Skip to main content

ஜாமினில் வந்த ரவுடியை பழிக்குப்பழியாக துரத்தி துரத்தி வெட்டிக்கொலை! கீழக்கரை கும்பல் சிக்கியது!

Published on 26/11/2020 | Edited on 26/11/2020

 

salem police station incident rowdies arrest the police

 

 

சேலத்தில், காவல்நிலையம் அருகே, பழிக்குப்பழியாக ரவுடியை துரத்தி துரத்தி வெட்டிக்கொன்ற சம்பவம் தொடர்பாக கீழக்கரையைச் சேர்ந்த மூன்று ரவுடிகளை காவல்துறையினர் கைது செய்தனர்.

 

இராமநாதபுரம் மாவட்டம் கீழக்கரை அருகே உள்ள மாயாகுளம் பகுதியைச் சேர்ந்தவர் கோபிநாத் (28). கடந்த ஆகஸ்ட் மாதம் 7- ஆம் தேதி கோபிநாத், அவருடைய நண்பர் தேவகுமார் (24) மற்றும் கூட்டாளிகள் உள்ளிட்ட சிலர், அதே பகுதியைச் சேர்ந்த எடிசன் (23) என்பவரை கீழக்கரையில் வெட்டிக்கொலை செய்தனர். இதுகுறித்து ஏர்வாடி காவல்துறையினர் வழக்குப்பதிவு செய்து கோபிநாத், தேவகுமார் ஆகியோரை கைது செய்துதனர். நீதிமன்ற உத்தரவின்பேரில், அவர்கள் மதுரை மத்திய சிறையில் அடைக்கப்பட்டனர்.

 

இந்நிலையில், நவ. 5- ஆம் தேதி அவர்கள் இருவரும் நிபந்தனை ஜாமினில் சிறையில் இருந்து வெளியே வந்தனர். கோபிநாத்தும், தேவகுமாரும் சேலம் சூரமங்கம் காவல்நிலையத்தில் தினமும் காலையிலும் மாலையிலும் நேரில் ஆஜராகி கையெழுத்திட வேண்டும் என்று நீதிமன்றம் உத்தரவிட்டு இருந்தது. அதன்படி, அவர்கள் இருவரும் சூரமங்கலம் ரயில் நிலையம் செல்லும் சாலையில் உள்ள ஒரு தனியார் விடுதியில் தங்கியிருந்து தினமும் காவல்நிலையத்தில் கையெழுத்திட்டு வந்தனர். 

 

நவ. 24- ஆம் தேதி மாலை 05.00 மணிக்கு கோபிநாத்தும், தேவகுமாரும் சூரமங்கலம் காவல்நிலையத்தில் சென்று கையெழுத்து போட்டுவிட்டு, அவர்கள் தங்கியிருந்த விடுதிக்கு நடந்து சென்று கொண்டிருந்தனர். அப்போது வழியில் நின்று கொண்டிருந்த மர்ம நபர்கள் மூன்று பேர், கத்தி, வீச்சரிவாளுடன் தூக்கிக்கொண்டு அவர்கள் இருவரையும் கொல்ல ஓடிவந்தனர். இதைப்பார்த்த அவர்கள் அங்கிருந்து தப்பிச்செல்ல முயன்றனர். 

 

இந்த துரத்தலில் கோபிநாத்தை மர்ம நபர்களிடம் வசமாக சிக்கிக் கொண்டார். அவர்கள் சரமாரியாக வெட்டியதில் கோபிநாத் சம்பவ இடத்திலேயே பரிதாபமாக உயிரிழந்தார். மக்கள் கூட்டம் கூடியதைப் பார்த்த கொலை கும்பல் அங்கிருந்து தப்பி ஓடியது. கண் முன்னாலேயே தன் கூட்டாளி கொல்லப்பட்டதைப் பார்த்த தேவகுமார், சூரமங்கலம் காவல்நிலையத்திற்கு தப்பிச்சென்று நடந்த விவரங்களைக் கூறினார். 

 

இதையடுத்து, காவல்துறை துணை ஆணையர் சந்திரசேகரன், உதவி ஆணையர் நாகராஜன் மற்றும் காவல்துறையினர் சம்பவ இடத்துக்கு விரைந்து சென்று விசாரணை நடத்தினர். சடலம் கைப்பற்றப்பட்டு, உடற்கூறாய்வுக்காக சேலம் அரசு மருத்துவமனைக்கு அனுப்பி வைக்கப்பட்டது.

 

வீச்சரிவாள், கத்தி உள்ளிட்ட ஆயுதங்களுடன் தப்பிய கும்பலை பிடிக்க ஒட்டுமொத்த மாநகர காவல்துறையினரும் முடுக்கி விடப்பட்டனர். பள்ளப்பட்டி காவல்துறையினர், புதிய பேருந்து நிலையத்தில் கொலையாளிகள் ஏதும் பேருந்தில் ஏறி தப்பிச் செல்கிறார்களா என கண்காணித்தனர். 

 

ஒரு பேருந்தில் மூன்று பேர், உடைகளில் ரத்த கறையுடன் இருந்ததை பார்த்த காவல்துறையினர், அவர்களை பிடித்து விசாரித்தனர். இதில், அவர்கள் ராமநாதபுரம் மாவட்டம் கீழக்கரையைச் சேர்ந்த அந்தோணி, கார்த்திக், விக்னேஷ் ஆகியோர் என்பது தெரிய வந்தது. எடிசனை கொலை செய்த கோபிநாத், தேவகுமாரை பழிக்குப்பழியாக சேலத்தில் வைத்து தீர்த்துக் கட்டிவிட்டு பேருந்தில் ஏறி தப்பிச்செல்ல முயன்றதும் தெரிய வந்தது. இதையடுத்து மூவரையும் காவல்துறையினர் கைது செய்தனர். 

