Skip to main content

பசுமைவழி சாலை திட்டத்தை கைவிடக்கோரி மனித சங்கிலி போராட்டம்: முத்தரசன் அறிவிப்பு

Published on 29/07/2018 | Edited on 29/07/2018

 பசுமைவழி விரைவுச்சாலை திட்டத்தை கைவிட வலியுறுத்தி, வரும் ஆகஸ்ட் 6ம் தேதி சேலம் உள்ளிட்ட ஐந்து மாவட்டங்களில் மனித சங்கிலி போராட்டம் நடத்தப்படும் என்று இந்திய கம்யூனிஸ்ட் கட்சித் தலைவர் முத்தரசன் கூறினார்.

 

இந்திய கம்யூனிஸ்ட் கட்சித் தலைவர் முத்தரசன் சேலத்தில் இன்று (ஜூலை 29, 2018) செய்தியாளர்களிடம் கூறியது, 

mutharasan

 

திமுக தலைவர் கருணாநிதி உடல்நலக்குறைவு காரணமாக மருத்துவமனையில் சிகிச்சை பெற்று வருகிறார். உடல்நலம் முன்னேற்றம் ஏற்பட்டிருப்பதால், அவர் குறித்த வதந்திகளை பொதுமக்கள் நம்ப வேண்டாம். இந்திய கம்யூனிஸ்ட் கட்சியின் மூத்த தலைவர் பாண்டியனின் உடல் நலமும் நன்றாக உள்ளது. விரைவில் அவர்கள் இருவரும் மருத்துவமனையில் இருந்து வீடு திரும்புவார்கள். 

விவசாயிகளின் கடும் எதிர்ப்பையும் மீறி சேலம் - சென்னை பசுமைவழி விரைவுச்சாலை திட்டத்தை அரசு மேற்கொண்டு வருகிறது. இந்த திட்டத்திற்கு விவசாயிகளின் ஆதரவு உள்ளதாக தொடர்ந்து பொய்யான தகவலை முதல்வர் திரும்ப திரும்ப கூறி வருவது கண்டிக்கத்தது. ஆங்கிலேயர் ஆட்சிக்காலத்தில்கூட இல்லாத வகையில், காவல்துறையினரை வைத்து மக்களை மிரட்டி இந்த திட்டத்திற்காக நிலம் கையகப்படுத்துகின்றனர்.

 

இயற்கை வளங்களை, நீர்நிலைகளை அழித்து கொண்டு வரப்பட உள்ள இந்த திட்டத்தை கைவிட வலியுறுத்தி, இந்திய கம்யூனிஸ்ட் கட்சி சார்பில் வரும் ஆகஸ்ட் 6ம் தேதி, சேலம், தர்மபுரி, கிருஷ்ணகிரி திருவண்ணாமலை, காஞ்சிபுரம் ஆகிய ஐந்து மாவட்டங்களிலும் மனித சங்கிலி போராட்டம் நடத்தப்படும். பாதிக்கப்பட்ட மக்களும், பல்வேறு அரசியல் கட்சித் தலைவர்களும் இந்த போராட்டத்தில் கலந்து கொள்கின்றனர்.

 

மேட்டூர் அணையில் இருந்து திறந்து விடப்பட்ட நீர், இதுவரை கடைமடை பகுதிக்குச் செல்லவில்லை. தென்மேற்கு பருவமழை தொடர்பாக முன்கூட்டியே தகவல் அறிந்து, டெல்டா மாவட்டங்களில் முன்னெச்சரிக்கை நடவடிக்கை மேற்கொண்டு தண்ணீரை வீணடிக்காமல் விவசாயிகள் மற்றும் பொதுமக்களின் பயன்பாட்டிற்கு பயன்படுத்திட அரசு தவறி விட்டது. இதனால் தினமும் 5 டிஎம்சி நீர் கடலில் வீணாக கலக்கிறது. திமுக ஆட்சியாக இருந்திருந்தால், இதுபோன்ற சம்பவம் நடந்திருக்காது.

 

கர்நாடகா மாநில முதல்வர் மேகதாதுவில் அணை கட்டுவதாக கூறுவதை ஏற்க முடியாது. இதனை தமிழக அரசு தடுத்திட வேண்டும். கர்நாடகா முதல்வர் குமாரசாமி இதுகுறித்து பேச வந்தால், இந்திய கம்யூனிஸ்ட் கட்சி தனது எதிர்ப்பை வெளிப்படுத்தும்.

