Skip to main content

கந்துவட்டி வசூல்; ஓட்டுநரை மிரட்டும் ஊராட்சி மன்றத் தலைவரின் கணவர்

Published on 05/07/2023 | Edited on 05/07/2023

 

Panchayat President husband threatens JCB driver by asking for usury

 

கரூர் அடுத்த பசுபதிபாளையம், இந்திரா நகரைச் சேர்ந்தவர் ரமேஷ்(42). திருமணம் ஆகி ஒரு மகன் மற்றும் மகள் உள்ளனர். இவர் தனியார் நிறுவனத்தில் ஜேசிபி வாகன ஓட்டுநராக பணிபுரிந்து வருகிறார். இரண்டு ஆண்டுகளுக்கு முன்பு கரூர் மாவட்டம், கோயம்பள்ளி ஊராட்சி தலைவரின் கணவரான திமுக பிரமுகர் மயில்ராஜ் மற்றும் பழனிசாமி, சரவணன் ஆகிய மூன்று பேரிடம் குடும்ப செலவுகளுக்காக சுமார் ஒரு லட்சம் ரூபாய் கடனாகப் பெற்றுள்ளார். கந்து வட்டியின் அடிப்படையில் இந்த கடன் வாங்கியதாக ஓட்டுநர் ரமேஷ் கூறுகிறார். 

 

இந்த நிலையில் கடந்த ஒரு வருடத்திற்கு முன்பு கந்து வட்டி வசூலுக்கு வந்த மூன்று பேரும் ரமேஷ் ஓட்டி வந்த ஜேசிபி வாகனத்தைப் பறித்துச் சென்றதாகக் கூறப்படுகிறது. இதுகுறித்து பசுபதிபாளையம் காவல் நிலையத்தில் அளித்த புகாரின் மீது நடவடிக்கை எடுக்காத காரணத்தால், உயர் நீதிமன்ற மதுரை கிளையில் ரமேஷ் அளித்த புகாரின் பேரில் சம்பந்தப்பட்ட மூன்று பேர் மீதும் பசுபதிபாளையம் போலீசார் வழக்குப் பதிவு செய்தனர். ஆனால், இதுவரை அந்த வழக்கு தொடர்பாக நடவடிக்கை எடுக்காமலும், வாகனத்தை மீட்டுத் தரவில்லை என்றும் கூறப்படுகிறது. 

 

இந்த நிலையில் காந்திகிராமம் பகுதியைச் சேர்ந்த சக்திவேல் என்பவரிடம் ஜேசிபி வாகனத்திற்காக சுமார் 5 லட்சம் ரூபாய் ஓட்டுநர் ரமேஷ் கடன் வாங்கி உள்ளார். அந்த கடனுக்கு முறையாக வட்டி செலுத்தி வந்த நிலையில், கடந்த நான்கு மாத காலமாக வட்டி செலுத்த முடியாத சூழ்நிலை ஏற்பட்டுள்ளது. இதன் காரணமாக சக்திவேல் ஓட்டுநர் ரமேஷ் செல்போனுக்கு அழைத்து, சாதி ரீதியாகத் தகாத வார்த்தைகளைப் பேசி, சொத்தை எழுதித் தருமாறு மிரட்டல் விடுத்த ஆடியோ ஒன்று சமூக வலைத்தளங்களில் வைரலாகி வருகிறது. இது தொடர்பாக ஓட்டுநர் ரமேஷ் கரூர் மாவட்ட காவல் கண்காணிப்பாளர் அலுவலகத்தில் நடைபெறும் குறைதீர்ப்பு நாள் கூட்டத்தில் ஜேசிபி வாகனத்தைப் பறித்துச் சென்ற ஊராட்சி மன்றத் தலைவரின் கணவரான மயில்ராஜ் மற்றும் பழனிசாமி, சரவணன் ஆகியோர் மீதும், வாகனத்திற்கு கடன் கொடுத்த சக்திவேல் மீதும் புகார் மனு அளித்துள்ளார்.

 

 

சார்ந்த செய்திகள்

Next Story

மருத்துவரை 18 முறை அரிவாளால் வெட்டிய சம்பவம்; விசாரணையில் வெளிவந்த திடுக்கிடும் தகவல்

Published on 26/02/2024 | Edited on 26/02/2024

மகாராஷ்டிரா மாநிலம், நாசிக் மாவட்டத்தைச் சேர்ந்தவர் கைலாஷ் ரதி (48). இவர், பஞ்ச்வதி பகுதியில் உள்ள ஒரு தனியார் மருத்துவமனையில் மருத்துவராக பணியாற்றி வந்தார். இந்நிலையில், கைலாஷ் ரதி, கடந்த 23ஆம் தேதி அன்று இரவு நேர பணியில் ஈடுபட்டுக் கொண்டிருக்கும் போது செல்போனில் பேசிக் கொண்டிருந்தார். 

