Skip to main content

புதிதாக கட்டப்பட்ட கழிவுநீர் வாய்க்கால் சுவர் சிறு மழைக்கே தாங்கல... ஒப்பந்ததாரர்- நெடுஞ்சாலைத்துறை கூட்டுக்கொள்ளை!

Published on 16/10/2020 | Edited on 16/10/2020

 

sewage water newly constructed rain damage in dharmapuri

 

தர்மபுரியில், புதிதாகக் கட்டப்பட்ட கழிவுநீர் வாய்க்கால் சுவர், ஒருநாள் மழைக்கே தாங்காமல் இடிந்து விழுந்துள்ளது. ஒப்பந்ததாரரும், நெடுஞ்சாலைத்துறை அதிகாரிகளும் சேர்ந்து கொண்டு தரமற்ற கட்டுமானப் பொருள்களால் கட்டியதால்தான் இடிந்து விழுந்ததாக சலசலப்பு கிளம்பியிருக்கிறது.

 

தர்மபுரியில், ஒட்டப்பட்டியில் உள்ள அரசு கலைக்கல்லூரி ஆண்கள் விடுதியில் இருந்து நீச்சல் குளம் வரையிலான ஒரு கி.மீ. தொலைவிற்கு புதிதாக கழிவுநீர் வாய்க்கால் கட்டும் பணிகள், சாலை விரிவாக்கப் பணிகள் நடந்து வருகின்றன. மாவட்ட நெடுஞ்சாலைத்துறை சார்பில் ஒருங்கிணைந்த சாலை மேம்பாட்டுத் திட்டத்தின் கீழ் இப்பணிகள் நடக்கின்றன. இதற்கான பட்ஜெட், 2 கோடி ரூபாய்.

 

சேலம் முதன்மைச் சாலையில் உள்ள நெடுஞ்சாலைத்துறையின் கோட்ட அலுவலகம் மற்றும் காவல்துறை எஸ்பி அலுவலகம் எதிரில், கழிவுநீர் வாய்க்கால் கட்டும் பணிகள் நடந்தன. கட்டுமானப் பணிகள் முடிந்து, அதற்கான முட்டுகள் எல்லாம் பெயர்த்து எடுத்துச் செல்லப்பட்டன. இந்த நிலையில்தான், அக்., 12, 13 ஆகிய நாள்கள் தர்மபுரியில் மழை பெய்தது. இதில், நெடுஞ்சாலைத்துறை கோட்ட அலுவலகம் எதிரில் கட்டப்பட்டிருந்த கழிவுநீர் வாய்க்கால் சுவர் இடிந்து விழுந்தது.

 

இதுகுறித்து தகவல் அறிந்த நெடுஞ்சாலைத்துறையினர், சிறு மழைக்கே தாங்காத கழிவுநீர் வாய்க்கால் இடிந்து விட்டதால், எங்கே விசாரணையில் சிக்கிக் கொள்ளப் போகிறோமோ என்ற அச்சத்தில் இடிந்து விழுந்த சாக்கடை கால்வாய் சுவரை எக்ஸ்கவேட்டர் இயந்திரம் மூலம் அவசர அவசரமாக அடித்து நிரவி சமன்படுத்தினர். தரமற்ற கட்டுமானப் பொருள்கள் மற்றும் நெடுஞ்சாலைத்துறையின் அலட்சியத்தால் புதிதாகக் கட்டப்பட்ட கழிவுநீர் வாய்க்கால் சுவர் இடிந்து விழுந்திருப்பது தெரிய வந்துள்ளது.

 

நெடுஞ்சாலைத்துறை ஊழியர்கள் சங்க நிர்வாகிகள் சிலர் கூறுகையில், ''கடந்த 2014- ஆம் ஆண்டு, கிருஷ்ணகிரி மாவட்டம் சூளகிரியில் தென்பெண்ணை ஆற்றின் குறுக்கே கட்டப்பட்ட பாலத்தின் ஒரு பகுதி இடிந்து விழுந்தது. தரமற்ற கட்டுமானப் பொருட்களால் அந்தப் பாலம் கட்டப்பட்டதால்தான், குறுகிய காலத்திலேயே இடிந்து போயிருப்பது தெரியவந்தது. அப்போது அந்தப் பிரச்னையில் தொடர்புடைய பொறியாளர்கள் இடமாற்றம் செய்யப்பட்டனர்.

