Skip to main content

குடிநீர்..! சிறு நிறுவனங்களை ஒழித்து கார்பரேட் கம்பெனிக்கா..? அடுத்து மூச்சு விடும் காற்றுக்கும் ப்ளான்...

Published on 29/02/2020 | Edited on 29/02/2020

 

வீடுகள், தொழிற்சாலைகள், உணவகங்கள் என எல்லா இடங்களிலும் ஆர்.ஓ. வாட்டர் அல்லது மினரல் வாட்டர் எனப்படும் கேன் குடிநீர்கள் ஏகபோக பயன்பாட்டில் உள்ளது. கடந்த பத்து, இருபது வருடங்களாக மக்களும் இதை குடித்து பழகி விட்டனர். இந்த நிலையில் சென்னை உயர் நீதிமன்றத்தில் தாக்கல் செய்யப் பட்ட பொதுநல வழக்கில் உரிய அனுமதி பெறாமல் நிலத்தடி நீரை உறிஞ்சி அதை சுத்திகரித்து விலைக்கு விற்பதை கண்டறிந்து சட்ட நடவடிக்கை எடுக்க வேண்டும் என நீதிமன்றம் வழங்கிய தீர்ப்பு மினரல் வாட்டர் கம்பெனிகளுக்கு பேரிடியாக அமைந்தது. இந்நிலையில் பத்து லிட்டர் இருபது அதற்கு மேலும் கேன்களில் குடிநீர் விற்பனை செய்யும் உற்பத்தியாளர்கள், வினியோக டீலர்கள், அதன் பணியாளர்கள் சங்கங்களின் கூட்டமைப்பு சார்பில், இன்று ஈரோட்டில் ஆலோசனை கூட்டம் நடந்தது. 

 

water



அந்த கூட்டத்துக்குப்பின், இதன் ஒருங்கிணைப்பாளர் எஸ்.கணேசன் செய்தியாளர்களிடம் கூறும்போது, தமிழ்நாட்டில் மினரல் வாட்டர் ஆயிரத்து நானூறு நிறுவனங்கள் தயாரிக்கிறது.  ஈரோட்டில் மட்டும் முப்பத்தி மூன்று  நிறுவனங்கள்  உள்ளன. இங்கு மட்டும் நான்காயிரம் டீலர்கள், பத்தாயிரம்  பணியாளர்கள் வேலை செய்கிறார்கள்.

 

சென்ற 2017ம் ஆண்டு அரசாணை வெளியிடப்பட்டது. அப்போதுதான் அதில், நிலத்தடி நீரை பயன்படுத்த அரசு அனுமதி பெற வேண்டும் என குறிப்பிட்டுள்ளனர். ஆனால் பல நிறுவனங்கள் நீண்ட வருடங்களாக இந்த அரசாணைக்கு முன்பே துவங்கப்பட்டு, மக்களின் அன்றாட குடிநீர் தேவைகளை  பூர்த்தி செய்து வருகிறோம்.


பொதுவாக ஈரோட்டில் மட்டும் எடுத்துக் கொண்டால் காவிரி ஆற்றில், காளிங்கராயன் வாய்க்காலில் பெருமளவு சாயக்கழிவு உட்பட பல கெமிக்கல் கழிவுகள் கலந்து அந்த தண்ணீரை அப்படியே மக்கள்  குடிக்க முடியாத நிலை ஏற்பட்டுவிட்டது. இந்த சூழலில் இங்கு மழைக்காலங்களில் தினமும் அறுபதாயிரம் தலா இருபது லிட்டர் கேன்களும் கோடை காலத்தில், ஒரு லட்சம் கேனும் மக்களிடம் விற்பனை செய்கிறோம்.

 

சென்ற 20ந் தேதிக்கு மேல் தமிழகத்தில் பல யூனிட் மினரல் வாட்டர் உற்பத்தி நிறுவனங்களை அதிகாரிகளால் சீல் வைக்கப்பட்டு விட்டதால் உற்பத்தி செய்ய முடியாமல் வினியோகம் நிறுத்தப்பட்டு விட்டது. நீதிமன்றத்தில் எங்கள் தரப்பு நியாய்ததை கோரிக்கையாக முன்வைத்துள்ளோம். இது பற்றி தமிழக  முதல்வரிடமும்  பேச இருக்கிறோம்.

