Skip to main content

“மனிதாபிமானமுள்ள ஒவ்வொருவருக்கும் தலைகுனிவு” - திருமாவளவன் கண்டனம்

Published on 20/01/2024 | Edited on 20/01/2024
Thirumavalavan MP condemns the beaten kallakurichi student issues

“மனிதாபிமானமுள்ள, மனித உரிமைகளில் நம்பிக்கையுள்ள ஒவ்வொருவருக்கும் தலைகுனிவை ஏற்படுத்தியுள்ளது” எனப் பட்டியலின மாணவி மீது நடத்தப்பட்ட வன்கொடுமை தாக்குதலுக்கு விசிக தலைவர் திருமாவளவன் எம்.பி கண்டனம் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், “கள்ளக்குறிச்சி மாவட்டம் உளுந்தூர்பேட்டை அருகேயுள்ள திருநருங்குன்றம் கிராமம், ஆதிதிராவிடர் சமூகத்தைச் சார்ந்த பள்ளி மாணவிக்கு நேர்ந்துள்ள வன்கொடுமைகள் மிகுந்த அதிர்ச்சியளிக்கிறது. பன்னிரண்டாம் வகுப்பை முடித்துள்ள மாணவி நீட் தேர்வு எழுதி மருத்துவம் பயிலும் கனவில் இருந்துள்ளார். அதற்காக அவர் வீட்டு வேலை செய்ய முடிவெடுத்து, திருவான்மியூர் பகுதியில் உள்ள அடுக்குமாடிக் குடியிருப்பில் உள்ள ஒரு வீட்டில் முகவர் ஒருவர் மூலம் வீட்டுப் பணியாளராக வேலைக்குச் சேர்ந்துள்ளார். வீட்டு உரிமையாளர் அன்டோ மதிவாணன் என்பவர் பல்லாவரம் தொகுதியைச் சார்ந்த திமுக சட்டமன்ற உறுப்பினரின் மகன் ஆவார். அவரது மனைவி மெர்லின் என்பவர் தான், மாணவியை குரூரமாகக் கொடுமைப் படுத்தியுள்ளார் எனத் தெரிய வருகிறது.

வீட்டு வேலைக்குச் சேர்ந்த நாளிலிருந்தே பல மாதங்களாக மாணவிக்கு சம்பளம் வழங்காமலும், அவரது குடும்பத்தினரைச் சந்திக்கவிடாமலும், ஒரு நாளைக்கு 16 மணி நேரம் வேலை வாங்கியதுடன், மனிதாபிமானமற்ற முறையில் அடித்துத் துன்புறுத்திக் கொடூரமாக வதைத்துள்ளாரென்று தெரியவருகிறது. இது மனிதாபிமானமுள்ள, மனித உரிமைகளில் நம்பிக்கையுள்ள ஒவ்வொருவருக்கும் தலைகுனிவை ஏற்படுத்தியுள்ளது. ஈவிரக்கமற்ற இச்செயலை விடுதலைச் சிறுத்தைகள் கட்சி வன்மையாகக் கண்டிக்கிறது.

பாதிக்கப்பட்ட மாணவியின் புகாரையடுத்து கணவன், மனைவி ஆகிய இருவர் மீதும் வன்கொடுமைத் தடுப்புச் சட்டத்தின் கீழ் வழக்குப் பதிவு செய்யப்பட்டுள்ளது. அரசியல் செல்வாக்குள்ள குடும்பமெனினும், காவல்துறை வழக்குப் பதிவு செய்திருப்பது சற்று ஆறுதல் அளிக்கிறது. பாதிக்கப்பட்ட மாணவி, கணவனால் கைவிடப்பட்ட ஒரு தாயின் அரவணைப்பில் வளர்ந்து மருத்துவராகும் கனவுடன் உழைத்திட வீட்டுப் பணியில் சேர்ந்துள்ளார். உழைத்துச் சம்பாதித்துப் படிக்கத் துடிக்கும் ஒரு ஏழைச் சிறுமியை ஊக்கப்படுத்த வேண்டிய பக்குவம் இல்லாமல், நெஞ்சில் ஈரமின்றி இவ்வாறு கொடுமைப்படுத்தும் இவர்களின் கொடிய போக்கு மிகுந்த அதிர்ச்சியளிக்கிறது.

