Skip to main content

39 ஆண்டுகளாக காதலிக்கு சாக்லேட் கொடுக்கும் காதலர்!

Published on 14/02/2018 | Edited on 15/02/2018
ron

காதலர் தினம் ஒவ்வொரு ஆண்டும் பிப்ரவரி 14 ஆம் தேதி  உலகம் முழுவதும் கொண்டாடப்பட்டு வருகிறது. அன்று பல காதல்கள் துளிர்க்கும், சில காதல்கள் உதிரும். ஆனால் காதலித்து கரம் பிடித்தவர்கள் இருவருக்கும் இடையில் ஏற்பட்ட  அந்த அற்புதம் நிகழ்ந்த நாளை நினைவுகூர்ந்து ஒரு அழகான உரையாடலும், பரிசு பரிமாற்றமும் இருக்கும். இதனை எத்தனை பேர் பின்பற்றுவார்கள் என்பது தெரியாது.  

ron

ஆனால்  நியூமெக்ஸிக்கோவைச்  சேர்ந்த  ரான் மற்றும் டோனா காதல் தம்பதி இணைந்து 39வது காதலர் தினத்தை ஆரம்பத்தில் இருந்த அதே காதலோடு கொண்டாடி வருகின்றனர். ஜனவரி 1979ஆம் ஆண்டு ஆல்புகெர்க்கியில் ஒரு இன்ஸுரன்ஸ் அதிகாரியாக ஒரு வீட்டு கதவைத் தட்டிய போது ஒரு பெண் கதவைத் திறந்தார். அந்தப் பெண்தான்  டோனா. அத்தருணம் இருவரின் எண்ண ஓட்டமும் ஒன்றாக மாறியது. அதன் பின் இருவரும் காதலர் தினம் அன்று சந்தித்து பேசியபோது ரான், "உனக்கு சாக்லேட் பிடிக்குமா?" என்று கேட்க, "ஆம், எனக்கு டார்க் சாக்லேட் மற்றும்  பஃப்பெட்ஸ் கேண்டி என்றால் ரொம்ப பிடிக்கும்" என்று சொன்னவுடன் அன்று முதல் 39 ஆண்டுகளாக காதலர் தினத்தன்று டார்க்  சாக்லேட்டை அதே கடையில் வாங்கி டோனாவிற்கு  பரிசளித்து வருகிறார் ரான். 

2014ஆம் ஆண்டு டோனாவிற்கு டிமென்ஷியாவினால் பாதிக்கப்பட்டு இருந்தபொழுது அவர் மருத்துவமனையில் சேர்க்கப்பட்டார். அங்கு தன் காதலி இருந்த நிலையை கண்டு வருந்தினார் ரான் . "2015 ஆம் ஆண்டு  அவள் மீண்டும் வீட்டிற்கு வந்தாள். ஆனால் அவளால் எழுத முடியவில்லை, பேச முடியவில்லை, அவளால் அன்று கழிவறைக்கூட செல்லமுடியவில்லை. அது தான் என் வாழ்வில் சோகமான நாளாக இருந்தது" என்கிறார் ரான் . இது பற்றி டோனா கூறியபோது, "என்னைப் பாதுகாப்பவர் இவர். நான் இவரை திருமணம் செய்து பல ஆண்டுகள் ஆனாலும் இன்றும் அவரை நான் காதலிக்கிறேன்" என்கிறார். 

இதுமட்டுமல்லாமல் தற்போது இந்த காதலர் தினத்திற்கு ரான் டோனாவுக்கு  பரிசு வாங்கி அளிக்கும் வீடியோ வைரலாகி வருகிறது.

