Skip to main content

கலெக்டர் அலுவலகத்தில் கருப்பு பணம்... 93 பவுன் சுருட்டிய பெண்ணின் நூதன உத்தி!

Published on 14/11/2020 | Edited on 14/11/2020

 

salem district women money and gold police investigation

சேலத்தில், ஆட்சியர் அலுவலக ஊழியர்கள் சிலர் கருப்பு பணம் வைத்திருப்பதால், அதை வெள்ளையாக்குவதற்காக ஒரு பவுன் நகையை ஒரு லட்சம் ரூபாய்க்கு வாங்கிக் கொள்ள தயாராக இருப்பதாகக்கூறி நூதன முறையில் மர்மப் பெண் ஒருவர் கிராமப் பெண்களிடம் 93 பவுன் நகைகளை சுருட்டிய சம்பவம் குறித்து காவல்துறையினர் விசாரித்து வருகின்றனர். 

 

சேலம் அமானி கொண்டலாம்பட்டி, அரச மரத்துக்காட்டூரைச் சேர்ந்தவர் சபீனா (26). அவர், சேலம் மாவட்ட ஆட்சியர் அலுவலகத்தில் பணியாற்றி வருவதாக உள்ளூர் மக்களிடம் கூறி வந்துள்ளார். ஆட்சியர் அலுவலக ஊழியர்கள் பலர் கருப்பு பணத்தை வைத்திருக்கிறார்கள் என்றும், அவர்கள் பணத்தை வெள்ளையாக்க ஒரு பவுன் தங்கத்தை ஒரு லட்சம் ரூபாய்க்கு வாங்கிக் கொள்ள தயாராக இருப்பதாகவும் கூறி வந்துள்ளார்.

 

இத்தொகை, பவுன் கையில் கிடைத்த ஒரு மாதத்தில் வழங்கப்படும் என்றும், அதற்கு முன்னதாக நோட்டரி பப்ளிக் வழக்கறிஞர் மூலம் முத்திரைத்தாளில் உத்தரவாதம் எழுதிக் கொடுக்கப்படும் என்றும் கூறியுள்ளார்.

 

இதை நம்பிய உள்ளூர் பெண்கள் பலர், சபீனாவிடம் தாங்கள் அணிந்திருந்த நகைகளை போட்டிப்போட்டுக் கொண்டு கழற்றிக் கொடுத்துள்ளனர். அதன்படி, காஞ்சனா 16 பவுன், திலகவதி 30 பவுன், மஹாலட்சுமி 16 பவுன், சிவகுமார் 8 பவுன், விஜயா 16 பவுன், மைதிலி 3, சுதாகர் ஒன்றரை பவுன், பாரதி 3 பவுன் என மொத்தம் 93 பவுன் நகைகளை சபீனாவிடம் கொடுத்துள்ளனர்.

 

சிலர் அடகு வைத்திருந்த நகைகளையும் சபீனாவிடம் கடன் வாங்கிய பணத்தில் மீட்டு, அவற்றையும் கொடுத்துள்ளனர். சிலரிடம் வங்கிக்கடன் வாங்கித் தருவதாகவும் கூறி, நகைகளை பெற்றுள்ளார் சபீனா.

 

நகைகளை வாங்கி ஓரிரு மாதங்கள் ஆகியும் அவர் சொன்னபடி ஒருவருக்கு கூட பவுனுக்கு ஒரு லட்சம் ரூபாய் கொடுக்காமல் இருந்ததால் அவர் மீது நகைகளை கொடுத்த பெண்களுக்கு சந்தேகம் ஏற்பட்டது. மேலும், திடீரென்று அவர் தான் குடியிருந்து வரும் வீட்டையும் காலி செய்துவிட்டு அருகில் உள்ள இந்திரா நகர் பகுதிக்குச் சென்று விட்டார். அங்கு சென்று விசாரித்தபோதும் சபீனா சரியாக பிடிகொடுத்துப் பேசவில்லை.

 

அதையடுத்து நகைகளைப் பறிகொடுத்த 20- க்கும் மேற்பட்ட பெண்கள், சபீனா மீது உரிய நடவடிக்கை எடுக்கக்கோரி சேலம் மாநகர காவல்துறை ஆணையரிடம் நேற்று முன்தினம் (நவ. 12) புகார் மனு அளித்தனர்.

 

இந்தப் புகாரின்பேரில் காவல்துறையினர் வழக்குப்பதிவு செய்து விசாரித்து வருகின்றனர். ஆட்சியர் அலுவலகத்தில் சபீனா என்ற பெயரில் யாரேனும் பணியாற்றுகிறார்களா, இதேபோல் அவர் வேறு யார் யாரிடம் மோசடி செய்திருக்கிறார் என்றும் விசாரணை நடந்து வருகிறது.

 

சார்ந்த செய்திகள்

Next Story

ரூ. 7 கோடி மதிப்புள்ள தங்கம் பறிமுதல்; சென்னையில் பரபரப்பு!

Published on 27/03/2024 | Edited on 27/03/2024
Rs. 7 crore worth of gold seized; Sensation in Chennai
மாதிரிப்படம்

சென்னை விமான நிலையத்திற்கு இன்று (27.03.2024) துபாயில் இருந்து எமிரேட்ஸ் ஏர்லைன்ஸ் என்ற விமானம் ஒன்று வந்துள்ளது. இந்த விமானத்தில் வந்தவர்களை சுங்கத்துறை அதிகாரிகள் தீவிரமாக சோதனை செய்தனர். அப்போது கேரள மாநிலம் கோட்டையம் பகுதியைச் சேர்ந்த 37 வயதான பெண் ஒருவர் தனது 14 வயது மகளுடன் வந்துள்ளார்.