 

நாங்கள் அரசிடம் முறையாக அனுமதி பெற்று தண்ணீர் எடுத்தாலும் ஒரு நாளைக்கு 20,000 லிட்டர் தண்ணீர் எடுக்க மட்டுமே அனுமதி உள்ளது. அதில், 50 சதவீதம் குடிநீராகவும், 50 சதவீதம் வேஸ்ட்டாக வீணாகி, அதனை மறுசுழற்சிக்கும், பிற பயன்பாட்டுக்கும் வழங்குகிறோம். இந்த குறைந்த அளவை வைத்து எந்த குடிநீர் ஆலைகளையும்  செயல்படுத்த முடியாது.
 

ஒரு ஆலை செயல்பட வேண்டும் என்றால் அதில் 55 வகையான பரிசோதனைகளும் 15க்கும் மேற்பட்ட அனுமதி யையும் பெற்றுள்ளோம். இதில் நிலத்தடி நீர் அனுமதியையும் நாங்கள் பெறுவதற்கு தான் விரும்புகிறோம். எங்கள் பயன்பாட்டுக்கு ஏற்ற கட்டணம் வசூலிக்கும் வகையில் சென்ற 2017 க்கு முன்பு துவங்கிய தொழிற்சாலைகளுக்கு இந்த விதிகளை தளர்த்தி எங்களுக்கு அனுமதி தர வேண்டும்.


 

தமிழ்நாடு முழுக்க பல லட்சம் பேரின் வாழ்வாதாரம், மட்டுமல்ல லட்சக்கணக்கான  மக்களின் குடிநீர் தேவையும் தடைபடும். மேலும் இந்த சூழ்நிலையை பயன்படுத்தி கொண்டு போலியான குடிநீர் நிறுவனங்கள், மினரல் வாட்டர் நிறுவனங்கள், முறைப்படி சுத்திகரிக்காத நீரை வழங்கும் நிலைதான்  ஏற்படும். மாநகராட்சி மூலம், குறைந்த தொகையில் வழங்கப்படும் சுத்திகரிக்கப்பட்ட நீருக்கு வெறும் ஒரிரு பரிசோதனை மட்டுமே செய்கிறார்கள் ஆனால் நாங்கள் அப்படியல்ல முறைப்படி நீரை சுத்திகரிக்கிறோம் என்றார்.
 

நீதிமன்ற உத்தரவு அதனால் மினரல் வாட்டர் கம்பெனிகள் நெருக்கடி என்பது ஒரு புறம் இருந்தாலும் இது கார்ப்பரேட் கம்பெனிகளுக்கு அவர்களின் வணிகத்திற்கு வாய்ப்பு அளிப்பதாக அமைந்துவிடுகிறது எனக் கூறிய உற்பத்தியாளர் ஒருவர், சிறிய நிறுவனங்களை கபளீகரம் செய்து பெரும் முதலாளிகளை கொண்ட கார்ப்பரேட் கம்பெனி ஒட்டுமொத்த குத்தகையாக இந்த குடிநீர் உரிமை பெறுவதற்காக இப்படி எல்லாம் நடக்கிறதோ  என நாங்கள் அஞ்சுகிறோம் என்றார்.
 

பெட்டிக்கடைகளை ஒழித்து சூப்பர் ஸ்டோர் அல்லது டிபாட்மென்ட் ஸ்டோர்கள் வந்தன பிறகு இதையும் நசுக்கி இப்போது நகரங்களில் மால் வந்து விட்டது. அப்படித்தான் குடிநீர் உரிமையும் செல்லப் போகிறது. குடிநீரையும் பெரு முதலாளியே எடுத்துக் கொண்டால் மிஞ்சி இருப்பது நாம் சுவாசிக்கும் காற்று தான் அதற்கும் நம் ஆட்சியாளர்கள் ப்ளான் போட்டு வைத்திருப்பார்கள் தான்.


 

சார்ந்த செய்திகள்

 

Next Story

காவிரி விவகாரம்; கர்நாடக காங்கிரஸ் அரசுக்கு எடப்பாடி பழனிசாமி கண்டனம்!

Published on 12/07/2024 | Edited on 12/07/2024
Edappadi Palaniswami condemns Karnataka Congress government!

