Skip to main content

பல பேரிடம் கோடிக்கணக்கில் மோசடி; பெண் மீது பரபரப்பு புகார் 

Published on 22/11/2023 | Edited on 22/11/2023

 

  woman who cheated many people out of crores

 

சென்னை பள்ளிக்கரணை பகுதியை சேர்ந்தவர் கலாவதி(56). அம்மா உணவகத்தில் தற்காலிக ஊழியராக பணிபுரிந்து வரும் இவர் அப்பகுதியில் மகளிர் குழு தலைவராக இருந்து வருகிறார். கலாவதி வசிக்கும் பகுதியில் வசித்து வரும் அமுதா(52) என்ற பெண் மூலம் சுகந்தி(49)  என்பவர் அறிமுகம் ஆகியுள்ளார். கடந்த ஆண்டு செப்டம்பர் மாதம் கலாவதி மகளிர் குழு தலைவராக இருப்பதால் உங்கள் குழுவில் உள்ளவர்களுக்கு ஆளுக்கு 10 லட்சம் முதல் 20 லட்சம் ரூபாய் என 2 கோடியே 80 லட்சம் ரூபாய் வரை லோன் வாங்கி தருவதாக கூறியதாக கூறப்படுகிறது. 

 

அதற்கு முன்பு உங்கள் குழுவில் உள்ள 22-நபர்களிடமும்  முன்பணம் வாங்கித் தருமாறும் அவ்வாறு நீங்கள் முன்பணம் வாங்கி கொடுத்தால் ஒரு மாதத்திலேயே லோன் வந்துவிடும் எனவும் சுகந்தி ஆசை வார்த்தை கூறி மோசடி வலையை விரித்துள்ளார். சுகந்தி விரித்த மோசடி வலையை உண்மை என்று நம்பிய மகளிர் குழுவில் உள்ள 22 நபர்களும் ஆளுக்கு 30 ஆயிரம் முதல் 35 ஆயிரம் ரூபாய் வரை மொத்தம் 7-லட்சத்து 68,000 ரூபாய் லோன் கிடைக்கும் என்ற நம்பிக்கையில் முன்பணம் கொடுத்துள்ளனர். முன்பணம் கட்டினால் ஒரு மாதத்திற்குள்ளேயே லோன் வந்துவிடும் என்று சுகந்தி கூறியதை நம்பி காத்திருந்த மகளிர் குழு உறுப்பினர்கள் பல மாதங்கள் கடந்தும் லோன் வராததால் சுகந்தியிடம் இதுகுறித்து முறையிட்டுள்ளனர். 

 

  woman who cheated many people out of crores

 

அதனை தொடர்ந்து திருவான்மியூர் பகுதியில் உள்ள தனியார் லோன் நிறுவன அலுவலர் பாத்திமா என்பவரை மகளிர் குழுவினருக்கு அறிமுகப்படுத்தி பாத்திமாவுக்கு ரூபாய் 5 லட்சம் முன்பணம் கட்டினால் லோன் உடனடியாக கிடைத்துவிடும் என சுகந்தி கூறியுள்ளார். அதையும் நம்பி பல தவணைகளாக மகளிர் குழுவினர் பாத்திமாவுக்கு 5 லட்சம் கட்டியுள்ளனர். மேலும் சுகந்தி கலாவதியிடம் என்னுடைய வீடு அடமானத்தில் உள்ளது என அழுது புலம்பி எனக்கு 10-லட்சம் தேவைப்படுகிறது என கேட்டுள்ளார். கலாவதி என்னிடம் அவ்வளவு பணம் இல்லை எனக்கூற உனது மகள்களின் நகைகளை அடமானம் வைத்து கொடு லோன் பணம் கிடைத்ததும் நகைகளை மீட்டு தருகிறேன் எனக்கூறியுள்ளார். அதனை நம்பி கலாவதி மகளின் தங்க நகைகளை அடமானம் வைத்து ரூபாய் 7 லட்சம் ரொக்க பணமும். மீதமுள்ள 3 லட்சம் வட்டிக்கு வாங்கி சுகந்தியிடம் கொடுத்துள்ளார்.