இவர்களை சுங்கத்துறை அதிகாரிகள் சோதனை செய்த போது ரூ. 7 கோடி மதிப்புள்ள 11.98 கிலோ தங்கக் கட்டிகள் இருப்பது கண்டுபிடிக்கப்பட்டது. மேலும் தொடர்ந்து அவர்களிடம் நடத்தப்பட்ட விசாரணையில் லண்டனில் இருந்து துபாய் வழியாக வந்த போது கடத்தல் தங்கத்தோடு சிக்கியது தெரியவந்துள்ளது.

இதனையடுத்து 37 வயதான அப்பெண்ணை கைது செய்து சுங்கத்துறை அதிகாரிகள் நீதிமன்ற காவலில் அடைத்தனர். அண்மைக் காலத்தில் பயணி ஒருவரிடம் இருந்து 12 கிலோ கடத்தல் தங்கம் பிடிபட்டது இதுவே முதல்முறை என்ற தகவலும் வெளியாகியுள்ளது. மேலும், ரூ.7 கோடி மதிப்புள்ள 11.98 கிலோ தங்கக் கட்டிகள் சென்னை விமான நிலையத்தில் பறிமுதல் செய்யப்பட்ட சம்பவம் சென்னை விமான நிலைய அதிகாரிகள் மற்றும் விமான பயணிகள் மத்தியில் பெரும் பரபரப்பை ஏற்படுத்தியுள்ளது. 

Next Story

சிக்கிய 6 கோடி ரூபாய் தங்கம்! - அதிரடியில் தேர்தல் பறக்கும் படை 

Published on 25/03/2024 | Edited on 25/03/2024
6 crores of gold trapped! Election Flying Squad in action
மாதிரி படம் 

சேலம் அருகே, உரிய ஆவணங்களின்றி கூரியர் நிறுவன வாகனத்தில் கொண்டு செல்லப்பட்ட 6.20 கோடி ரூபாய் தங்க நகைகளைத் தேர்தல் பறக்கும் படை அதிகாரிகள் பறிமுதல் செய்தனர்.

நாடாளுமன்றத் தேர்தல் வரும் ஏப்ரல் 19ம் தேதி நடக்கிறது. இதையொட்டி வாக்காளர்களுக்கு அரசியல் கட்சிகள் சார்பில் பணம் உள்ளிட்ட பரிசுப் பொருட்கள் வழங்கப்படுவதைத் தடுக்கும் வகையில், தேர்தல் பறக்கும் படை அதிகாரிகள் தீவிரமாகக் கண்காணித்து வருகின்றனர். இந்நிலையில், சேலத்தை அடுத்துள்ள மல்லூர் பிரிவு சோதனைச் சாவடியில் தேர்தல் பறக்கும் படை அதிகாரி ரபீக் அஹ்மது தலைமையில் அலுவலர்கள் மார்ச் 23 ஆம் தேதி காலை வாகனச் சோதனையில் ஈடுபட்டு இருந்தனர்.

அப்போது, சேலத்திலிருந்து வந்த தனியார் கூரியர் நிறுவனத்திற்குச் சொந்தமான வாகனத்தை நிறுத்தி சோதனையிட்டனர். அதில் இருந்த 3 சாக்கு மூட்டைகளைப் பிரித்துப் பார்த்தனர். அவற்றில் 39 நகைப் பெட்டிகள் வைக்கப்பட்டிருந்தன. அந்தப் பெட்டிகளில் 6.20 கோடி ரூபாய் மதிப்பிலான 29 கிலோ புதிய தங்க நகைகள் இருந்தன. இந்த நகைகளைக் கொண்டு செல்வதற்கான உரிய ஆவணங்கள் இல்லாததால் அவற்றை தேர்தல் பறக்கும் படை அதிகாரிகள் பறிமுதல் செய்தனர். 

அவற்றை, நாமக்கல் மாவட்டம் ராசிபுரம் வட்டாட்சியர் அலுவலகத்தில் உள்ள உதவி தேர்தல் நடத்தும் அலுவலர் முத்துராமலிங்கத்திடம் ஒப்படைத்தனர். இதுகுறித்து அவர் கூறுகையில், ''பறிமுதல் செய்யப்பட்ட நகைகள் சேலத்தில் இருந்து திண்டுக்கல், மதுரை, புதுக்கோட்டை ஆகிய இடங்களில் உள்ள நகைக் கடைகளுக்குக் கொண்டு செல்லப்படுவதற்காக கூரியர் நிறுவனத்தின் மூலம் அனுப்பி வைத்துள்ளனர். ஆனாலும் இதற்கான உரிய ஆதாரங்கள் இல்லாததால் நகைகளைப் பறிமுதல் செய்து, அரசு கருவூலத்தில் ஒப்படைக்கப்பட்டுள்ளது. சம்பந்தப்பட்ட நிறுவனம், இந்த நகைகளுக்கான ஆதாரங்களைக் காண்பித்துவிட்டு பெற்றுச் செல்லலாம்'' என்றார்.