Skip to main content

கஞ்சா போதையில் அடித்துக் கொண்ட யாசகர்கள் - அலறியடித்து ஓடிய கிரிவல பக்தர்கள்

Published on 16/06/2024 | Edited on 16/06/2024
thiruvannamalai incident;Screaming Krivala devotees

திருவண்ணாமலை நகரில் கஞ்சா அதிகமாகிவிட்டது என்கிற புகாரின் அடிப்படையில் காவல்துறையினர் தொடர்ச்சியாக ரெய்டு செய்து கஞ்சா விற்பனையாளர்ளைப் பிடித்து சிறையில் அடைத்து வருகின்றனர். கடந்த வாரத்தில் 5 பெண்கள் உள்பட 12 பேரை கைது செய்துள்ளனர். அப்படியிருந்தும் திருவண்ணாமலை நகரிலேயே கஞ்சா விற்பனையைத் தடுக்க முடியாமல் தோல்வியடைந்துள்ளது காவல்துறை.

திருவண்ணாமலை அண்ணாமலையார் மலைக் கிரிவலத்துக்கு தினமும் ஆயிரக்கணக்கான பக்தர்கள் வருகின்றனர். வார இறுதி நாட்களில் அது நான்கு மடங்காக உயர்ந்துள்ளது. இரவு நேரத்தில் வெளிமாநில பக்தர்கள் பக்தியுடன் கிரிவலம் வருகின்றனர்.

ஜூன் 14ஆம் தேதி இரவு 9.0 மணியளவில் கிரிவலப்பாதை சூரிய லிங்கம் அருகே சாமியார்கள் என்கிற யாசகர்கள் சிலர் ரோட்டில் ஓட ஓட அடித்துக்கொண்டனர். அதோடு கிரிவலம் வந்த பக்தர்கள் மீது கற்களை வீசியதாகக் கூறப்படுகிறது. அவர்கள் அனைவரும் கஞ்சா போதையில் இருந்துள்ளனர், அவர்களுக்குள் ஏதோ தகராறு உருவாக கஞ்சா போதையில் இந்த யாசகர்கள் அடித்துக்கொண்டது கிரிவலப்பாதையில் சென்ற பக்தர்களை அதிர்ச்சியடையச் செய்துள்ளது.

சாலையோரம் பக்தர்கள் நடந்து செல்ல நடைபாதை அமைக்கப்பட்டுள்ளது. அதோடு பக்தர்கள் கால்வலியை போக்க அமர்வதற்காக சாய்வு பெஞ்சுகளும், மழை, வெயிலுக்கு ஒதுங்கி நிற்க நிழற்கூடம் அமைக்கப்பட்டுள்ளது. இதனை யாசகர்கள் ஆக்கிரமித்து தங்களுக்கான வாழ்விடமாக வைத்துக்கொண்டு பக்தர்களிடம் யாசகம் பெறுகின்றனர். இவர்கள் பக்தி மார்க்கத்தில் இருக்கிறார்கள் என பலரும் மூன்று வேளையும் இலவசமாக உணவு, காபி தருகிறார்கள். யாசகம் பெறும் பணத்தில் கஞ்சா, மது போன்ற போதைப் பொருட்களை வாங்கி உட்கொண்டுவிட்டு கிரிவலப்பாதையில் அட்டகாசம் செய்வதாகக் கூறப்படுகிறது.

யாசகர்கள் அடித்துக் கொள்வது குறித்து காவல்துறையினருக்கு தகவல் சொல்ல தொடர்புகொண்டபோது யாரும் போன் எடுக்கவில்லையாம். இவர்கள் அடித்துக்கொண்டு கொலையாகிவிடுமோ என மாவட்ட எஸ்.பி கார்த்திகேயன் எண்ணுக்கு தொடர்பு கொண்டுள்ளார்கள், அவரும் ஃபோன் எடுக்கவில்லையாம். சுமார் 1 மணி நேரத்திற்கு மேலாக யாசகர்கள் அடித்துக்கொண்டு சண்டை போட்டார்கள் என்கிறார்கள் அப்போது வாக்கிங் சென்றவர்களும், அங்கு கடை வைத்திருப்பவர்களும்.