Next Story

அதிமுக எம்எல்ஏ தலைமையில் திருமணம்; மாப்பிள்ளையைக் கைது செய்த போலீஸ்

Published on 09/02/2024 | Edited on 09/02/2024
 police arrested the youth who cheated the girl by pretending to be love

புதுச்சத்திரம் அருகே கீழ்பூவானிகுப்பம் கிராமத்தைச் சேர்ந்த ப்ரகதி(பெயர் மாற்றப்பட்டுள்ளது) (23). இவர் கடலூரில் உள்ள அரசு கலைக் கல்லூரியில் கடந்த 3 ஆண்டுகளுக்கு முன்  இளங்கலை கணிதம் பயின்றுள்ளார்.  இந்நிலையில் அதே கல்லூரியில் இளங்கலை விலங்கியல் பயின்ற குறிஞ்சிப்பாடி அருகே குண்டியமல்லூர் கிராமத்தைச் சேர்ந்த சரவணாசங்கர் மகன் சஞ்சீவிராஜ்( 24)  இவர்கள் கல்லூரியில் படிக்கும் போதிலிருந்து இருவருக்கும் காதல் ஏற்பட்டுள்ளது.

இந்த நிலையில் சஞ்சீவிராஜ் ப்ரகதியை கடற்கரை, கோயில், சினிமா தியேட்டர் உள்ளிட்ட பல்வேறு இடங்களுக்கு அழைத்துச் சென்று சுற்றியுள்ளார். பின்னர் கடந்த 2019 மார்ச் 25ஆம் தேதி கீழ்பூவானிகுப்பம் கிராமத்தில் உள்ள தென்னந்தோப்புக்கு இரவு 10 மணிக்கு வற்புறுத்தி அழைத்துச் சென்று திருமணம் செய்து கொள்வதாக கட்டாயப்படுத்தி ஆசைவார்த்தை கூறி தனிமையில் இருந்துள்ளார்.

இதனைத்தொடர்ந்து இவரை திருமணம் செய்து கொள்வதாக ஆசை வார்த்தை கூறி பலமுறை தனிமையில் இருந்து வந்துள்ளார். இந்த நிலையில் எப்போ திருமணம் செய்து கொள்வது என கேட்டபோது திருமணம் தற்போது செய்து கொள்ள முடியாது என்றும், இவர் இவரது மாமன் மகளை திருமணம் செய்து கொள்ள இருப்பதாகவும் அதற்கு நிச்சயம் செய்து விட்டதால் அவளைத் தான் திருமணம் செய்து கொள்வேன் என கூறியுள்ளார். பின்னர் இவரிடம் பேசுவதை நிறுத்திவிட்டு போனை சுவிட்ச் ஆப் செய்துள்ளார்.

இதனைதொடர்ந்து வரும் 11-ந்தேதி அவரது மாமா மகளுடன் விருத்தாசலம் கொளஞ்சியப்பர் கோயிலில் காலை திருமணம் செய்துகொண்டு மாலையில் குறிஞ்சிப்பாடியில் உள்ள திருமண மண்டபத்தில் வரவேற்பு நடைபெற உள்ளது. இதில் அதிமுக கடலூர் மேற்கு மாவட்ட செயலாளரும் புவனகிரி சட்டமன்ற உறுப்பினருமான அருண்மொழித்தேவன் தலைமையில் நடைபெற உள்ளது. திருமண பத்திரிகையை உறவினர்கள் உள்ளிட்ட அனைவருக்கும்  கொடுத்து வந்துள்ளனர். பத்திரிகை வைக்கும் தகவல் அறிந்து கடந்த 4-ந்தேதி ப்ரகதி மருந்து குடித்துவிட்டு கடலூர் அரசு மருத்துவமனையில் சிகிச்சை பெற்று வந்துள்ளார்.

