமோன்னு நெனச்சேன். உங்க மூலமா எங்க பொண்ணு அதை சுவைச்சுட்டா'ன்னு ரொம்ப நெகிழ்ச்சியா பேசுனாங்க. இப்படி பல அனுபவங்கள்" என்று ஸ்வீட்க்கொரு செண்டிமெண்ட் சைட் இருப்பதை நமக்கு உணர்த்தினார் பாஸ்கரன்.

 

native sweets

 

பேசப்பேச நமக்கு நாவூறியது. 'நேட்டிவ் ஸ்பெஷல்.காம்'மின் டாப் - 5 உணவுப்பண்டங்கள் என்னவென்று கேட்டோம். "திருநெல்வேலி அல்வா, திருவில்லிப்புத்தூர் பால்கோவா இரண்டும் எப்போதும் டாப். கருப்பட்டி மைசூர்பாக்ன்னு ஒரு ஐட்டம் எமது முயற்சியில் நமது பாரம்பரிய கருப்பட்டியினைக் கொண்டு ஒரிஜினலாக கொண்டு வந்தோம், எல்லோருக்குமே பிடித்த ஐட்டம் இது. சின்ன வெங்காய முறுக்கு... பீட்பேக், விற்பனை இரண்டிலும் டாப். இவை தவிர அவ்வப்போது ஒவ்வொரு பண்டம் முன்னிலையில் இருக்கும்" என்று பெஸ்ட் செல்லர் லிஸ்ட் சொன்னார்.

 

கடைசியாக ஒரு கேள்வி மனதில் இருந்தது. ஐடி வேலையை விட்டுட்டு பிசினஸ் பண்றேன், விவசாயம் பண்றேன் என்பது ஒரு ஃபேஷன் மாதிரி ஆகிவிட்டது. உண்மையில் எப்படி உணர்கிறார்கள் இவர்கள்? கேட்டுவிட்டோம்... "எமது ஐடி நண்பர்களில் எம்மை விட அதிகம் சம்பாரிப்பவர்களும் இருக்காங்க, இன்னும் இந்த அளவுக்கு வராதவங்களும் இருக்காங்க. ஆனால், ஒரு விஷயம். எங்கள் நண்பர்களை சந்திக்கும்போது, அவர்களிடம் பேசும்போது, 'ஸ்ட்ரெஸ்' என்ற வார்த்தையை அடிக்கடி கூறாக கேள்விப்படுகிறோம். ஆனால், எங்களுக்கு அந்த வார்த்தை பொருந்தாது. ஞாயிற்றுக்கிழமையிலும் கூட அலுவலகம் வந்துவிடுவோம். வருமானம் குறைவுதான் என்றாலும் நம் சமூகம் சார்ந்த நலன் பயக்கும் நோக்கத்துடன் செயல்படுவதால் மிகுந்த ஊக்கத்துடன் செயல்படுகிறோம்" என்றனர் திருப்தியுடன். எல்லோரும் இப்படி முயற்சியில் ஈடுபட முடியாது. ஒவ்வொருவர் வாழ்க்கையும் வெவ்வேறு. நாம என்ன செய்யலாம்? 'நேட்டிவ் ஸ்பெஷல்.காம்'மில் (www.nativespecial.com) ஆடர் செய்து 'ஸ்வீட் சாப்பிடுவோம், ஸ்ட்ரெஸ்ஸை மறப்போம்'. நம்மிடம் மிகுந்த உற்சாகத்துடன் பகிர்ந்த ’நேட்டிவ் ஸ்பெஷல்’ இயக்குனர்கள் பார்த்திபன், பாஸ்கரன் மற்றும் செல்வகுமார் ஆகியோரை வாழ்த்துவோம். 

 

   

Next Story

சாம்பிராணினா சும்மா இல்ல! 20 நாடுகளை கலக்கும் 2 தமிழர்களின் சக்ஸஸ் கதை!

Published on 28/09/2020 | Edited on 06/11/2020
srimathi sambrani jk muthu

ஆரம்பம்...