 

எப்போதும் மக்கள் நடமாட்டம் பரபரப்பாக இருக்கும் சூரமங்கலம் சாலையில், காவல்நிலையம் அருகிலேயே ரவுடியை துரத்தி துரத்தி வெட்டிக்கொலை செய்த சம்பவம் அப்பகுதியில் பரபரப்பை ஏற்படுத்தியுள்ளது. பிடிபட்ட மூவரிடமும் தீவிர விசாரணை நடந்து வருகிறது.

 

 

சார்ந்த செய்திகள்

Next Story

பட்டப்பகலில் பெண் படுகொலை; போலீசார் விசாரணை

Published on 28/03/2024 | Edited on 28/03/2024
nn

திருவள்ளூர் மாவட்டம் பொன்னேரியில் வீட்டில் தனியாக இருந்த பெண் ஒருவர் சரமாரியாக வெட்டிக் கொலை செய்யப்பட்ட சம்பவம் பரபரப்பை ஏற்படுத்தி இருக்கிறது.

திருவள்ளூர் மாவட்டம் பொன்னேரி பகுதியைச் சேர்ந்தவர் குமார். ஓய்வு பெற்ற மின்வாரிய ஊழியரான இவர் நேற்று வெளியே சென்றுவிட்டு வீடு திரும்பியுள்ளார். அப்போது வீட்டின் ஹாலில் அவருடைய மனைவி சரஸ்வதி வெட்டுக் காயங்களுடன் ரத்த வெள்ளத்தில் கிடந்தார். இதனைக் கண்டு அதிர்ச்சியடைந்த குமார் கூச்சலிட்டுள்ளார். அக்கம் பக்கத்தில் இருந்தவர்கள் ஓடி வந்து பார்த்து போலீசாருக்கு தகவல் கொடுத்தனர்.

தகவலறிந்து உடனடியாக சம்பவம் நடந்த இடத்திற்கு வந்த போலீசார், ரத்த வெள்ளத்தில் உயிரிழந்து கிடந்த சரஸ்வதியின் உடலைப் பிரேதப் பரிசோதனைக்காக அனுப்பி வைத்தனர். மர்ம நபர்கள் சரஸ்வதியை வெட்டிப் படுகொலை செய்துவிட்டு அவர் கழுத்தில் இருந்த தங்க நகையைப் பறித்துச் சென்றது விசாரணையில் தெரியவந்தது. இருப்பினும் இந்த கொலை, நகைக்காக நடந்ததா அல்லது வேறு ஏதேனும் முன் விரோதப் பிரச்சனை காரணமாக நிகழ்ந்ததா என்பது தொடர்பாக விசாரணை நடத்தி வருகின்றனர். பட்டப்பகலில் பெண் படுகொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியுள்ளது

Next Story

நீரோடையில் மிதந்த சடலம்; போலீசார் விசாரணையில் அதிர்ச்சி

Published on 27/03/2024 | Edited on 27/03/2024
A body lying in a stream; Police investigation shocked

தந்தையைக் கொலை செய்தவரைப் பழிக்குப் பழி கொலை செய்து நீரோடையில் வீசிய சம்பவம் நெல்லையில் பரபரப்பை ஏற்படுத்தி இருக்கிறது.

நெல்லை மாவட்டம் தெற்கு ஏறாந்தை கிராமத்தில் வசித்து வருபவர் தேவபாலன். லாரி ஓட்டி வந்த தேவபாலன் திடீரென காணாமல் போன நிலையில், உறவினர்கள் அவரைத் தேடி வந்தனர். இறுதியில் ஊருக்கு ஒதுக்குப்புறமாக உள்ள நீரோடை ஒன்றில் சடலம் ஒன்று மிதப்பதாகத் தகவல் பரவியது. இந்த தகவலையடுத்து சம்பவ இடத்திற்கு வந்த திசையன்விளை போலீசார் ஆய்வு செய்ததில், வெட்டுக் காயங்களுடன் ஒருவர் கொலை செய்யப்பட்டு நீரோடையில் வீசப்பட்டது தெரிய வந்தது.

உடலைக் கைப்பற்றி விசாரணை நடத்தியதில், அது காணாமல் போன தேவபாலன் என்பது தெரியவந்தது. இது குறித்து வழக்குப்பதிவு செய்த காவல்துறையினர் சம்பவம் தொடர்பாக விசாரணை நடத்தி வந்தனர். இந்த நிலையில், தேவபாலன் கொலை வழக்கு தொடர்பாக சாத்தூர் நீதிமன்றத்தில் உத்திரகுமார், சுரேஷ்குமார், சேர்மதுரை உள்ளிட்ட மூன்று பேர் சரணடைந்தனர். மூவரும் சகோதரர்கள். அவர்களிடம் நடத்தப்பட்ட விசாரணையில், பழிக்குப் பழியாக லாரி டிரைவரை கொலை செய்தது தெரியவந்தது.

2017 ஆம் ஆண்டு துரைபாண்டியன் என்பவர் கொலை செய்யப்பட்ட சம்பவத்தில் தேவபாலனுக்கு தொடர்பு இருந்ததாகத் தெரிகிறது. ஆனால் நீதிமன்றத்தில் குற்றம் நிரூபணம் ஆகாததால் அவர் விடுவிக்கப்பட்டிருந்தார். இந்நிலையில், துரைபாண்டியனின் மகன்களான சுரேஷ்குமார், உத்திர குமார், சேர்மதுரை ஆகிய மூன்று பேரும் பல வருடங்கள் கழித்து தேவபாலனை வெட்டிக் கொலை செய்தது விசாரணையில் தெரிய வந்தது.