Skip to main content

சென்னையில் மருத்துவர் தற்கொலை; சிக்கிய உருக்கமான கடிதம்

Published on 23/08/2023 | Edited on 23/08/2023

 

Tragedy befell a doctor in Chennai; Trapped letter

 

சென்னை ஆழ்வார்பேட்டை டி.டி.கே. சாலையைச் சேர்ந்தவர் கார்த்தி(42). இருதய அறுவை சிகிச்சை நிபுணரான இவர், சென்னை மருத்துவக் கல்லூரியில் பேராசிரியராகப் பணியாற்றி வந்தார். இவர், ஆழ்வார்பேட்டை டி.டி.கே சாலையில் உள்ள தனது தாய் மாமாவின் அடுக்குமாடிக் குடியிருப்பில் வசித்து வந்தார். இவருடைய தந்தை உலகநாதன், மருத்துவராகப் புதுச்சேரியில் வசித்து வருகிறார். கார்த்தியின் தாய் கஸ்தூரிக்கு முதுமை காரணமாக உடல் நலக்குறைவு ஏற்பட்டு மருத்துவமனையில் சிகிச்சை பெற்று வருகிறார். கார்த்தியின் தங்கை தீபா, அமெரிக்காவில் மருத்துவராகப் பணியாற்றி வருகிறார். மேலும், அவர் தனது கணவன் மற்றும் குழந்தைகளுடன் அமெரிக்காவிலேயே வசித்து வருகிறார்.

 

இந்த நிலையில், கார்த்தி அமெரிக்காவில் உள்ள தனது தங்கை தீபாவுடன் தினமும் செல்போனில் தொடர்பு கொண்டு பேசுவது வழக்கமாக வைத்துள்ளார். அதன் அடிப்படையில், கடந்த 19 ஆம் தேதி தீபா கார்த்திக்கை செல்போனில் அழைத்துள்ளார். ஆனால், அவர் அழைப்பை எடுக்கவில்லை. தொடர்ந்து இரண்டு நாள்களாக தன்னுடைய அண்ணன் கார்த்திக்கை அழைத்தும், அவர் அந்த அழைப்பை எடுக்கவில்லை. 

 

இதனால் சந்தேகம் அடைந்த தீபா, தன்னுடைய நண்பரான ஸ்ரீவித்யா என்பவரை தொடர்பு கொண்டுள்ளார். மேலும், அவரிடம் இது குறித்து தகவல் தெரிவித்து வீட்டுக்கு நேரில் சென்று பார்க்கும்படி கூறியுள்ளார். இதையடுத்து ஸ்ரீவித்யா, கார்த்தியின் வீட்டுக்குச் சென்று பார்த்தபோது வீடு திறந்த நிலையில் இருந்துள்ளது. மேலும், அவர் கதவைத் திறந்து வீட்டுக்கு உள்ளே சென்றபோது அதிகமாக துர்நாற்றம் வீசியிருக்கிறது.

 

இதனால் சந்தேகம் அடைந்த ஸ்ரீவித்யா, வீட்டின் அறைக்குச் சென்று பார்த்துள்ளார். அங்கு, கார்த்தி நாற்காலியில் உட்கார்ந்த நிலையிலேயே கைகளில் ரத்தம் வெளியேறியவாறு பிணமாகக் கிடந்துள்ளார். மேலும், கார்த்தியின் உடல் அழுகிய நிலையில் இருந்துள்ளது. இதனால், அதிர்ச்சியடைந்த ஸ்ரீவித்யா தேனாம்பேட்டை காவல்துறையினருக்கு உடனடியாக தகவல் கொடுத்தார். ஸ்ரீவித்யா கொடுத்த தகவலின் பேரில், உதவி ஆணையர் பிரகாஷ்ராஜ், காவல் ஆய்வாளர் ஆனந்த் பாபு, உதவி ஆய்வாளர் கார்த்திகேயன் சம்பவ இடத்திற்கு விரைந்து சென்றனர்.

 

அங்கு சென்ற காவல்துறையினர்,  கார்த்தி தனது இரண்டு கைகளிலும் டிரிப்ஸ் ஏற்றும் ஊசியால் குத்தப்பட்டு, உடலில் இருந்து ரத்தம் வெளியேறி அறை முழுக்கச் சிதறி இருந்துள்ளதைப் பார்த்துள்ளனர். அதன் பின்னர் உயிரிழந்த கார்த்தியின் உடலை மீட்டு பிரேதப் பரிசோதனைக்காக ஓமந்தூரார் அரசு மருத்துவமனைக்கு அனுப்பி வைத்தனர். அதனைத் தொடர்ந்து, காவல்துறையினர் கார்த்தியின் வீட்டில் சோதனை நடத்தினர். அப்போது, கார்த்தி இறப்பதற்கு முன்பு தன் கைப்பட எழுதி அறையில் வைத்திருந்த ஒரு கடிதத்தைக் கைப்பற்றினர். அந்தக் கடிதத்தில், “எனது வாழ்க்கை அழகாக முடிவுக்கு வந்தது. எனது சாவுக்கு யாரும் காரணம் இல்லை” என்று எழுதப்பட்டிருந்திருக்கிறது.

