Skip to main content

சென்னை டூ பெங்களூர் தேசிய நெடுஞ்சாலை; சினிமாவை மிஞ்சும் சம்பவம்

Published on 22/02/2024 | Edited on 22/02/2024
Four arrested for stealing from vehicles on Chennai-Bangalore National Highway

நெடுஞ்சாலை என்கிற ஒரு திரைப்படம் வெளியானது. அந்தப்படத்தில் தேசிய நெடுஞ்சாலைகளில் செல்லும் சரக்கு லாரிகளில் பொருட்களை திருடும் கும்பல்கள் எப்படி திருடுகிறது என்பது குறித்து காட்சிப்படுத்தியிருப்பார்கள். களத்தில் செயல்படும் திருட்டு கும்பல் அதைவிட வித்தியாசமாக லாரிகளில் கொள்ளையடித்து வருகின்றனர். அதாவது பெண்களை தேசிய நெடுஞ்சாலைகளில் நிறுத்தி வாகனங்களை நிறுத்தச்செய்து கொள்ளையடிப்பது, ஓட்டுநர்கள் வாகனங்களை ஓய்வுக்காக நிறுத்திவைக்கும்போது திருடுவது போன்று பல வகைகளில் திருடுகின்றனர். அப்படியொரு கும்பலை தான் பிடித்துள்ளது காவல்துறை. 

திருப்பத்தூர் மாவட்டம் ஆம்பூர் அடுத்த பெரியாங்குப்பம் சென்னை பெங்களூர் தேசிய நெடுஞ்சாலையில் ஆம்பூர் கோட்ட காவல் துணை கண்காணிப்பாளர் ராமமூர்த்தி தலைமையிலான போலீசார் வாகன தணிக்கையில் ஈடுபட்டிருந்தனர். அப்போது அவ்வழியாக வந்த இனோவா கார் ஒன்றை சந்தேகத்தின் பெயரில் நிறுத்தி விசாரணை நடத்தியதாக கூறப்படுகிறது. அந்த காரில் இருந்த நபர்கள் முன்னுக்கு பின் முரணாக பதில் அளித்ததாக கூறப்படுகிறது. இதனால் சந்தேகமடைந்த போலீசார் அவர்களை காரோடு காவல் நிலையத்திற்கு அழைத்துச் வந்து விசாரணை நடத்தினர். விசாரணையில் காரில் இருந்தவர்கள் சென்னை போரூர் பகுதியை சேர்ந்த டேவிட் சோபி, பரமசிவம், அருண், முத்து என தெரியவந்தது.

Four arrested for stealing from vehicles on Chennai-Bangalore National Highway

இவர்கள் சென்னை டூ பெங்களூர் தேசிய நெடுஞ்சாலையில் செல்லும் கனரக வாகனங்கள், சாலையோரம் நிற்கும் கனரக வாகனங்கள் மற்றும் லாரிகளில் ஏறி அதிலுள்ள பொருட்களை கொள்ளையடித்துக்கொண்டு தப்பிப்பது தங்கள் தொழில் எனக்கூறியுள்ளனர். அதிகமாக திருடமாட்டோம், வழக்கு பதிவாகாத அளவுக்கு பொருட்களை திருடுவோம், குறைவாகத்தானே திருடு போயிருக்கிறது என அவர்கள் புகார் தரமாட்டார்கள் எனச்சொல்லியுள்ளனர்.

அவர்கள் தந்த வாக்குமூலத்தைத் தொடர்ந்து ஆம்பூர் கிராமிய போலீசார் வழக்கு பதிவு செய்து அவர்களிடமிருந்த ஒரு இனோவா கார், திருட்டுக்கு பயன்படுத்திய மினி லாரி, திருடி வைத்திருந்த கோல்டு வின்னர் ஆயில் பாக்கெட் பெட்டிகள், எலக்ட்ரிக் பொருட்கள், ராணுவ வீரர்களின் உடை உள்ளிட்டவற்றை கைப்பற்றினர். அதன் மதிப்பு பல லட்சம் என்கின்றனர் போலீஸார். பறிமுதல் செய்த பொருள்களோடு வழக்கு பதிவு செய்து நான்கு பேரையும் போலீசார் நீதிமன்றத்தில் நிறுத்தி வேலூர் சிறையில் அடைத்தனர்.

