முன்னாள் முதலமைச்சர் கலைஞர் ஆற்றிய 'தமிழ்த் திரைப் பணி - ஓர் ஆய்வு' என்ற தலைப்பில் சென்னைப் பல்கலைக்கழகம் வழங்கும் வாய்மொழித் தேர்வு நந்தனம் அரசு ஆடவர் கலைக் கல்லூரியில் நடைபெற்றது. தமிழ்த் துறையின் பேராசிரியர் இரா. கருணாநிதியை நெறியாளராக கொண்டு கலைஞர் கதை, வசனம் எழுதிய கலைஞரின் பெண் சிங்கம் திரைப்பட இயக்குநர் ஸ்ரீ கபாலி என்கிற பாலி ஸ்ரீரங்கம்  ஆய்வு மாணவராக,  கலைஞர் கதை, திரைக்கதை, வசனம் மற்றும் பாடல்கள் எழுதிய 75 படங்களை முனைவர் பட்ட ஆய்வு செய்துள்ளார். சென்னைப் பல்கலைக்கழகத்தில் 2015 ஆம் ஆண்டிலிருந்து கலைஞரின் திரைப்படைப்புக்களை ஆய்வு செய்து வந்தார். தற்போது கலைஞரின் திரைப் பணி ஆய்வு நிறைவு பெற்றது குறிப்பிடத்தக்கது. 

கலை, அறிவியல் கல்லூரிகளில் சேர்க்கைக்கான கலந்தாய்வு தேதியைக் கல்லூரி கல்வி  இயக்ககம் அறிவித்துள்ளது.

தமிழகத்தில் வரும் கல்வியாண்டிற்கான கலை, அறிவியல் கல்லூரி சேர்க்கைக்கான கலந்தாய்வு வரும் ஆகஸ்ட் 5 தேதி முதல் தொடங்கும் எனக் கல்லூரி கல்வி இயக்ககம் தெரிவித்துள்ளது. இதனால் தமிழகத்தில் 163 அரசு கலை, அறிவியல் கல்லூரிகளில் வரும் ஆகஸ்ட் 5 முதல் கலந்தாய்வு தொடங்க உள்ளது. 12 ஆம் வகுப்பில் எடுக்கப்பட்ட மதிப்பெண் மற்றும் இட ஒதுக்கீடு அடிப்படையில் கலந்தாய்வு நடைபெறும். 163 கலை, அரசு அறிவியல் கல்லூரிகளில் உள்ள 1.3 லட்சம் இடங்களில் சேர 4 லட்சத்திற்கும் மேற்பட்டோர் விண்ணப்பித்திருந்த நிலையில் ,சில நாட்களுக்கு முன்பு தரவரிசை பட்டியல் வெளியாகி இருந்தது. இந்நிலையில் இந்த அறிவிப்பானது வெளியாகியுள்ளது. அதிலும் இந்த கலந்தாய்வு ஆன்லைன் முறையில் நடைபெறும் என அறிவிக்கப்பட்டுள்ளது குறிப்பிடத்தக்கது.