தமிழகத்திற்கு நாள் ஒன்றுக்கு 1 டிஎம்சி தண்ணீர் திறக்க வேண்டும் என்று காவிரி ஒழுங்காற்று குழு பரிந்துரை செய்திருந்தது. இந்த நிலையில் கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. இதையடுத்து, தமிழகத்திற்குத் தண்ணீர் தரவே முடியாது என்று கர்நாடக முதல்வர் சித்தராமையா திட்டவட்டமாகத் தெரிவித்துள்ளார்.

இது தொடர்பாகச் செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார். 

தமிழகத்திற்குத் தண்ணீர் தர மறுக்கும் கர்நாடக காங்கிரஸ் அரசுக்கு தமிழக எதிர்க்கட்சி தலைவர் எடப்பாடி பழனிசாமி கண்டனம் தெரிவித்துள்ளார். இது தொடர்பாக அவர் வெளியிட்ட பதிவில், “கர்நாடக அணைகளில் இருந்து தமிழகத்திற்கு காவிரியில் நாளொன்றுக்கு ஒரு டி.எம்.சி வீதம் ஜூலை 31 வரை தண்ணீர் திறந்துவிடவேண்டும் என்ற காவிரி ஒழுங்காற்றுக் குழுவின் உத்தரவை ஏற்க மறுக்கும் கர்நாடக காங்கிரஸ் அரசின் போக்கு கடும் கண்டனத்திற்குரியது. காவிரி ஆறு பாயும் மாநிலங்களின் எண்ணங்களை கருத்திற்கொண்டு பிறப்பிக்கப்பட்டுள்ள உத்தரவை கர்நாடக அரசு ஏற்காமல் முரண்டு பிடிப்பது ஏற்கத்தக்கதல்ல.

விளம்பர போட்டோ ஷூட்டில் மட்டுமே கவனம் செலுத்தும் திமுக முதல்வர், காங்கிரசின் தயவிற்காக தமிழ்நாட்டின் ஜீவாதார உரிமையை விட்டுக்கொடுப்பது அவரின் தொடர் செயலற்றத்தன்மை மூலம் தெளிவாகத் தெரிகிறது. மேடையில் மட்டும் மாநில உரிமை பற்றி வாய் கிழிய பேசும் திமுக அரசின் முதல்வர் தன்னுடைய செயலற்ற தன்மையால், தமிழக மக்களின் வாழ்வோடு விளையாடி வருவது கடும் கண்டனத்திற்குரியது.

டெல்டா விவசாயிகள் நலனைக் கருத்திற்கொண்டு உடனடியாக காவிரி விவகாரத்தில் தீர்க்கமான நடவடிக்கைகளை மேற்கொண்டு தமிழ்நாட்டிற்கு உரித்தான நீரைப் பெறுமாறு திமுக முதல்வரை வலியுறுத்துகிறேன்” எனத் தெரிவித்துள்ளார். 

Next Story

மாற்றுத்திறனாளி கோரிக்கையை நிராகரித்த அரசு; நிறைவேற்றிய நடிகர் பாலா!

Published on 11/07/2024 | Edited on 11/07/2024
Actor Bala who helped a special person by buying a three-wheeler

ஈரோடு கிருஷ்ணம்பாளையம் பகுதியைச் சேர்ந்தவர் விஜயகுமார். இவரது மாற்றுத்திறனாளி மனைவியான பிரேமா என்பவர் ஈரோடு ஈஸ்வரன் கோவில் வீதியில் உள்ள ஜவுளி கடைக்கு வேலைக்கு சென்று வருகிறார்.இதையடுத்து 3 வயது முதல் போலியோவால் பாதிக்கப்பட்டு மாற்றுத்திறனாளியான இவர் தினந்தோறும் வீட்டில் இருந்து பேருந்து மூலம் வேலைக்கு செல்ல 2.கி.மீதூரம் நடந்து சென்று பேருந்து மூலம் வேலைக்கு சென்று வருகிறார். 60சதவீதம் மாற்றுத்திறனாளியான இவர் அரசு சமூக நலத்துறையில்  கடந்த 8வருடங்களாக மாற்றுத்திறனாளிகளுக்கான வாகனம் கேட்டு விண்ணப்பம் செய்த நிலையில் நான்குமுறை விண்ணப்பம் நிராகரிக்கப்பட்டது. இதனால் காலை-மாலை வேலைக்கு சென்று வருவதற்கு மிகுந்த சிரமத்தை சந்தித்து வந்தார்.

