திருச்சி மாவட்டம், நவல்பட்டு பெரிய சூரியூர் பகுதியில் சையத் அலி என்பவர் ஒரு மினரல் வாட்டர் நிறுவனத்தை நடத்திவந்தார். கடந்த நான்கு வருடங்களுக்கு முன்பாக அவரது தொழிலில் நஷ்டம் ஏற்படவே, அவர் தனது தொழிற்சாலையை மூடியுள்ளார். ஆனால், தொழிற்சாலையிலிருந்த உபகரணங்களை அப்படி வைத்துள்ளார். இந்நிலையில் நேற்று முன்தினம் அவர், தனது நிறுவனத்தை நேரில் சென்று பார்த்துள்ளார். அப்போது அவரது நிறுவனத்தில் இருந்த சில பொருட்கள் காணாமல் போயிருந்தது. இது குறித்து சையத், நவல்பட்டு காவல் நிலையத்தில் புகார் கொடுத்தார். அந்தப் புகாரின் அடிப்படையில், காவல்துறையின் வழக்குப் பதிவு செய்து விசாரணையில் ஈடுபட்டனர்.
அந்த விசாரணையில், திருவரம்பூர் பகுதி சேர்ந்த பாரதி(20), முரளி(19), சூர்யா(19) ஆகிய மூன்று பேர் திருட்டில் ஈடுபட்டது தெரியவந்தது. அதனைத் தொடர்ந்து காவல்துறையினர் அவர்கள் மூவரையும் கைது செய்யத் திட்டமிட்டு அவர்கள் இருந்த இடத்திற்குச் சென்றுள்ளனர். அப்போது, பாரதி மற்றும் முரளி மட்டுமே காவல்துறையிடம் சிக்கியுள்ளனர். சூர்யா அங்கிருந்து தப்பிச் சென்றுள்ளார். பிடிபட்ட இருவரையும் கைது செய்த காவல்துறையினர் அவர்களைக் காவல்நிலையத்திற்கு அழைத்து சென்று விசாரணை மேற்கொண்டு வருகின்றனர். மேலும், தப்பித்த சூர்யாவைத் தீவிரமாகத் தேடிவருகின்றனர்.
