Skip to main content

மெடிட்டரேனியன் டயட் என்றால் என்ன?- ஊட்டச்சத்து நிபுணர் கிருத்திகா தரண் விளக்கம்

Published on 28/08/2023 | Edited on 28/09/2023

 

Kirthika Tharan - diet tips - mediterranean diet

 

புதிதாக ஒரு டயட் முறையைப் பற்றி  ஊட்டச்சத்து நிபுணர் கிருத்திகா தரண் நமக்கு அறிமுகப்படுத்துகிறார்

 

உலகில் மிக ஆரோக்கியமான டயட் முறை எது என்பது குறித்த சந்தேகம் ஆராய்ச்சியாளர்களுக்கு வந்தது. இதனால் 7000 பேரை வைத்து ஒரு ஆராய்ச்சியை நடத்தினார்கள். அவர்களுக்கு உடல் ஆரோக்கியம் மேம்பட்டதை அவர்கள் கண்டுபிடித்தனர். அவர்கள் பரிசோதனை செய்து பார்த்தது மெடிட்டரேனியன் முறையைத் தான். இந்த முறையில் நட்ஸ், பழங்கள், காய்கறிகள், முழு தானியங்கள், இனிப்பான பழங்கள், சிக்கன், முட்டை, வெண்ணெய், சீஸ் ஆகியவற்றை சேர்த்துக்கொள்வார்கள். 

 

இதில் சர்க்கரை சேர்க்கப்படுவதில்லை. அதற்கு பதிலாக தேன் சேர்த்துக்கொள்ளலாம். இயற்கையான முறையில் கிடைக்கும் இறைச்சியை மட்டுமே அவர்கள் பயன்படுத்துகிறார்கள். உணவில் மீன் சேர்த்துக்கொள்ளலாம். துரித உணவுகள் எதையும் எடுத்துக்கொள்ளக் கூடாது. இதை நம்மால் தொடர்ந்து பின்பற்ற முடியும் என்று மருத்துவர்கள் கூறுகின்றனர். கடல் உணவுகளை அதிக அளவில் எடுத்துக்கொள்ளலாம். இதை தினமும் நம்மால் பின்பற்ற முடியும் என்பது தான் இதன் சிறப்பு அம்சம். 

 

சுத்திகரிக்கப்பட்ட கோதுமையை நாம் பயன்படுத்தக் கூடாது. இந்த உணவு முறையை முழுக்க முழுக்க இந்தியத் தன்மைக்கு மாற்றுவது சற்று கடினம். பாரம்பரியமான இந்தியப் பழங்கள் ஆரோக்கியமானவை. உடல் உழைப்பு இப்போது அதிகம் நமக்கு இல்லை என்பதால் கார்போஹைட்ரேட் அதிகம் தேவைப்படுவதில்லை. இதனால் முழு தானியங்கள், கடல் உணவுகள், நட்ஸ் ஆகியவற்றை நாம் அதிக அளவில் எடுத்துக்கொள்ளலாம். கொழுப்புள்ள மீன், நண்டு, இறால் ஆகியவற்றை உண்ணலாம்.

 

உணவில் தயிர் சேர்த்துக்கொள்ளலாம். சிறுதானியங்கள், சிவப்பு அரிசி ஆகியவற்றை எடுத்துக்கொள்ளலாம். பட்டாணி, பருப்பு வகைகள் ஆகியவற்றை நாம் உணவில் சேர்த்துக்கொள்ளலாம். அதிகமான இனிப்புள்ள பழங்களை எப்போதாவது தான் நாம் உணவில் சேர்த்துக்கொள்ள வேண்டும். மெடிட்டேரியன் டயட் என்பதை இந்திய முறைக்கு நாம் மாற்றிப் பயன்படுத்த வேண்டும். இதன் மூலம் உடல் பருமன் நிச்சயம் குறையும். குழந்தைகளுக்கும் இந்த உணவு முறை மிகவும் நல்லது. மருத்துவ உலகத்தால் அங்கீகரிக்கப்பட்ட ஒரு நல்ல உணவு முறை தான் இது.