 

அரசின் எந்த பொறுப்பிலும் இல்லாத ஒருவருக்கு ராணுவ ஹெலிகாப்டரை பயன்படுத்திட அனுமதி வழங்கிய மத்திய அமைச்சர் நிர்மலா சீதாராமன் உடனடியாக பதவி விலக வேண்டும். இல்லாவிட்டால் பிரதமர் அவரை பதவி நீக்கம் செய்ய வேண்டும். சொத்துக்குவிப்பு புகாரில் வழக்குப்பதிவு செய்யப்பட்டுள்ள துணை முதல்வர பன்னீர்செல்வமும் உடனடியாக பதவி விலக வேண்டும். இவ்வாறு முத்தரசன் கூறினார்

சார்ந்த செய்திகள்

 

Next Story

'திமுக வெற்றிக்காக பாடுபடுவோம்' -முத்தரசன் பேட்டி

Published on 15/06/2024 | Edited on 15/06/2024
nn

விழுப்புரம் மாவட்டம் விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெறும் எனத் தேர்தல் ஆணையம் அறிவித்துள்ளது. அரசியல் கட்சிகள் வேட்பாளர்களை அறிவிப்பதில் தீவிரம் காட்டி வரும் நிலையில் அதிமுக இந்த இடைத் தேர்தலை புறக்கணிக்க முடிவெடுத்துள்ளது.

இந்நிலையில் ஈரோடு மாவட்டம் சத்தியமங்கலத்தில் இந்திய கம்யூனிஸ்ட் கட்சியின் மாநில செயலாளர் முத்தரசன் இன்று செய்தியாளர்களைச் சந்தித்தார். அப்போது பேசுகையில், ''குவைத்தில் நடந்த தீ விபத்தில் இறந்தவர்களுக்கு தமிழக அரசு ரூ.5 லட்சம் வழங்கிய நிலையில், மத்திய அரசு ரூ.2 லட்சம் மட்டுமே வழங்கியுள்ளது. அதை ரூ.25 லட்சமாக உயர்த்தி கொடுக்க வேண்டும். நீட் தேர்வில் நடைபெற்ற ஏராளமான குளறுபடிகளை சரி செய்ய வேண்டும். தமிழகத்தில் நீட் தேர்வை நிரந்தரமாக தடை விதிக்க வேண்டும். விக்கிரவாண்டி தொகுதியில் தி.மு.க. வேட்பாளரை இந்திய கம்யூனிஸ்ட் கட்சி முழுமையாக ஆதரிக்கும். திமுக வெற்றிக்காக பாடுபடுவோம். வனத்துறையில் பணியாற்றும் வேட்டை தடுப்பு காவலர்களை பணி நிரந்தரம் செய்ய வேண்டும். வனத்தில் 40 ஆண்டுகளுக்கு மேலாக வளர்ந்து, தற்பொழுது பட்டுப்போன மூங்கில் மரங்களை வனப்பகுதியில் வாழும் பழங்குடியினரே அதனை எடுத்துச் செல்ல வனத்துறை அனுமதிக்க வேண்டும்'' என்றார்.

Next Story

காவிரி மேலாண்மை வாரிய தீர்மானத்திற்கு எதிராக போராட்டம்; விவசாயிகள் மீது அதிரடி நடவடிக்கை!

Published on 21/05/2024 | Edited on 21/05/2024
; Action on farmers on Protest against Cauvery Management Board resolution

காவிரி மேலாண்மை வாரியம் உச்சநீதிமன்ற தீர்ப்புக்கு எதிராக காவிரியில் மேகதாது அணை கட்ட தீர்மானத்திற்கு ஒப்புதல் அளித்ததை கண்டித்தும், இந்தத் தீர்மானத்தை ரத்து செய்ய வலியுறுத்தியும் கடலூர் மாவட்ட தமிழ்நாடு காவிரி விவசாயிகள் சங்கம் சார்பில் தீர்மான நகல் எரிப்பு போராட்டம் நடைபெற்றது.

இந்தப் போராட்டத்திற்கு, சிதம்பரம் காவல்துறையினர் அனுமதி மறுக்கப்பட்டதால் சங்கத்தின் மாவட்ட செயலாளர் ராமச்சந்திரன் தலைமையில் விவசாயிகள் கண்ணன், ஹாஜா மைதீன், லட்சுமி காந்தன், சுரேஷ்குமார், தங்கராசு, இளையராஜா, அன்பழகன், பன்னீர்செல்வம், பொன்னுசாமி, உள்ளிட்ட விவசாயிகள் கலந்து கொண்டு காவேரி நதிநீர் மேலாண்மை வாரிய தீர்மான நகலை கிழித்துப் போட்டு போராட்டத்தில் ஈடுபட்டனர்.

மேலும், பிரதமர் மோடி தலைமையிலான அரசையும், காவிரி நதிநீர் மேலாண்மை வாரியத்தைக் கண்டித்தும், தீர்மானத்தை ரத்து செய்ய வலியுறுத்தியும், கோஷங்களை எழுப்பி ஆர்ப்பாட்டத்தில் ஈடுபட்டனர். இதனைத் தொடர்ந்து தீர்மான நகலை கிழித்த விவசாயிகளை காவல்துறையினர் கைது செய்தனர். அதனைத் தொடர்ந்து, அவர்களை தனியார் மண்டபத்தில் தங்க வைத்து அவர்களிடம் விவரத்தைப் பெற்றுக் கொண்டு விடுதலை செய்தனர்.