Skip to main content

“ஆளுநரின் சொந்தக் கருத்துகள் அவைக்குறிப்பில் இருந்து நீக்கம்” - சபாநாயகர் அப்பாவு அதிரடி

Published on 12/02/2024 | Edited on 12/02/2024
Governor own comments are removed from their notes says Appavu

தமிழக சட்டப்பேரவையின் இந்த ஆண்டுக்கான முதல் கூட்டத்தில் கலந்து கொள்வதற்காக சட்டப்பேரவைக்கு முதல்வர் மு.க. ஸ்டாலின், சபாநாயகர் அப்பாவு, அமைச்சர்கள், சட்டமன்ற உறுப்பினர்கள் இன்று (12.02.2023) காலை சட்டப்பேரவைக்கு வந்திருந்தனர். பேரவைக்கு வந்த முதல்வர் மு.க. ஸ்டாலினுக்கு அணிவகுப்பு மரியாதை அளிக்கப்பட்டது. இதனையடுத்து சட்டப்பேரவைக்கு வந்த ஆளுநர் ஆர்.என்.ரவியை, சபாநாயகர் அப்பாவு, சட்டப்பேரவைச் செயலாளர் சீனிவாசன் ஆகியோர் மலர்க்கொத்து கொடுத்து வரவேற்றனர். இதனையடுத்து காலை 10 மணிக்கு தமிழ்த்தாய் வாழ்த்துடன் கூட்டத்தொடர் தொடங்கியது.

ஆளுநர் தனது உரையில், “அனைவருக்கும் வணக்கம், தமிழக மக்கள் அனைவருக்கும் ஆங்கில புத்தாண்டு வாழ்த்துகள். சட்டப்பேரவையின் நிகழ்ச்சியின் தொடக்கத்திலும் இறுதியிலும் தேசிய கீதம் பாட வேண்டும் என தொடர்ச்சியாக நான் முன்வைத்த கோரிக்கை புறக்கணிக்கப்பட்டுள்ளது. தமிழக அரசு தயாரித்த உரையில் இடம்பெற்றுள்ள சில வரிகள் உண்மைக்கு மாறாகவும் தார்மீகத்திற்கு முரணாகவும் உள்ளன. இத்தகைய உரைக்கு நான் குரல் கொடுப்பது அரசியலமைப்பை கேலிக்கூத்தாக்கும் செயலாகிவிடும் என்பதால், இத்துடன் என்னுடைய உரையை முடித்துக்கொள்கிறேன்” எனத் தெரிவித்து உரையாற்றத் தொடங்கிய 4 நிமிடங்களில் உரையை முடித்து தனது இருக்கையில் அமர்ந்து கொண்டார்.

பின்னர் ஆளுநர் உரையின் தமிழாக்கத்தை சபாநாயகர் வாசித்தார். அப்போது, “மழை வெள்ள நிவாரண நிதியை மத்திய அரசிடம் இருந்து 50 கோடியை ஆளுநர் வாங்கித் தந்தால் நன்றாக இருக்குமென்று நாங்கள் கேட்கலாம். சாவர்க்கர், கோட்சே வழியில் வந்தவர்களுக்கு நாங்கள் சற்றே குறைந்தவர்கள் அல்ல... ஜன கன மன இனிமேல்தான் பாடுவோம்” என சபாநாயகர் பேசிக் கொண்டிருக்கும் போதே ஆளுநர் ஆர்.என். ரவி சட்டப்பேரவையில் இருந்து வெளிநடப்பு செய்தார். இதனையடுத்து சபாநாயகர் அப்பாவு அறையில் அலுவல் ஆய்வுக்குழு கூட்டம் நடைபெறும். இந்த கூட்டத்தில் ஆளுநர் உரை மீதான விவாதம் நடத்துவதற்காக எத்தனை நாட்கள் அவையை நடத்துவது, எத்தனை நாட்கள் கூட்டத்தொடரை நடத்துவது என்பது குறித்து ஆலோசித்து முடிவெடுக்கப்பட்டது.

