Skip to main content

''நான் செய்த எல்லா பணிகளுக்கும் ஆவணங்கள் வைத்திருக்கிறேன்'' - நத்தர்ஷா பள்ளிவாசல் அறங்காவலர் அல்லாபக்‌ஷ்

Published on 17/04/2023 | Edited on 17/04/2023

 

 "I have documents for all the work I have done" - Natarsha Masjid Trustee Allah Baksh

 

திருச்சி நத்தர்ஷா பள்ளிவாசல் தலைமை அறங்காவலர் அல்லாபக்‌ஷ் மீது குற்றச்சாட்டுகள் எழுந்த நிலையில் சுழற்சி முறையில் மற்றொருவரை பொது அறங்காவலராக நியமிக்க வேண்டும் என்ற கோரிக்கை எழுந்துள்ளது.

 

கடந்த 6 ஆம் தேதி அன்று வக்பு வாரியத்தின் திருச்சி மண்டலத்திலிருந்து ஒரு கடிதம் பள்ளிவாசலுக்கு அனுப்பப்பட்டுள்ளது. புதிய நிர்வாக அறங்காவலர் தேர்வு ஒத்திவைக்கப்பட்டுள்ளதாகவும், வக்பு வாரியத்தின் தலைமை செயல் அலுவலர் வெளியிட்ட குறிப்பாணை அடிப்படையில் இந்த கடிதம் அனுப்பப்பட்டுள்ளதாகவும் கண்காணிப்பாளர் கடிதம் அனுப்பி இருந்தார்.

 

வக்பு வாரியத்தின் தலைமை செயல் அதிகாரியாக ரபியுல்லா கடந்த 30 ஆம் தேதியோடு பதவியில் இருந்து விலகிவிட்டார். புதிய தலைமை செயல் அதிகாரியாக அரசு கேபிள் நிறுவனத்தில் பணியாற்றிய ஜெய்னுலாப்தீன் நியமிக்கப்பட்டுள்ளார். தமிழக அரசு கடந்த மார்ச் 30 ஆம் தேதி இந்த ஆணையை வழங்கினாலும் கூட கடந்த 10 ஆம் தேதி தான் ஜெய்னுலாப்தீன் பதவியில் வந்து சேர்ந்துள்ளார். கடந்த 1 ஆம் தேதி முதல் 10 ஆம் தேதி வரை வக்பு வாரியத்தின் தலைமை செயல் அதிகாரி பதவி காலியாக இருந்தது. பொறுப்பு அதிகாரியாக யாரும் நியமிக்கப்படாத நிலையில் இந்த கடிதத்தை யார் அனுப்பியது? யார் சொல்லி அனுப்பியது? எனக் கேள்வி எழுந்தது. இது குறித்து உரிய விசாரணை நடத்த வேண்டும் என்றும் மனு அளிக்கப்பட்டுள்ளது.

 

இந்த விவகாரம் குறித்து நத்தர்ஷா பள்ளிவாசல் அல்லாபக்‌ஷிடம் செல்போனில் தொடர்பு கொண்டு பேசியபோது, ''நான் கடந்த 6 ஆம் தேதி அறங்காவலர்கள் கூட்டம் நடத்த உள்ளதாக அறங்காவலர்களுக்கும், வக்பு வாரியத்துக்கும் கடிதம் அனுப்பி வைத்தேன். அங்கிருந்து மீண்டும் பதில் கடிதம் மூலம் தொடர்ந்து தலைமை அறங்காவலராக இருப்பதற்கு வாரியம் கடிதம் அனுப்பியுள்ளது. பொதுவாக பொது அறங்காவலர்கள் 3 பேர், கௌரவ பதவியான பங்காளி, பரம்பரை அறங்காவலர்கள் தலா ஒருவர் வீதம் என மொத்தம் 2 பேர் இருப்பார்கள். இந்த 5 பேரில் பொது அறங்காவலர்கள் 3 பேரில் ஒருவர் தலைமை அறங்காவலராக நியமிக்கப்படுவார்கள்.

