Skip to main content

டாஸ்மாக் வரி 4 ரூபாய் பெட்ரோல் மீதான வரி 20 ரூபாய் என்னக் கொடுமை சார் இது!!!

Published on 30/04/2018 | Edited on 30/04/2018

தமிழ்நாடு மாநில வாணிபக் கழகமான டாஸ்மாக் பீருக்கு 4 ரூபாய் 36 பைசாவாக கலால் வரியை விதிக்கிறது. 1 லிட்டர் வீதம் இது விதிக்கப்படுவதால் புல் பீரான 650 மில்லிக்கு இன்னும் குறையும். ஆனால் 1 லிட்டர் பெட்ரோலுக்கு தமிழக அரசு விதிக்கும் மதிப்பு கூட்டு வரி (VAT)  20 ரூபாய். அதுவும் 34 சதவீதம் மதிப்பு கூட்டு வரி விதிக்கும் மாநிலம். சரக்குக்கு குறைந்த வரியும் பெட்ரோலுக்கு அதிக வரியும் விதித்திருக்கும் ஒரே தென்னிந்திய மாநிலம் தமிழ்நாடு.

petrol

 

 

இன்று நாடு முழுவதும் புகைந்து கொண்டு இருக்கும் பிரச்சினை பெட்ரோல், டீசல் விலை உயர்வுதான். 2017-க்கு முன்னர் எவ்வித பிரச்சினையும் இன்றி சுமூகமாக போய் கொண்டிருந்தது பெட்ரோல், டீசல் விலை. மத்திய அரசின் மானியத்தினால் பெட்ரோல், டீசல் விலை மக்களை பாதிக்காத அளவில் இருந்தது. பாரதிய ஜனதா ஆட்சி மத்தியில் அமைந்ததும் 2017 ஜூன் மாதம் 16 முதல் மாறும் எரிபொருள் விலை (Dynamic Fuel Pricing) என்ற புதிய முறை அமல்படுத்தப்பட்டது. அதாவது தினமும் சர்வதேச சந்தையில் கச்சா எண்ணெய்கேற்ப பெட்ரோல், டீசல் விலையில் மாறுதல் ஏற்படும். நாடு முழுவதும் உள்ள 58,000 பெட்ரோல் பங்குகளில் காலை 6 மணிக்கு அன்றைய பெட்ரோல், டீசல் விலை மாறுதலடையும். இது ஒன்றும் இந்திய அரசு கண்டுபிடித்த விலை கொள்கையல்ல. சர்வதேச அளவில் பரவலாக நடைமுறையிலிருக்கும் விலை கொள்கைதான். சர்வதேச அளவில் அமலில் இருக்கும் ஜி.எஸ்.டி வரி விதிப்பு போல தான் இதுவும். இப்பொழுது பிரச்சினை இந்த புதிய விலை நிர்ணய கொள்கையில் இல்லை. இந்த விலை கொள்கையால் பெரிய தொகையாக பெட்ரோல், டீசல் மானிய செலவீனம் தடுக்கப்பட்டது. இது நாட்டின் பொருளாதாரத்திற்கு நல்லதுதான். ஆனால் பிரச்சினையே இந்த பெட்ரோல், டீசல் மேல் விதிக்கப்படும் மத்திய, மாநில வரி விதிப்பு முறைதான்.

ஒரு லிட்டர் பெட்ரோல் விலையானது எண்ணெய் நிறுவனம் நிர்ணயிக்கும் விலை, மத்திய அரசின் வரி, மாநில அரசின் வரி சேர்ந்தே நிர்ணயிக்கப்படுகின்றது.