அதனைத் தொடர்ந்து சபாநாயகர் அப்பாவு செய்தியாளர்களைச் சந்தித்தார். அப்போது அவர் பேசுகையில், “2024 - 2025 ஆம் ஆண்டுக்கான நிதிநிலை அறிக்கையை பிப்ரவரி 19 ஆம் தேதி தமிழக நிதித்துறை அமைச்சர் தங்கம் தென்னரசு தாக்கல் செய்ய இருக்கிறார். பிப்ரவரி 20 ஆம் தேதி வேளாண் நிதிநிலை அறிக்கை தாக்கல் செய்யப்பட உள்ளது. வேளாண் பட்ஜெட் விவாதம் இன்றி நிறைவேற்றப்படும். பொது நிதிநிலை அறிக்கையின் மீது விவாதம் 21 ஆம் தேதி காலை மற்றும் மாலை என இரு வேளைகளிலும் நடைபெறும். பிப்ரவரி 22 ஆம் தேதி நிதி அமைச்சரின் பதிலுரையுடன் சட்டமன்ற கூட்டத் தொடர் நிறைவு பெறும்.

Governor own comments are removed from their notes says Appavu

தமிழக அரசு தயாரித்த ஆளுநர் உரையை அப்படியே பதிவேற்றம் செய்ய வலியுறுத்தி பேரவையில் தீர்மானம் நிறைவேற்றப்பட்டுள்ளது. தேசிய கீதம் குறித்து ஆளுநர் ரவி பேசியது அவைக்குறிப்பில் இடம் பெறாது. தமிழக அரசின் உரையில் உள்ள கருத்துகளைத் தவிர்த்து சட்டப்பேரவையில் ஆளுநர் பேசிய சொந்தக் கருத்துகள் அவைக் குறிப்பில் இருந்து நீக்கப்பட்டது” எனத் தெரிவித்தார். 

சார்ந்த செய்திகள்

 

Next Story

 கள்ளச்சாராய ஒழிப்பு மசோதா; ஆளுநர் ஒப்புதல்

Published on 12/07/2024 | Edited on 12/07/2024
Tamil Nadu Governor approves  illicit liquor  Bill

கள்ளக்குறிச்சியில் கள்ளச்சாராயம் அருந்தி 60க்கும் மேற்பட்டவர்கள் உயிரிழந்த சம்பவம் மாநிலம் முழுவதும் பெரும் அதிர்வலைகளை ஏற்படுத்தியது. அதிமுக உள்ளிட்ட எதிர்க்கட்சிகள் கள்ளச்சாராய மரணத்திற்குப் பொறுப்பேற்று முதல்வர் ஸ்டாலின் பதவி விலக வேண்டும் என்று தொடர்ந்து கண்டம் தெரிவித்தனர்.

இந்தப் பரபரப்பான சூழலுக்கு மத்தியில் கடந்த மாதம் 20 ஆம் தேதி தமிழக சட்டசபை பேரவைக் கூட்டம் கூடியது. அதில் மதுவிலக்கு சட்ட மசோதா தாக்கல் செய்யப்பட்டது. தமிழ்நாடு மதுவிலக்குச் சட்டம் 1937 இல் திருத்தம் செய்து, கள்ளச்சாராயத்தை ஒழிக்கும் வகையில், கள்ளச்சாராயம் விற்றால் ஆயுள் வரை கடுங்காவல் தண்டனையுடன் ரூ.10 லட்சம் அபராதம் விதிக்கும் வகையில் மாற்றம் செய்யப்பட்டது. பின்பு வாக்கு எடுப்பு மூலம் மசோதா நிறைவேற்றப்பட்டு ஆளுநரின் ஒப்புதலுக்காக அனுப்பி வைக்கப்பட்டது. 

இந்த நிலையில் கள்ளச்சாராயம் தயாரிப்பவர்கள் மற்றும் விற்பவர்களுக்கு ஆயுள் தண்டனை வழங்கு மசோதாவுக்குத் தமிழக ஆளுநர் ஆர்.என்.ரவி ஒப்புதல் வழங்கியுள்ளார். 

Next Story

பெரியார் பல்கலை. துணைவேந்தரின் ரீ என்ட்ரி; கொஞ்சம் மிரட்டல், நிறைய புலம்பல்!

Published on 03/07/2024 | Edited on 03/07/2024
Conversation between Periyar University Vice-Chancellor Professors

பெரியார் பல்கலை துணைவேந்தருக்கு பதவி நீட்டிப்பு வழங்கப்பட்ட பிறகு நடந்த கல்வி ஆண்டு துவக்க உரையில், கடந்தகால செயல்பாடுகள் குறித்து புலம்பியும், ஆசிரியர்களுக்கு மிரட்டல் விடுக்கும் வகையிலும் அவர் பேசியிருப்பது மீண்டும் சலசலப்பை ஏற்படுத்தி உள்ளது. 

