Skip to main content

சிறுவர்கள் முதல் பெரியவர்கள் வரை ஏற்படும் மனச்சோர்வுக்கு என்ன தான் காரணம்? - டாக்டர் கல்பனா விளக்கம்

Published on 13/10/2023 | Edited on 13/10/2023

 

Dr Kalpana health tips

 

மனச்சோர்வு குறித்த பல்வேறு தகவல்களை டாக்டர் கல்பனா நம்மோடு பகிர்ந்துகொள்கிறார்

 

இன்று குழந்தைகள் முதல் பெரியவர்கள் வரை அனைவரும் டென்ஷன் என்கிற வார்த்தையை அதிகம் பயன்படுத்துகிறார்கள். நிறைய கோபம் வருகிறது என்கிறார்கள். டென்ஷனாவதால் மனச்சோர்வு உண்டாகிறது. பெரியவர்கள் தங்களுடைய குழந்தைகளுக்காகவே வாழ்க்கையை வாழும் வகையில் தான் நம்முடைய சமூக அமைப்பு இருக்கிறது. அதனால் அவர்கள் தங்களுடைய ஆசைகள் அனைத்தையும் ஒதுக்கி வைக்கின்றனர். குறிப்பாக தந்தைக்கு இதனால் அதிக மனச்சோர்வு ஏற்படுகிறது. இதன் காரணமாக அவர்கள் சிகரெட் குடிக்க ஆரம்பிக்கிறார்கள். புகை என்பது மிகவும் ஆபத்தானது.

 

இதனால் பிற்காலத்தில் அவர்களுக்கு பல்வேறு நோய்கள் ஏற்படவும் வாய்ப்பு இருக்கிறது. நீங்கள் உங்களுக்காகவும் நேரத்தை ஒதுக்கிக்கொள்ள வேண்டும் என்று நான் பொதுவாக அனைவருக்கும் அறிவுரை வழங்குவேன். தங்களுக்கான நேரம் என்பது அனைவருக்குமே வேண்டும். அப்போதுதான் மனது லேசாகும். இரண்டு நிமிடம் கண்களை மூடி அமர்ந்திருந்தாலே போதுமானது. குழந்தைகள் பெரும்பாலும் வெளிநாடு சென்றுவிடுவதால் பெற்றோர் இங்கு தனியாக இருக்கின்றனர். குழந்தைகளிடம் வீடியோ கால் மூலமாகத் தான் பேசுகிறார்கள். அந்த நேரங்களில் அவர்களுக்கு மனச்சோர்வு ஏற்படுகிறது. 

 

அப்படியான நேரத்தில் அவர்களுக்கு உடல் பாதிப்பு ஏதேனும் இருக்கிறதா என்பதையும் பரிசோதனை செய்ய வேண்டும். தூக்கமின்மை பிரச்சனையும் அவர்களுக்கு இருக்கும். அவர்கள் உடனே மருத்துவரை அணுக வேண்டியது அவசியம். தேவையான மருந்துகளை எடுத்துக்கொள்ள வேண்டும். மனச்சோர்வு காரணமாக நிறைய தற்கொலைகளும் நடக்கின்றன. வயதான பிறகு தான் உங்களுடைய வாழ்க்கை தொடங்குகிறது. இப்போதுதான் உங்களுக்கு ஒரு வயது ஆகிறது என்று நினைத்துக்கொள்ளுங்கள். மகிழ்ச்சியாக வாழுங்கள். இப்போது நமக்கு அனைத்து விதமான மருத்துவ வசதிகளும் இருக்கின்றன. என்ன பிரச்சனை என்றாலும் உடனடியாக மருத்துவரை அணுகுங்கள்
 

 

 

Next Story

வாழ்க்கை முறையில் ரத்த அழுத்தம் வராமல் எப்படித் தடுப்பது? - மருத்துவர் ராஜேந்திரன் விளக்கம்

Published on 23/07/2024 | Edited on 23/07/2024
Dr. Rajendran explained prevent blood pressure

ரத்த அழுத்தத்தை வாரமல் தடுக்க அன்றாட வாழ்க்கை முறையை எப்படி கையாளலாம் என்பது பற்றி ஓய்வு பெற்ற அரசு மருத்துவமனை மருத்துவர் ராஜேந்திரன் நம்மிடம் விளக்குகிறார். 