இறக்குமதி செய்யப்படும் கச்சா எண்ணெய் விலையும் கப்பல் போக்குவரத்துக்கான கட்டணமும் சேர்த்து சுத்திகரிப்பு செய்யப்பட்டு உற்பத்தி செய்யப்படும் ஒரு லிட்டர் பெட்ரோல் விலை ரூ. 35.65 பைசாவாக எண்ணெய் நிறுவனங்கள் நிர்ணயிக்கின்றன. இப்போது இந்த பெட்ரோல் மீது மத்திய அரசின் கலால் வரி லிட்டருக்கு ரூ. 19.48 பைசா விதிக்கப்படுகிறது. தமிழக அரசு  மதிப்பு கூட்டு வரியாக லிட்டருக்கு 20 ரூபாய் விதிக்கிறது. சுற்றுச்சூழல் மாசுபாடுக்காக விதிக்கபடும் வரி லிட்டருக்கு 25 பைசாவும்  விற்பனை கமிஷன் லிட்டருக்கு ரூபாய் 3.60 ஆக மொத்தம் சேர்ந்து 1 லிட்டர் பெட்ரோல் விலை ரூ. 78.98 ஆகும். இந்த விலை நிச்சயம் அதிகப்படியான விலைதான். இந்த விலையினால் நேரடியாகவும் மறைமுகமாகவும் மக்கள் அதிகளவில் பாதிக்கப்படுகின்றனர். அன்றாட பயணசெலவும் உணவு பெருட்கள் விலையும் அதிகரிக்க பெட்ரோல், டீசல் விலை மிக முக்கிய காரணம்.

பிரச்சினை இதுமட்டுமல்ல சர்வதேச கச்சா எண்ணெய் விலை இன்னும் ஏறும். ஏறிக்கொண்டே போகும். அப்போது இந்தியா என்ன  செய்யபோகிறது. ஒரே நாடு, ஒரே வரி, என்று முழங்கி மத்திய அரசு ஜி.எஸ்.டி வரியை அறிமுகப்படுத்தியது. இந்தியாவில் அனைத்து பொருட்கள் மற்றும் சேவைகளை ஜி.எஸ்.டிக்குள் கொண்டுவந்துவிட்டது.   ஆனால் பெட்ரோல், டீசல் மட்டும் ஜி.எஸ்.டி வரி விதிப்பில் கொண்டு வராமல் இருக்கிறது. இந்த விஷயத்தில் வரிவிதிப்பின் நேர்மை எங்கு போனது. பெட்ரோல் விலையை ஜி.எஸ்.டிக்குள் கொண்டு வந்தால், 12 சதவீத ஜி.எஸ்.டி வரி விதிப்பில் பெட்ரோல் விலை 38.10 ரூபாயாக இருக்கும்.  18 சதவீத ஜி.எஸ்.டி வரி விதிப்பில் பெட்ரோல் விலை இருக்கும். 40.05 ரூபாயாக இருக்கும், 28 சதவீத ஜி.எஸ்.டி வரி விதிப்பில் பெட்ரோல் விலை 43.44 ரூபாயாக இருக்கும். மது விற்பனைக்கு ஜி.எஸ்.டி வரியில் சலுகை காட்டும் மத்திய அரசு மக்களின் முக்கிய தேவையும் பிரச்சினையுமான பெட்ரோல், டீசல் விலையை ஜி.எஸ்.டிக்குள் கொண்டு வருவதில் என்ன தயக்கம். டாஸ்மாக் விற்பனையில் சராசரியாக 26,200 கோடி வசூலிக்கும் தமிழக அரசு பெட்ரோல், டீசல் மீதான வரிவிதிப்பை குறைப்பதனால் பெரிய பாதிப்பு ஒன்றுமில்லை. இதை எல்லாம் செய்யாமல் நீங்கள் மக்களுக்காக பேசும் பேச்சு வீண் பேச்சு தான். மக்களும் அதை விரும்பவில்லை.

 

 

 

Next Story

‘ஆன்லைனில் மது விற்பனையா?’ - டாஸ்மாக் நிர்வாகம் விளக்கம்!

Published on 17/07/2024 | Edited on 17/07/2024
tasmac explanation for online sales related news

தமிழகத்தில் ஆன்லைன் வினியோக நிறுவனங்கள் மூலமாக வீடுகளுக்கே  சென்று மதுவை விற்கும் திட்டம் விரைவில் தொடங்கப்பட உள்ளதாக தகவல் வெளியாகி இருந்தது. இந்தத் திட்டத்தை கைவிட வேண்டும் என பாமக நிறுவனர் ராமதாஸ் உள்ளிட்ட பல்வேறு கட்சித்தலைவர்களும் வலியுறுத்தியிருந்தனர். 

