Skip to main content

முதல்வரை பள்ளிக்கு அழைத்த மாணவர்கள்... பச்சலூர் ஹைடெக் பள்ளியில் பணிகள் தீவிரம்!

Published on 03/06/2022 | Edited on 03/06/2022

 

'தமிழ்நாட்டில் இப்படி ஒரு அரசுப் பள்ளியா?' என அனைவரையும் வியக்க வைத்திருக்கிறது புதுக்கோட்டை மாவட்டம் அறந்தாங்கி ஒன்றியத்தில் உள்ள ஊராட்சி ஒன்றிய நடுநிலைப் பள்ளி. ஒரு பள்ளி மாணவனுக்கு என்னவெல்லாம் கற்றுக் கொடுக்க வேண்டுமோ அத்தனையும் ஒரே இடத்தில் கற்றுத்தரப்படுகிறது.

 

அழகான, சுத்தமான வகுப்பறைக்குள் நுழைந்தால் 5 நட்சத்திர விடுதி அறைக்குள் நுழைந்தது போல இருக்கும். ஏ.சி, கணினி, ஸ்மார்ட் போர்டு, மாணவர் மனசு, குடிநீர், சீப்பு கண்ணாடி, புத்தக சுமையை குறைக்க அலமாரிகள் என நூற்றுக்கணக்கான வசதிகள். அத்தனை வசதிகளையும் ஏற்படுத்த 70 நாட்களே ஆனது என்கிறார் ஒட்டுமொத்த தமிழகத்தையே திரும்பி பார்க்க வைத்த பள்ளி தலைமை ஆசிரியர் ஜோதிமணி. அத்தனையும் பொதுமக்கள், பெற்றோர்களின் உதவியுடன் அரசின் திட்டங்களையும் நிதியையும் பெற்று செய்யப்பட்டது. அனல் பறக்கும் வெயிலில் நின்று 100 நாள் வேலை செய்யும் பெண்கள் கூட பள்ளியின் வளர்ச்சிக்கு உதவியுள்ளார்கள்.

 

இப்படி ஒரு பள்ளியை மாங்குடியில் உருவாக்க 15 ஆண்டுகள் ஆனது பச்சலூரில் உருவாக்க 70 நாட்களே ஆனது என்பது வியப்பில்லை. இந்தப் பள்ளியைப் பார்க்க பல பள்ளி பெற்றோர்களும் வந்து பார்த்த பிறகு வீட்டுக்குச் செல்ல மனமில்லாமல் செல்கிறார்கள்.

 

அப்படி வந்தவர்கள் தான் வடகாடு புள்ளாச்சி குடியிருப்பு மக்களும். பள்ளியை பார்த்த அடுத்த நாளே, ஆண்டுவிழாவில் கலந்து கொண்டு நவீன வகுப்பறை அமைக்க நிதி வழங்கிய அமைச்சர் மெய்யநாதனின் ஊக்கத்தில், பச்சலூர் பள்ளி தலைமை ஆசிரியர் ஜோதிமணி ஆலோசனையில் மாவட்ட முதன்மைக் கல்வி அலுவலர் சாமி.சத்தியமூர்த்தி, திருவரங்குளம் வட்டார கல்வி அலுவலர் கருணாகரன் மேற்பார்வையில் தங்கள் பள்ளியையும் நவீனப்படுத்தி வருகின்றனர். இதேபோல புதுக்கோட்டை விடுதி, மினிகந்தா, அழியாநிலை பள்ளிகளும் நவீனமாகி வருகிறது.

 

இந்தப் பள்ளிகள் பற்றி நக்கீரன் மற்றும் நக்கீரன் இணையத்தில் வீடியோ செய்திகள் வெளியானது. அதில் டெல்லி சென்ற முதல்வர் அய்யா ஒரு பள்ளியை பார்த்து இதுபோல பள்ளிகள் உருவாக வேண்டும் என்றார். முதல்வரய்யா ஒரு முறை எங்க பள்ளிக்கு வந்து பாருங்க என்று பச்சலூர் பள்ளி மாணவர்கள் முதல்வருக்கு அழைப்புக் கொடுத்ததையும் பதிவு செய்திருந்தோம்.

 

நக்கீரனில் இந்த செய்தி வெளியான நாளில் முதல்வர் அலுவலகம் பச்சலூர் பள்ளி பற்றிய தகவல்களை மாவட்ட நிர்வாகத்திடம் கேட்ட நிலையில் மாவட்ட முதன்மைக் கல்வி அலுவலர் சாமி சத்தியமூர்த்தி பள்ளிக்குச் சென்று ஆய்வு செய்து அறிக்கை கொடுத்துள்ளார். 8 ந் தேதி நலத்திட்ட உதவிகள் வழங்க புதுக்கோட்டை வரும் முதல்வர் பச்சலூர் பள்ளிக்கும் செல்ல வாய்ப்புள்ளதாகக் கூறப்பட்டு வருகிறது.