 

sewage water newly constructed rain damage in dharmapuri

 

இந்த நிலையில்தான், தர்மபுரியிலும் கழிவுநீர் வாய்க்கால் சுவர் கட்டிமுடிக்கப்பட்ட இரண்டொரு நாளில் லேசான மழைக்குக் கூட தாங்காமல் இடிந்து விழுந்திருக்கிறது. நல்வாய்ப்பாக இதனால் யாருக்கும் எந்த விதச் சேதாரமும் ஏற்படவில்லை. கழிவுநீர் வாய்க்காலின் பக்கவாட்டுச் சுவர்கள் கட்டும்போது இரும்பு கம்பிகளால் செண்டரிங் செய்யப்பட வேண்டும். அப்போதுதான் இடிந்து விழாமல் இருக்கும். ஆனால், தற்போது இடிந்து விழுந்த கழிவுநீர் வாய்க்கால் சுவர்கள் இரும்பு கம்பியால் ஆன செண்டரிங் செய்யப்படாமல்தான் கட்டப்பட்டன. அதனால்தான் சிறு மழைக்குக் கூட தாங்காமல் இடிந்து விழுந்துள்ளது. அதேபோல் தரமற்ற கட்டுமானப் பொருள்களும்கூட காரணமாக இருக்கலாம்.

 

கட்டுமானப் பணிகளை மேற்கொண்டு வரும் ஒப்பந்ததாரர்களும், நெடுஞ்சாலைத்துறை அதிகாரிகளும் சேர்ந்து கொண்டு தரமற்ற கட்டுமானப் பொருள்களைக் கொள்முதல் செய்துள்ளனர். அவர்கள் அதிகளவில் கமிஷன் எடுத்துக் கொள்வதால்தான் தரமற்ற கட்டுமானப் பொருள்களைக் கொண்டு இப்பணிகளைச் செய்து வருகின்றனர். இது தொடர்பாக நெடுஞ்சாலைத்துறை மற்றும் ஒப்பந்ததாரர்களிடம் மாவட்ட நிர்வாகம் விசாரித்து நடவடிக்கை எடுக்க வேண்டும்,'' என்றனர்.

 

இதுபற்றி நாம் தர்மபுரி மாவட்ட நெடுஞ்சாலைத்துறை கோட்ட பொறியாளர் தனசேகரிடம் பேசினோம். ''சார்... கழிவுநீர் வாய்க்கால் சுவர் கட்டும் பணிகள், சாலை விரிவாக்கம் செய்யும் பணிகளை உள்ளூரைச் சேர்ந்த இக்பால் என்ற ஒப்பந்ததாரர்தான் எடுத்துச் செய்து வருகிறார். சம்பவம் நடந்த அன்று காலையில்தான் கழிவுநீர் வாய்க்கால் சுவர் கட்டிமுடிக்கப்பட்டது. அன்று மாலையே கனமழை பெய்தது. அப்போது வாய்க்கால் சுவருக்கு சப்போர்ட்டாக வைக்கப்பட்டு இருந்த முட்டுகள் நகர்ந்துவிட்டன. அதனால்தான் கழிவுநீர் வாய்க்கால் சுவர்கள் இடிந்துள்ளன. சுமார் 10 மீட்டர் தூரத்திற்குதான் சேதம் அடைந்துள்ளன. அதன் மதிப்பு 1.50 லட்சம் ரூபாய்தான். பெரிய அளவில் சேதம் ஏற்படவில்லை. இதையெல்லாம் பெருசு படுத்தாதீங்க சார்...,'' என்றார் தனசேகர்.

 

சேதத்தின் மதிப்பு சின்னதோ பெரியதோ... விரயமாக்கப்பட்டது மக்களின் வரிப்பணம் என்பதை அதிகாரிகளும், ஒப்பந்ததாரர்களும் கவனத்தில் கொள்ள வேண்டும்.

 

 

 

சார்ந்த செய்திகள்

 

Next Story

'இதுதான் எங்கள் தேர்தல் வெற்றியின் ரகசியம்' - முதல்வர் பேச்சு  

Published on 11/07/2024 | Edited on 11/07/2024
'We must not lose sight of any place' - Chief Minister's speech

