Skip to main content

சர்கார் பட விவகாரம்; ஏ.ஆர். முருகதாஸ் மீது பதிவு செய்யப்பட்ட வழக்கில் உயர்நீதிமன்றம் உத்தரவு...

Published on 26/07/2021 | Edited on 26/07/2021

 

High Court Cancelled case on Murugadoss basses on Supreme Court Order

 

சர்கார் பட விவகாரம் தொடர்பாக  இயக்குநர் ஏ.ஆர். முருகதாஸ் மீது பதிவு செய்யப்பட்ட வழக்கை ரத்து செய்து உயர்நீதிமன்றம் உத்தரவிட்டுள்ளது.

 

நடிகர் விஜய் நடிப்பில் கடந்த 2018ம் ஆண்டு தீபாவளிக்கு வெளியான சர்கார் திரைப்படத்தில் தமிழக அரசையும், அரசால் பொதுமக்களுக்கு வழங்கப்பட்டுள்ள இலவசத் திட்டங்களையும் கடுமையாக விமர்சிக்கும் காட்சிகள் அமைக்கப்பட்டன. இதனால் அரசின் திட்டங்களைத் தவறாகக் குறிப்பிடுவதாக படத்தின் இயக்குநர் ஏ.ஆர்.முருகதாஸ் மீது சென்னை மத்திய குற்றப்பிரிவு காவல்துறையில் தேவராஜன் என்பவர் அளித்த புகாரில் வழக்குப் பதிவு செய்யப்பட்டுள்ளது.

 

இந்த வழக்கில் ஏ.ஆர்.முருகதாஸ்க்கு முன் ஜாமீன் வழங்கி உயர்நீதிமன்றம் கடந்த 2018ம் ஆண்டு உத்தரவிட்டது. இந்த நிலையில் இந்த வழக்கை ரத்து செய்யக் கோரி இயக்குநர் ஏ.ஆர்.முருகதாஸ் சென்னை உயர்நீதிமன்றத்தில் மனுத் தாக்கல் செய்தார். அதில், தனக்கு எதிரான புகார், அரசியல் காழ்ப்புணர்ச்சி காரணமாக அளிக்கப்பட்டதாகவும், அதனால் பதிவு செய்யப்பட்ட வழக்கை ரத்து செய்ய வேண்டும் எனவும் கோரியிருந்தார்.

 

இந்த மனுவை இன்று விசாரித்த நீதிபதி தண்டபாணி பிறப்பித்த உத்தரவில், திரைப்படம் தணிக்கை முடிந்த பிறகு தான் வெளியிடப்பட்டுள்ளது. தணிக்கை முடிந்த திரைப்படம் குறித்து தனி நபர் அல்லது அரசு கேள்வி எழுப்ப அல்லது வழக்குப் பதிவு செய்ய முடியாது என்று உச்ச நீதிமன்றம் உத்தரவிட்டுள்ளதை சூட்டிகாட்டிய நீதிபதி, அரசியலமைப்பு வழங்கிய பேச்சுரிமை எதிராகப்  பதிவு செய்யப்பட்டுள்ள இந்த வழக்கை ரத்து செய்வதாக தன்னுடைய உத்தரவில் தெரிவித்துள்ளார்.

 


 

சார்ந்த செய்திகள்

 

Next Story

சல்மான்கான் படத்தில் இணைந்த தமிழ் நடிகர்!

Published on 04/07/2024 | Edited on 04/07/2024
sathyaraj joined in Salman Khan's film

ரமணா, துப்பாக்கி, கத்தி போன்ற வெற்றி படங்கள் கொடுத்த இயக்குநர் ஏ.ஆர்.முருகதாஸ், ரஜினியை வைத்து ‘தர்பார்’ படத்தை இயக்கியிருந்தார். இந்த படம் எதிர்பார்த்த வெற்றியை தரவில்லை. இந்த நிலையில், நீண்ட இடைவெளிக்குப் பிறகு ஏ.ஆர் முருகதாஸ், சிவகார்த்திகேயனை வைத்து படமெடுக்கப்போவதாக அறிவிப்பு வெளியானது. இந்த படம், சிவகார்த்திகேயனின் 23வது படமாகும். இப்படத்தில், அனிருத் இசையமைக்க, ருக்மணி வசந்த் கதாநாயகியாக நடிக்கிறார். இந்த படத்தின் படப்பிடிப்பு முழு வீச்சில் நடைபெற்று வந்தது. இதற்கிடையில்,இப்படத்தின் படப்பிடிப்பை பாதியில் நிறுத்திவிட்டு ஏ.ஆர் முருகதாஸ் பாலிவுட் பக்கம் சென்றிருக்கிறார். 