அன்றாட வாழ்க்கையில் நாம் செய்ய வேண்டிய காரியங்களை முன்கூட்டியே பிளான் பண்ணி லிஸ்ட் போட்டு அதுக்கேற்றார் போல் செய்தால் அந்த விஷயத்தை முழுமையாக நிறைவேற்ற முடியாவிட்டாலும், ரத்த அழுத்தம் வராமல் பார்த்துக்கலாம். உடற்பயிற்சி, தேவையான அளவு தூக்கம் மிக மிக முக்கியம். இதை செய்யும் போது நமது மூளை புத்துணர்ச்சிக்குள்ளாகிறது. தூக்கம் வரவில்லையென்றால், தூக்க மாத்திரையை தேடாமல் நல்ல புத்தகங்களை படியுங்கள். தூக்க மாத்திரைகளை உட்கொண்டால், அது அடிக்சன் ஆகிவிடும். அதனால், கூடுமான வரையிலும் தூக்க மாத்திரைகளை தவிர்ப்பது நல்லது. நடைபயிற்சி, மூளை பயிற்சி, யோகா, தியானம், நல்ல புத்தகங்களை படிக்கும் போது தான் மூளைக்கு ஓய்வு கொடுக்கும். 

காலையில் இருந்து மாலை வரை தொடர்ச்சியாக ஒருவர் வேலை செய்துவிட்டு அதிலிருந்து விடுபட நல்ல இசையை கேட்கலாம், நல்ல புத்தகங்களை படிக்கலாம்,  வீட்டுக்கு தேவையான பொருட்களை வாங்கலாம். காலையில் இருந்து மாலை வரை வேலை செய்த மூளையினுடைய அந்த பகுதிக்கு இதன் மூலம் ஓய்வு கொடுக்கனும். இதுதான் உண்மையான ஓய்வு. அதைவிட்டு, தூக்க மாத்திரைகளை உட்கொண்டு தூங்கிட்டு இருந்தால், உடன் சோர்வு நீங்குவது என்பது கஷ்டமா இருக்கும். கடுமையாக வேலை பார்த்துவிட்டு சோர்வாக இருந்து தூங்க நினைக்கும் போது, டிவியில் பிடித்த நிகழ்ச்சியை பார்த்தால் உடனே உங்கள் தூக்கம் எல்லாம் காணாமல் போவதை நீங்கள் உணர்ந்திருக்கிறீர்கள். இதற்கு காரணம் என்னவென்றால், இதுவரை ஸ்ரெயின் ஆகிகொண்டிருந்த மூளையினுடைய அந்த பகுதி ஸ்விட்ச் ஃஆப் பண்ணியிருக்கிறோம். அதற்கு பதிலாக, இன்னொரு பகுதியை ஸ்விட்ச் ஆன் பண்ணி வச்சிருக்கிறோம். இப்படி செய்யும் போது உடலும், மனசும் மனநிறைவாக இருக்கும். இப்படி, உடலுக்கும் உள்ளத்துக்கும் பயிற்சிகள் கொடுக்கும் போது கண்டிப்பாக அந்த மன அழுத்தத்தை குறைக்கலாம். 

அடுத்ததாக உணவு வகைகள் என்பது மிக மிக முக்கியமானவை. அதிகளவு ரத்த அழுத்த நோயாளிகள்,  அவர்களுடைய மருத்துவர்கள் அறிவுறுத்தலின்படி உணவு பழக்கத்தை மாற்றிக்கொள்ளலாம். எண்ணெய் வகைகள், கொழுப்பு சத்து பொருட்கள், அதிகளவு உப்பு ஆகிய உணவுகளை குறைத்துக்கொள்ள வேண்டும். எப்போதெல்லாம் உப்பு வகையான உணவுகளை அதிகமாக சாப்பிடுகிறோமோ அப்போதெல்லாம் தண்ணீர் அதிகமாக குடிப்போம். அந்த உப்பும், தண்ணீரும் சேரும் போது ரத்த அளவு அதிகமாகி ரத்த அழுத்தம் அதிகமாகுவதற்கான வாய்ப்புதான் அதிகம். எனவே, இது போன்ற உணவு பொருட்களை குறைத்து சாப்பிட வேண்டும். நொறுக்கு தீனி உணவை கொஞ்ச கொஞ்சமாக குறைத்துவிட்டு ஒரேடியாக நிறுத்த வேண்டும்.