தர்மபுரி மாவட்டத்தில் நலத்திட்ட உதவிகளை தொடங்கி வைப்பதற்காக தமிழக முதல்வர் சென்றுள்ள நிலையில் 'மக்களுடன் முதல்வர் திட்டம்' தமிழக முதல்வரால் தர்மபுரியில் உள்ள ஊரகப் பகுதிகளில் தொடங்கி வைக்கப்பட்டுள்ளது. இரண்டாவது நிகழ்வாக 445 கோடி ரூபாய் மதிப்பிலான பல்வேறு முடிவுற்ற பணிகளை பொதுமக்களின் பயன்பாட்டிற்கு தமிழக முதல்வர் தொடங்கி வைத்தார். தர்மபுரி - திருவண்ணாமலையில் நான்கு வழிச் சாலை, அடுக்குமாடி குடியிருப்பு கட்டிடங்கள் உள்ளிட்ட பல்வேறு துறைகளின் சார்பில் கட்டப்பட்டுள்ள முடிவுற்ற பணிகளை முதல்வர் தொடங்கி வைத்துள்ளார். பெண்களுக்கான 20 பேருந்துகளையும் தமிழக முதல்வர் தொடங்கி வைக்க இருக்கிறார். 56 கோடி ரூபாய் மதிப்பில் 2,637 பயனாளிகளுக்கு நலத்திட்ட உதவிகளை தமிழக முதல்வர் வழங்கவுள்ளார்.

தொடர்ந்து தர்மபுரியில் திட்டங்களை துவக்கி வைத்த பின் தமிழக முதல்வர் மு.க.ஸ்டாலின் உரையாற்றுகையில், ''ஆட்சிக்கு வந்த நூறு நாட்களுக்குள் இருக்கக்கூடிய எல்லா காரியங்களையும் நிறைவேற்றிக் காட்டுவேன் என்று சொன்னேன். உங்கள் முன்னாடி அந்தப் பெட்டியை பூட்டி திராவிட முன்னேற்றக் கழகத்தின் தலைமை நிலையமான அண்ணா அறிவாலயத்தில் பாதுகாப்பாக வைத்தோம். உடனடியாக எதிர்க்கட்சிகள் என்ன பேசினார்கள் 'இவர்கள் ஆட்சிக்கும் வரப்போவதில்லை; இந்த பெட்டியையும் திறக்கப் போவதில்லை' என்று இறுமாப்பில் கேலி செய்தார்கள், கிண்டல் செய்தார்கள். ஆனால் பொதுமக்களாகிய நீங்கள் திமுக மேல், என் மேல் நம்பிக்கை வைத்து அந்த கேலி மனிதர்களை தோற்கடித்து எங்களுக்கு பெரிய வெற்றியை தேடித் தந்தீர்கள்.

nn

ஆட்சிக்கு வந்ததும் உங்களுடைய மனுக்களை கவனிப்பதற்காக ஒரு புதிதாக ஒரு துறையை உருவாக்கினேன். அந்த துறையினுடைய பெயர் 'உங்கள் தொகுதியில் முதலமைச்சர்' என்னிடம் கொடுக்கப்பட்ட மனுக்கள் துறைவாரியாக பிரித்து அதிலிருந்து நடைமுறை சாத்தியமுள்ள 2, 29216 மனுக்களுக்கு உடனடியாக தீர்வு கண்டுள்ளோம். மக்கள் வைத்த கோரிக்கைகளில் சாத்தியம் உள்ள அனைத்தையும் நிறைவேற்றி இருக்கிறோம். தேர்தலுக்கு முன் வாங்கிய மனுக்களுக்கு தீர்வு கண்டதுடன் எங்களுடைய கடமை முடிந்துவிட்டது என்று நினைக்கவில்லை. இனிமேல் தான் கடமை தொடங்குகிறது என நினைத்து உழைப்பை கொடுக்கிறோம்.

அதனால்தான் தொடர்ந்து மனுக்களை வாங்கி வருகிறோம். அதை முறைப்படுத்த வேண்டும். எப்படி எல்லாம் முறைப்படுத்த வேண்டும் என்று சொன்னால் முதலமைச்சருடைய தனிப்பிரிவு; முதலமைச்சரின் உதவி மையம்; ஒருங்கிணைக்கப்பட்ட குறை தீர்ப்பு மேலாண்மை அமைப்பு; உங்கள் தொகுதியில் முதலமைச்சர் என எல்லாவற்றையும் ஒருங்கிணைத்து 'முதல்வரின் முகவரி' என்ற ஒரு புதிய துறையை உருவாக்கினோம். பொது மக்களுடைய கோரிக்கைகள் எந்த இடத்திலும் எங்களுடைய பார்வையில் இருந்து தவறி விடக்கூடாது என்பதற்காகத் தான் இவை எல்லாவற்றையும் ஒருங்கிணைத்தோம். முதலமைச்சர் தனிப்பிரிவில் பெறப்படக்கூடிய மனுக்கள் மட்டுமல்லாமல், இணையதளம், அஞ்சல், சமூக வலைத்தளம், மாவட்ட நிர்வாகத்தின் மூலம் பெறப்படும் மனுக்கள், அமைச்சர்கள் மற்றும் மக்கள் பிரதிநிதிகளிடம் கொடுக்கப்படும் மனுக்கள் இப்படி எல்லாம் மனுக்களையும் ஒரே இடத்தில் போய் சேருகிறது. மக்களால் தரப்படும் அனைத்து மனுக்களையும் ஒரு குடையின் கீழ் கொண்டு வந்தோம். எல்லா மக்களின் கோரிக்கைகளும் தலைமைச் செயலகத்திற்கு வந்து விட்டது. நான் முதலமைச்சராக பொறுப்பேற்றதும் 'முதல்வரின் முகவரி' துறையின் கீழ் இப்பொழுது வரைக்கும் பெறப்பட்ட 68,30,281 மனுக்களில் 66,65, 304 மணிகளுக்கு உரிய முறையான தீர்வு கண்டுள்ளோம்.