கணவன் தனது மனைவியை அடிக்கவோ, பெற்றோர் தமது பிள்ளைகளை அடிக்கவோ, ஆசிரியர்கள் மாணவர்களை அடிக்கவோ கூடாது என்கிற 'மனித உரிமை' குறித்த விழிப்புணர்வு, உலகெங்கும் வளர்ந்துள்ள இக்காலச் சூழலில், இவர்களால் எப்படி இவ்வாறு நடந்து கொள்ளமுடிகிறது என்பது பேரதிர்ச்சி அளிக்கிறது. மாணவியை நள்ளிரவு வரை வேலை செய்யச்சொல்லி அடித்ததுடன், சாதியைச் சொல்லியும் இழிவுபடுத்தி கொடுமைப்படுத்தியதாகவும் சொல்லி அந்த மாணவி கதறுவது நெஞ்சை உலுக்குகிறது. இந்நிலையில், குற்றம் சாட்டப்பட்டுள்ளவர்களைக் கைது செய்வது உள்ளிட்ட சட்டப்படியான நடவடிக்கைகளில் அரசு உறுதியாக இருக்க வேண்டுமென வலியுறுத்துகிறோம்.

பதினெட்டு வயதுக்கும் கீழாகவுள்ள சிறுவர்களை வேலைக்கு அமர்த்தும் குற்றச் செயல்களைத் தடுத்திட அரசு உரிய நடவடிக்கைகளை மேற்கொள்ள வேண்டும். தமிழ்நாடு தழுவிய அளவில் இது குறித்து விரிவான புலனாய்வை மேற்கொள்ள நீதிபதி ஒருவரின் தலைமையிலான ஆணையம் ஒன்றை அமைத்திட வேண்டுமெனவும் விசிக சார்பில் கேட்டுக்கொள்கிறோம். பாதிக்கப்பட்ட மாணவிக்கு வன்கொடுமைத் தடுப்புச் சட்டப்படி அளிக்க வேண்டிய இழப்பீட்டை வழங்குவதுடன், அவருடைய மருத்துவக் கல்விக்கான கனவை நனவாக்கிட ஆவன செய்ய வேண்டுமெனவும் தமிழ்நாடு அரசுக்கு விசிக சார்பில் கோரிக்கை விடுக்கிறோம்” எனக் குறிப்பிடப்பட்டுள்ளது.

சார்ந்த செய்திகள்

Next Story

'அம்பேத்கர் விரும்பிய ஜனநாயகத்தை பாதுகாக்க இந்தியா கூட்டணி வெல்ல வேண்டும்'-திருமாவளவன் பேச்சு

Published on 14/04/2024 | Edited on 14/04/2024
 'The India alliance must win to protect the democracy Ambedkar wanted' - Thirumavalavan speech

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி, முதற்கட்டமாக ஏப்ரல் 19 ஆம் தேதி தமிழகத்தில் வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே அரசியல் கட்சிகள் தேர்தல் பணிகளில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது. அதே சமயம் தமிழக அரசியல் கட்சிகள் வேட்பாளர்களை அறிவித்து பிரச்சாரங்களை தொடங்கியுள்ளன.