இதுகுறித்து விபரம் அறிந்த பெண் தரப்பினர் சம்பந்தப்பட்டவர்களிடம் திருமணம் செய்துகொள்ள பேசியுள்ளனர். ஆனால் அவர்கள் மறுத்துள்ளனர். இந்த நிலையில் சிதம்பரம் அனைத்து மகளிர் காவல்நிலையத்தில் 8-ந்தேதி புகார் அளிக்கப்பட்டது. புகாரின் பேரில் காவல்துறையினர் விசாரணை மேற்கொண்டு சம்பவத்தின் உண்மை தன்மை அறிந்து சம்பந்தபட்ட சஞ்சீவிராஜை கைது செய்து சிறையில் அடைத்துள்ளனர். திருமணத்திற்கு 2 நாட்களே உள்ள நிலையில் மாப்பிள்ளை கைது செய்யப்பட்டு சிறைக்கு சென்ற சம்பவம் இந்தப் பகுதியில் பரபரப்பை ஏற்படுத்தியுள்ளது.

Next Story

தங்கையின் காதலை எதிர்த்த அண்ணன் வெட்டிக் கொலை; காதலன் வெறிச் செயல்!

Published on 09/02/2024 | Edited on 09/02/2024
boyfriend who incident his girlfriend  brother who was against love

புதுக்கோட்டை அடப்பன்வயல் 6-ம் வீதி சிங்காரம் மகன் ஒச்சி கார்த்தி (எ) கார்த்தி (25). இவரது தங்கையும், மேல 6-ம் வீதி அரியமுத்து மகன் 29 வயது சீனிவாசனும் காதலித்து வந்துள்ளனர். இதுபற்றி அறிந்த ஒச்சி கார்த்தி தன் தங்கை மீதான காதலை விடுமாறு சீனிவாசனிடம் கூறியுள்ளார். சீனிவாசனோ காதலை துண்டித்துக்கொள்ள மறுத்துள்ளார். இதனால சில நாட்களுக்கு முன்பு இருவருக்கும் தகராறு ஏற்பட்டுள்ளது.

கார்த்தி தன் தங்கையுடனான காதலை விட வலியுறுத்தி வந்த நிலையில் தான் தன் காதலை விட மனமில்லாத சீனிவாசன் தன் காதலுக்கு தடையாக உள்ள தன் காதலியின் அண்ணன் கார்த்தியை தீர்த்துக்கட்ட தன் நண்பர்களுடன் சேர்ந்து முடிவு செய்துள்ளார். இந்த நிலையில் தான் நேற்று முன்தினம் (7.2.2024) கார்த்தி விஸ்வநததாஸ் நகரில் புதிதாக கட்டப்படும் வீட்டைப் பார்க்க வந்த போது பின் தொடர்ந்து வந்த சீனிவாசன், அவரது நண்பர் அடப்பன்வயல் 3-ம் வீதி நாகராஜன் மகன் நெருப்பு தினேஷ் என்கிற தினேஷ் (25), மற்றும் ஒருவர் என 3 பேரும் சேர்ந்து கார்த்தியை சரமாரியாக வெட்டிச் சாய்த்துவிட்டு அங்கிருந்து தப்பிச் சென்றுவிட்டனர்.

பலத்த காயமடைந்து கீழே சாய்ந்த கார்த்தி சம்பவ இடத்திலேயே உயிரிழந்தார். தகவல் அறிந்து வந்த திருக்கோகர்ணம் போலிசார் கார்த்தி சடலத்தை மீட்டு பிரேதப் பரிசோதனைக்காக புதுக்கோட்டை மருத்துவக்கல்லூரி மருத்துவமனைக்கு அனுப்பி வைத்து தப்பி ஓடிய 3 பேரையும் தேடி வருகின்றனர். இதில் ஒச்சி கார்த்தி, சீனிவாசன் ஆகியோர் நண்பர்களாக சேர்ந்து பல வழக்குகளில் சிக்கி வெளிவந்தவர்கள் என்று கூறப்படுகிறது. காதலுக்கு தடையாக இருந்த நண்பனான காதலியின் அண்ணனையே வெட்டிச் சாய்த்த சம்பவம் பரபரப்பை ஏற்படுத்தியுள்ளது.