Skip to main content

ஆளும் வளரணும், அறிவும் வளரணும்! வழியெல்லாம் வாழ்வோம் #10

Published on 04/05/2018 | Edited on 04/05/2018
Valiyellam vaalvom 10

 

கல்வி என்பது என்னவென்பதை ஓர் அறிஞர் இப்படிக் கூறுவார். "கல்வி என்பது உடல், உள்ளம், ஆன்மா ஆகியவற்றின் ஒருமித்த வளர்ச்சி (Integrated Development) என்று". ஆனால் உட்கார்ந்து உணவருந்தக்கூட நேரமில்லாமல் கையேந்திபவன்கள் காளானாய்ப் பெருகிவிட்ட காலத்தில் இந்த மூன்றையும் எப்படி ஒருங்கே, சரியாய், முறையாய் வளர்ப்பது?

உடல்தான் உள்ளம் ஆன்மா அனைத்திற்கும் அடிப்படை. அதனால்தான் திருமூலர், "உடம்பால் அழியின் உயிரால் அழிவர், திடம்படு மெய்ஞானம் தேறவும் மாட்டார்" என்று கூறுவார். எனவே குழந்தைகள் ஞானத்தை, கல்வியைப் பெற வேண்டுமெனில், அவர்களுக்கு உடல் அதிமுக்கியம்.  அதற்கான முக்கியக் காரணியே உடற்பயிற்சி.

 

Students running

 

 


குழந்தைகளுக்கான உடற்பயிற்சிகள்

"ஆளும் வளரணும், அறிவும் வளரணும்
அது தான்டா வளர்ச்சி- உன்னை ஆசையோடு
ஈன்றவளுக்கு அதுவே நீ தரும் மகிழ்ச்சி" 
என்று பட்டுக்கோட்டை கல்யாணசுந்தரம் அவர்கள் பாடியிருப்பார்.

 

 

 

ஆனால், இன்று அறிவு வளர்ச்சி மட்டுமே போதும் என்று தங்கள் குழந்தைகளின் ஆள் வளர்ச்சியைப் பற்றி பெரும்பாலான பெற்றோர் கவலைப்படுவதே இல்லை. இங்கே ஆள் வளர்ச்சி என்று குறிப்பிடுவது எடை அதிகரிப்பு மட்டும் அல்ல என்பதைப் புரிந்துகொள்ள வேண்டும். உடல்-எடை குறியீடு எனப்படும் Body Mass Index (BMI) சரியான அளவில் குழந்தைகளுக்கு இருத்தல் அவசியம். ஆனால், இங்கு சில இடங்களில் ஊட்டச்சத்து குறைபாடான   குழந்தைகளையும், வேறு சில இடங்களில் அதிக எடையுள்ள குழந்தைகளையும் நாம் ஒருங்கே காண முடிகிறது. இந்த இரண்டுமேகுறைபாடுகளே. இதனை சரி செய்ய   உடற்பயிற்சி ஓர் எளிய முறையாகும். குழந்தைகள் பிஞ்சுகள், அவர்களுக்கு என்ன பெரிதாய் உடற்பயிற்சி தேவைப்படும் என்று நினைப்பது நம்மில் பலரிடம் எழும் பொதுவான கேள்வியாகும்.
 

ஏன் வேண்டும் சிறுவர் சிறுமியர்க்கான உடற்பயிற்சி?