 

தற்போது பங்காளி, பரம்பரை அறங்காவலர்கள் பதவிக்காலம் முடிந்துவிட்டது. இந்த இருவரையும் நியமிக்க வேண்டியது வக்பு வாரியம் தான். எனவே அவர்கள் நியமிக்கப்பட்ட பிறகு தலைமை அறங்காவலராக தொடருவதற்கான கூட்டத்தை நடத்த வேண்டும் என்று குறிப்பிட்டுள்ளனர். இதுதான் நீதிமன்ற உத்தரவும் கூட. இந்த 5 பேரில் யாரும் பதவியில் இல்லாமல் புதிய நிர்வாகி அந்த பதவிக்கு தேர்வு செய்யப்படும் வரை தலைமை அறங்காவலர் பதவியில் நீடிப்பார். அவரும் 3 வருடங்கள் மட்டுமே நீடிக்க முடியும். அதேபோல் வங்கிக் கணக்கில் 63 லட்சம் இருந்ததாக கூறுகிறார்கள். நான் செய்த எல்லா பணிகளுக்கும் உரிய ஆவணங்கள், ஆடிட்டிங் என அனைத்தும் சரியாக வைத்து வக்பு வாரியத்துக்கு அனுப்பி வைத்துள்ளேன்.

 

அதேபோல் வக்பு வாரியத்தில் இருந்து கடிதம் சிஇஓ இல்லாமல் எப்படி வந்தது என்று கேட்டுள்ளனர். அவர்களுக்கு அதற்கான வரைமுறை தெரியவில்லை. ஒருவர் இல்லாத பட்சத்தில் அவருக்கு கீழ் உள்ள பொறுப்பு அதிகாரி நான் அனுப்பிய கடிதத்திற்கு பதில் அளித்துள்ளார். எனவே, அவர்கள் சொல்லும் எந்த குற்றச்சாட்டுக்கும் அவர்களிடம் உரிய ஆதாரம் இல்லை. எனவே, ஆதாரம் இல்லாமல் பேசும் அவர்களுடைய வார்த்தைகளை நான் கேட்பதாகவும் இல்லை. நான் இந்த பள்ளிவாசலுக்கு வந்த பிறகு பல மேம்பாடுகள் செய்யப்பட்டுள்ளன. இன்னும் இந்த பள்ளிவாசலை மேம்படுத்துவதற்கான நடவடிக்கையில் ஈடுபடுவேன்'' என்றார்.

 

 

 

சார்ந்த செய்திகள்

Next Story

மாசி மகம்; 132 ஆண்டுகளாக பூவராக சுவாமிக்கு, இஸ்லாமியர்கள் வரவேற்பு!

Published on 24/02/2024 | Edited on 24/02/2024
For 132 years in front of Masi Magam Near Chidambaram, Muslims welcome Bhuvaraha Swami!

கடலூர் மாவட்டம் கிள்ளையில் ஆண்டுதோறும் மாசி மகம் சிறப்பாக  நடைபெறுவது வழக்கம். இதில் கிள்ளை மற்றும் அதனைச் சுற்றியுள்ள கிராமங்களில் இருந்து 100-க்கும் மேற்பட்ட சாமி சிலைகள் மேளதாளம் முழங்க கிள்ளை கடற்கரை பகுதிக்கு கொண்டுவரப்பட்டு,  தீர்த்தவாரி நடைபெறும். இந்த நிலையில் கிள்ளையில் மாசி மக விழா நடைபெற்றது.

கிள்ளை மற்றும் அதனைச் சுற்றியுள்ள கிராமங்களில் இருந்து ஏராளமான சுவாமிசிலைகள் கிள்ளை கடற்கரைக்கு கொண்டுவரப்பட்டு தீர்த்தவாரி நடைபெற்றது. மாசி மகத்தை முன்னிட்டு ஏராளமான பொதுமக்கள் கலந்து கொண்டு சாமி தரிசனம் செய்தனர். பலர் கடலில் குளித்துவிட்டு முன்னோர்களுக்கு தர்ப்பணம் தந்தனர்.

