Skip to main content

முதன்முறையாக ரயில்வே தொழிலாளர்களுக்கு தபால் வாக்குரிமை! - தேர்தல் ஆணையம் உத்தரவு

Published on 02/04/2021 | Edited on 02/04/2021

 

Postal voting for railway workers for the first time

 

நாடாளுமன்றம், சட்டமன்றம், உள்ளாட்சி அமைப்புகள் உள்ளிட்ட தேர்தல்களில், ஓடும் ரயில்களில் பணியாற்றும் லோக்கோ பைலட்டுகள், கார்டுகள், பயணச்சீட்டு பரிசோதகர்கள் உள்ளிட்ட இதர பணியாளர்கள் யாரும் ஓட்டு போட முடிவதில்லை. காரணம், வாக்களிப்பதற்கு வசதியாக இந்தப் பணியாளர்களுக்கு விடுமுறையளிக்கப்படுவதில்லை. விடுமுறையளித்தால் ரயில் சேவைகள் தடைபடும். இதனாலேயே அவர்களால் வாக்களிக்க முடிவதில்லை. இந்தப் பிரச்சினை நீண்டகாலமாக இருந்து வருகிறது. 

 

இந்த நிலையில், ‘தேர்தல் பணிகளில் ஈடுபடும் ஆசிரியர்கள் மற்றும் அரசு ஊழியர்களுக்கு தபால் வாக்குரிமை இருப்பது போல, தேர்தல் காலங்களில் ரயில்களில் பணிபுரியும் தொழிலாளர்களுக்கும் தபால் வாக்குரிமை அளிக்க வேண்டும்’ என்று பிரதமர் மோடி மற்றும் மத்திய சட்ட அமைச்சகத்துக்கு, கடந்த ஜனவரி மாதம் கோரிக்கை கடிதம் அனுப்பியிருந்தார் சதர்ன் ரயில்வே மஸ்தூர் யூனியனின் மதுரை கோட்ட உதவிச் செயலாளர் ராம்குமார். 

 

ராம்குமாரின் கோரிக்கையைப் பரிசீலிக்குமாறு தேர்தல் ஆணையத்தின் கவனத்துக்கு கொண்டு சென்றது பிரதமர் அலுவலகம். இதனைத் தொடர்ந்து, தலைமைத் தேர்தல் ஆணையத்தின் செயலாளர் அபிசேக் திவாரி, மக்கள் பிரதிநிதித்துவச் சட்டம் பிரிவு எண் 60(சி)-யில் மாற்றம் செய்யப்பட்டுள்ளது. அதன்படி, தேர்தல் நாளன்று அத்யாவசிய பணிகளில் உள்ளவர்களுக்குத் தபால் வாக்குரிமை வழங்கப்படும் என்றும், அத்யாவசிய பணிகளில் ரயில்வே ஊழியர்கள் வருவதால் அவர்களுக்கும் தபால் வாக்குரிமை வழங்கப்படுகிறது என்றும் உத்தரவு  பிறப்பித்துள்ளார். 

 

இதுகுறித்து ராம்குமாரிடம் நாம் பேசியபோது, "இவ்வளவு காலமும் ரயில்வே ஊழியர்களுக்கு மறுக்கப்பட்டுவந்த தபால் வாக்குரிமை, இந்தத் தேர்தலில் கிடைத்திருப்பது மகிழ்ச்சி. ரயில்வே ஊழியர்களைப் போல தேர்தல் நாளன்று அத்யாவசிய பணிகளில் இருக்கும் அனைத்துத் துறை பணியாளர்களுக்கும் தபால் வாக்குரிமைக் கிடைத்துள்ளது" என்கிறார் பெருமிதமாக!

 

 

சார்ந்த செய்திகள்

 

Next Story

“ரயில் விபத்திற்கு மோடி அரசு பொறுப்பு ஏற்க வேண்டும்” - காங்கிரஸ் தலைவர்கள் வலியுறுத்தல்!

