Skip to main content

ஆசிரியர் இல்ல விழாவிற்கு சீர்; நெகிழ்ச்சியில் ஆழ்த்திய கிராம மக்கள்!

Published on 06/06/2024 | Edited on 06/06/2024
Seer for Teacher's House Festival; Excited villagers

புதுக்கோட்டை மாவட்டம் பச்சலூர் ஊராட்சி ஒன்றிய நடுநிலைப் பள்ளி தலைமை ஆசிரியர் ஜோதிமணி. தமிழ்நாட்டில் இவரை அறிந்தவர்கள் அதிகம். ஒரு அரசுப் பள்ளி எப்படி எல்லாம் இருக்க வேண்டும் என்பதைத் தான் பணியாற்றிய மாங்குயிலும் தற்போது பணியாற்றும் பச்சலூரிலும் செய்து காட்டியவர். பொதுமக்கள், தன்னார்வலர்களின் பங்களிப்போடு பள்ளி வளாக நடைபாதை முழுவதும் பேவர் பிளாக், ஓரங்களில் அழகான செடிகள், வகுப்பறைகள் ஏ.சி. ஸ்மார் போர்டு, சாக்பீஸ் இல்லா வெள்ளை போர்டு, கண்காணிப்பு கேமரா, தூய குடிநீர் குழாய், சீப்பு, கண்ணாடி, பவுடர், தபால் பெட்டி, புகார் பெட்டி, புத்தகங்கள் வைக்க அலமாரி, புத்தக சுமையைக் குறைக்க ஒரு நாளைக்கு ஒரு புத்தகம் எனப் பல்வேறு உத்திகளைப் பின்பற்றி வருகிறார். இவை அனைத்து ஒவ்வொரு வகுப்பறையிலும் செயல்படுத்தப்படுகிறது. மேலும் மதிய உணவு நேர்த்தி, தலைமை ஆசிரியர் அறையில் கேமராக்களின் கண்காணிப்பு திரை, மைக் இப்படி அத்தனை வசதிகளையும் அற்புதமாய் செய்து வைத்துள்ளார். அதனால் தலைமை ஆசிரியரை மாணவர்கள், கிராம மக்களுக்கும் பிடிக்கும்.

இவரது பள்ளியை மட்டும் நவீனப்படுத்தினால் போதாது என்று நினைத்தவர் ஒவ்வொரு கிராமத்திலும் உள்ள பள்ளிகளை மாற்ற வேண்டும் என்று ஒவ்வொரு கிராமமாகச் சென்று விழிப்புணர்வு ஏற்படுத்தினார். பல கிராம மக்களும் பச்சலூர் பள்ளியை வந்து பார்த்து வியந்து போனாலும் தங்கள் கிராம பள்ளியை மாற்றுவோம் என்று சொல்லிப் போகின்றனர். சேந்தன்குடி, புதுக்கோட்டை விடுதி போன்ற பல பள்ளிகள் மாறியுள்ளது. ஆனால் வடகாடு புள்ளாச்சிகுடியிருப்பு  பள்ளி சேர்ந்த பெற்றோர்கள் பச்சலூர் பள்ளியைப் பார்த்து வியந்ததோடு தலைமை ஆசிரியரை தங்கள் பள்ளிக்கும் அழைத்து எங்கள் பள்ளியை மாற்ற உங்கள் ஆலோசனையும் உதவியும் தேவை என்று சொன்ன போதே தன் கையில் இருந்து ஒரு பெருந்தொகையைக் கொடுத்து ஆச்சரியமூட்டினார். 

Seer for Teacher's House Festival; Excited villagers

அடுத்த நாளே புள்ளாச்சிகுடியிருப்பு ஊராட்சி ஒன்றிய தொடக்கப்பள்ளிக்கு வந்து மாற்றங்களைப் பட்டியலிட்டார். அமைச்சர் மெய்யநாதன் உதவியோடு தன்னார்வலர்கள், பெற்றோர்கள் பங்களிப்பில் பள்ளியின் நவீன வளர்ச்சிகள் தொடங்கி சில மாதங்களில் பச்சலூருக்கு அடுத்து புள்ளாச்சிகுடியிருப்பு பள்ளி அனைத்து வசதிகளும் பெற்ற பள்ளியாக மாறிய போது அமைச்சர் மெய்யநாதன் திறந்து வைத்தார்.