 

"ஒரு நாள் எங்க வாத்தியார் ஒருத்தர் கூப்பிட்டுக் கேட்டார், 'தம்பி டேய்... நீ பிசினஸ் பண்றியாடா?'ன்னு. அப்போதான் தோனுச்சு, 'ஓஹோ... நாம பண்றதுக்கு பேர்தான் பிசினஸ்ஸா'ன்னு" என்று சொல்லி மனம் விட்டு சிரிக்கிறார் ஜே.கே.முத்து. பிசினஸ் என்ற வார்த்தை தெரியும் முன்பே, தான் பத்தாம் வகுப்பு படிக்கும்போதே தொழில் செய்யத் தொடங்கி, இன்று தனது தயாரிப்பை  இருபதுக்கும் மேற்பட்ட நாடுகளுக்கு ஏற்றுமதி செய்கிறார். வடஇந்தியாவில் இவரது ப்ராண்ட்தான் முன்னணியில் இருக்கிறது. இவரது பகுதியில் உள்ள சுய உதவிக் குழுக்களை சேர்ந்த பெண்களையும் தயாரிப்புப் பணிகளில் ஈடுபடுத்துவதன் மூலமாக அவர்களுக்கு வேலைவாய்ப்பு அளிக்கிறார்கள்.

 

srimathy stall

 

 

அப்படி என்ன தயாரிக்கிறார்கள்? சாம்பிராணி! நாம் சாதாரணமாக நினைக்கும் சாம்பிராணியின் உலக அளவிலான வர்த்தகம் மிகப்பெரியது. அதில் பெரும் நிறுவனங்கள் ஈடுபட்டுள்ளன. அவர்களுக்கெல்லாம் 'டஃப்' கொடுக்கிறார்கள் இரண்டு தமிழர்கள். ஜே.கே.முத்து  - சம்பத்குமார் ஆகிய இரு மதுரை நண்பர்கள்தான் தங்களது 'கமலம் க்ரூப் - டோன் டீலிங்ஸ் ப்ரைவேட் லிமிட்டட்' நிறுவனத்தின் தயாரிப்பான 'ஸ்ரீமதி சாம்பிராணி மற்றும் அகர்பத்திகள்' மூலம் தமிழகம் மட்டுமல்லாமல் வடஇந்தியாவையும் மணக்கச் செய்கிறார்கள். இவர்களது தயாரிப்புகளுக்கு வடஇந்தியாவில் நல்ல வரவேற்பு. பல மாநிலங்களின் முக்கிய பிரமுகர்கள் இவர்களை அழைத்துப் பேசிப் பாராட்டி இருக்கிறார்களாம். “நாங்க எங்களோட வெப்சைட்ல நேரடியா எங்க மொபைல் நம்பரை கொடுத்திருப்பதால, எங்க கஸ்டமர்ஸ் அடிக்கடி கூப்பிட்டு பேசுவாங்க, பாராட்டுவாங்க. ஒரு முறை சீரடி சாய்பாபா கோவிலின் தலைமை அர்ச்சகரே நேரடியா எனக்கு ஃபோன் பண்ணி, உங்க தயாரிப்பு ரொம்ப நல்லா இருக்குன்னு பாராட்டினார். எம்.பி., எம்.எல்.ஏ, பெரிய அதிகாரிகள் இப்படி பலர் பேசிருக்காங்க. இப்படி வந்த ஃபோன்களில் என்னால் இன்னும் நம்ப முடியாத அளவுக்கு ஆச்சரியம், மகிழ்ச்சி தந்த விசயம், சச்சின் டெண்டுல்கர் மனைவி அஞ்சலி எங்க தயாரிப்புகளை ரொம்ப விரும்பிக் கேட்டு வாங்குவாங்கன்னு எங்க டீலர் சொன்னது. அவர் சொல்லும்போது, முதலில் அஞ்சலின்னா யாருன்னு தெரியாம, சரி சரின்னு பேசிட்டு இருந்தேன். அவர்தான் ‘சச்சின் மனைவிய்யா’ என்று குறிப்பிட்டு சொன்னார். எங்களுக்கு ரொம்ப மகிழ்ச்சியா இருந்தது" என்கிறார்கள் நண்பர்கள்.

 

jkmuthu sampath old pic

ஜே.கே.முத்து  - சம்பத்குமார் (அப்போது)

 

jk muthu sampathkumar

ஜே.கே.முத்து  - சம்பத்குமார் (இப்போது)

 

