Skip to main content

இரண்டு ஆண்டுகளுக்கு பிறகு நடைபெறும் குலசை தசரா திருவிழா! 

Published on 28/09/2022 | Edited on 29/09/2022

 

Kulasai Dussehra festival to be held after two years!

 

பிரசித்திப் பெற்ற குலசேகரப்பட்டினம் தசரா திருவிழாவில் நேர்த்திக் கடன் செலுத்துவதற்காக, வித விதமான வேடங்களுக்கான பொருட்களை மக்கள் ஆர்வத்துடன் வாங்கி வருகிறார்கள். 

 

குலசேகரப்பட்டினம் தசரா விழாவிற்காக லட்சக்கணக்கான பக்தர்கள் பல வித வேடங்களை அணிந்து, நேர்த்திக் கடன் செலுத்துவது வழக்கம். கடந்த இரண்டு ஆண்டுகளாக கரோனா பொது முடக்கத்தால், பக்தர்களுக்கு அனுமதி வழங்கப்படாத நிலையில், இந்த ஆண்டு வேண்டுதலைச் செலுத்த பக்தர்கள் தயாராகி வருகிறார்கள். 

 

விழாவின் போது, 10 நாட்கள் விரதம் இருக்கும் பக்தர்கள், காளி உள்ளிட்ட கடவுள் வேடம் அணிந்து, தங்களது வேண்டுதலை நிறைவேற்றுவர். இதற்காக நெல்லை டவுன் நெல்லையப்பர் கோயில் வாசல் பகுதியில் பல வித அலங்காரப் பொருட்கள் விற்பனை வந்துள்ளன. 

 

50 ரூபாய் முதல் 5,000 ரூபாய் வரையிலான அலங்காரப் பொருட்கள் விற்பனை செய்யப்பட்டு வருகின்றன. அலங்காரம் மற்றும் வேடமணிவதற்கான பொருட்கள், இந்தாண்டு 10% முதல் 15% வரை விலை உயர்ந்துள்ளதாக கூறுகிறார்கள் வியாபாரிகள். 

 

முத்தாரம்மன் கோயில் தசரா திருவிழாவின், முக்கிய நிகழ்வான சூரசம்ஹாரம் வரும் அக்டோபர் 5- ஆம் தேதி நடைபெறவுள்ளது. 

 

சார்ந்த செய்திகள்

Next Story

13வது நோன்பு நாளில் சுடச்சுட ஆவி பறக்க தயாரான பிரியாணி

Published on 24/03/2024 | Edited on 24/03/2024
Ready-to-eat Biryani to bake on the 13th day of Lent

ஏப்ரல் மாதம் ரம்ஜான் பண்டிகை வருவதையொட்டி உலகம் முழுவதும் இஸ்லாமிய மக்கள் நோன்பு இருந்து வருகின்றனர். சூரியன் உதயம் முதல் அந்தி சாயும் வரை உணவு உண்ணாமல், நீர் அருந்தாமல் நோன்பு இருப்பர். மாலை 6 மணிக்கு மசூதிக்கு சென்று நமாஸ் செய்துவிட்டு உணவு உண்பார்கள். காலை 5 மணிக்கு முன்பாக உணவு உண்பதை நிறுத்திவிடுவர். நோன்பு காலத்தில் இயலாத மக்களுக்கு மதம் பார்க்காமல் உதவுவார்கள்.

வேலூர் கோட்டை எதிரே 400 கிலோ சிக்கன் கறி கொண்டு சுடச் சுட ஆவி பறக்க நோன்பு பிரியாணி தயார் செய்யப்பட்டது. வேலூர் மக்கான் பகுதியைச் சேர்ந்த இளைஞர்கள் ரம்ஜான் பண்டிகையை முன்னிட்டு 13 வது நோன்பு நாளில் பிரியாணி சமைத்து சுமார் 2000 வீட்டுக்கு பகிர்ந்து அளித்தனர்.

சனிக்கிழமை மாலை 5 மணியிலிருந்து பிரியாணி தயார் செய்யும் பணி தொடங்கிய நிலையில் நள்ளிரவு ஒரு மணி வரை பிரியாணி சமைக்கப்பட்டது. இந்தப் பணியில் சுமார் 130 பேர் ஈடுபட்ட நிலையில், மக்கான் பகுதியில் உள்ள வீடுகளுக்கு சுமார் அதிகாலை 2.30 மணிக்கு முன்பு பகிர்ந்தளிக்கப்பட்டது. ரம்ஜானை முன்னிட்டு 13 வது நோன்பு நாளில் அதிகாலையில் மக்கான் பகுதியில் உள்ள அனைத்து இஸ்லாமியர்களும் பிரியாணியை உண்டு மகிழ்ந்தனர்.

Next Story

திரௌபதி அம்மன் கோவில் இன்று திறப்பு; போலீசார் குவிப்பு

Published on 22/03/2024 | Edited on 22/03/2024
Draupadi Amman temple opens today; Police build up

விழுப்புரம் திரௌபதி அம்மன் கோவில் இன்று திறக்கப்படுகிறது.

விழுப்புரம் அருகே உள்ள மேல்பாதி கிராமத்தில் கடந்த ஆண்டு ஏப்ரல் மாதம் நடந்த திரௌபதி அம்மன் தீமிதி திருவிழாவில் இரு தரப்பினரிடையே மோதல் ஏற்பட்டது. அதனைத் தொடர்ந்து மாவட்ட நிர்வாகம் கோவிலுக்கு சீல் வைத்தது. கோவிலில் இதுவரை யாரும் அனுமதிக்கப்படவில்லை. எட்டு கட்டமாக சமாதான பேச்சுவார்த்தை நடத்தப்பட்ட நிலையில் இரு தரப்பும் நீதிமன்றத்தை நாடி இருந்தது.

இந்நிலையில் 22 ஆம் தேதியான இன்று கோவிலைத் திறந்து பூஜை நடத்துவதற்கு உயர்நீதிமன்றம் அறிவுறுத்தி இருந்தது. பொதுமக்கள் யாரும் அனுமதிக்கப்படாத நிலையில், ஒரு கால பூஜை மற்றும் பூசாரியால் செய்யப்பட வேண்டும் என அறிவிக்கப்பட்டுள்ளது. இதனால் இன்று அதிகாலை முதலே கோவிலை சுத்தம் செய்யும் பணிகள் நடைபெற்ற நிலையில், தற்போது கட்டிங் மெஷின் மூலம் கோவில் பூட்டு உடைக்கப்பட்டு கோவிலைத் திறக்கும் பணி நடைபெற்று வருகிறது. பொதுமக்கள் தடுத்து நிறுத்தப்பட்டிருக்கும் நிலையில், பாதுகாப்புப் பணிக்காக அதிகப்படியான போலீசார் அங்கு குவிக்கப்பட்டிருப்பது பரபரப்பை ஏற்படுத்தி இருக்கிறது.