 

இதனையடுத்து பச்சலூர் ஊராட்சி ஒன்றிய நடுநிலைப்பள்ளியில் புதிய வர்ணம் தீட்டும் பணிகள் தொடங்கி சிறுசிறு திருத்தப்பணிகள் செய்யப்பட்டு வருகிறது. மேலும் அறந்தாங்கியிலிருந்து பச்சலூர் வழியாகக் காரைக்குடி செல்லும் சாலையில் புதுப்பட்டி வரை சாலையோர செடி கொடிகள் அகற்றப்பட்டு வருகிறது. மேலும் முதலமைச்சர் பச்சலூர் வந்தால் தலைமை ஆசிரியர் ஜோதிமணி முதலில் உருவாக்கிய மாங்குடி பள்ளியையும் பார்க்க செல்வாரோ என்று மாங்குடி பள்ளியிலும் திருத்த பணிகளும் நடந்து வருகிறது.

 

சில வருடங்களுக்கு முன்பு நக்கீரன் வீடியோவில் வெளியான மாங்குடி, பச்சலூர் பள்ளிகளை டெல்லி முதல்வர் கெஜ்ரிவால் பார்த்தார். தற்போது தமிழக முதல்வர் பச்சலூர் வருகிறார் என்பது மகிழ்ச்சியாக உள்ளது. இதேபோல தமிழகத்தில் உள்ள பள்ளிகளை மாற்ற வேண்டும் என்கின்றனர் கிராம மக்கள்.

 

 

சார்ந்த செய்திகள்

Next Story

பாம்பு கடித்து பள்ளி மாணவி உயிரிழந்த சோகம்!

Published on 22/04/2024 | Edited on 22/04/2024
nn

புதுக்கோட்டையில் பாம்பு கடித்து மருத்துவமனையில் சேர்க்கப்பட்ட பள்ளி மாணவி சிகிச்சை பலனின்றி உயிரிழந்த சம்பவம் சோகத்தை ஏற்படுத்தியுள்ளது.

புதுக்கோட்டை மாவட்டம் எம்.குளவாய்ப்பட்டி கிராமத்தைச் சேர்ந்த கூலித்தொழிலாளி சின்னதுரை மகள் விசித்ரா (வயது 14). இவர் அதே ஊரில் உள்ள ஊராட்சி ஒன்றிய நடுநிலைப் பள்ளியில் 8 ஆம் வகுப்பு படித்து வருகிறார். கடந்த ஒரு வார காலமாக தேர்தலுக்காக சில தேர்வுகள் ஒத்திவைக்கப்பட்டு விடுமுறை விடப்பட்டிருந்தது. இந்நிலையில் கடந்த 20 ஆம் தேதி விசித்ரா தனது வீட்டில் வளர்க்கும் ஆடுகளுக்கு இரைதேடிச் சென்றவர் ஒரு கருவேலமரத்தடியில் கொட்டிக்கிடந்த கருவேலங்காய்களை சேகரித்த போது கீழே இருந்த பாம்பு விரலில் கடித்துள்ளது.

பாம்பு கடித்து அலறிய சிறுமியை உடனே அங்கிருந்தவர்கள் மீட்டு, புதுக்கோட்டை மருத்துவக் கல்லூரி மருத்துவமனையில் சிகிச்சைக்காக சேர்த்துள்ளனர். பாம்பின் விஷம் வேகமாக உடலில் பரவியுள்ள நிலையில் தீவிர சிகிச்சை அளித்தும் மாணவி விசித்ரா சிகிச்சை பலனின்றி பரிதாபமாக உயிரிழந்தார். சிறுமியின் இறப்பால் கிராமமே சோகத்தில் மூழ்கியுள்ளது.

Next Story

'வெறுப்பும் பாகுபாடும் தான் மோடியின் உத்தரவாதம்'-முதல்வர் மு.க.ஸ்டாலின் கண்டனம்

Published on 22/04/2024 | Edited on 22/04/2024
'Hatred and discrimination is Modi's guarantee'- CM Stalin condemns


18ஆவது நாடாளுமன்றத் தேர்தல், நாடு முழுவதும் களைகட்டி வருகிறது. 7 கட்டங்களாக இந்தத் தேர்தல் நடைபெறும் நிலையில் முதற்கட்ட வாக்குப்பதிவு, கடந்த 19ஆம் தேதி நடைபெற்று முடிந்துள்ளது. இதில் தமிழ்நாடு உள்ளிட்ட 21 மாநிலங்கள் மற்றும் யூனியன் பிரதேசங்களில் உள்ள 102 இடங்கள் அடங்கும். இதையடுத்து மற்ற மாநிலங்களில் அடுத்தடுத்து வாக்குப்பதிவு நடைபெறவுள்ளது. ஜூன் 1ஆம் தேதி கடைசி நாள் வாக்குப்பதிவு நடைபெறுகிறது. ஜூன் 4ஆம் தேதி தேர்தலின் முடிவுகள் அறிவிக்கப்படவுள்ளன.