சேலம் பெரியார் பல்கலை. துணைவேந்தர், ஜெகநாதன். இவருடைய  பதவிக்காலம் ஜூன் 30ம் தேதியுடன் முடிவடைந்தது. இவரும், முன்பு நிரந்தர  பொறுப்பு பதிவாளராக இருந்த தங்கவேலும் சேர்ந்து கொண்டு பல்வேறு ஊழல் முறைகேடுகளில் ஈடுபட்டதாக புகார்கள் கிளம்பின. இது தொடர்பாக  வழக்குப்பதிவு செய்யப்பட்டு, நீதிமன்றத்தில் விசாரணை நடந்து வருகிறது.   இந்நிலையில், கடும் விமர்சனங்களுக்கிடையே, 2025 மே 19ம் தேதி வரை மேலும்  11 மாதங்களுக்கு ஜெகநாதனுக்கு பதவி நீட்டிப்பு வழங்கி ஆளுநர் ஆர்.என்.ரவி,  கடந்த ஜூன் 29ம் தேதி உத்தரவிட்டார். இது உயர்கல்வித்துறையில் பல்வேறு அதிர்வலைகளை ஏற்படுத்தியது.

பெரியார் பல்கலை தொழிலாளர்கள் சங்கத்தினர் ஆளுநர், ஜெகநாதனைக் கண்டித்து ஜூலை1, 2 தேதிகளில் பல்கலை  முன்பு போராட்டத்தில் ஈடுபட்டனர். கோடை விடுமுறைக்காலம் முடிந்து பெரியார் பல்கலை ஜூலை 1ஆம் தேதி தொடங்கியது. ஒவ்வொரு கல்வி ஆண்டின் தொடக்கத்திலும் துணைவேந்தர் அனைத்து ஆசிரியர்களையும் சந்தித்துப் பேசுவது நடைமுறையில் இருக்கிறது. அதன்படி, ஜூலை 2ஆம் தேதி நடப்புக் கல்வி ஆண்டுக்கான துவக்க உரையாற்றினார் துணைவேந்தர் ஜெகநாதன். இதற்கான மேடையில், துணைவேந்தருடன் பதிவாளர் (பொறுப்பு)  விஸ்வநாதமூர்த்தி, தேர்வுக்கட்டுப்பாட்டு அலுவலர் (பொறுப்பு) கதிரவன் ஆகியோரும் அமர்ந்து இருந்தனர். 27 துறைகளைச் சேர்ந்த 120 உதவி, இணை மற்றும் பேராசிரியர்கள் கலந்து கொண்டனர். அனைவரையும் வரவேற்றுப் பேசிய  பதிவாளர், துணைவேந்தரை பேச அழைத்தார். 

ஊழல் புகார், கைது, பதவி நீட்டிப்பு என பல்வேறு சர்ச்சைகள் சுழன்றடித்து வரும் நிலையில் துணைவேந்தர் ஜெகநாதன் என்ன பேசப் போகிறாரோ என்ற எதிர்பார்ப்பு ஆசிரியர்கள் மத்தியில் நிலவியது. அவர் எப்போது எந்த மேடை ஏறினாலும், 'சுழன்றும் ஏர்ப்பின்னது உலகம் அதனால் உழந்தும் உழவே தலை' என்ற திருக்குறளைச் சொல்லி பேச்சைத்  தொடங்குவார். நேற்றைய (ஜூலை 2) துவக்க உரையிலும் இந்த குறட்பாவைச் சொல்லியே பேசத் தொடங்கினார். அவர் கோவை வேளாண் பல்கலையில் பேராசிரியராக பணியாற்றியவர் என்பதால் உழவின் பெருமையைச் சொல்லும் வகையில், நிகழ்ச்சிகளில் இந்த  திருக்குறளோடு பேச்சைத் தொடங்குவதை வழக்கமாகக் கொண்டிருப்பதாகச்  சொல்லப்பட்டது. அடுத்து, தனக்கு ஆளுநர் பதவி நீட்டிப்பு வழங்கியதற்கு நன்றி சொல்லிவிட்டு, சில துறைகளில் மாணவர் சேர்க்கை குறைவாக இருப்பது ஏன்? என்று கேட்டு டாப் கியரில் எகிறத் தொடங்கினார்.     