கிரிவலம் பாதுகாப்புக்கு என 24 மணி நேர இருசக்கர வாகன ரோந்து படை அமைக்கப்பட்டது. தொடக்கத்தில் கிரிவலப்பாதையில் ரவுண்ட்ஸ் வந்து கொண்டே இருப்பார்கள். தவறு செய்பவர்களை எச்சரித்தார்கள், பல சம்பங்கள் இதனால் தடுக்கப்பட்டது. கழுதை தேய்ந்து கட்டெறும்பான கதையாக இப்போது ரவுண்ட்ஸ் சரியாக வருவதில்லை என்கிறார்கள். இதனால் கஞ்சா, மது குடித்துவிட்டு இவர்களுக்குள் அடிக்கடி சண்டை போட்டுக் கொள்வார்கள் என்கின்றனர்.

 

 நடவடிக்கை எடுக்குமா காவல்துறை?

சார்ந்த செய்திகள்

 

Next Story

ஆம்ஸ்ட்ராங் கொலை வழக்கு; பாஜக நிர்வாகி அஞ்சலை கைது

Published on 19/07/2024 | Edited on 19/07/2024
nn

தமிழக பகுஜன் சமாஜ் கட்சியின் மாநில தலைவர் ஆம்ஸ்ட்ராங் கடந்த 5 ஆம் தேதி (05.07.2024) இரவு பெரம்பூரில் உள்ள அவரது வீட்டின் அருகே 6 பேர் கொண்ட மர்ம கும்பலால் வெட்டி படுகொலை செய்யப்பட்டார். இது தொடர்பாக சரணடைந்த ஆற்காடு சுரேஷின் தம்பி பொன்னை பாலு, ராமு, திருவேங்கடம், திருமலை, செல்வராஜ், மணிவண்ணன், சந்தோஷ், அருள், கோகுல், விஜேஷ், சிவசக்தி ஆகிய 11 நபர்களும் போலீசார் கஸ்டடியில் எடுக்கப்பட்டு விசாரணை நடைபெற்றது. இத்தகைய சூழலில் இந்த வழக்கில் தொடர்புடைய முக்கிய குற்றவாளியான பிரபல ரவுடி திருவேங்கடம் 14.07.2024 அன்று அதிகாலை என்கவுன்டர் செய்யப்பட்டது பரபரப்பை ஏற்படுத்தியது.

மீதமுள்ள 10 பேர் பூவிருந்தவல்லி தனி கிளைச் சிறையில் அடைக்கப்பட்டுள்ளனர். தொடர்ச்சியாக இந்த கொலை சம்பவம் தொடர்பாக அரசியல் கட்சியில் தொடர்புடையவர்கள் கைது செய்யப்பட்டு வருகின்றனர்.  இதில் வழக்கறிஞர் ஹரிஹரன் என்பவரும், தாதாவின் மனைவி மலர்க்கொடி என்பவரும் கைது செய்யப்பட்டதாக தகவல்கள் வெளியாகி இருந்தது. இந்த கொலை தொடர்பாக பாஜகவினுடைய வட சென்னை மேற்கு மாவட்ட துணைத் தலைவர் பதவியிலிருந்த அஞ்சலை என்பவரை போலீசார் தேடிவந்தனர். 