இந்நிலையில் ஈரோட்டில் தனியார் நிகழ்ச்சியில் ஒன்று பங்கேற்பதற்காக தனியார் ஹோட்டலில் தங்கி இருந்த நடிகர் பாலாவை உணர்வுகள் அமைப்பு மூலம் மாற்றுத்திறனாளி வாகனம் கேட்டு கோரிக்கை மனு அளித்தார்.இதையடுத்து மாற்றுத்திறனாளி பெண்ணின் மனுவை பெற்று கொண்ட பாலா நிகழ்ச்சிக்கு சென்று விட்டார்.இதன் பின்னர் மாற்றுத்திறனாளி பிரேமாவும் வீட்டிற்கு சென்று விட்டார்.இதற்கிடையே நிகழ்ச்சி முடிவடைவதற்குள் நடிகர் பாலா உணர்வுகள் அமைப்பினரிடம் நிதி கொடுத்து 50ஆயிரம் ரூபாய் மதிப்புள்ள மாற்றுத்திறனாளி வாகனத்தை வாங்கி வீட்டிற்கு கொண்டு செல்ல அறிவுறுத்தினார்.

இதையடுத்து நிகழ்ச்சி நிறைவடைந்த பின்பு நடிகர் பாலா மாற்றுத்திறனாளி பெண் பிரேமா வீட்டிற்கு நேரடியாக சென்று மாற்றுத்திறனாளிக்கு மூன்று சக்கர வாகனத்தை வழங்கி ஆச்சரியத்தை ஏற்படுத்தினார்.இதனால் ஆனந்த கண்ணீருடன் நடிகர் பாலாவுக்கு மாற்றுத்திறனாளி பெண் மற்றும் கணவர் நன்றி தெரிவித்தனர்.இதையடுத்து தனது வீட்டிற்குள் பாலாவை அழைத்து தண்ணீர் வழங்கி உபசரிப்பு செய்தார். மாற்றுத்திறனாளி பெண் வார்த்தைகளால் விவரிக்க முடியாமல் சந்தோஷத்தில் திளைத்தப்படி பாலாவுக்கு மீண்டும் மீண்டும் நன்றியை தெரிவித்தார்.மேலும் இந்த வாகனம் எவ்வளவு பெரிய உதவியாக இருப்பதுடன் வாழ்க்கையை  மேம்படுத்த எந்த அளவு உதவியாக இருக்கும் என்று கண்ணீர் மூலம் விவரித்தார்.

இதன் பின்னர் செய்தியாளர்களிடம் பேசிய நடிகர் பாலா, “அரசுக்கு அறிவுரை வழங்கும் வகையில் எனக்கு தகுதி இல்லை. என்னிடம் இருந்தால் உதவி செய்வேன். பெரிய அளவில் நலத்திட்ட உதவிகள் செய்வதற்கு நடவடிக்கை எடுத்து கொண்டு இருக்கிறேன். முன்பு வழங்கிய இலவச ஆம்புலன்ஸ் சேவை நல்ல முறையில் மக்கள் மத்தியில் வரவேற்பு பெற்றுள்ளது” என்றார். 

இது குறித்து மாற்றுத்திறனாளி பெண் பிரேமா கூறுகையில், “44வயது காரணமாக பேருந்தில் பயணம் செய்ய முடியவில்லை. அரசியல் கட்சி பிரமுகர்கள் மூலமாகவும் வாகனம் கேட்டும் கிடைக்கவில்லை. இரட்டை பெண் குழந்தைகள் வைத்துக் கொண்டு வாழ்வாதாரத்தை நடத்துவதற்கு சிரமத்தை சந்தித்து வரும் நிலையில் பாலாவின் உதவி பெரும் உதவியுடன் புதிய நம்பிக்கையாக உள்ளது” எனத் தெரிவித்தார். மாற்றுத்திறனாளி பெண் ஒருவர் கோரிக்கை மனு அளித்து சில மணி நேரத்தில் கோரிக்கை நிறைவேற்றிய நடிகர் பாலாவின் செயல் அப்பகுதியில் காண்போரை நெகிழ்ச்சி யில் ஆழ்த்தியது.