இந்த நிலையில் பச்சலூர் பள்ளி தலைமை ஆசிரியர் ஜோதிமணி மகள் சன்மதிக்கு இன்று வியாழக்கிழமை மாலை நிச்சயதார்த்த விழா நடக்க உள்ளதை அறிந்த வடகாடு புள்ளாச்சிகுடியிருப்பு பகுதி மக்கள், தங்கள் பள்ளி வளர உதவிய தலைமை ஆசிரியர் ஜோதிமணி இல்ல விழாவுக்கு நாங்கள் தாய்மாமன் சீர் கொண்டு போறோம் என்றனர். புள்ளாச்சிகுடியிருப்பில் இருந்து தனி பேருந்தில் மாணவர்களுடன் கிராம மக்கள் ஏறி வந்து அறந்தாங்கி விழா மண்டபம் அருகே இறங்கி மா, பலா, வாழை என முக்கனிகளோடு தட்டுத் தாம்பூலங்கள் ஏந்தி வானத்தில் வர்ணஜாலம் காட்டிய வண்ண வண்ண பட்டாசுகள் வெடித்துக் கொண்டு தாய்வீட்டுச் சீதனமாய் மண்டபத்திற்குள் நுழைந்த போது அத்தனை பேரும் வியந்து, நெகிழ்ந்தனர். 

Seer for Teacher's House Festival; Excited villagers

உறவினர்கள் தான் இப்படி சீர் கொண்டு வருவார்கள் ஆனால் என்று வியந்தவர்களிடம், 'தலைமை ஆசிரியர் ஜோதிமணி குடும்பம் எங்கள் உறவினர்கள்' தான் என்று கெத்தாகச் சொல்லிவிட்டுச் சென்றனர். தங்கள் பள்ளி வளர காரணமான வேறு ஒரு தலைமை ஆசிரியர் இல்ல விழாவிற்குச் சீர் கொண்டு வந்த புள்ளாச்சிகுடியிருப்பு மக்களை அனைவரும் பாராட்டினர். தலைமை ஆசிரியர் குடும்பத்தினர் நெகிழ்ச்சியில் ஆனந்தக் கண்ணீரைத் துடைத்துக் கொண்டனர். 

சார்ந்த செய்திகள்

 

Next Story

டாக்டர் முத்துலெட்சுமி ரெட்டி சிலைக்கு மரியாதை செலுத்திய மருத்துவக்கல்லூரி முதல்வர்!

Published on 23/07/2024 | Edited on 23/07/2024
medical college principal paid respect to statue of Dr. Muthulakshmi Reddy

முதல் பெண் மருத்துவர், சென்னை மாகாணத்தின் முதல் சட்ட மேலவை உறுப்பினர் என்று பல்வேறு "முதல்" என்ற சொல்லுக்கு சொந்தக்காரர் டாக்டர் முத்துலெட்சுமி ரெட்டி. 1886 ஜூலை 30 ம் நாள் புதுக்கோட்டை திருக்கோகர்ணம் நாராயணசாமி - சந்திரம்மாள் தம்பதிக்கு மகளாக பிறந்த முத்துலெட்சுமி ரெட்டி பெண்களுக்கு படிப்பு எதற்கு என்ற தடைகளை உடைத்து கல்லூரிச் சென்று படித்து மருத்துவரானார். 

தொடர்ந்து தேவதாசி முறை ஒழிப்பு, குழந்தை திருமணத் தடுப்பு, விதவை மறுமணம் செய்யவும் உடன்கட்டை ஏறுதலைத் தடுக்கவும் போராடினார். பெண் கல்வி, உரிமைக்காக போராடியவர் அடையாறு புற்றுநோய் மருத்துவமனை உருவாக காரணமான இவர் 1968 ஜூலை 22 ந் தேதி மறைந்தார். 

இவரது நினைவை போற்றும் விதமாக புதுக்கோட்டையில் டாக்டர் முத்துலெட்சுமி நினைவு மாவட்ட மருத்துவமனை இயங்கியது. மருத்துவக்கல்லூரி மருத்துவமனை தொடங்கப்பட்டது. அந்த வளாகத்தில் டாக்டர் முத்துலட்சுமி ரெட்டிக்கு சிலை வைக்கப்பட்டது. அவரது பிறந்தநாள் மற்றும் நினைவு நாட்களில் வளாகத்தில் உள்ள அவரது சிலைக்கு மாலை அணிவித்து மரியாதை செய்வது வழக்கம். அந்த வகையில் நேற்று(22.7.2024) அவரது நினைவு நாளையொட்டி புதுக்கோட்டை மருத்துவக் கல்லூரி பொறுப்பு முதல்வர் டாக்டர் ராஜ்மோகன் தலைமையில் மருத்துவர்கள் மாலை அணிவித்து மரியாதை செய்தனர். 