அசைவ உணவுகளை சாப்பிடலாம். ஆனால், அந்த உணவுகளில் கொழுப்பு  சத்து உள்ள பகுதிகளை அதிகமாக சாப்பிடக் கூடாது. எண்ணெய்யில் போட்டு பொறித்த மீன் வறுவல், சிக்கன் பிரை, கருவாடு உள்ளிட்ட உணவுகளை தவிர்க்க வேண்டும். சுலபமாக ஜீரணம் ஆகும் உணவுகளை சாப்பிடலாம். நடு ராத்திரியில் சாப்பிடும் பழக்கத்தை தவிர்க்க வேண்டும். இன்றைக்கு 25, 30 வயது இளைஞர்களுக்கு கூட ரத்த அழுத்தம் வருகிறது. இதற்கு அவர்களுடைய வேலையினுடைய சூழ்நிலைதான் காரணம். எனவே ஆகாரம், போதுமான அளவு தூக்கம், உடற்பயிற்சி, டென்சன் இல்லாத வாழ்க்கை இதையெல்லாம் செய்தாலே, அதிகளவு ரத்த அழுத்தத்தை மிதமான அளவில் குறைக்கலாம். மிதமான ரத்த அழுத்த அளவை இல்லாமல் கூட செய்யலாம். 

Next Story

அல்சரில் இருந்து எப்படி நம்மை தற்காத்து கொள்ள வேண்டும்? - உணர்வு நீக்கியல் மருத்துவ நிபுணர் கல்பனா விளக்கம்

Published on 22/07/2024 | Edited on 22/07/2024
Anesthesiologist Kalpana explains how protect from ulcers

அல்சரை ஆரம்பத்திலேயே கவனிக்காமல் விட்டால் என்ன நடக்கும், அல்சரில் இருந்து எப்படி நம்மை தற்காத்து கொள்ள வேண்டும் ஆகியவற்றை குறித்து உணர்வு நீக்கியல் மருத்துவ நிபுணர் கல்பனா நமக்கு விளக்குகிறார்.

வருமுன் காப்போம் என்பதை பற்றி பேசுவோம். வாழ்க்கையில் எல்லா விஷயமும் வருவதற்கு முன்னாடி தயாராக இருந்தால் அதை காப்பாற்றிக்கொள்ளலாம். இன்றைக்கு நிறைய இளைஞர்களுக்கு அல்சர் வருகிறது. வயிறு எரிச்சல், வயிறு புண் வருவதை நமது உணவு பழக்கம் அதிகப்படுத்தும். இதனால், ரொம்ப ரொம்ப தாங்கமுடியாத வலி வரும். இதற்கு சரியான நேரத்தில் வேளை வேளைக்கு சாப்பிட வேண்டும். 

டியோடினல் அல்சர், காஸ்டிரிக் அல்சர் என இரண்டு வகையான அல்சர் இருக்கிறது. அல்சர் உள்ள ஒரு நபர், சாப்பிட உடன் வயிற்று வலி கம்மி ஆகிவிடும். ஆனால், இந்த டியோடினல் அல்சர் அதிகமாகி, நடு ராத்திரி பயங்கரமான வலியோடு எழுவோம். அந்த வலி 10/10 அளவுக்கு இருக்கும். இதை எப்படி தற்காத்து கொள்ள வேண்டும் என்பதை பார்ப்போம். நமது உணவு பழக்கத்தை மாற்றிக்கொள்ளலாம். நாம் சாப்பிடுற உணவு சீக்கிரம் செரிமானம் ஆகும் உணவை சாப்பிட வேண்டும். நமது வாழ்க்கை முறை மாற வேண்டும். இந்த அல்சர் வருவதற்கு முன்பு, வயிற்று எரிச்சல், வயிற்று வலி போன்ற அறிகுறிகள் தெரியவரும். சில சமயம் மாரடைப்பு வருவது போல் வலி ஏற்படும். இது வரும் போது தண்ணீர் குடித்தாலோ அல்லது தயிர் பருகினாலோ, பயோடிக் பானங்கள் குடித்தாலோ வலி கம்மி ஆகும்.