இப்படி, தங்கள் தரத்தாலும் சரியான வியாபார வியூகத்தாலும் வெற்றியைப் பெற்று, பலருக்கு வேலைவாய்ப்பையும் அளித்து, தங்கள் பயணத்தின் 23 ஆண்டுகளை கடந்திருக்கிறார்கள் இவர்கள். இந்த பிசினஸ் பயணத்தை தனது பதினாறாம் வயதிலேயே, பத்தாம் வகுப்பு படிக்கும்போதே, 1990ஆம் ஆண்டில் தொடங்கிவிட்டார் முத்து. 'டோன் மியூஸிக்கல்ஸ்' என்ற பெயரில் ஆடியோ கேசட் விற்பனை செய்திருக்கிறார். அப்போதுதான் இவரது ஆசிரியர் ஒருவர் இவரிடம் 'நீ பிசினஸ் பண்றியா தம்பி?' என்று கேட்க, 'பிசினஸ்' என்ற வார்த்தை அறிமுகமாகியிருக்கிறது. இவரது ஆர்வத்தாலும், அவர் நடத்தி வந்த ஆடியோ கேசட் வியாபாரத்தாலும் ஈர்க்கப்பட்ட இவரது நண்பர் சம்பத்குமார், 1992ஆம் வருடம் இவருடன் இணைகிறார். இருவரும் இணைந்து, 'டோன் ட்ரானிக்ஸ்' என்ற எலக்ட்ரானிக்ஸ் விற்பனை நிறுவனத்தை தொடங்குகின்றனர். பொருட்களை வாங்கி விற்கும் ஏஜென்சியாக பல வியாபாரங்களை செய்து 2000ஆம் ஆண்டில் ஒரு கட்டத்தில் சாம்பிராணி வியாபாரத்தில் இறங்குகின்றனர். தரமான சாம்பிராணியை நாமே தயாரித்து விற்கலாம் என்ற எண்ணம் ஏற்பட, உருவானதுதான் 'ஸ்ரீமதி சாம்பிராணி மற்றும் அகர்பத்திகள்' என்ற ப்ராண்ட்.

 

"நம்ம வீட்டுக்கு ஒரு பொருளை செஞ்சா எப்படி செய்வோமோ அப்படி செஞ்சு தரணும்னுதான் இந்தத் தயாரிப்பை தொடங்கினோம். அப்படி தரமா செஞ்சா வரவேற்பு இருக்கும்னு நம்புனோம். அதே மாதிரி இருந்தது. ஆரம்பத்துல ரொம்ப கடினமா இருந்தது. தொடர் முயற்சிகள் மற்றும் மெல்ல வியாபார நுணுக்கங்களை கற்றுக்கொண்டது மூலமா இப்போ ஸ்ரீமதி மட்டுமல்லாமல் பாஞ்சஜன்யா, வாசம் உள்ளிட்ட பிராண்ட்களில் எங்கள் தயாரிப்புகள் வருகின்றன. வடஇந்தியாவில் பல மாநிலங்களில் எங்க சாம்பிராணி, ஊதுபத்திதான் நம்பர் 1" என்று பெருமையுடனும் பக்குவத்துடனும் தங்கள் பயணத்தை பகிர்கிறார் ஜே.கே.முத்து.

 

ஒவ்வொரு நாளும் இவர்களது நிறுவனத்தில் பணிபுரிவோர், தயாரிப்புப் பணிகளில் ஈடுபடும் முன் ஒரு உறுதிமொழியை ஏற்கின்றனர். "நம்ம வீட்டுல மனைவியோ அம்மாவோ சமைக்கும்போது சுவை முன்ன பின்ன இருக்கலாம், ஆனால் தரம் குறையாது... வீட்ல சாப்பிட்டு ஒருத்தருக்கு உடம்பு கெட்டுப்போறது பொதுவா நடக்குறதில்ல. அதுக்குக் காரணம், அவுங்க ஆத்மார்த்தமா செய்றாங்க. இந்த கான்செப்ட்டை நாங்க எங்க நிறுவனத்தில் கொண்டு வரணும்னு நினைச்சோம். அதே ஆத்மார்த்தமான உணர்வு நம் தொழிலாளர்களுக்கும் வரணும்னுதான் இந்த உறுதிமொழியை ஏற்கிறோம். இதுக்கு பெரிய எஃபக்ட் இருக்கு..." என்கிறார் முத்து. "எங்கள் தயாரிப்புகளை பயன்படுத்துவோர் ஆக்கப்பூர்வமான எண்ணங்கள் மற்றும் நல்ல ஆரோக்கியத்துடன் செழிப்பாக வாழ வேண்டுமென்று ஆத்மார்த்தமான வேண்டுதலுடன் நான் தயாரிக்கும் என்னிடமிருந்து வெளியாகும் ஒவ்வொரு பொருளும் தரமாகவும் தூய்மையாகவும் இருக்குமென்று உறுதி கூர்கிறேன்" - இதுதான் அவர்கள் ஏற்கும் உறுதிமொழி. வாடிக்கையாளர்கள் மீது இவ்வளவு அக்கறை என்றால், தொழிலாளர்கள் மீதும் அதே அக்கறை காட்டுகிறார்கள். கரோனா காரணமாக லாக்டௌன் அறிவிக்கப்பட்டதிலிருந்து ஒன்றரை மாதம் விடுமுறை கொடுத்து ஊதியமும் வழங்கியுள்ளனர். அது தங்களுக்கு ஆத்மதிருப்தியளித்ததாகக் கூறுகிறார் முத்து.