 

இந்த சம்பவம் தொடர்பாக தேனாம்பேட்டை காவல்துறையினர் வழக்குப்பதிவு செய்து விசாரணை நடத்தினர். அவர்கள் நடத்திய விசாரணையில், கார்த்தி பொதுமக்களுக்கு சேவை செய்யும் மனப்பான்மையால் திருமணம் செய்து கொள்ளாமல் வாழ்ந்துள்ளார். மேலும், கொரோனா பேரிடர் காலத்தில் செங்கல்பட்டு அரசு மருத்துவமனையில் வேலை பார்த்து வந்துள்ளார். அப்போது, அவருக்கு 3 முறை கொரோனா தொற்று ஏற்பட்டு சிகிச்சை பெற்றுள்ளார். கடந்த 6 மாதங்களுக்கு முன்பு உதவிப் பேராசிரியராக ராஜீவ் காந்தி அரசு மருத்துவக் கல்லூரியில் பணியில் சேர்ந்துள்ளார். இதனையடுத்து, சில மாதங்களாக இதயத்தில் ஏற்பட்ட பிரச்சனை தொடர்பாக சிகிச்சை பெற்று வந்துள்ளார் என்று  காவல்துறையினருக்குத் தெரியவந்தது. இதனையடுத்து, கார்த்தியின் இறப்பு குறித்து பல்வேறு கோணங்களில் தேனாம்பேட்டை காவல்துறையினர் தீவிர விசாரணை நடத்தி வருகின்றனர்.  மருத்துவ பேராசிரியர் ஒருவர் வீட்டில் பிணமாகக் கிடந்த சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.

 

 

சார்ந்த செய்திகள்

 

Next Story

காணாமல் போன இளம்பெண்; கண்டுபிடித்துத் தரக்கோரி காவல் நிலையம் முற்றுகை

Published on 23/07/2024 | Edited on 23/07/2024
Missing Girl; Find out and lay siege to the police station

புதுக்கோட்டை மாவட்டம் ஆலங்குடி காவல் சரகத்திற்கு உட்பட்ட ஒரு கிராமத்தைச் சேர்ந்த 19 வயது இளம்பெண் கடந்த 19 ந் தேதி திடீரென காணாமல் போன நிலையில் உறவினர், தோழிகள் வீடுகளில் எல்லாம் தேடிய உறவினர்கள் ஆலங்குடி காவல் நிலையத்தில் புகார் கொடுத்துள்ளனர். பெண்ணை காணவில்லை என்று பெற்றோர் புகார் கொடுத்திருந்த நிலையில் ஆலங்குடி போலீசார் அந்த பெண் பயன்படுத்திய செல்போன் எண் அணைத்து வைக்கப்பட்டிருந்ததால் அவர் யாருக்கெல்லாம் போனில் பேசியுள்ளார் என்ற விபரங்களை சேகரித்து சில குறிப்பிட்ட எண்ணில் உள்ளவர்களிடம் விசாரணை செய்து வருகின்றனர்.

இந்நிலையில் புகார் கொடுத்து சில நாட்களாகியும் இளம்பெண்ணை கண்டுபிடித்துத் தரவில்லை என்று இன்று செவ்வாய்க் கிழமை மாலை ஆலங்குடி காவல் நிலையம் முன்பு திரண்ட இளம்பெண்ணின் உறவினர்கள் ஆண்கள் பெண்கள் என ஏராளமானோர் முற்றுகை போராட்டத்தில் ஈடுபட்டனர். இதையடுத்து நடந்த சமாதானப் பேச்சுவார்த்தையில் செல்போன் விபரங்கள் சேகரிக்கப்பட்டு தொடர் விசாரனை நடப்பதால் விரைவில் மீட்கப்படுவார் என்று போலீசார் உறுதி அளித்ததால் முற்றுகை போராட்டத்தை கைவிட்டு கலைந்து சென்றனர். இதனால் அங்கு சிறிது நேரம் பரபரப்பு ஏற்பட்டிருந்தது.