அப்போது, அந்த மருத்துவமனைக்குள் அத்துமீறி ஒரு மர்ம நபர் உள்ளே நுழைந்து, மறைந்திருந்து கைலாஷ் ரதியைக் கடுமையாகத் தாக்கியுள்ளார். மேலும், அவர் தான் மறைத்து வைத்திருந்த அரிவாளால் கைலாஷ் ரதியை சரமாரியாக வெட்டியுள்ளார். இதில் படுகாயமடைந்த கைலாஷ், ரத்த வெள்ளத்தில் கீழே விழுந்தார். இவரது அலறல் சத்தம் கேட்ட அங்கிருந்தவர்கள், அங்கு விரைந்து வந்தனர். ஆனால், அவர்கள் வருவதை உணர்ந்த அந்த நபர், அங்கிருந்து தப்பி ஓடியுள்ளார். இந்த தாக்குதலில் படுகாயமடைந்த கைலாஷ் மருத்துவமனையில் தீவிர சிகிச்சை பெற்று வருகிறார். 

இந்த சம்பவம் குறித்து தகவல் அறிந்து விரைந்து வந்த போலீசார், மருத்துவமனையில் வைக்கப்பட்டிருந்த சிசிடிவி கேமரா காட்சிகளை ஆய்வு செய்தனர். அதில், தாக்குதல் நடத்திய அந்த நபர் அந்த மருத்துவமனையில் பணியாற்றி வந்த முன்னாள் ஊழியரின் கணவர் என்பது தெரியவந்தது. இதனையடுத்து, இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வந்தனர்.

அந்த விசாரணையில், மருத்துவமனையில் பணிபுரிந்து வந்த பெண் முன்னாள் ஊழியர் 12 லட்ச ரூபாய்க்கு மேல் முறைகேடு செய்ததால் சமீபத்தில் வேலையில் இருந்து நீக்கப்பட்டுள்ளார். மனைவியை வேலையை விட்டு நீக்கியதால் ஆத்திரமடைந்த கணவர், மருத்துவமனைக்குள் அத்துமீறி நுழைந்து மருத்துவரை அரிவாளால் 18 முறை சரமாரியாக வெட்டியுள்ளார் என்பது தெரியவந்தது. இந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.

Next Story

22 ஆண்டுகளாக தலைமறைவாகி இருந்த பயங்கரவாதி கைது; விசாரணையில் பகீர் தகவல்

Published on 26/02/2024 | Edited on 26/02/2024
who was absconding for 22 years arrested in maharastra

தடை செய்யப்பட்ட இந்திய இஸ்லாமிய மாணவர் இயக்கத்தைச் சேர்ந்தவர் ஹனிப் ஷேக் (47). இவர், ‘சிமி’ என்கிற இயக்கத்தில் சேர்ந்து பல இளைஞர்களை மூளைச்சலவை செய்தும், இயக்க செயல்பாடுகளுக்காக நன்கொடை திரட்டும் பணிகளிலும் ஈடுபட்டு வந்துள்ளார். அதன் பிறகு, இவர் கடந்த 2001ஆம் ஆண்டு, அந்த இயக்க பத்திரிகையின் ஆசிரியராகவும் வேலை பார்த்து வந்துள்ளார். 

அந்த சமயத்தில், டெல்லியில் உள்ள நியூ பிரண்ட்ஸ் காலனி போலீஸ் நிலையத்தில் சட்டவிரோத நடவடிக்கைகள் தடுப்பு சட்டத்தின் கீழ், ஹனிப் ஷேக் மீது தேசவிரோத வழக்கு பதிவு செய்யப்பட்டது. அதன் பிறகு, தலைமறைவாக இருந்து வந்த ஹனிப் ஷேக்கை, கடந்த 2002ஆம் ஆண்டு டெல்லி உயர்நீதிமன்றம், அவரை தலைமறைவு குற்றவாளியாக அறிவித்தது. 

ஹனிப் ஷேக்கை பற்றி தகவல்கள், டிஜிட்டல் ஆதாரங்கள் மற்றும் ஆதரவாளர்களை பற்றி தகவல்களை சேகரிக்க டெல்லி போலீஸ் சிறப்பு பிரிவு ஒரு குழுவை அமைத்து தீவிர கண்காணிப்பில் ஈடுபட்டு வந்தது. இந்த நிலையில், மகாராஷ்டிரா மாநிலம், ஜல்காவ் மாவட்டம் புசாவல் நகர் பகுதியில் போலீஸ் வாகன சோதனையில் ஈடுபட்டு கொண்டிருந்தனர். அப்போது, காகா ரோடு வழியாக காரில் ஹனிப் ஷேக்கை அடையாளம் கண்டு போலீசார் சுற்றி வளைத்தனர். இதில் அதிர்ச்சியடைந்த ஹனிப் ஷேக் அங்கிருந்து தப்பி ஓட முயன்றார். உடனே சுதாரித்த போலீசார், ஹனிப் ஷேக்கை விரட்டிச் சென்று பிடித்து கைது செய்தனர்.

கைது செய்யப்பட்ட ஹனிப் ஷேக்கிடம் நடத்திய விசாரணையில், ஹனிப் ஷேக் தனது அடையாளத்தை மறைத்துக்கொண்டு, புசாவல் நகரில் உள்ள ஒரு உருது பள்ளியில் ஆசிரியராக பணியாற்றி வந்துள்ளார் என்பது தெரியவந்தது. இதனையடுத்து, ஹனிப் ஷேக்கிடம் தொடர்ந்து போலீசார் விசாரணை நடத்தி வருகின்றனர். 22 ஆண்டுகளாக தலைமறைவாக இருந்த பயங்கரவாதி கைது செய்யப்பட்டிருப்பது பெரும் பரபரப்பை ஏற்படுத்தியுள்ளது.