 

 

 
சாம்பிராணி, பழைய விஷயம்தான். ஆனால் அதில் புதுமையை புகுத்தியிருக்கிறார்கள் இவர்கள். கப் சாம்பிராணி என்ற புதிய வகை சாம்பிராணியை பல ஆய்வுகளுக்கும், முயற்சிகளுக்கும் பிறகு கண்டுபிடித்திருக்கிறார்கள். மதுரையில் நடந்த கண்காட்சிகளில் மக்களுக்கு இலவசமாக விநியோகித்திருக்கிறார்கள். ஆனாலும் ஆரம்பத்தில் பெரிய வரவேற்பில்லையாம். இருந்தாலும் தொடர்ந்து முயன்றதில் வடஇந்தியாவிலும் ஏற்றுமதி சந்தையிலும் வரவேற்பு கிடைத்திருக்கிறது. இவர்கள் கண்டுபிடித்த இந்த 'கப் சாம்பிராணி' வகையை பலரும் தயாரிக்க ஆரம்பித்திருக்கிறார்கள். இவர்கள் காப்புரிமைக்கு விண்ணப்பித்திருந்ததால், அப்படி தயாரிப்பவர்களுக்கு நோட்டிஸ் அனுப்பி தடுத்திருக்கிறார்கள். பின் ஒரு கட்டத்தில் 'இந்தத் தொழிலை செய்பவர்கள் பெரும்பாலும் குடிசைத் தொழிலாகத்தான் செய்கிறார்கள். அவர்கள் தொழிலை தடுத்து நாம் என்ன சாதிக்கப்போகிறோம்?' என்ற கேள்வி தோன்ற, அந்த நடவடிக்கைகளை கைவிட்டிருக்கிறார்கள்.

 

    
இவர்களின் மனிதாபிமானத்தை பெருநிறுவனங்கள் பயன்படுத்திக்கொண்டன. இதே வகை சாம்பிராணிகளை அவர்களும் தயாரித்து விற்கிறார்கள். ஆனால், முத்து - சம்பத் இருவரும் அதைப் பற்றிக் கவலைப்படாமல் தங்கள் அடுத்த கட்ட முன்னேற்றத்தை நோக்கிச் சென்றனர். அது, தங்கள் 'பிராண்டை' வலிமைப்படுத்துவது. எத்தனை கப் சாம்பிராணிகள் இருந்தாலும் 'ஸ்ரீமதி சாம்பிராணி', ’ஸ்ரீமதி அகர்பத்தி' வேண்டும் என்று மக்கள் கேட்டு வாங்குமாறு செய்யவேண்டும் என்று அதை நோக்கி உழைத்தனர். அதை சாதிக்கவும் செய்தனர். இவர்கள் அறிமுகம் செய்த கப் சாம்பிராணியால் இன்சென்ஸ் இண்டஸ்ட்ரி என்றழைக்கப்படும் ஊதுபத்தி, சாம்பிராணி உள்ளிட்ட பொருள்களின் மொத்த சந்தை மதிப்பில் சாம்பிராணியின் பங்கு அதிகரித்திருக்கிறது. வர்த்தக உலகில் இது மிகப்பெரிய தாக்கம். அவர்கள் செயல்படுத்திய யுக்திகள் எல்லாம் உலகத்தரமான மேலாண்மை கல்வி நிறுவனங்களில் படித்த, பெரும் பன்னாட்டு நிறுவனங்களில் பணிபுரியும் பிசினஸ் வல்லுனர்கள் செய்வது. புதிய தொழில்முனைவோருக்குப் பாடங்கள்... அப்படி என்ன யுக்திகள்? அடுத்த பகுதியில் பார்ப்போம்... 

கட்டுரையின் தொடர்ச்சி...

இந்தியாக்காரங்களே இப்படித்தான்னு சொன்னாங்க... கோபம் வந்தது! - 20 நாடுகளை கலக்கும் 2 தமிழர்களின் சக்ஸஸ் கதை! #2