இந்தியா கூட்டணி சார்பில் சிதம்பரம் தொகுதியில் போட்டியிடும் விடுதலை சிறுத்தைகள் கட்சியின் வேட்பாளரும் சிதம்பரம் நாடாளுமன்ற உறுப்பினருமான திருமாவளவன் ஞாயிற்றுக்கிழமை காட்டுமன்னார்கோவில் அருகே உள்ள வீராணநல்லூர் பகுதியில் தனது தேர்தல் பிரச்சாரத்தை தொடங்கினார். அப்போது டாக்டர் அம்பேத்கரின் 133 வது பிறந்த நாளில் அங்குள்ள அவரது திருவுருவ சிலைக்கு கூட்டணி கட்சியினருடன் மாலை அணிவித்து மரியாதை செலுத்தி தமிழக அரசு வகுத்துள்ள சமத்துவம் குறித்த உறுதிமொழியை அவர் வாசிக்க அனைவரும் உறுதிமொழி ஏற்றனர்.

இதனைத் தொடர்ந்து நாட்டார்மங்கலம், பழஞ்சநல்லூர், கருணாகரநல்லூர், அறந்தாங்கி, மாமங்கலம், கொண்ட சமுத்திரம், வடக்கு பாளையம், சோழத்தரம், குமாரக்குடி, கானூர், நாச்சியார் பேட்டை, திருமுட்டம், கள்ளிப்பாடி உள்ளிட்ட 25-க்கும் மேற்பட்ட கிராம பகுதிகளில் பானை சின்னத்திற்கு வாக்கு சேகரித்தார்.

வாக்கு சேகரித்து பேசிய அவர், 'அம்பேத்கரின் பிறந்தநாளில் அவர் வகுத்தளித்த அரசியலமைப்பு சட்டத்தையும், அவர் விரும்பிய சமத்துவத்தையும், ஜனநாயகத்தையும் பாதுகாக்க வேண்டுமானால் இந்தியா கூட்டணி வெற்றி பெற வேண்டும். நடப்பது சாதாரண தேர்தல் அல்ல நாட்டையும் நாட்டு மக்களையும் காக்கும் அறப்போர். முதல்வர் ஸ்டாலின், தலைவர் ராகுல் இணைந்து பாரதிய ஜனதா பாசிச அரசு தொடரக்கூடாது வீழ்த்தப்பட வேண்டும் என தேசிய அளவில் அமைக்கப்பட்ட வியூகம் தான் இந்தியா கூட்டணி.  இந்தியா கூட்டணி வெற்றி பெற்று ஆட்சி அமைக்க வேண்டும் என்றால் இங்கு  40 இடங்களிலும் வெற்றி பெற்றாக வேண்டும். சிதம்பரம் தொகுதி உட்பட 40 தொகுதியிலும் முதல்வர் தான் வேட்பாளர்' என பேசினார்.

விசிக காட்டுமன்னார்கோவில் எம்எல்ஏ சிந்தனைச்செல்வன், திமுக கடலூர் கிழக்கு மாவட்ட கழக பொருளாளர் எம்.ஆர்.கே.பி.கதிரவன், மார்க்சிஸ்ட் கம்யூனிஸ்ட் கட்சியின் மாவட்ட செயற்குழு உறுப்பினர் தேன்மொழி, கூட்டணி கட்சியினர் 200-க்கும் மேற்பட்டவர்கள் உடன் இருந்தனர்.

Next Story

“எடப்பாடிக்கு எட்டப்பன் வரலாறு தான் பொருந்தும்” - கே.பாலகிருஷ்ணன்

Published on 13/04/2024 | Edited on 13/04/2024
 history of Eddyappan is suitable for Edappadi palaniswami says K. Balakrishnan

புவனகிரி பேரூந்து நிலையம் அருகே இந்தியா கூட்டணியின் திமுக தலைமையில் விடுதலை சிறுத்தைகள் கட்சியின் தலைவர் தொல். திருமாவளவன் சிதம்பரம் நாடாளுமன்ற தொகுதியில்  பானை சின்னத்தில் போட்டியிடுகிறார். இவருக்கு ஆதரவு திரட்டி பானைச்சின்னத்திற்கு வாக்கு கேட்கும் வகையில் மார்க்சிஸ்ட் கம்யூனிஸ்ட் கட்சியின் சார்பில் தேர்தல் பிரச்சார பொதுக்கூட்டம் நடைபெற்றது. இந்த கூட்டத்திற்கு கட்சியின் மாவட்ட செயற்குழு உறுப்பினர் ஆர்.ராமச்சந்திரன் தலைமை தாங்கினார். புவனகிரி ஒன்றியச்செயலாளர் பி.ஜெ.ஸ்டாலின் வரவேற்றார்.