Published on 17/06/2024 | Edited on 17/06/2024
Modi govt should take responsibility for the train incident Congress leaders insist

மேற்கு வங்க மாநிலம் டார்ஜிலிங் மாவட்டத்தில் உள்ள பனிஷ்தேவா பகுதியில் இன்று (17.06.2024) காலை 9 மணியளவில் சீல்டா - கஞ்சன்ஜங்கா எக்ஸ்பிரஸ் ரயில் நின்று கொண்டிருந்தது. அப்போது அந்த வழியாக வந்த சரக்கு ரயில் சீல்டா - கஞ்சன்ஜங்கா எக்ஸ்பிரஸ் ரயில் மீது மோதியது. இந்த ரயில் விபத்தில் பலர் காயமடைந்துள்ளதாகவும், 4 பேர் உயிரிழந்துள்ளதாகவும் முதற்கட்ட தகவல் வெளியாகி இருந்தது.

சரக்கு ரயில் மோதியதில் பயணிகள் ரயிலின் கடைசி மூன்று பெட்டிகள் முழுவதுமாக சீர்குலைந்துள்ளன. அதிலும் குறிப்பாக எக்ஸ்பிரஸ் ரயிலின் கடைசிப் பெட்டி தூக்கி வீசப்பட்டது. இதனையடுத்து இந்த விபத்தில் பலி எண்ணிக்கை 15 ஆக அதிகரித்துள்ளது எனத் தகவல் வெளியாகியுள்ளது. மேலும் 60க்கும் மேற்பட்டோர் காயமடைந்துள்ளனர் எனக் கூறப்படுகிறது. ரயில் விபத்து நடந்த இடத்தை பார்வையிட மத்திய ரயில்வே துறை அமைச்சர் அஸ்வினி வைஷ்ணவ் டார்ஜிலிங் செல்கிறார். விபத்து நடந்த இடத்தில், டார்ஜிலிங் எம்.பி., ராஜு பிஸ்டா நேரில் பார்வையிட்டார். 

Modi govt should take responsibility for the train incident Congress leaders insist

இந்நிலையில் இந்த ரயில் விபத்து சம்பவத்திற்கு காங்கிரஸ் கட்சியின் முன்னாள் தலைவர் ராகுல் காந்தி தனது கடும் கண்டனத்தை பதிவு செய்துள்ளார். இது குறித்து அவர் வெளியிட்டுள்ள எக்ஸ் பதிவில், “மேற்கு வங்கத்தில் கஞ்சன்ஜங்கா எக்ஸ்பிரஸ் விபத்தில் பலர் உயிரிழந்த செய்தி மிகவும் வருத்தமளிக்கிறது. உயிர்களை இழந்து வாடும் குடும்பத்தினர் அனைவருக்கும் எனது ஆழ்ந்த இரங்கலைத் தெரிவித்துக் கொள்வதுடன், காயமடைந்தவர்கள் விரைவில் குணமடைய வேண்டும் என்று விரும்புகிறேன். பாதிக்கப்பட்ட அனைவருக்கும், அவர்களது குடும்பத்தினருக்கும் அரசு உடனடியாக முழு இழப்பீடு வழங்க வேண்டும். நிவாரணம் மற்றும் மீட்புப் பணிகளில் காங்கிரஸ் தொண்டர்கள் அனைத்து உதவிகளையும் செய்யுமாறு கேட்டுக் கொள்ளப்படுகிறார்கள்.

கடந்த 10 ஆண்டுகளில் அதிகரித்துள்ள ரயில் விபத்துகள் மோடி அரசின் தவறான நிர்வாகத்தின் மற்றும் புறக்கணிப்பின் நேரடி விளைவாகும், இதனால் ஒவ்வொரு நாளும் பயணிகளின் உயிர் மற்றும் உடைமைகளில் இழப்பு ஏற்படுகிறது. பொறுப்புள்ள எதிர்க்கட்சி என்ற வகையில், இந்தப் பயங்கரமான அலட்சியத்தை நாங்கள் தொடர்ந்து கேள்வி எழுப்புவோம். இந்த விபத்துக்களுக்கு மோடி அரசாங்கத்தை பொறுப்பேற்கச் செய்வோம்” எனக் குறிப்பிட்டுள்ளார். 