இதனால் இரண்டாம் கட்ட தேர்தலுக்கான பிரச்சாரம் வட இந்திய மாநிலங்களில் களைகட்டி வருகிறது. அரசியல் தலைவர்கள் தங்களின் பிரச்சாரத்தைத் தீவிரமாக செய்து வருகின்றனர். அந்த வகையில் ராஜஸ்தான் மாநிலம் பன்ஸ்வாராவில் பிரதமர் மோடி நேற்று தேர்தல் பிரச்சாரத்தில் ஈடுபட்டார். அப்போது, “காங்கிரஸ் கட்சியின் தேர்தல் அறிக்கையில் தாய்மார்கள் மற்றும் மகள்கள் வைத்திருக்கும் தங்கம் கணக்கீடு செய்யப்பட்டு பங்கீடு செய்யப்படும் என்று வாக்குறுதி அளிக்கப்பட்டுள்ளது. முன்பு காங்கிரஸ் ஆட்சி காலத்தின் போது நாட்டின் உடைமைகளில் இஸ்லாமியர்களுக்கு முன்னுரிமை இருக்கிறது என்று கூறினார்கள். அப்படியென்றால் யாருக்கு உங்கள் வளங்கள் போகப்போகிறது?. நாட்டில் ஊடுருவி வருபவர்களுக்கும், அதிக குழந்தைகளைப் பெற்றெடுப்பவர்களுக்கும், மக்கள் கஷ்டப்பட்டு சம்பாதித்த செல்வத்தை காங்கிரஸ் கட்சி பங்கிட்டுக் கொடுத்துவிடும்.

அதாவது, காங்கிரஸ் கட்சியினர் இந்தியாவுக்குள் ஊடுருவிய, அதிக குழந்தைகள் பெற்றுக் கொண்டவர்களுக்கு சொத்துகளை வழங்குவோம் என்கிறார்கள். நீங்கள் கடினமாக உழைத்து சேர்த்த சொத்தை அவர்களுக்குக் கொடுக்க ஒப்புக்கொள்ளப் போகிறீர்களா?” எனப் பேசினார். பிரதமரின் இந்தப் பேச்சு பெரும் சர்ச்சையானது.

பிரதமர் மோடியின் இத்தகைய வெறுப்பு பேச்சுக்கு தேர்தல் ஆணையம் உரிய நடவடிக்கை எடுக்க வேண்டும் எனக் காங்கிரஸ் கட்சியின் மூத்த தலைவர்கள் அபிஷேக் மனு சிங்வி, சல்மான் குர்ஷித், குர்தீப் சத்பால் ஆகியோர் தேர்தல் ஆணையத்திற்கு நேரில் சென்று புகார் மனு அளித்துள்ளனர். சமூகங்களுக்கு இடையே வெறுப்பை பரப்பும் வகையில் பேசிவரும் பிரதமர் மோடி மீது நடவடிக்கை எடுக்க வேண்டும் என அந்த மனுவில் குறிப்பிடப்பட்டுள்ளது.

'Hatred and discrimination is Modi's guarantee'- CM Stalin condemns

இந்நிலையில் பிரதமர் மோடியின் பேச்சுக்கு தமிழக முதல்வர் மு.க.ஸ்டாலின் கண்டனம் தெரிவித்துள்ளார். 'பிரதமர் மோடியின் நச்சு பேச்சு கேவலமானது, மிகவும் வருந்தத்தக்கது. மக்களின் கோபத்திற்கு அஞ்சி மத உணர்வுகளைத் தூண்டி வெறுப்பு பேச்சை நாடி உள்ளார் பிரதமர் மோடி. பிரதமரின் அப்பட்டமான வெறுப்பு பேச்சுக்கு தேர்தல் ஆணையம் நடுநிலைமையைக் கைவிட்டு விட்டது. வெறுப்பும் பாகுபாடும் தான் மோடியின் உண்மையான உத்தரவாதம்' என  தமிழக முதல்வர் மு.க.ஸ்டாலின் தனது கண்டனத்தை தெரிவித்துள்ளார்.