''சில துறைகளில் மாணவர் சேர்க்கைக் குறைந்துள்ளது. குறிப்பாக, நூலக  அறிவியல் துறையில் ஒரே ஒரு மாணவர்தான் சேர்ந்துள்ளார். கல்வியியல்  துறையில் ஒருவர்கூட சேரவில்லை. மாணவர்களே இல்லாமல் ஆசிரியர்களுக்கு எதற்காக சம்பளம் கொடுக்க வேண்டும்? துறைத்தலைவர்கள், பேராசிரியர்கள்  சரியாக பாடம் நடத்தி இருந்தால் இதுபோன்ற நிலை ஏற்பட்டிருக்காது. ஆளே இல்லாமல் எதற்காக இந்தத் துறைகளை வைத்திருக்க வேண்டும்? பேசாமல் இந்த  துறைகளை மூடி விடலாம். நமக்கு மாணவர்கள்தான் விளம்பர தூதர்கள். ஒரு துறை சரியாக இருந்தால் மாணவர்கள் வெளியே அதைப்பற்றி நல்லவிதமாகச் சொல்வார்கள். நமக்கும் மாணவர் சேர்க்கை அதிகரித்திருக்கும். ஆனால் அவர்கள் வெளியே வேறு  விதமாகச் சொல்லி இருக்கிறார்கள். அதற்காக ஆசிரியர்கள் எல்லோரையும் குற்றம் சொல்லவில்லை. 'நாக்' கமிட்டி  வந்தபோது, ஆசிரியர்கள் எல்லோரும் இரவு, பகலாக வேலை செய்ததை  மறக்கவில்லை.

ஒரு துறையில், மாணவர்களுக்கு அகமதிப்பீட்டு மதிப்பெண் குறைவாக போட்டுள்ளனர். பிடித்த மாணவர்கள், பிடிக்காத மாணவர்கள் என்று பாரபட்சம் பார்க்க வேண்டாம். நாம் மாணவர்களுக்காகத்தான் இருக்கிறோம். இப்போதுகூட மாணவர் சேர்க்கை குறைந்து விட்டதாக ஊடகங்களில் செய்தி  வருகின்றன. எல்லா துறைகளிலும் சேர்க்கைக் குறைந்து விட்டதாகச் சொல்ல  முடியாது. ஒரு சில துறைகளில்தான் குறைவாக உள்ளது. அதற்கு என்ன காரணம் என்பதைக் கண்டறிந்து அவற்றைக் களைய நடவடிக்கை எடுக்கப்படும். எல்லா விஷயங்களையும் ஊடகங்களில் தவறாக சித்தரித்து பரப்புவதால்  யாருக்கு என்ன லாபம் கிடைக்கப் போகிறது? நம்மை மற்றவர்கள் அசிங்கமாக  நினைக்க மாட்டார்களா? சங்கம் என்று சொல்லிக்கொண்டு ஒருத்தர் மட்டும்தான் இருப்பார் பாருங்க. அவரும், இன்னும் சிலரும் என்னைப் பற்றித் தப்பு தப்பாக ஊடகங்களில் பேட்டி  கொடுக்கின்றனர். 

Conversation between Periyar University Vice-Chancellor Professors

வெளியில் இருந்து மூன்றாம் நபர்களும் தவறான  செய்திகளைப் பரப்புகின்றனர். தேசிய அளவிலான தர வரிசையில் 70வது இடத்தில் இருந்த பெரியார்  பல்கலையை இப்போது 49வது இடத்திற்குக் கொண்டு வந்து நிறுத்தி இருக்கிறோம். இனி அதேபோன்ற தர வரிசை கிடைக்குமா? என்பது  சந்தேகம்தான். ஆசிரியர்கள் மீது புகார்கள் வருவதன் பேரில்தான் விசாரணைக்குழு  அமைக்கிறேன். நடவடிக்கை எடுக்கிறேன். இதற்கு நான் என்ன செய்ய முடியும்?  என்னிடம் உங்களுக்கு பிடிக்காதது எதுவாக இருந்தாலும் நேரில் சொல்லலாம். அதைவிட்டுவிட்டு ஏன் ஊடகங்களில் பேசுகிறீர்கள்? புகார் வந்தால் நடவடிக்கை  எடுப்பேன். உதவி பேராசிரியர் ஒருவர் என்னைப் பற்றி ஊடகங்களில் பேட்டி கொடுக்கிறார்.  அவருடன் சேர்ந்து கொண்டு இன்னும் சிலரும் பேசுகிறார்கள். இத்தனை நடந்தும்  ஒருவர்கூட, துணைவேந்தர் தவறானவர் இல்லை என்று சொல்லாதது வருத்தம்  அளிக்கிறது.