 

பின்பு அந்த பணமும் திரும்பி தராததால் ஏமாற்றமடைந்து சுகந்தியிடம் நேரில் சென்று கலாவதி கேட்டுள்ளார். அப்பொழுது சுகந்தி உன்னால் முடிந்ததை பார்த்துக்கொள். இனிமேல் வீட்டுபக்கம் வந்தால் அடித்து கொன்றுவிடுவேன் என கொலைமிரட்டல் விடுத்து விரட்டியதாக கூறப்படுகிறது. பாத்திமா மற்றும் சுகந்தியிடம் கொடுத்த பணம், தங்க நகைகளை மீட்டு தருமாறு தாம்பரம் காவல் ஆணையரகத்தில் புகார் அளித்ததோடு, மகளிர் குழு மூலம் லோன் வாங்கித் தருகிறோம் முன்பணம் கொடுங்கள் என யாராவது கூறினால் பொதுமக்கள் நம்ப வேண்டாம் என பாதிக்கப்பட்டவர்கள் வேதனையுடன் பேட்டியளித்துள்ளனர்.

 

 

சார்ந்த செய்திகள்

Next Story

கர்ப்பிணிப் பெண்ணின் வலி மிகுந்த பயணம்; நடுவழியில் நிறுத்தப்பட்ட ரயில்

Published on 02/03/2024 | Edited on 02/03/2024
 Cuddalore Collector praised doctor who delivered  pregnant woman who was in convulsions

திருவாரூர் மாவட்டத்தைச் சேர்ந்தவர்கள் திருமுருகன் - ஷியமாளா தம்பதியர். திருமுருகன் சென்னையில் ஒரு தனியார் நிறுவனத்தில் பணிபுரிந்து வருகிறார். இவரது மனைவி ஷியமாளா 9 மாத கர்ப்பிணி. பிரசவம் பார்ப்பதற்குச் சென்னையிலிருந்து திருவாரூர் வழியாகத் தங்கள் சொந்த ஊருக்கு ரயிலில் கணவர் அழைத்துச் சென்று கொண்டிருந்தார். அந்த ரயில் விழுப்புரம் கடந்த போது நிறைமாத கர்ப்பிணி ஷியமாளாவுக்கு வலிப்பு ஏற்பட்டு மிகவும் அவதிப்பட்டுள்ளார். 

மனைவிக்கு ஏற்பட்ட நிலை கண்டு திருமுருகன் துடித்துப் போனார். உடனடியாக அங்கிருந்த பயணிகள் இது குறித்து ரயில் காப்பாளரிடம் தொடர்பு கொண்டு தகவல் தெரிவித்தனர். உடனடியாக அருகில் மருத்துவமனை இருக்கும் ரயில் நிலையத்தில் ரயிலை நிறுத்துவதற்கு முடிவு செய்தனர். திருமுருகன் மருத்துவமனையில் சேர்க்க உதவுமாறு கேட்டுக் கொண்டார். கடலூரை நெருங்கிக் கொண்டிருந்தது ரயில், அதற்குள் 108 ஆம்புலன்ஸ்-க்கு தகவல் தெரிவிக்கப்பட்டு கடலூர் திருப்பாதிரிப்புலியூர் ரயில் நிலையத்தில் 108 ஆம்புலன்ஸை டிரைவர் பெஞ்சமின் பிராங்கிளின் தயாராக நிறுத்திவிட்டு சியாமளாவின் கணவர் திருமுருகனுக்கு தகவல் தெரிவித்தார்.

ரயில் காப்பாளர், கர்ப்பிணிப் பெண் சியாமளாவின் நிலைமையைக் கருதி கடலூர் திருப்பாதிரிப்புலியூர் ரயில் நிலையத்தில் அந்த ரயில் நிறுத்தம் இல்லாதபோதிலும் ரயிலை நிறுத்தினார். ரயிலில் மயக்க நிலையில் இருந்த ஷியாமாளாவை பயணிகள் உதவியுடன் ரயில்வே தண்டவாளத்தை கடந்து 108 ஆம்புலன்ஸ் வண்டியில் கொண்டு வந்து ஏற்றினர். அதற்குள் முன்னேற்பாடாக கடலூர் அரசு மாவட்ட தலைமை மருத்துவமனையின் மகப்பேறு மருத்துவர் மகேஸ்வரி ஷியாமளாவின் உடனடி பிரசவத்திற்கு தயார் நிலையில் இருந்தார்.