Next Story

“ஒரு அரசியல் தலைவர் உயிரிழப்பார்” - அருள் வாக்கு சொன்ன கோவில் பூசாரி

Published on 22/07/2024 | Edited on 22/07/2024
temple priest predicts that the political leader will lost life

புதுக்கோட்டை மாவட்டம் கிழக்கு கடற்கரை சாலையில் உள்ள மீமிசல் குடியிருப்பு பகுதியில் பிரசித்தி பெற்ற "வழிவிடும் கருப்பசாமி கோயில் உள்ளது. தினசரி பக்தர் வந்து போனாலும் ஆடி பௌர்ணமி திருவிழாவே மிகச் சிறப்பு. இந்த நாளில் பல ஆயிரம் பக்தர்கள் கூடுகிறார்கள்.

ஆடி பௌர்னமி திருவிழாவில் என்றதும் மீமிசல் சுற்றியுள்ள கிராம மக்கள் கடந்த ஒரு வாரமாக விரதம் இருந்து நேர்த்திக்கடன் உள்ள பக்தர்கள் ஏம்பக்கோட்டை ஸ்ரீ தர்ம முனீஸ்வரர் ஆலயத்தில் இருந்து வானவேடிக்கை, ஆட்டம் பாட்டத்துடன் ஆயிரக்கணக்கான பக்தர்கள் ஒரே நேரத்தில் பால்குடம் மற்றும் பறவை காவடி, அலகுகாவடி எடுத்து நகரின் முக்கிய வீதிகள் வழியாக ஊர்வலமாக சென்று கருப்பசாமி கோவிலை வந்தடைந்தனர். அங்கு கருப்பசாமிக்கு அபிஷேக ஆராதனைகள் நடைபெற்றது.

தொடர்ந்து கருப்பசாமி அரிவாள் மீது நின்று அருள்வாக்கு கூறும் நிகழ்ச்சி நடைபெற்றது. நிகழ்ச்சியில் கோயில் பூசாரி மாதவன் அரிவாள்கள் மீது ஏறி நின்று சாமி ஆடி முதலில் நாட்டில் என்னவெல்லாம் நடக்கப் போகிறது என்று நாட்டுக்கான நல்வாக்கு சொல்லத் தொடங்கினார்.

temple priest predicts that the political leader will lost life

இந்த வருசம் விளைச்சல் அதிகமாகும், ரியல் எஸ்டேட் தொழில் நல்லா இருக்கும். இந்த ஆண்டு ஒரு அரசியல் தலைவர் உயிர் சேதம் ஏற்படும். போன வருசம் சொன்னேன் நடந்துச்சு அதுபோல ஒரு உயிர்சேதம் ஏற்படும். கண் நோய் வரும், வைரஸ் காய்ச்சல் வரும் கருப்பசாமி காப்பாத்திக் கொடுக்கிறேன். விலைமதிக்கக் கூடிய சிலைகள் கண்டெடுக்கப்படும், தங்கம் விலை குறையும், கும்பாபிசேகங்கள் அதிகம் நடக்கும், ஒரு அரசியல் குடும்பம் தடுமாறும், டாக்டர் எக்சாம்ல மதிப்பெண்ல குழப்பம் ஏற்படும். கவர்மெண்ட் வேலை நிறைய கிடைக்கும் 16 கலெக்டர்கள் பாசாவாங்க. நகைக்கடன் தள்ளுபடி வரும். மழை கம்மியாவும், இடி காற்று அதிகமாவும் இருக்கும்" என்று நாட்டுக்கான அருள்வாக்கு சொல்லி முடித்தார்.

தொடர்ந்து பக்தர்களுக்கு அருள்வாக்கு கூறினார். விழாவில் சுற்றுவட்டார பகுதிகளில் இருந்து ஆயிரக்கணக்கான பக்தர்கள் நீண்ட வரிசையில் காத்திருந்து அருள்வாக்கு பெற்றுச் சென்றனர்.கருப்பசாமி கோயில் பூசாரி நாட்டுக்கான அருள்வாக்கு சொன்னது எப்படி நடக்குமோ என்ற குழப்பத்துடன் சென்றனர் பக்தர்கள்.