இதில் கட்சியின் மாநிலச் செயலாளர் கே.பாலகிருஷ்ணன் கலந்துகொண்டு பேசுகையில், “கடந்த 2019 ஆம் ஆண்டு தேர்தலில் திருமாவளவன் குறைந்த வாக்கில் வெற்றி பெற்றார். இந்த முறை வெற்றி பெறமாட்டார் எனக் கூறிவருகின்றனர்.  எதிரணியில் இருக்கிற கட்சிகள் எல்லாம் ஒன்றாக சேர்ந்தபோது கூட உங்களால் திருமாவளவனை தோற்கடிக்க முடியவில்லை.   இன்றைக்கு  ஒண்ணா இருந்த கூட்டணி உங்களுக்குள்ளேயே உடைந்து போய் கிடக்கிறது. அதிமுகவை பல்வேறு கூறுகளாக உடைத்த பெருமை தமிழக வரலாற்றில் எடப்பாடி பழனிசாமிக்கு சேரும். அதேபோல இந்த தேர்தலிலே, தேர்தலுக்குப் பிறகு அதிமுக என்கிற கட்சியினுடைய முடிவுரையை எழுதுகிற காரியத்தையும் அதே எடப்பாடி பழனிசாமி தான் செய்து கொண்டிருக்கிறார்.

 history of Eddyappan is suitable for Edappadi palaniswami says K. Balakrishnan

எடப்பாடி பழனிசாமி மோடியிடம் ஒட்டும் இல்லை, உறவும் இல்லை என பேசுகிறார். 5 ஆண்டு  ஆட்சியில்  மோடி செய்யக்கூடிய எல்லா பாவத்துக்கும்  பக்க பலமா இருந்தது நீங்கதானே. அந்தக் கொலைகார கூட்டத்திற்கு காவடி தூக்குனது நீங்க தான். இதையெல்லாம் செய்துவிட்டு நான் ஒரு விவசாயி எனக் கூறுகிறீர்கள்.  வெள்ளையனை எதிர்த்து போராடி தூக்கு மேடைக்கு சென்ற கட்டபொம்மனுக்கு ஒரு வரலாறு இருக்கும் என்று சொன்னால், அதனை காட்டிக் கொடுத்த எட்டப்பனுக்கும் ஒரு வரலாறு இருக்கத்தான் செய்கிறது.  உங்களுக்கு எட்டப்பன் வரலாறு தானே பொருந்தும். விவசாயிகளுக்கு எதிராக 3 வேளாண் சட்டங்களுக்கு  ஆதரவு அளித்தீர்கள். டெல்லியில் லட்சக்கணக்கான விவசாயிகள் போராட்டத்தில் ஈடுபட்டனர். இந்த சட்டத்தை நியாயப்படுத்தி அப்போது பேசினீர்கள். தமிழக முதல்வராக ஸ்டாலின் பொறுப்பேற்றவுடன் சட்டமன்றத்தில் இந்த 3 சட்டங்களையும் கிழித்து எறிய வேண்டும் என தீர்மானம் நிறைவேற்றினார். அதே சட்டமன்றத்தில் தான் நீங்களும் இருந்தீர்கள். ஏன் தீர்மானம் நிறைவேற்றவில்லை. சட்டத்தை நிறைவேற்றியது மோடி கூட்டம் என்றால்,  ஆதரித்த துரோகி கூட்டம் அதிமுக என்பதை மறந்துவிடக்கூடாது.