 

 

 

Next Story

வாழ்க்கை முறையில் ரத்த அழுத்தம் வராமல் எப்படித் தடுப்பது? - மருத்துவர் ராஜேந்திரன் விளக்கம்

Published on 23/07/2024 | Edited on 23/07/2024
Dr. Rajendran explained prevent blood pressure

ரத்த அழுத்தத்தை வாரமல் தடுக்க அன்றாட வாழ்க்கை முறையை எப்படி கையாளலாம் என்பது பற்றி ஓய்வு பெற்ற அரசு மருத்துவமனை மருத்துவர் ராஜேந்திரன் நம்மிடம் விளக்குகிறார். 

அன்றாட வாழ்க்கையில் நாம் செய்ய வேண்டிய காரியங்களை முன்கூட்டியே பிளான் பண்ணி லிஸ்ட் போட்டு அதுக்கேற்றார் போல் செய்தால் அந்த விஷயத்தை முழுமையாக நிறைவேற்ற முடியாவிட்டாலும், ரத்த அழுத்தம் வராமல் பார்த்துக்கலாம். உடற்பயிற்சி, தேவையான அளவு தூக்கம் மிக மிக முக்கியம். இதை செய்யும் போது நமது மூளை புத்துணர்ச்சிக்குள்ளாகிறது. தூக்கம் வரவில்லையென்றால், தூக்க மாத்திரையை தேடாமல் நல்ல புத்தகங்களை படியுங்கள். தூக்க மாத்திரைகளை உட்கொண்டால், அது அடிக்சன் ஆகிவிடும். அதனால், கூடுமான வரையிலும் தூக்க மாத்திரைகளை தவிர்ப்பது நல்லது. நடைபயிற்சி, மூளை பயிற்சி, யோகா, தியானம், நல்ல புத்தகங்களை படிக்கும் போது தான் மூளைக்கு ஓய்வு கொடுக்கும். 

காலையில் இருந்து மாலை வரை தொடர்ச்சியாக ஒருவர் வேலை செய்துவிட்டு அதிலிருந்து விடுபட நல்ல இசையை கேட்கலாம், நல்ல புத்தகங்களை படிக்கலாம்,  வீட்டுக்கு தேவையான பொருட்களை வாங்கலாம். காலையில் இருந்து மாலை வரை வேலை செய்த மூளையினுடைய அந்த பகுதிக்கு இதன் மூலம் ஓய்வு கொடுக்கனும். இதுதான் உண்மையான ஓய்வு. அதைவிட்டு, தூக்க மாத்திரைகளை உட்கொண்டு தூங்கிட்டு இருந்தால், உடன் சோர்வு நீங்குவது என்பது கஷ்டமா இருக்கும். கடுமையாக வேலை பார்த்துவிட்டு சோர்வாக இருந்து தூங்க நினைக்கும் போது, டிவியில் பிடித்த நிகழ்ச்சியை பார்த்தால் உடனே உங்கள் தூக்கம் எல்லாம் காணாமல் போவதை நீங்கள் உணர்ந்திருக்கிறீர்கள். இதற்கு காரணம் என்னவென்றால், இதுவரை ஸ்ரெயின் ஆகிகொண்டிருந்த மூளையினுடைய அந்த பகுதி ஸ்விட்ச் ஃஆப் பண்ணியிருக்கிறோம். அதற்கு பதிலாக, இன்னொரு பகுதியை ஸ்விட்ச் ஆன் பண்ணி வச்சிருக்கிறோம். இப்படி செய்யும் போது உடலும், மனசும் மனநிறைவாக இருக்கும். இப்படி, உடலுக்கும் உள்ளத்துக்கும் பயிற்சிகள் கொடுக்கும் போது கண்டிப்பாக அந்த மன அழுத்தத்தை குறைக்கலாம். 