ஆண்டுதோறும் கிள்ளை கடற்கரைக்கு மாசி மகத் திருவிழாவிற்கு ஸ்ரீமுஷ்ணம் பூவராக சாமி தீர்த்தவாரிக்கு வருவது வழக்கம். இந்த ஆண்டு கடற்கரைக்கு வழக்கம்போல தீர்த்தவாரிக்கு வந்தது. கிள்ளை தைக்கால் பகுதியில் தர்க்கா டிரஸ்ட் நிர்வாகி சையது சக்ஹாப் தலைமையில் ஏராளமான இஸ்லாமியர்கள், பேரூராட்சி மன்ற துணைத்தலைவர் கிள்ளை ரவீந்திரன் உள்ளிட்டோர் இணைந்து சாமியை வரவேற்று பட்டு சாத்தினார்கள். பின்னர் பூவராகசாமி கொண்டுவந்த பிரசாதத்தை மேளதாளம் முழங்க அதே பகுதியில் உள்ள தர்ஹாவிற்கு எடுத்துச்சென்று உலக நன்மைக்காகவும், மக்களின் நலனுக்காகவும் பாத்தியா ஓதப்பட்டது. 

இந்நிகழ்வில் பேரூராட்சி உறுப்பினர்கள், முக்கிய பிரமுகர்கள்,  பூவராகசாமி கோயில் செயல் அலுவலர் ராஜ்குமார், பொதுமக்கள் உள்ளிட்டவர்கள் கலந்து கொண்டனர். இந்நிகழ்வு கடந்த 132 ஆண்டுகளாக மதங்களை கடந்த மகம் என இந்து - முஸ்லீம் ஒற்றுமையை பறைசாற்றும் வகையில் அமைந்து வருவது அனைவரது மத்தியிலும் வரவேற்பைப் பெற்றுள்ளது.

Next Story

'இஸ்லாமிய சிறைவாசிகள் அனைவரையும் விடுவிக்க வேண்டும்' - இந்திய யூனியன் முஸ்லீம் லீக் வலியுறுத்தல்

Published on 06/02/2024 | Edited on 06/02/2024
'All Muslim Jailers should be released'- Indian Union Muslim League insists

தமிழக அரசின் பரிந்துரையை ஏற்று 17 சிறைவாசிகளை விடுவிக்கத் தமிழக ஆளுநர் ஒப்புதல் அளித்துள்ளார். அதன்படி கடலூர், கோவை, வேலூர், புழல் ஆகிய சிறைகளில் இருந்து மொத்தம் 17 சிறைவாசிகள் விடுவிக்கப்பட்டுள்ளனர். கடலூர் சிறையில் நீண்ட காலமாக உள்ள செல்வராஜ், சேகர், பெரியண்ணன், உத்திரவேல் ஆகியோர் விடுதலை செய்யப்பட்டுள்ளனர்.

கோவையிலிருந்து ஆறு சிறைவாசிகள் விடுதலை செய்யப்பட்டுள்ளனர். பூரி கமல், விஜயன், அபுதாஹிர், ஹாரூன் பாட்ஷா, சாகுல் ஹமீது உள்ளிட்ட ஆறு பேர் விடுதலை செய்யப்பட்டுள்ளதாக கோவை சிறைத்துறை எஸ்.பி தகவல் வெளியிட்டுள்ளார். வேலூர் சிறையில் இருந்து ஸ்ரீனிவாசன் என்பவரும், புழல் சிறையில் இருந்து ஜாகீர் என மொத்தம் 17 பேர் விடுவிக்கப்பட்டுள்ளனர்.

இந்நிலையில் ஆயுள் சிறைவாசிகள் விடுதலை தொடர்பாக இந்திய யூனியன் முஸ்லிம் லீக் தேசிய தலைவர் பேராசிரியர்  கே. எம்.காதர் மொகிதீன் விடுத்துள்ள அறிக்கையில், 'நீண்ட நெடுங்காலமாக சிறைத் தண்டனை அனுபவிக்கும் ஆயுள் சிறைவாசிகளை கருணை அடிப்படையில் விடுதலை செய்ய வேண்டும்; அவ்வாறு விடுதலை செய்கின்றபோது அதில் மத பேதமோ, வழக்கு வித்தியாசமோ பார்க்கக்கூடாது என்பதை தொடர்ந்து வலியுறுத்தி வருகிறோம்.