Modi govt should take responsibility for the train incident Congress leaders insist

மேலும் இது தொடர்பாக காங்கிரஸ் கட்சியின் தலைவர் மல்லிகார்ஜுன கார்கே தனது எக்ஸ் சமூக வலைத்தளப்பதிவில், “மேற்கு வங்க மாநிலம் ஜல்பைகுரியில் கஞ்சன்ஜங்கா எக்ஸ்பிரஸ் ரயில் மோதிய விபத்தில் பலர் உயிரிழந்துள்ளனர் மற்றும் பலர் காயமடைந்துள்ளனர். விபத்து காட்சிகள் வேதனை அளிக்கிறது. பாதிக்கப்பட்ட குடும்பங்களுக்கு எங்களின் ஆழ்ந்த அனுதாபங்கள். இந்தத் துயர நேரத்தில், அவர்கள் ஒவ்வொருவருக்கும் எங்கள் இரங்கலையும் தெரிவித்துக் கொள்கிறோம். காயமடைந்தவர்கள் விரைவில் குணமடைய வேண்டுகிறோம். பாதிக்கப்பட்டவர்களுக்கு உடனடியாக முழுமையான இழப்பீடு வழங்க வேண்டும்.

கடந்த 10 ஆண்டுகளில், ரயில்வே அமைச்சகத்தின் தவறான நிர்வாகத்தில் மோடி அரசு ஈடுபட்டுள்ளது. ஒரு பொறுப்புள்ள எதிர்க்கட்சியாக, மோடி அரசு ரயில்வே அமைச்சகத்தை எப்படி  கேமராவால் இயக்கப்படும் சுயவிளம்பர மேடையாக மாற்றியுள்ளது என்பதை அடிக்கோடிட்டுக் காட்டுவது நமது கடமையாகும். மேலும் இந்திய ரயில்வேயைக் கைவிட்டதற்கு மோடி அரசாங்கத்தை பொறுப்பேற்கச் செய்வோம்’ எனத் தெரிவித்துள்ளார். 

Next Story

ரயில் விபத்து; பிரதமர் மோடி நிவாரணம் அறிவிப்பு!

Published on 17/06/2024 | Edited on 17/06/2024
west bengal kanchenjunga express incident PM Modi relief announcement

மேற்கு வங்க மாநிலம் டார்ஜிலிங் மாவட்டத்தில் உள்ள பனிஷ்தேவா பகுதியில் இன்று (17.06.2024) காலை 9 மணியளவில் சீல்டா - கஞ்சன்ஜங்கா எக்ஸ்பிரஸ் ரயில் நின்று கொண்டிருந்தது. அப்போது அந்த வழியாக வந்த சரக்கு ரயில் சீல்டா - கஞ்சன்ஜங்கா எக்ஸ்பிரஸ் ரயில் மீது மோதியதாகக் கூறப்படுகிறது. இந்த ரயில் விபத்தில் பலர் காயமடைந்துள்ளதாகவும், 4 பேர் உயிரிழந்துள்ளதாகவும் தகவல் வெளியாகி இருந்தது. சரக்கு ரயில் மோதியதில் பயணிகள் ரயிலின் கடைசி மூன்று பெட்டிகள் முழுவதுமாக சீர்குலைந்துள்ளன. அதிலும் குறிப்பாக எக்ஸ்பிரஸ் ரயிலின் கடைசிப் பெட்டி தூக்கி வீசப்பட்டதாக அதிர்ச்சி தகவல் வெளியாகியுள்ளது.

