Skip to main content

குப்பை பொறுக்கலாம் வாங்க...! சேலம் மாநகராட்சி அழைப்பு!!

Published on 28/12/2020 | Edited on 28/12/2020

 

salem municipal corporation invited the peoples clean city

சேலத்தை தூய்மையான மாநகரமாக மாற்ற, நடைப்பயிற்சியின்போது நடைபாதையில் தென்படும் குப்பைகளை சேகரிக்கும் பணியை மாநகராட்சி நிர்வாகம் தொடங்கியுள்ளது. இப்பணியில் தன்னார்வலர்கள் ஆர்வத்துடன் பங்கேற்று மக்காத குப்பைகளை அகற்ற வேண்டும் என்றும் வேண்டுகோள் விடுத்துள்ளது.

 

ஞாயிறன்று (டிச. 27) அஸ்தம்பட்டி மண்டலத்துக்கு உட்பட்ட கோம்பைப்பட்டி சாலை, ஏற்காடு முதன்மைச்சாலை, பச்சியம்மன் திரையரங்கு சாலை, ஏடிசி நகர் ஆகிய இடங்களில் சிறப்பு குப்பைகள் அகற்றும் பணிகள் (பிளாக்கிங்) நடந்தன. மாநகர காவல்துறை ஆணையர் செந்தில்குமார், மாநகராட்சி ஆணையர் ரவிச்சந்திரன் ஆகியோர் கலந்து கொண்டனர். 

 

காவல்துறையினர், குடியிருப்போர் நலச்சங்கத்தினர் மற்றும் தன்னார்வலர்கள் 400 பேர் இப்பணியில் ஈடுபட்டனர். 770 கிலோ நெகிழிகள் உள்ளிட்ட இதர மக்காத கழிவுகள் சேகரிக்கப்பட்டன. 

 

காவல்துறை துணை ஆணையர்கள் செந்தில், சந்திரசேகர், உதவி ஆணையர்கள், மாநகர நல அலுவலர் பார்த்திபன், மாநகராட்சி உதவி ஆணையர்கள், உதவி பொறியாளர்கள் கலந்து கொண்டனர்.

 

முன்னதாக டிச.26- ஆம் தேதி, சாமிநாதபுரம், ஆர்.டி.பால் தெரு, குரங்குசாவடி முதன்மைச்சாலை, இரும்பாலை முதன்மைச்சாலை, வித்யா நகர், வீராணம் சாலை, கடலூர் சாலை, கோவிந்தம்மாள் நகர், புத்தூர் இட்டேரி சாலை, அன்னதானப்பட்டி சாலை பகுதிகளில் சிறப்பு குப்பை அகற்றும் பணிகள் நடந்தன. இதில் 450 தன்னார்வலர்கள் கலந்து கொண்டு 860 கிலோ நெகிழிகள் உள்ளிட்ட மக்காத கழிவுப் பொருள்களை சேகரித்தனர். சனிக்கிழமை தோறும் இப்பணிகளை மேற்கொள்ள தீர்மானித்துள்ளது சேலம் மாநகராட்சி.

 

சார்ந்த செய்திகள்

Next Story

விஜய் பட நடிகரின் வித்தியாசமான கிஃப்ட் - கல்யாணத்தில் கலகலப்பு

Published on 22/02/2024 | Edited on 22/02/2024
actor benjamin gift garlic to new married couples

வெற்றிக் கொடி கட்டு, ஆட்டோகிராஃப், திருப்பாச்சி உள்ளிட்ட பல படங்களில் காமெடி கதாபாத்திரம் மற்றும் துணை கதாபாத்திரங்களில் நடித்து பிரபலமானவர் பெஞ்சமின். கடைசியாக கடந்த ஆண்டு வெளியான மெய்ப்படச் செய் என்ற படத்தில் நடித்திருந்தார்.

இந்த நிலையில் சேலத்தில் நடந்த திருமண நிகழ்வில் நடிகர் பெஞ்சமின் கலந்து கொண்டுள்ளார். அப்போது மணமக்களுக்கு பூண்டால் கட்டப்பட்ட மாலை மற்றும் 2 கிலோ பூண்டு அடங்கிய பூங்கொத்து ஆகியவைகளை கொடுத்து வாழ்த்தினார். அவரோடு நடிகர் முகமது காசிம் என்ற நடிகரும் சென்றுள்ளார். இவர்களின் பரிசைப் பார்த்து மணமக்கள் புன்னகைத்து வாங்கிக் கொண்டனர்.

இது தொடர்பான வீடியோ சமூக வலைதளங்களில் வெளியாகி பலரது கவனத்தை ஈர்த்து வருகிறது. பூண்டின் விலை கடந்த டிசம்பர் மாதம் முதல் உயரத் தொடங்கியது. கடந்த சில தினங்களாக 1 கிலோ பூண்டு ரூ.500 முதல் ரூ.550 வரை விற்கப்பட்டு வருகிறது  என்பது குறிப்பிடத்தக்கது.  

Next Story

மேட்டூர் அருகே இருதரப்பினர் மோதல்; போலீஸ் குவிப்பு

Published on 19/02/2024 | Edited on 19/02/2024
Clash between two sides near Mettur; police presence

சேலம் மாவட்டம் மேட்டூர் அருகே இரு தரப்பினர் மோதிக் கொண்டதால் போலீஸ் குவிக்கப்பட்டுள்ளது பரபரப்பை ஏற்படுத்தி இருக்கிறது.

சேலம் மாவட்டம் மேட்டூர் வட்டம் காவேரிபுரம் என்ற பகுதியில் ஒன்றரை ஏக்கர் பரப்பளவில் இஸ்லாமியர்கள் தகன பூமி ஒன்று உள்ளது. இந்த நிலப்பரப்பிற்கு அருகே பட்டியலின மக்கள் வசித்து வருகின்றனர். அந்த பகுதியில் பலர் வசித்து வரும் நிலையில், தங்கள் குடியிருப்பு அருகே உடல்களை அடக்கம் செய்யக்கூடாது எனத் தெரிவித்து அந்தப் பகுதி மக்கள் எதிர்ப்பு தெரிவித்து வருகின்றனர்.

இந்நிலையில், இன்று அங்கு சடலம் ஒன்று புதைப்பதற்காக எடுத்து வரப்பட்ட நிலையில், அதைத் தடுத்து நிறுத்திய பொதுமக்கள் அவர்களுடன் வாக்குவாதத்தில் ஈடுபட்டனர். இதனால் அங்கு தள்ளுமுள்ளு ஏற்பட்டு பதற்றமான சூழ்நிலை ஏற்பட்டது. இது குறித்து உடனடியாக போலீசாருக்கு தகவல் கொடுக்கப்பட்ட நிலையில், சம்பவ இடத்திற்கு வந்த போலீசார் இருதரப்பினரையும் சமாதானப்படுத்த முயன்றனர். மேலும் அந்த பகுதி மக்கள் உடனடியாக இதற்கு நிரந்தர தீர்வு வேண்டும் எனக் கேட்டு சாலை பகுதியில் போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது.