Skip to main content

‘உன் கூட நூறு வருசம் வாழணும்...’ - 8 பேருக்கு விபூதி அடித்த இளம்பெண்

Published on 11/07/2023 | Edited on 11/07/2023

 

 young woman who married and cheated 8 people through Instagram

 

இளம்பெண் ஒருவர் இன்ஸ்டாகிராம் மூலம் பழகி 8 பேரைத் திருமணம் செய்துகொண்டு அவர்களின் பணத்தையும், நகைகளையும் எடுத்துக்கொண்டு மாயமான சம்பவம் பெரும் அதிர்ச்சியை ஏற்படுத்தியுள்ளது. 

 

சேலம் மாவட்டம் தாரமங்கலத்தைச் சேர்ந்தவர் பைனான்ஸியர் மூர்த்தி. இவர் தொளசம்பட்டி போலீசாரிடம், ‘இன்ஸ்டாகிராம் மூலம் நீலகிரி மாவட்டத்தைச் சேர்ந்த ரஷீதாவுக்கும் எனக்கும் பழக்கம் ஏற்பட்டது. அவர் பியூட்டீசியனாக பணியாற்றி வருகிறார். நாளடைவில் எங்களது பழக்கம் காதலாக மாறியதால், கடந்த மார்ச் மாதம் 30 ஆம் தேதி இருவரும் ஓமலூரில் உள்ள ஈஸ்வரன் கோயிலில் திருமணம் செய்துகொண்டோம். பின்பு இருவரும் 3 மாதங்கள் ஒன்றாக வாழ்ந்து வந்த நிலையில், கடந்த 5 ஆம் தேதி காலையில் இருந்து ரஷீதாவை காணவில்லை. மேலும் வீட்டில் இருந்த ரூ.1.50 லட்சம் பணம், 4 பவுன் நகைகளையும் காணவில்லை. அதனால் தனது காதல் மனைவி ரஷீதாவை கண்டுபிடித்துத் தரும்படி’ புகார் அளித்தார். இதனிடையே ரஷீதாவிடம் பழகியதால் தனது மனைவியையும் மூர்த்தி விவகாரத்து செய்துள்ளார்.

 

புகாரின் அடிப்படையில் வழக்குப் பதிவு செய்து விசாரணையைத் தீவிரப்படுத்திய போலீசார், ரஷீதாவின் சமூக வலைத்தளப் பக்கங்களை ஆய்வு செய்தனர். அதில் இன்ஸ்டாகிராமில் பல்வேறு பெயர்களில் கணக்குகள் வைத்துக்கொண்டு, வசதியான ஆண்களைத் தன் காதல் வலையில் சிக்க வைத்துத் திருமணம் செய்துகொண்டு, பணம் மற்றும் நகைகளை ஏமாற்றி வந்தது தெரிய வந்துள்ளது. இதனை அடிப்படையாகக் கொண்டு மாயமான ரஷீதாவை போலீசார் தீவிரமாகத் தேடி வரும் நிலையில், கடந்த மாதம் 20 ஆம் தேதி கோவையில் பெண் ஒருவர், ‘எனது கணவர் சத்ய கணேஷ் ஒரு பெண்ணுடன் தொடர்பு வைத்துக்கொண்டு என்னிடம் அடிக்கடி பணம் கேட்டு மிரட்டுகிறார்’ என்று மகளிர் காவல்நிலையத்தில் புகார் கொடுத்திருக்கிறார்.

 

அந்தத் தகவலைத் தெரிந்து கொண்ட தொளசம்பட்டி போலீசார், அந்த வழக்குடன் மூர்த்தியின் வழக்கை ஒப்பிட்டுப் பார்த்ததில் இரண்டு பெண்ணும் ஒருவர்தான் என்பதைக் கண்டுபிடித்தனர். பின்பு விசாரணையைத் தீவிரப்படுத்தியதில், மூர்த்தி போன்று 8 பேரை ரஷீதா திருமணம் செய்துகொண்டதாக அதிர்ச்சி தகவல் வெளியாகியுள்ளது. இதனைத் தொடர்ந்து போலீசார் ரஷீதாவை பிடிப்பதில் தீவிரம் காட்டி வருகின்றனர். 

 

 

சார்ந்த செய்திகள்

Next Story

வாக்களிக்க சென்ற இருவர் மயங்கி விழுந்து உயிரிழப்பு!

Published on 19/04/2024 | Edited on 19/04/2024
Two people who went to vote fainted and passed way

உலகின் மிகப்பெரிய ஜனநாயகத் திருவிழாவான இந்திய நாட்டின் 18-ஆவது நாடாளுமன்ற தேர்தல் நாடு முழுவதும் களைகட்டி வருகிறது. அதன்படி முதற்கட்டமாக இன்று தொடங்கி ஜூன் 1 ஆம் தேதி வரை 7 கட்டமாக வாக்குப்பதிவு நடைபெறவுள்ளது. முதற்கட்டமாக 21 மாநிலங்கள் மற்றும் யூனியன் பிரதேசங்களில் உள்ள 102 இடங்களுக்கு இன்று வாக்குப்பதிவு நடைபெறுகிறது