சிவகார்த்திகேயன் படத்தையடுத்து ஏ.ஆர் முருகதாஸ், பாலிவுட்டில் சல்மான் கானை வைத்து படமெடுத்து வருகிறார். ‘சிக்கந்தர்’ எனத் தலைப்பு வைக்கப்பட்டுள்ள இப்படத்தின் படப்பிடிப்பு கடந்த ஜூன் 19ஆம் தேதி முதல் நடைபெற்று வருகிறது. முதல் முறையாக இருவரும் கூட்டணி வைத்துள்ளதால் ரசிகர்கள் மத்தியில் இப்படத்திற்கு எதிர்பார்ப்பு அதிகரித்துள்ளது. இப்படத்தை தயாரிப்பாளர் சஜித் நதியாத்வாலா தயாரிக்கிறார். அடுத்த ஆண்டு ரமலான் பண்டிகையை முன்னிட்டு இப்படம் வெளியாகவுள்ளது. ராஷ்மிகா மந்தனா சல்மான் கானுக்கு ஜோடியாக நடிக்கிறார். இதற்கு முன்பு பாலிவுட்டில் ரன்பிர் கபூருக்கு ஜோடியாக அனிமல் படத்தில் நடித்திருந்தார். இப்போது இந்தியில், விக்கி கௌஷல் நடிப்பில் உருவாகும் ஒரு படத்தில் நடித்து முடித்துள்ளார்.

இந்த நிலையில், இப்படத்திற்கான புதிய அப்டேட்டை படக்குழு அறிவித்துள்ளது. இது தொடர்பாக சமூக வலைத்தளப் பக்கத்தில் தெரிவித்துள்ளதாவது, “சத்யராஜை வரவேற்பதில் மகிழ்ச்சி அடைகிறோம். சிகந்தர் குழுவில் நீங்கள் இருப்பதில் பெருமை அடைகிறோம்” எனக் குறிப்பிட்டுள்ளது. மேலும், இந்த படத்தில் நடிகர் பிரதீக் பாப்பர் இணைந்துள்ளதாக அறிவிக்கப்பட்டுள்ளது. இப்படத்தின் மூலம், பாலிவுட்டில் சத்யராஜ் நான்காவது படத்தில் நடிக்கிறார். 

Next Story

கான் நடிகருடன் ஜோடி - பாலிவுட்டில் டேக் ஆஃப் ஆகும் ராஷ்மிகா மந்தனா

Published on 09/05/2024 | Edited on 09/05/2024
rashmika mandana to pair witha salman khan in ar murugadoss project

ரஜினியின் தர்பார் படத்தை தொடர்ந்து நீண்ட இடைவெளிக்குப் பிறகு சிவகார்த்திகேயனின் 23ஆவது படத்தை இயக்கி வருகிறார் ஏ.ஆர் முருகதாஸ். இப்படத்தில் ருக்மணி வசந்த் கதாநாயகியாக நடிக்க அனிருத் இசையமைக்கிறார். படப்பிடிப்பு கடந்த பிப்ரவரி மாதம் பூஜையுடன் தொடங்கி முழு வீச்சில் நடைபெற்று வருகிறது. 

இந்தப் படத்தை அடுத்து பாலிவுட்டில் சல்மான் கானை வைத்து படமெடுக்கவுள்ளார் ஏ.ஆர் முருகதாஸ். இதன் மூலம் பாலிவுட்டின் முன்னணி நடிகர்களான அமீர் கான், அக்‌ஷய் குமார் உள்ளிட்ட ஹீரோக்களை இயக்கிய ஏ.ஆர் முருகதாஸ் மற்றொரு முன்னணி நடிகரான சல்மான் கானை இயக்கவுள்ளார். சல்மான் கான், கடைசியாக டைகர் 3 படத்தில் நடித்திருந்தார். இப்படம் கடந்த ஆண்டு நவம்பரில் வெளியானது. இதையடுத்து விஷ்ணுவர்தன் இயக்கத்தில் நடிக்கவுள்ளதாக 1 வருடத்திற்கும் மேலாக தகவல் உலா வந்து கொண்டிருக்கிறது. ஆனால், அப்படம் குறித்த அப்டேட் இன்னும் வெளியாகாத சூழலில் சர்ப்ரைஸாக ஏ.ஆர் முருகதாஸ் பட அறிவிப்பு வெளியானது. 

rashmika mandana to pair witha salman khan in ar murugadoss project

முதல் முறையாக இருவரும் கூட்டணி வைத்துள்ளதால் ரசிகர்கள் மத்தியில் இப்படத்திற்கு எதிர்பார்ப்பு அதிகரித்துள்ளது. சிக்கந்தர் என்ற தலைப்பில் உருவாகும் இப்படத்தை தயாரிப்பாளர் சஜித் நதியாத்வாலா தயாரிக்கிறார். அடுத்த ஆண்டு ரமலான் பண்டிகையை முன்னிட்டு இப்படம் வெளியாகவுள்ளது. இதனைக் கடந்த மார்ச்சில் அறிவித்த படக்குழு, தற்போது கதாநாயகி குறித்த அறிவிப்பை வெளியிட்டுள்ளது. ராஷ்மிகா மந்தனா சல்மான் கானுக்கு ஜோடியாக நடிக்கவுள்ளார். இதற்கு முன்பு பாலிவுட்டில் ரன்பிர் கபூருக்கு ஜோடியாக அனிமல் படத்தில் நடித்திருந்தார். இப்போது இந்தியில், விக்கி கௌஷல் நடிப்பில் உருவாகும் ஒரு படத்தில் நடித்து முடித்துள்ளார். மேலும் தெலுங்கில் புஷ்பா 2, ரெயின்போ, தி கேர்ள்ஃபிரண்ட் மற்றும் தமிழ், தெலுங்கு என இரண்டு மொழிகளில் உருவாகும் தனுஷின் குபேரா படத்தில் நடித்து வருகிறார்.