இந்திய யூனியன் முஸ்லிம் லீக் உள்ளிட்ட பல தரப்பட்டோரின் தொடர் முயற்சிகளின் பயனாக ஆயுள் சிறைவாசிகள் விடுதலை குறித்து பரிசீலிக்க சென்னை உயர்நீதிமன்ற ஓய்வு பெற்ற நீதியரசர் என். ஆதிநாதன் அவர்கள் தலைமையில் 6 பேர் அடங்கிய குழுவை அமைப்பதாக தமிழ்நாடு முதல்வர்  மு.க.ஸ்டாலின் அவர்கள் 22.12.2021ல் அறிவித்தார். இந்த குழு அரசுக்கு 28.10.2022 ல் அளித்த அறிக்கையில் 264 ஆயுள் சிறைவாசிகளை முன் விடுதலை செய்யலாம் என பரிந்துரைத்தது. அதன் அடிப்படையில் பேரறிஞர் அண்ணா அவர்களால் 115 வது பிறந்த நாளையொட்டி முதற்கட்டமாக 49 ஆயுள் சிறைவாசிகள் விடுதலைக்கான கோப்பினை ஆளுநருக்கு 24.08.2023 அன்று தமிழக அரசு அனுப்பியது. இதில் 20 பேர் முஸ்லிம்களாவர்.

தற்போது 2024 பிப்ரவரி 5 மற்றும் 6 தேதிகள் 17 பேர் விடுதலை செய்யப்பட்டுள்ளனர். இதில் 10 பேர் முஸ்லிம்கள். ஆயுள் சிறைவாசிகளில் 36 முஸ்லிம்கள் உள்ளனர். இவர்களில் 35 பேர் பரோல் விடுப்பில் உள்ளனர். கடலூர் மத்திய சிறையில் உள்ள ரியாஸுர் ரஹ்மான் பரோல் விடுப்பு வேண்டாம், விடுதலையே வேண்டும் என கூறி சிறையிலையே உள்ளார். பரோல் விடுப்பில் உள்ள 21 பேரில் 10 பேர் தற்போது விடுதலை செய்யப்பட்டுள்ளனர். மற்றவர்களின் பரோல் விடுப்பு காலம் வரும் 21 ஆம் தேதியுடன் முடிவடைகிறது. இவர்கள் விடுதலை குறித்த அறிவிப்பு வரும் வரை அவர்களை தொடர்ந்து பரோல் விடுப்பில் விட வலியுறுத்துகிறோம்.

வெடிகுண்டு வழக்கில் தண்டனை அனுபவிக்கும் கோவை பாஷா, புகாரி, நவாப், தாஜுதீன் ஆகிய நால்வர் விடுதலைக்கு நீதியரசர் ஆதிநாதன் குழு பரிந்துரை செய்திருந்தது. தற்போது விடுதலையானவர்களில் அவர்கள் பெயர் இல்லை. வெடிகுண்டு வழக்கில் தொடர்புடையவர்கள் நீண்ட நெடுங்காலம் சிறைவாசம் அனுபவித்து விட்டார்கள். கருணை அடிப்படையில் அவர்கள் விடுதலை செய்யப்பட்டு திருந்தி வாழ வாய்ப்பு அளிக்க வேண்டும் என்பதே நமது வேண்டுகோள். அந்த வேண்டுகோளை தமிழ்நாடு அரசும், ஆளுநரும் நிறைவேற்றுவார்கள் என நம்புகிறோம்.

ஆயுள் சிறைவாசிகள் விடுதலைக்கு துணை நின்ற தமிழக அரசு, ஆளுநர் மற்றும் நீதித்துறையினர் உள்ளிட்ட அனைவருக்கும் இந்திய யூனியன் முஸ்லிம் லீக் சார்பில் நெஞ்சார்ந்த நன்றியை உரித்தாக்குகிறேன்' எனத் தெரிவிக்கப்பட்டுள்ளது.