அந்த வகையில் தமிழகத்தில் உள்ள 39 நாடாளுமன்ற தொகுதிக்கும், புதுச்சேரியில் உள்ள ஒரு நாடாளுமன்ற தொகுதிக்கும் இன்று வாக்குப்பதிவு நடைபெற்று வருகிறது. பதற்றமான வாக்குச்சாவடிகளில்  பல அடுக்கு பாதுகாப்பு போடப்பட்டுள்ளது. சரியாக காலை 7 மணிக்கு தொடங்கிய வாக்குப்பதிவு மாலை 6 மணி வரை நடைபெறவுள்ளது.  இந்த நிலையில் காலை 7 மணி முதல் வாக்காள பெருமக்கள் ஆர்வத்துடன் வாக்களித்து வருகின்றனர். அதேபோன்று அரசியல் கட்சி தலைவர்கள், வேட்பாளர்கள் என பலரும் தங்களின் வாக்குகளை வாக்குச்சாவடிகளில் செலுத்தி வருகின்றனர். தமிழ்நாட்டில் காலை 9 மணி நிலவரப்படி 24.34 சதவீத வாக்குகள் பதிவாகியுள்ளன.

இந்த நிலையில் வாக்களிக்க சென்ற இருவர் மயங்கி விழுந்து உயிரிழந்துள்ளனர். சேலம் மாவட்டம் கெங்கவல்லி அருகே செந்தாரப்பட்டி ஊராட்சி தொடக்கப்பள்ளி வாக்குச்சாவடி மையத்தில் வாக்களிக்கச் சென்ற சின்னபொண்ணு (77) என்ற மூதாட்டி மயங்கி விழுந்து உயிரிழந்தார். அதேபோன்று, சேலம் மாநகராட்சி நடுநிலைப்பள்ளி வளாகத்தில் சூரமங்கலம் பகுதியை சேர்ந்த பழனிசாமி(65) தனது மனைவியுடன் வாக்களிக்கச் சென்றபோது மயங்கி விழுந்து பலியானார். சேலம் மாநகரில் நடந்த இந்த துயர் சம்பவம் அப்பகுதி மக்கள் மத்தியில் பெரும் சோகத்தை ஏற்படுத்தியுள்ளது.

Next Story

17 ஆம் நூற்றாண்டைச் சேர்ந்த போர் வீரனின் நடுகல் கண்டுபிடிப்பு!

Published on 18/04/2024 | Edited on 18/04/2024
17th century warrior headstone Kantipudi

சேலம் மாவட்டம், மாதநாயக்கன்பட்டி பெருந்தலைவர் காமராசர் நினைவு அரசு மேல்நிலைப்பள்ளி தொன்மை பாதுகாப்பு மன்றத்தின் தலைவர் தலைமை ஆசிரியர், பொறுப்பு ஆசிரியர்களாக அன்பரசி, விஜயகுமார் ஆகியோர் உள்ளனர். இப்பள்ளி மாணவர்கள் கொடுத்த தகவலின்படி ஆசிரியர்களும், மாணவர்களும் களப்பயணத்தின் போது வீரனின்  நடுகல்  ஒன்று கண்டறியப்பட்டது.

பொது ஆண்டு 17 ஆம் நூற்றாண்டைச் சேர்ந்த இந்த நடுகல்லில் எழுத்துகள் எதுவும் இல்லை. கல்பூமியின் மேற்பரப்பில் 2 அடி உயரமும் 1.5  அடி அகலம் கொண்டது. இந்த நடுகல்லை சுற்றி கல்திட்டை போன்ற அமைப்பும் உள்ளது . நடுகல்லில் போர் வீரனின் சிற்பம்  உள்ளது.
வேட்டைக்கு சென்று இறந்ததற்காக எடுக்கப்பட்ட நடுகல்லாக இருக்கலாம். ஆலிடாசனம் நிலையில் வில்லில் நாணில் அம்பு எய்துவது போன்றும், இடுப்பில் குரு வாளும், காதில் பத்ர குண்டலமும்,   கழுத்தில் சரப்பளி, சவுடி, முத்தாரம் அணிகலன் அணிந்திருப்பது  போன்றும் கையில் தோள்வளை  இருப்பது போன்ற உருவமைப்பு உள்ளது.

17th century warrior headstone Kantipudi

இப்பகுதி தாருகாவனத்திற்க்கு அருகில் இருப்பதால்  இந்த வீரன் வேட்டுவ தலைவனாக இருக்கலாம். இந்த நடுகல் எல்லாம் அவர்களின் நினைவைப் போற்றும் வகையில் வைக்கப்பட்டதாகும்.  தொன்மை பாதுகாப்பு மன்றத்தின் சார்பாக தொல்லியல் சார்ந்த வரலாற்று தகவல்களையும், அதனை பற்றிய விழிப்புணர்வையும் இன்றை இளைய தலைமுறை மாணவர்களுக்கு கொண்டு சேர்ப்பது தான் தொன்மை பாதுகாப்பு மன்றத்தின் நோக்கமாகும் என்கின்றனர் தொன்மை பாதுகாப்பு மன்ற ஆசிரியர்கள்.