தமிழ்நாட்டில் தொடர்ந்து தோல்வியை கண்ட பிறகும் ஒன்றிய அரசு பாடம் கற்றுக் கொள்ளவில்லை. மத்திய அரசு விருப்பு வெறுப்பு இல்லாமல் செயல்பட வேண்டும். அனைவர் வீட்டிற்கும் ஏதோ ஒரு வகையில் அரசின் திட்டங்கள் சென்றடைய வேண்டும் என்ற எண்ணத்தில்தான் பணியாற்றி வருகிறோம். எல்லோருக்குமான அரசாக இருப்பது தான் எங்கள் தேர்தல் வெற்றியின் ரகசியம்'' என்றார்.

Next Story

'மக்களுடன் முதல்வர் திட்டம்'-தருமபுரியில் முகாமிடும் முதல்வர்

Published on 11/07/2024 | Edited on 11/07/2024
 makkaludan muthalvar scheme- Chief Minister camped at Dharampuri

தமிழக முதல்வர் தர்மபுரி மாவட்டத்தில் நலத்திட்ட உதவி தொடங்கி வைப்பதற்காக செல்லவிருக்கும் நிலையில் சேலம் ஓமலூர் விமான நிலையப் பகுதியில் ட்ரோன்கள் பறக்க நேற்றே தடை விதிக்கப்பட்டிருந்தது. இந்தநிலையில் போக்குவரத்து மாற்றமும் செய்யப்பட்டுள்ளது.

'மக்களுடன் முதல்வர் திட்டம்' இன்று தமிழக முதல்வரால் தர்மபுரியில் உள்ள ஊரகப் பகுதிகளில் தொடங்கி வைக்கப்பட இருக்கிறது. தர்மபுரி பாளையம்புதூரில் இன்று காலை 11.30 மணிக்கு  தமிழக முதல்வர் மு.க.ஸ்டாலின் தொடங்கி வைக்க இருக்கிறார். தமிழகத்தில் மொத்தமுள்ள 12,500 ஊராட்சிகளில் அடுத்தடுத்து 2500 முகாம்களை நடத்த அரசு திட்டமிட்டுள்ளது. அதேபோல் சேலம் கோட்டத்தில் பெண்களுக்காக 20 பேருந்துகளை தமிழக முதல்வர் இன்று தொடங்கி வைக்க இருக்கிறார்.

முதல்வரின் வருகை காரணமாக சேலத்தில் ட்ரோன்கள் பறக்கத் தடை விதிக்கப்பட்டுள்ளது. மேலும் போக்குவரத்து மாற்றம் செய்யப்பட்டுள்ளது. தர்மபுரியில் பல்வேறு நிகழ்ச்சிகளில் முதல்வர் பங்கேற்க இருப்பதால் காலை 8:30 முதல் நண்பகல் 1:30 வரை கிருஷ்ணகிரி- சேலம் தேசிய நெடுஞ்சாலையில் கனரக வாகனங்கள் செல்ல தடை விதிக்கப்பட்டுள்ளது. ஓசூர், கிருஷ்ணகிரியில் இருந்து மொரப்பூர், அரூர், காரிமங்கலம் வழியாக சேலம் செல்ல வேண்டும் என அறிவுறுத்தப்பட்டுள்ளது. அதேபோல் சேலத்தில் இருந்து கிருஷ்ணகிரி, பெங்களூர் செல்லும் கனரக வாகனங்கள் அரூர் வழியாக செல்ல வேண்டும் என அறிவுறுத்தப்பட்டுள்ளது. தர்மபுரியில் இருந்து இலகு ரக வாகனங்கள் பொம்மிடி, தீவட்டிப்பட்டி வழியாக சேலத்திற்கு செல்ல வேண்டும் எனவும் அறிவிக்கப்பட்டுள்ளது.