அகமதிப்பீட்டுத் தேர்வுகள் எல்லாம் ஒழுங்காக நடத்தணும். மதிப்பீடு பணிகளைச் சரியாக பண்ணுங்க. இன்னும் 11 மாதங்கள் நான் இங்குதான் இருக்கப் போகிறேன். தொடர்ந்து பல்கலை வளர்ச்சிக்கு நிறைய பணிகளைச் செய்வேன். செய்து கொண்டுதான் இருக்கிறேன். ஒரு சிலரால் அதில் தடங்கல் ஆகிறது. சேலம் உத்தமசோழபுரத்தில் சோலார் திட்டம் கொண்டு வர நடவடிக்கை  எடுக்கப்பட்டு வந்தது. என்னை கைது செய்த பிறகு அந்த திட்டம் கைநழுவிப் போய்விட்டது. சேலத்தில் உள்ள முன்னாள் எம்.பி., ஒருவர் எத்தனையோ பேருக்கு மாணவர் சேர்க்கைக்காக கேட்டிருக்கிறார். நானும் சேர்க்கை அனுமதி கொடுத்திருக்கிறேன். ஆனால் நான் கைது செய்யப்பட்டபோது எனக்கு அவர் எந்த உதவியும் செய்யவில்லை. அதேநேரம், நாமக்கல்லில் உள்ள முன்னாள் எம்.பி., ஒருவர்  எனக்கு நிறைய உதவிகளைச் செய்தார். இப்போதும் நான் ஆராய்ச்சிக் கட்டுரைகளை எழுதிக் கொண்டுதான் இருக்கிறேன்.  நீங்களும் எழுதுங்கள். எதைச் செய்தாலும் பல்கலை வளர்ச்சிக்கென்று செய்யுங்கள்,'' என நிறைய புலம்பலும், கொஞ்சம் மிரட்டலுமாகப் பேசி முடித்தார்  துணைவேந்தர் ஜெகநாதன்.

''உங்கள் சொந்தப் பிரச்சனையாக இருந்தாலும் என்னிடம் சொல்லுங்கள். என்னால் முடிந்ததை செய்கிறேன்,'' என்று இறங்கி வந்து பேசியபோதும்  ஆசிரியர்களிடையே எந்த ரியாக்ஷனும் இல்லை. மேலும் அவர், ''ஜார்க்கண்ட் மாநில ஆளுநராக உள்ள சி.பி.ராதாகிருஷ்ணனைச் சந்தித்ததைக்கூட தவறாக சித்தரித்து விட்டனர். அவருடனான சந்திப்பு  யதேச்சையாக நடந்ததுதான். அவரிடம் கூட பெரியார் பல்கலை வளர்ச்சிக்காக  உதவி கேட்டு புரபோசல் அளித்திருக்கிறேன். ஆனால் இந்த சந்திப்பைக்கூட தவறாக சித்தரித்து விட்டனர். ஊடகங்களில் தப்பு  தப்பாக பரப்பி விட்டனர். அப்போதுகூட ஆசிரியர்கள் யாருமே என்னை ஆதரித்துப் பேசவில்லை. ஏன் இந்தப் பல்கலையில் ஆசிரியர்கள் இப்படி இருக்கிறார்கள் என்று எனக்குப் புரியவே இல்லை,'' என மீண்டும் புலம்பினார்.

உரையை முடிக்கும்போது திடீரென்று ஒரு பஞ்ச் டயலாக்குடன் நிறைவு செய்ததுதான் ஹைலைட். ''நான் இறைவனை நம்பவில்லை. இயற்கையை நம்புகிறேன். இயற்கை என்றைக்குமே பொய் சொல்லாது. அது கண்டிப்பாக நம்மை தண்டிக்கும். கொரோனா காலத்தில் இயற்கை எப்படி தண்டித்ததோ, அதுபோல என்னைப் பற்றி  தவறாக பேசுபவர்களையும் இயற்கை ஒருநாள் தண்டிக்கும்,'' என சாபம் விட்டு  உரையை நிறைவு செய்தார் துணைவேந்தர் ஜெகநாதன். அவர் கஷ்டப்பட்டு பஞ்ச் வசனத்துடன் முடித்தாலும், கூட்டத்தில் இருந்த பேராசிரியர்கள் யாருமே அதை கைத்தட்டி உற்சாகப்படுத்தவில்லை.  எல்லோருமே அமைதியாக அமர்ந்து  இருந்தனர். பகல் 12 மணிக்குத் தொடங்கிய கூட்டம், 45 நிமிடங்களில் முடிந்தது. துணைவேந்தருக்கு பதவி நீட்டிப்பு வழங்கப்பட்டதற்காக சம்பிரதாயத்துக்குக் கூட  மேடையில் அவருக்கு யாரும் வாழ்த்துச் சொல்லவோ, சால்வை அணிவிக்கவோ  வரவில்லை. அவருடைய ஆதரவு பேராசிரியர்களும் வாழ்த்துச் சொல்வதை  தவிர்த்தனர். கூட்டத்தில் கலந்து கொண்ட ஆசிரியர்களுக்கு அரை லிட்டர் குடிநீர் பாட்டில்,  இனிப்பு, மசால் வடை, தேநீர் / காபி வழங்கப்பட்டது. அதேநேரம், துணைவேந்தரின் பேச்சுக்கு பேராசிரியர்கள் மத்தியில் சில விமர்சனங்களும் கிளம்பி உள்ளன.