முன்பெல்லாம் பொழுதுபோக்கிற்காகவாவது குழந்தைகள் விளையாடினர். இன்றோ வீட்டுப்பாடம், தனிப்பாடப்பயிற்சி, சிறப்பு வகுப்புகள் என்று அவர்களுக்கு போக்குவதற்கே பொழுதில்லாத சூழ்நிலையில் எங்கே பொழுதுபோக்காய் விளையாடுவது? மேலும், இப்போதைய குழந்தைகள் வீடு, பள்ளி, தனிப்பயிற்சி என்று ஏதாவது ஒரு கூரையின் அடியிலேயே குடியிருக்கின்றனர்.   அவர்கள் வெளியே உலாவும் நேரமும் மிகமிகக் குறைவு. பாரதி பாடிய, "மாலை முழுதும் விளையாட்டு" என்று வழக்கப்படுத்திக்கொண்ட காலமெல்லாம் மலையேறிப்போனது. குழந்தைகள் மட்டுமல்ல; பெரியவர்களும் காலையும் மாலையும் வெளிக்காற்றில் உலாவி வருதல் கட்டாயம்.

"காலை மாலை உலாவி  நிதம்
காற்று வாங்கி வருவோரின்
காலைத் தொட்டுக் கும்பிட்டு
காலன் ஓடிப்போவானே" என்று கவிமணி தேசிக விநாயகம் பிள்ளை கூறுவார்.

 

exercise



வெளிக்காற்றை நுகர்தல் அவ்வளவு முக்கியம். ஆனால், பெற்றோரும் என் செய்வர்? இன்றைய மாசுபட்ட சூழலில், ஆக்சிஜன் அளவை விட கார்பன்-மோனாக்ஸைட், கார்பன்-டை-ஆக்ஸைட்களின் விகிதம் அதிகமாகிப் போன சுற்றுச்சூழலில் குழந்தைகளை வெளியில் விடவே பெற்றோர் பயப்படுகின்றனர். அவர்களைக் குறை சொல்லவும் இயலாது. பிறகு இதெற்கெல்லாம் என்ன தீர்வு, எப்படி உடற்பயிற்சிகளை மேற்கொள்வது என்று ஆயிரம் வினாக்கள் நம்முன். அவற்றுக்கெல்லாம் விடை தேடும் முன், இப்போதைய குழந்தைகளை அதிகம் பாதிக்கும் குறைபாடுகள், நோய்கள் ஆகிவற்றை பட்டியலிடலாம்.
 

குழந்தைகளுக்கு ஏற்படும் பொதுவான பிரச்சனைகள்
1. குழந்தைகளின் எடை சார்ந்த பிரச்சனைகள்
2. வளர்ச்சியின்மை 
3. நினைவாற்றல் குறைபாடு போன்றவை.

அன்றாடப் பிரச்சனைகள்
1.   மலச்சிக்கல்
2.   ஒற்றைத்தலைவலி
3.   மன உளைச்சல் போன்றவை.

இவையனைத்தையும் முழுமையாய் சரியாக்கவும் சிலவற்றை சமன் செய்யவும் உதவுவதே உடற்பயிற்சியின் குறிக்கோள். அடுத்த பகுதியில் உடற்பயிற்சிகள், அவற்றின் வகைகள், உடற்பயிற்சியின்போது குழந்தைகள் செய்ய வேண்டியவை மற்றும் தவிர்க்க வேண்டியவை பற்றி காண்போம்.

 

Next Story

மருத்துவமனையில் தீ விபத்து; டெல்லி போலீசார் அதிரடி!

Published on 26/05/2024 | Edited on 26/05/2024
Delhi hospital incident police in action

டெல்லியின் விவேக் விஹார் பகுதியில் உள்ள தனியார் குழந்தைகள் நல மருத்துவமனையில் நேற்று (25.05.2024) இரவு திடீரென தீ விபத்து ஏற்பட்டது. அப்போது மருத்துவமனையில் இருந்த 12 குழந்தைகள் தீக்காயத்துடன் மீட்கப்பட்டு சிகிச்சைக்காக அனுமதிக்கப்பட்டனர். இவர்களில் 7 குழந்தைகள் சிகிச்சைப் பலனின்றி உயிரிழந்தது பெரும் சோகத்தை ஏற்படுத்தியுள்ளது.