விரைவு ரயில் மீது சரக்கு ரயில் மோதி விபத்து ஏற்பட்டுள்ள சம்பவம் ரயில் பயணிகள் மற்றும் பொது மக்கள் மத்தியில் பெரும் அதிர்ச்சியையும், பரபரப்பையும் ஏற்படுத்தியுள்ளது. இத்தகைய சூழலில் இந்த விபத்தில் பலி எண்ணிக்கை 15 ஆக அதிகரித்துள்ளது. மேலும் 60க்கும் மேற்பட்டோர் காயமடைந்துள்ளனர் எனக் கூறப்படுகிறது. ரயில் விபத்து நடந்த இடத்தை பார்வையிட மத்திய ரயில்வே துறை அமைச்சர் அஸ்வினி வைஷ்ணவ் டார்ஜிலிங் செல்கிறார். விபத்து நடந்த இடத்தில், டார்ஜிலிங் எம்.பி., ராஜு பிஸ்டா நேரில் பார்வையிட்டார். 

west bengal kanchenjunga express incident PM Modi relief announcement
ஜெய வர்ம சின்ஹா

இந்த விபத்து குறித்து ரயில்வே வாரியத்தின் தலைவரும் தலைமை நிர்வாக அதிகாரியுமான ஜெய வர்ம சின்ஹா ​​கூறுகையில், “காஞ்சன்ஜங்கா எக்ஸ்பிரஸ் ரயில் விபத்து தொடர்பான மீட்புப் பணிகள் நிறைவடைந்தன. இந்த சம்பவத்தில் சரக்கு ரயிலின் ஓட்டுநர், உதவி ஓட்டுநர் மற்றும் காஞ்சன்ஜங்கா எக்ஸ்பிரஸ் ரயிலின் காவலாளி (guard) ஆகியோர் உயிரிழந்துள்ளனர். சரக்கு ரயில் ஓட்டுநர் சிக்னலை மீறியதாக தெரியவருகிறது. அகர்தலா - சீல்டா வழித்தடத்தில் உள்ள அனைத்து ரயில் நிலையங்களிலும் உதவி மையங்கள் அமைக்கப்பட்டுள்ளன” எனத் தெரிவித்துள்ளார்.

இது குறித்து குடியரசுத் தலைவர் திரௌபதி முர்மு தனது எக்ஸ் வலைத்தளப் பதிவில், “மேற்கு வங்க மாநிலம் டார்ஜிலிங் ரயில் விபத்தில் பயணிகள் உயிரிழந்த செய்தி மிகுந்த வேதனை அளிக்கிறது. எனது எண்ணங்களும் பிரார்த்தனைகளும் துயரமடைந்த குடும்பத்தினருடன் உள்ளன. காயமடைந்தவர்கள் விரைவில் குணமடையவும், நிவாரணம் கிடைக்கவும் பிரார்த்திக்கிறேன்” எனத் தெரிவித்துள்ளார்.

 west bengal kanchenjunga express incident PM Modi relief announcement

அதே சமயம் ரயில் விபத்தில் உயிரிழந்தோர் குடும்பத்தினருக்கு ரூ.2 லட்சமும், காயமடைந்தவர்களுக்கு ரூ.50 ஆயிரமும் நிவாரணமாக வழங்கப்படும் எனப் பிரதமர் மோடி அறிவித்துள்ளார். அதோடு ரயில்வே துறை அமைச்சர் அஷ்வினி வைஷ்ணவ் கூறுகையில், “ரயில் விபத்தில் பாதிக்கப்பட்டவர்களுக்கு இழப்பீடு வழங்கப்படும். இந்த விபத்தில் மரணமடைந்தவர்களுக்கு ரூ.10 லட்சம், கடுமையான படுகாயம் அடைந்தவர்களுக்கு ரூ.2.5 லட்சம் மற்றும் சிறிய காயங்களுக்கு ரூ.50 ஆயிரம் வழங்கப்படும் எனத் தெரிவித்துள்ளார்.