அடுத்ததாக உணவு வகைகள் என்பது மிக மிக முக்கியமானவை. அதிகளவு ரத்த அழுத்த நோயாளிகள்,  அவர்களுடைய மருத்துவர்கள் அறிவுறுத்தலின்படி உணவு பழக்கத்தை மாற்றிக்கொள்ளலாம். எண்ணெய் வகைகள், கொழுப்பு சத்து பொருட்கள், அதிகளவு உப்பு ஆகிய உணவுகளை குறைத்துக்கொள்ள வேண்டும். எப்போதெல்லாம் உப்பு வகையான உணவுகளை அதிகமாக சாப்பிடுகிறோமோ அப்போதெல்லாம் தண்ணீர் அதிகமாக குடிப்போம். அந்த உப்பும், தண்ணீரும் சேரும் போது ரத்த அளவு அதிகமாகி ரத்த அழுத்தம் அதிகமாகுவதற்கான வாய்ப்புதான் அதிகம். எனவே, இது போன்ற உணவு பொருட்களை குறைத்து சாப்பிட வேண்டும். நொறுக்கு தீனி உணவை கொஞ்ச கொஞ்சமாக குறைத்துவிட்டு ஒரேடியாக நிறுத்த வேண்டும்.

அசைவ உணவுகளை சாப்பிடலாம். ஆனால், அந்த உணவுகளில் கொழுப்பு  சத்து உள்ள பகுதிகளை அதிகமாக சாப்பிடக் கூடாது. எண்ணெய்யில் போட்டு பொறித்த மீன் வறுவல், சிக்கன் பிரை, கருவாடு உள்ளிட்ட உணவுகளை தவிர்க்க வேண்டும். சுலபமாக ஜீரணம் ஆகும் உணவுகளை சாப்பிடலாம். நடு ராத்திரியில் சாப்பிடும் பழக்கத்தை தவிர்க்க வேண்டும். இன்றைக்கு 25, 30 வயது இளைஞர்களுக்கு கூட ரத்த அழுத்தம் வருகிறது. இதற்கு அவர்களுடைய வேலையினுடைய சூழ்நிலைதான் காரணம். எனவே ஆகாரம், போதுமான அளவு தூக்கம், உடற்பயிற்சி, டென்சன் இல்லாத வாழ்க்கை இதையெல்லாம் செய்தாலே, அதிகளவு ரத்த அழுத்தத்தை மிதமான அளவில் குறைக்கலாம். மிதமான ரத்த அழுத்த அளவை இல்லாமல் கூட செய்யலாம். 

Next Story

வெப்ப அலை முன்னெச்சரிக்கை; ஓ.ஆர்.எஸ் கொடுக்க ஏற்பாடு

Published on 26/04/2024 | Edited on 26/04/2024
nn

கோடை காலம் தொடங்கிய நிலையில் தமிழகத்தில் வெப்ப அலைக்கான எச்சரிக்கைகளை வானிலை ஆய்வு மையம் அறிவித்துள்ளது. சில நாட்களாகவே தமிழகத்தில் வெயில் செஞ்சுரி அடித்து வருகிறது. இந்தநிலையில் வெட்ப அலை காரணமாக மக்களுக்கு நீர்ச்சத்து இழப்பு ஏற்படுவதை தடுப்பதற்கு ஓ.ஆர்.எஸ் கரைசல் வழங்க பொது சுகாதாரத்துறை உத்தரவிட்டுள்ளது. அனைத்து ஆரம்ப சுகாதார நிலையங்களிலும் போதிய அளவில் ஓ.ஆர்.எஸ் கரைசல் பாக்கெட்டுகள் இருப்பில் வைக்கும்படி உத்தரவு பிறப்பிக்கப்பட்டுள்ளது.

அரசு ஆரம்ப சுகாதார நிலையங்களில் பொதுமக்கள் தாங்களாகவே சென்று இந்த ஓ.ஆர்.எஸ் கரைசலைப் பெற்றுக் கொள்ளலாம் எனவும் கூறப்பட்டுள்ளது. குறிப்பாக விவசாயக் கூலித் தொழிலாளிகள், கட்டுமான தொழிலாளர்கள், சாலையோர வியாபாரிகள் ஆகியோருக்கு இந்தக் கரைசலை விநியோகிக்கவும் முடிவு செய்யப்பட்டுள்ளது.