அதிகளவு மன அழுத்தம், காபி போன்ற பானங்கள், காரமான உணவுகள் போன்றவற்றை பயன்படுத்தினால் தான் இந்த அல்சர் வருகிறது. சில பேருக்கு கோதுமை சப்பாத்தி சாப்பிட்டால் வயிற்று எரிச்சல் வரும். நிறைய பேருக்கு இது அல்சராக இருக்க வேண்டும் என்ற அவசியம் இல்லை. ஆரம்பக்கட்டத்திலேயே அல்சர் வராது. வயிற்று பகுதியில் சில இடங்களில் வீக்கம் இருக்கும், அது தான் வயிற்று எரிச்சலுக்கான காரணம். அந்த அசிட்டிட்டியை நடுநிலைப்படுத்தினால், வலி கம்மி ஆகிடும். அதற்கு தான் ஜெலுசில் போன்ற மருந்தை நாம் குடிப்போம். 

வலி எல்லோருக்கும் இருக்கும். ஆனால், அந்த வலியினால் நாம் பாதிப்படையுறோமா, இல்லையா என்பது நம் கையில் தான் இருக்கிறது. அதற்கான மருத்துவம் எடுத்துக்கலாம். அதை தடுப்பதற்கான யுக்திகளை கையாளுவதை நாம்தான் பார்த்துக் கொள்ள வேண்டும். இந்த அல்சரை சரிசெய்யவில்லை என்றால், அது நாள் ஆக ஆக சிலசமயம் புற்று நோயாக மாறுவதற்கான வாய்ப்பும் உண்டு. அதனால், இது வருவதற்கு முன்னாடியே நாம் காப்பாற்றிக்கொள்வது நல்லது. இந்த அல்சரால், புளிச்ச ஏப்பம் போன்றவை வரும். ஒரு பொது இடத்தில் இந்த மாதிரி ஏப்பம் விட்டால், சங்கடமான நிலை ஏற்படும். இதனால், வெளியே செல்வதற்கே பயம் ஏற்பட்டு மன அழுத்தம் ஏற்படும். இதற்கான வழி என்னவென்றால், நமது உணவு பழக்கத்தை மாற்றிக்கொள்ளம்லாம். நமக்கு ஒவ்வாத விஷயங்களை நாம்தான் கண்டுபிடிக்க வேண்டும். சரியான நேரத்தில் சாப்பிட வேண்டும். வலி மாத்திரை சாப்பிடுகிறோம் என்றால் அதுவும் அல்சரில் கொண்டு சேர்க்கும். வலிக்கான மாத்திரைகளை நீங்களே முடிவு செய்து வெளியே வாங்கி சாப்பிடுவதை கண்டிப்பாக தவிர்க்க வேண்டும். 

இது போன்ற அல்சர் இருக்கும் போது ஒரு மன உளைச்சலில் கொண்டு சேர்க்கும். மன அழுத்தம் போன்றவற்றை தவிர்க்க வேண்டும் என்றால், ஒழுங்குமுறையான உணவு பழக்கத்தை கொண்டு வர வேண்டும். உணவு என்பது மிக மிக முக்கியமான விடயம். அந்த உணவை எப்படி, எந்த நேரத்தில் சாப்பிடுகிறோம் என்பதில் தான் இந்த அல்சரில் இருந்து நம்மை காப்பாற்றும். வலிக்குண்டான மாத்திரைகளை தயவுசெய்து சாப்பிட வேண்டாம். ஒரு வேளை அதை சாப்பிட்டால், உணவு உண்ட பிறகு இந்த மாத்திரைகளை சாப்பிடுங்கள். ஏனென்றால், இந்த மாத்திரைகள் வயிற்றை மட்டும் பாதிக்காது, சில நேரங்களில் சிறுநீரகத்தையும் பாதிக்கும்.