இது தொடர்பாக பாமக நிறுவனர் ராமதாஸ் தனது எக்ஸ் சமூக வலைத்தளத்தில் வெளியிட்டுள்ள பதிவில், “தமிழ்நாட்டில்  பீர், ஒயின், மணமூட்டப்பட்ட மதுவகைகள் போன்ற குறைந்த அளவில் ஆல்கஹால் கொண்ட மதுவகைகளை ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்க தமிழக அரசு  திட்டமிட்டிருப்பதாகவும், அதன் சாதக பாதகங்கள் குறித்து ஆன்லைன் வினியோக நிறுவனங்கள், மது உற்பத்தியாளர்கள் போன்றோருடன் கலந்தாய்வு செய்து வருவதாகவும் ஆங்கில நாளிதழ்  செய்தி வெளியிட்டுள்ளது. இந்த செய்தியில் கூறப்பட்டுள்ள தகவல்கள் உண்மையா?. வீடுகளுக்கே சென்று மது விற்க திட்டமிடப்பட்டுள்ளதா? என்பது குறித்து தமிழக அரசு விளக்கமளிக்க வேண்டும். ஒருவேளை இந்தச் செய்தி உண்மையாக இருந்தால் தமிழக அரசின் திட்டம் கடுமையாக கண்டிக்கத்தக்கது ஆகும். 

tasmac explanation for online sales related news

தமிழ்நாட்டில் படிப்படியாக மதுவிலக்கை ஏற்படுத்துவோம் என்று வாக்குறுதி  அளித்த முதலமைச்சர் மு.க.ஸ்டாலின், மதுப்பழக்கத்தை  ஊக்குவிக்கும் வகையிலான இத்தகைய திட்டங்களை அனுமதிக்கக் கூடாது.  மது வகைகளை ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்பனை செய்யும் திட்டம் இருந்தால் அதை தமிழக அரசு கைவிட வேண்டும்; இல்லாவிட்டால் மக்களைத் திரட்டி மாபெரும் போராட்டத்தை பாட்டாளி மக்கள் கட்சி நடத்தும்” எனத் தெரிவித்திருந்தார். 

இந்நிலையில் ஆன்லைன் மூலம் மதுபானங்கள் விற்கும் திட்டம் தொடங்கப்படுவதாக தகவல் வெளியான நிலையில் இது தொடர்பாக டாஸ்மாக் நிர்வாகம் விளக்கமளித்துள்ளது. அதில், “ஆன்லைன் விநியோக நிறுவனங்கள் மூலம் வீடுகளுக்கே சென்று மதுவை விற்கும் திட்டம் எதுவும் இல்லை. அதோடு  டெட்ரா பாக்கெட் எனப்படும் காகிதக் குடுவையின் மூலம் மதுவை அறிமுகம் செய்யவும் திட்டமிடவில்லை” எனத் தெரிவிக்கப்பட்டுள்ளது. 

Next Story

ஓடும் ரயில் மீது மது பாட்டில்கள் வீச்சு; பயணிகள் அச்சம்

Published on 16/07/2024 | Edited on 16/07/2024
Throwing liquor bottles on a moving train; Passengers fear

ஓடும் ரயில்  மீது மது பாட்டில்கள் வீசப்பட்ட சம்பவம் சென்னையில் பயணிகள் மத்தியில் அதிர்ச்சியை ஏற்படுத்தியுள்ளது.

சென்னை மறைமலைநகர் பகுதியில் ரயில் மீது மர்ம நபர்கள் மது பாட்டில் வீசியதாக பயணிகள் அதிர்ச்சி தெரிவித்துள்ளனர். எழும்பூரில் இருந்து புறப்பட்ட பல்லவன் எக்ஸ்பிரஸ் ரயில் மீது மர்மநபர்கள் குடிபோதையில் மதுபாட்டில்களை வீசியதாக கூறப்படுகிறது. இதுபோன்று  ரயில் மீது மது பாட்டில்கள் வீசப்படும் சம்பவங்கள் அடிக்கடி நடைபெறுவதாக பயணிகள் குற்றச்சாட்டுகளை வைத்திருந்த நிலையில் இன்று நடைபெற்ற சம்பவம் தொடர்பாக ரயில்வே போலீசார் விசாரணை மேற்கொண்டு வருகின்றனர்.