nn

தொடர்ந்து பாஜகவின் வட சென்னை மேற்கு மாவட்ட துணைத் தலைவர் பதவியில் இருந்து அஞ்சலை நீக்கப்படுவதாக கட்சியின் மாநில துணைத் தலைவர் கரு நாகராஜன் பாரதிய ஜனதா கட்சி சார்பில் அறிக்கை ஒன்றை வெளியிட்டிருந்தார். இந்நிலையில் ஆம்ஸ்ட்ராங் வழக்கு தொடர்பாக தேடப்பட்டு வந்த முன்னாள் பாஜக நிர்வாகி அஞ்சலை கைது செய்யப்பட்டுள்ளதாக தகவல்கள் வெளியாகியுள்ளது. அதேநேரம் ஐஸ் ஹவுஸ் பகுதியைச் சேர்ந்த எல்லப்பன் என்ற ரவுடியையும் பிடித்து போலீசார் விசாரணை மேற்கொண்டு வருவதாகவும் தகவல்கள் வெளியாகி உள்ளது.

Next Story

மாற்றுத்திறனாளி பெண் பாலியல் வன்கொடுமை செய்யப்பட்டு கொலை? - அதிரவைக்கும் சோக சம்பவம்

Published on 19/07/2024 | Edited on 19/07/2024
A disabled woman was assaulted?-A shocking incident


ஈரோடு மாவட்டம் நம்பியூர் அருகே உள்ள பூசாரிப்பாளையம் எம்.ஜி.ஆர்.நகரைச் சேர்ந்தவர்கள் ராமன்-பழனாள் தம்பதி. மனைவி பழனாள் அஞ்சனூர் ஊராட்சியில் தூய்மைப் பணியாளராக வேலை பார்த்து வருகிறார். இவர்களுக்கு 4 மகள்களும், ஒரு மகனும் உள்ளனர். இதில் மூன்று மகளுக்கும், ஒரு மகனுக்கும், திருமணமாகி தனித்தனியாக வசித்து வருகின்றனர்.

கடைசி மகள் கவிதாவுக்கு (பெயர் மாற்றப்பட்டுள்ளது) 32 வயது ஆகிறது மாற்றுத்திறனாளியான இவருக்கு இன்னும் திருமணம் ஆகவில்லை. தாய் பழனாளுடன் வசித்து வருகிறார். இந்நிலையில் நேற்று மாலையில் கவிதா திடீரென மாயமானார். அவரை அவரது தாய் மற்றும் உறவினர்கள் பல்வேறு இடங்களில் தேடினர். எனினும் அவர் குறித்து எந்த ஒரு தகவலும் கிடைக்கவில்லை. நம்பியூர் அருகே இருகாலூர் சமத்துவபுரத்தில் உள்ள ரமேஷ் என்பவர் வீட்டின் கட்டிலில் கவிதா ஆடை இல்லாத நிலையில் இறந்து கிடந்துள்ளார். அவரது உடலை பார்த்து தாய் மற்றும் உறவினர்கள் கதறி அழுதனர்.

இதுகுறித்து தகவல் அறிந்ததும் நம்பியூர் போலீசார் சம்பவ இடத்துக்கு விரைந்து வந்து கவிதா உடலைக் கைப்பற்றி பிரேதப் பரிசோதனைக்காக கோபிசெட்டிபாளையம் அரசு மருத்துவமனைக்கு அனுப்பி வைத்தனர். ஆடைகளற்ற நிலையில் செல்லம்மாள் பிணமாக கிடந்ததால் அவர் பாலியல் வன்கொடுமை கொலை செய்யப்பட்டிருக்கலாம் என்ற சந்தேகத்தில் போலீசார் விசாரணை நடத்தினர்.

இந்நிலையில் கவிதா இறந்து கிடந்த வீட்டின் உரிமையாளர் ரமேஷ் தலைமறைவாகியுள்ளார். அவரைப் பிடிக்க போலீசார் தீவிர முயற்சி மேற்கொண்டு வருகின்றனர். பிரேதப் பரிசோதனை அறிக்கை முடிவு வந்த பிறகு தான் கவிதா எவ்வாறு இறந்தார்? என்ற விவரம் தெரிய வரும் என்று போலீசார் தெரிவித்துள்ளனர்.

The website encountered an unexpected error. Please try again later.