Next Story

வேட்டைத் துப்பாக்கி வெடித்து இளைஞர் பலி; துப்பாக்கியைத் தேடும் போலீசார்

Published on 23/07/2024 | Edited on 23/07/2024
Hunting gun blast passed away youth

புதுக்கோட்டை மாவட்டம் இலுப்பூர் அருகே உள்ள வேப்பவயல் கிராமத்தைச் சேர்ந்த பழனிச்சாமி மகன் லட்சுமணன்(20), அதே கிராமத்தைச் சேர்ந்த அவரது நண்பர் சரவணன் மற்றும் அவரது மாமா தேக்கமலை ஆகியோர் நாட்டுத் துப்பாக்கியை பயன்படுத்தி காடுகளில் வேட்டையாடுவது வழக்கமாக இருந்துள்ளது. இதனால் இவர்கள் நாட்டுத்துப்பாக்கி வைத்திருந்ததாக கூறப்படுகிறது.

Hunting gun blast passed away youth

தற்போது, அந்த நாட்டுத் துப்பாக்கியில் வெடி மருந்து செலுத்தி சுட முயன்ற போது சுடமுடியவில்லை. காரணம் வெடிமருந்து செலுத்தும் பகுதியில் உள்ள ஓட்டை பெரிதாக இருந்ததால் அந்த ஓட்டையை அடைத்து சிறியதாக்குவதற்காக அதே கிராமத்தில் உள்ள ஆறுமுகம் என்பவருக்கு சொந்தமான வெல்டிங் பட்டறையில் வெல்டு வைக்க கொண்டு சென்றுள்ளனர். ஆறுமுகம் வெல்டிங் செய்த போது துப்பாக்கு இரும்பு குழாய் அதிக சூடாகி ஏற்கனவே துப்பாக்கி குழாயில் செலுத்தப்பட்டிருந்த வெடி மருந்துடன் துப்பாக்கி வெடித்து சிதறியுள்ளது. 

துப்பாக்கி வெடித்து சிதறிய இந்த சம்பவத்தில் லட்சுமணன் படுகாயம் அடைந்ததை தொடர்ந்து அவரை அருகே இருந்தவர்கள் மீட்டு திருச்சியில் உள்ள தனியார் மருத்துவமனைக்கு சிகிச்சைக்காக அனுப்பி வைத்துள்ளனர். ஆனால் அங்கு சிகிச்சை பலனின்றி லட்சுமணன் உயிரிழந்த நிலையில் இந்த சம்பவம் குறித்து இலுப்பூர் போலீசார் வழக்கு பதிவு செய்து விசாரணையை தொடங்கியுள்ளனர்.

மேலும், சம்பவத்தின் போது லட்சுமணன் கூட இருந்த சரவணன் மற்றும் அவரது மாமா தேக்கமலை ஆகிய இருவரை கைது செய்த போலீசார் அவர்களிடம் விசாரணை மேற்கொண்டு வரும் நிலையில் வெல்டிங் பட்டறை உரிமையாளர் ஆறுமுகம் தலைமுறைவாக உள்ளதால் அவரைத் தேடி வருகின்றனர்.  வெல்டிங் செய்யும் போது வெடித்து லெட்சுமணன் உயிர் போக காரணமாக இருந்த வேட்டைக்கு பயன்படுத்தும் நாட்டுத் துப்பாக்கியையும் தேடி வருகின்றனர்.

Hunting gun blast passed away youth

சம்பவ இடத்திற்கு வந்த திருச்சி சரக டிஐஜி மனோகர், புதுக்கோட்டை மாவட்ட காவல் கண்காணிப்பாளர் வந்திதா பாண்டே, இலுப்பூர் கோட்டாட்சியர் பெரியநாயகி, வட்டாட்சியர் சூரியபிரபு உள்ளிட்ட அதிகாரிகள் சம்பந்தப்பட்ட கிராமத்தில் விசாரணை மேற்கொண்டு சம்பவ இடத்தை பார்வையிட்டனர். வேட்டைக்கு பயன்படுத்தும் நாட்டுத் துப்பாக்கி வெடித்து இளைஞர் லட்சுமணன் உயிரிழந்த சம்பவம் பெரும் அதிர்ச்சியை ஏற்படுத்தி உள்ள சூழ்நிலையில் அவர்களுக்கு துப்பாக்கி எவ்வாறு வந்தது? யார் செய்து கொடுத்தது? என்பது குறித்தும் அது எவ்வாறு வெடித்தது என்பது குறித்தும் தொடர்ந்து போலீசார் விசாரணை மேற்கொண்டு வருகின்றனர்.