தமிழகத்தில் மோடி பாய் போட்டு படுத்தால் கூட ஒரு தொகுதியில் கூட வெற்றி பெற முடியாது. சிதம்பரம் தொகுதியில் பாஜகவால் டெபாசிட் பெற முடியுமா? தமிழகத்தில் எந்த தொகுதியில் அவர்களால் டெபாசிட் பெற முடியும்?. முகவரியே இல்லாத கட்சியை வைத்துக் கொண்டு எப்படி ஜெயிக்க முடியும். நாட்டு மக்கள் கட்டிய வரிப்பணத்தை அம்பானிக்கும், அதானிக்கும் ரூ.16 லட்சம் கோடி கடனை தள்ளுபடி செய்துள்ளீர்கள். இது தமிழகத்தில்  4 முறை பட்ஜெட் போடலாம். ஆனால் விவசாயிகள், தொழிலாளர்கள், மாணவர்கள் வாங்கிய கடனை  தள்ளுபடி செய்யவில்லை. ஆண்டுக்கு 2 கோடி பேருக்கு வேலை என கூறினீர்கள். செய்தீர்களா? ரயில்வே துறையில் 30 லட்சம் வேலை காலியிடம் உள்ளது. அதனைப் பூர்த்தி செய்ய நடவடிக்கை எடுக்கவில்லை. மக்களுக்கும், தொழிலாளிகளுக்கும் விரோதமான மோடி ஆட்சி முடிவுக்கு வரப்போகிறது.

குடியுரிமைச் சட்டம் குடியைக் கெடுக்கும் சட்டம் என அதிமுக, பாமக உள்ளிட்ட 12  எம்பி களிடம் ஆதரவு அளிக்கவேண்டாம் என வாதாடினோம் போராடினோம், கேட்கவில்லை. ஆதரவளித்து சட்டத்தை நிறைவேற்றி கொலைக் கருவியை பாஜக கையில் கொடுத்துள்ளனர். சட்டத்தை நிறைவேற்றிய கொலைகார கூட்டம் பிஜேபி என்றால் அந்தக் கொலைகாரக் கூட்டத்திற்கு துணையாக இருந்த துரோகிகள் அதிமுக, பாமக கூட்டம். இதனை யாராவது மன்னிப்பார்களா? அம்பேத்கர் இயற்றிய சட்டத்தை அகற்றிவிட்டு  மனுநீதி சட்டத்தை  அமல்படுத்தப்  பார்க்கிறார்கள்.

சிதம்பரம் தொகுதியில் பாஜக அதிமுகவை டெபாசிட்டை இழக்க செய்ய வேண்டும். அதுதான் திருமாவளவனின் வெற்றி. பிரதமர் வேட்பாளரைத் தேர்ந்தெடுக்கும் குழுவில் ஆலோசனை வழங்கக்கூடிய திருமாவளவனை இந்த தொகுதியில் பெருவாரியான வாக்கு வித்தியாசத்தில் வெற்றி பெறச் செய்யுங்கள்” என்று பேசினார்.  

இந்நிகழ்ச்சியில் மார்க்சிஸ்ட் கம்யூனிஸ்ட் கட்சியின் மாவட்ட செயலாளர் மாதவன், பரங்கிப்பேட்டை ஒன்றிய செயலாளர்கள் விஜய், ஆழ்வார், கீரப்பாளையம் ஒன்றியம் செல்லையா, நகர செயலாளர் மணவாளன், திமுக ஒன்றிய செயலாளர் மனோகர், மதியழகன், பேரூராட்சி தலைவர் கந்தன், காங்கிரஸ் மாவட்ட தலைவர் செந்தில்நாதன், கடலூர் மாநகராட்சி துணை மேயர் தாமரைச்செல்வன், விடுதலை சிறுத்தைகள் கட்சியின் தொகுதி பொறுப்பாளர் பாவணன், திராவிடர் கழக மாவட்டத் தலைவர் பூசி.இளங்கோவன், செயலாளர் சித்தார்த்தன், உள்ளிட்ட கூட்டணிக் கட்சியின் நிர்வாகிகள், தொண்டர்கள் கலந்து கொண்டனர்.