அதே சமயம் மற்ற குழந்தைகளுக்கு சிகிச்சை அளிக்கப்பட்டு வருகிறது. இந்த தீ விபத்து தொடர்பான காட்சிகள் இணையத்தில் வெளியாகி அதிர்ச்சியை ஏற்படுத்தியுள்ளது. ஆக்சிஜன் சிலிண்டர்கள் வெடித்ததில் தீ விபத்து ஏற்பட்டதாக முதற்கட்ட தகவல்கள் வெளியாகி உள்ளது. விபத்து சம்பவம் தொடர்பாக டெல்லி போலீசார் வழக்குப்பதிவு செய்து விசாரணை மேற்கொண்டு வருகின்றனர்.

தடயவியல் குழு மற்றும் போலீஸ் டிசிபி ஷஹ்தரா சுரேந்திர சவுத்ரி ஆகியோர் சம்பவ இடத்திற்கு இந்த தீ விபத்து குறித்து விசாரணை நடத்தினர். இந்நிலையில் மருத்துவமனையில் உரிமையாளர் நவின் கிச்சி என்பவரை டெல்லி காவல்துறையினர் அதிரடியாக கைது செய்துள்ளனர். இவர் மருத்துவமனை தொடங்கிய போதே இவர் மீது பாலியல் குற்றச்சாட்டுகள் எழுந்ததாகவும் கூறப்படுகிறது. 

Next Story

படம் பார்த்துவிட்டு பள்ளி மாணவன் செய்த பகீர் சம்பவம்; எச்சரித்து அனுப்பிய போலீசார்!

Published on 02/05/2024 | Edited on 02/05/2024
incident of a school student after watching the film; The police sent a warning

பள்ளி மாணவன் ஒருவன் திரைப்படத்தை பார்த்துவிட்டு காவல் நிலையத்திலேயே வெடிகுண்டு வைத்திருப்பதாக போலீசாருக்கு தகவல் கொடுத்த சம்பவம் வாழப்பாடியில் நிகழ்ந்துள்ளது.

சேலம் மாவட்டம் வாழப்பாடி காவல் நிலையத்தில் வெடிகுண்டு வைக்கப்பட்டு இருப்பதாக நேற்று அவசர அழைப்பு எண்ணான 100க்கு தகவல் ஒன்று கொடுக்கப்பட்டது. இதனால் அதிர்ச்சியடைந்த காவல்துறையினர் வாழப்பாடி காவல் நிலையத்தில் முழுமையாகச் சோதனையிட்டனர். ஆனால் அந்த தகவல் முற்றிலும் போலியானது என்பது சோதனைக்குப் பின் தெரிய வந்தது.

வெடிகுண்டு இருப்பதாக தகவலளித்தது சிறுவன் என்பதால் இது குறித்து போலீசார் விசாரணை மேற்கொண்டனர். விசாரணையில் பேளூரை சேர்ந்த பத்தாம் வகுப்பு படிக்கும் சிறுவன் ஒருவன் அவசர அழைப்பு எண்ணான  100-ஐ தொடர்பு கொண்டு காவல் நிலையத்தில் வெடிகுண்டு இருப்பதாகத் தெரிவித்தது தெரிய வந்தது. அந்த சிறுவனை வாழப்பாடி காவல் நிலையத்திற்கு அழைத்து வந்த போலீசார்  அவனிடம் விசாரணை நடத்தியதில் சில நாட்களுக்கு முன்பு பீஸ்ட் படம் பார்த்ததாகவும் அதில் மாலில் வெடிகுண்டு வைப்பது போன்ற காட்சி இருப்பதை பார்த்து அதேபோல் பயத்தை உருவாக்க காவல் நிலையத்திலேயே வெடிகுண்டு இருப்பதாக தெரிவித்ததாகக் கூறியுள்ளான். பின்னர் அந்த சிறுவனை எச்சரித்த போலீசார் இனி இப்படி நடந்து கொள்ளக் கூடாது என எச்சரித்து அனுப்பி வைத்தனர்.