ஷியாமளா மருத்துவமனைக்கு கொண்டுவரப்பட்டு சிகிச்சை அளிக்கப்பட்டது. ஷியமாளா வலிப்பு நோய் ஏற்பட்டு மயக்க நிலையில் இருந்தபோதும் அமினா கொடுத்து பிரசவம் செய்ய ஏற்பாடுகள் செய்யப்பட்டது. குழந்தை இறந்து பிறந்தாலும் பரவாயில்லை என்று தாயையாவது காப்பாற்ற வேண்டும் என்ற முயற்சியில் மருத்துவர்கள் சிகிச்சை மேற்கொண்ட நிலையில், நல்லபடியாக குழந்தையும் பிறந்தது. தாயும் நலமுடன் உள்ளார். இதனைத் தொடர்ந்து கணவர் திருமுருகன் மருத்துவக்குழுவுக்கும் ஆம்புலன்ஸ் குழுவினருக்கும் கண்ணீர் மல்க நன்றி தெரிவித்தார்.

இது குறித்து அறிந்த கடலூர் மாவட்ட ஆட்சியர் அருண் தம்புராஜ் மருத்துவமனைக்கு விரைந்து, தாய் மற்றும் குழந்தை இருவரையும் பார்த்து நலம் விசாரித்தார். இக்கட்டான சூழ்நிலையில் திறம்படச் செயல்பட்டு இரு உயிரையும் காப்பாற்றிய மருத்துவர் மகேஸ்வரி அவரது குழுவினர் மற்றும் ஆம்புலன்ஸ் ஊழியர்களையும் பாராட்டினார்.

Next Story

ஐ.டி. ஊழியர் ஏமாற்றம்; லட்சக்கணக்கில் மோசடி

Published on 02/03/2024 | Edited on 02/03/2024
18 lakh rupees scam by IT employee claiming profit from stock trading

திருச்சி திருவானைக்காவல் அழகப்பா தெரு பகுதியைச் சேர்ந்தவர் ராமச்சந்திரன்(46) பெயர் மாற்றப்பட்டுள்ளது. இவர் சென்னையில் ஐ.டி. நிறுவனத்தில் என்ஜினியராக வேலை பார்த்து வருகிறார். இவர் தனது இன்ஸ்டாகிராம் பக்கத்தில் இருந்து பகுதி நேர வேலை என்ற ஒரு லிங்கை டவுன்லோட் செய்தார். அப்போது அதில் பங்கு வர்த்தகத்தில் முதலீடு செய்தால் அதிக லாபம் ஈட்டித் தருவதாகத் தெரிவிக்கப்பட்டிருந்தது. 

இதனை நம்பிய ராமச்சந்திரன், மோசடி நபர்கள் கூறிய 8 வங்கிக் கணக்குகளுக்கு பல்வேறு தவணைகளாக கடந்த 3 மாதத்தில் ரூ.18 லட்சத்து 45 ஆயிரம் பணத்தை அனுப்பி வைத்தார். பின்னர் அந்த மர்ம ஆசாமிகள் அவருக்கு லாபத் தொகையும் தரவில்லை. முதலீடு செய்த பணத்தையும் திரும்பத் தராமல் ஏமாற்றிவிட்டனர். பின்னர் தான் ஏமாற்றப்பட்டதை உணர்ந்து கொண்ட ராமச்சந்திரன், இதுகுறித்து ஆன்லைன் மூலமாக திருச்சி மாநகர சைபர் கிரைம் போலீசில் புகார் செய்தார். அதன் பேரில் இன்ஸ்பெக்டர் கன்னிகா வழக்குப் பதிவு செய்து விசாரணை நடத்தி வருகிறார்.