Conversation between Periyar University Vice-Chancellor Professors

இது தொடர்பாக பேராசிரியர்களிடம் பேசியபோது, ''சேலத்தில் உள்ள முன்னாள் எம்.பி., என்று பெயரைச் சொல்லாமல் சொன்னாலும் அவர் எஸ்.ஆர்.பார்த்திபனைத்தான் சொல்கிறார். அதேபோல, நாமக்கல்லில் உள்ள முன்னாள் எம்.பி., என்றால், இப்போது பாஜகவில் உள்ள கே.பி.ராமலிங்கத்தை மறைமுகமாகச் சொல்லி இருக்கிறார். துணைவேந்தரின் பாஜக பாசம்தான் கே.பி.ராமலிங்கத்திற்கு முக்கியத்துவம் கொடுத்து பேச வைத்திருக்கிறது. ஊழல் புகாரில் கைது செய்யப்பட்டவருக்கு ஆளுங்கட்சி சிட்டிங் எம்.பி., ஆக இருப்பவர் எப்படி உதவி செய்ய முடியும்? மாணவர் சேர்க்கை இல்லாத துறைகளில் ஆசிரியர்களுக்கு எதற்காக சம்பளம் கொடுக்க வேண்டும் என்று துணைவேந்தர் கேட்கிறார். அதில் நியாயம்  இருக்கிறது. அதேநேரம், உறுப்புக் கல்லூரிகளில் பணியாற்றி வந்த முதல்வர்கள்  வெங்கடேஸ்வரன், மருதமுத்து, செல்வவிநாயகம், வெங்கடேசன், கார்த்திகேயன் ஆகியோர் பல்கலை பணிக்கு ஈர்த்துக் கொள்ளப்பட்டனர். 

பல்கலைக்கழகத்தில் முதல்வர் பணியிடமே இல்லாத நிலையில் அவர்களை சும்மாவே வைத்துக்கொண்டு ஆண்டுக்கு 1.50 கோடி ரூபாய்க்கு மேல் வெட்டியாக சம்பளம் கொடுத்து வருகிறார். இவர்களில் மருதமுத்து மட்டும் அண்மையில் ஓய்வு பெற்று விட்டார். இதையும் துணைவேந்தர் கவனத்தில் கொண்டு பேசியிருக்க வேண்டும்.   ஊழல் புகார்கள் குறித்துதான் ஊடகங்களில் பேராசிரியர்கள் சிலர் பேசி வருகின்றனர். அதற்காக அவர்களை சக ஆசிரியர்கள் ஆதரிக்கவும் இல்லை. எதிர்க்கவும் இல்லை. இதே நிலைப்பாட்டைதான் துணைவேந்தர் விவகாரத்திலும் பின்பற்றுகிறோம். மேலும், துணைவேந்தரே தனக்குப் பிடிக்காத ஆசிரியர்களுக்கு எதிராக சிலரை தூண்டிவிட்டு பெட்டிஷன் போட வைக்கிறார். அதையும் அவர் கவனத்தில் கொள்ள வேண்டும்,'' என்கிறார்கள் பேராசிரியர்கள்.

துணைவேந்தர் ஜெகநாதனுக்கு பதவி நீட்டிப்பு வழங்கப்பட்டுள்ள நிலையில், பெரியார் பல்கலையில் இன்னும் என்னென்ன ஏழரைகள் நடக்கப் போகிறதோ எனக் கமெண்ட் அடிக்கிறார்கள் பேராசிரியர்கள். 

The website encountered an unexpected error. Please try again later.