சார்ந்த செய்திகள்

 

Next Story

ஆந்திராவில் இருந்து தென்மாநிலங்களுக்குக் கடத்தப்படும் கஞ்சா; சுற்றிவளைத்த தமிழக போலீஸ்

Published on 13/07/2024 | Edited on 13/07/2024
cannabis smuggled from Andhra, Telangana to Tamil Nadu, Karnataka, Kerala by car and train

ஆந்திராவில் இருந்து தமிழகத்திற்குக் கஞ்சா கடத்திய வரப்படுவதாக வந்த ரகசியத் தகவல் போலீசாருக்கு கிடைத்துள்ளது. அதனடிப்படையில் மாவட்ட காவல் கண்காணிப்பாளர் மணிவண்ணன் உத்தரவின் பேரில் தமிழக ஆந்திர எல்லையோரம் உள்ள வேலூர் மாவட்டம் சைணகுண்டா சோதனை சாவடி அருகே குடியாத்தம் தாலுகா போலீசார் தீவிர வாகன தணிக்கையில் ஈடுபட்டனர்.

அப்போது கர்நாடகா பதிவு எண் கொண்ட சொகுசு காரை தடுத்து நிறுத்தி சோதனை செய்த போது அதில் 12 கிலோ கஞ்சா கடத்திவரப்பட்டது தெரியவந்தது.  கஞ்சாவைக் கடத்தி வந்த குடியாத்தம் பகுதியைச் சேர்ந்த குடியரசன் (24) கோகுல்குமார் ( 26) மாதேஷ் (21) மற்றும் பெரம்பலூர் மாவட்டத்தைச் சேர்ந்த வெங்கடேசன்( 23) ஆகிய நான்கு பேரையும் கைது செய்து கடத்தலுக்குப் பயன்படுத்தப்பட்ட காரை பறிமுதல் செய்த குடியாத்தம் தாலுகா போலீசார் வழக்குப் பதிவு செய்து விசாரணை மேற்கொண்டு வருகின்றனர். இதில் கைது செய்யப்பட்ட குடியரசன் மற்றும் கோகுல்குமார் ஆகிய இருவரும் மீது கொலை வழக்கு உள்ளிட்ட பல்வேறு வழக்குகள் நிலுவையில் உள்ளது குறிப்பிடத்தக்கது.

இதேபோல் ராணிப்பேட்டை மாவட்டம் அரக்கோணம் வழியாக டாடா நகர் பகுதியில் இருந்து எர்ணாகுளம் செல்லும் எர்ணாகுளம் எக்ஸ்பிரஸில் கஞ்சா கடத்தப்படுவதாக வேலூர் மதுவிலக்கு மற்றும் அமலாக்கப் பிரிவு காவல்துறையினருக்கு ரகசியத் தகவல் கிடைத்தது. அதன் பேரில் அரக்கோணம் மதுவிலக்கு மற்றும் அமலாக்கப் பிரிவு காவல் துறையினருடன் இணைந்து ரயிலில் சோதனை மேற்கொண்டனர். 

முன்பக்க சாதாரண பெட்டியில் சந்தேகம் அளிக்கக் கூடிய வகையிலிருந்த நபர்களைப் பிடித்து விசாரணை மேற்கொண்ட போது கஞ்சா கடத்தி வருவது தெரியவந்தது. அவர்களிடம் இருந்து 10 பாண்டல்களில் இருந்த சுமார் 14 கிலோ எடையுள்ள கஞ்சாவை பறிமுதல் செய்த காவல்துறையினர் கஞ்சா கடத்திய குற்றத்திற்காக கர்நாடகா மாநிலம் பெங்களூரைச் சேர்ந்த சுப்ரமணியம் (21) மற்றும் அப்துல் (18) ஆகிய இருவரைக் கைது செய்து விசாரணை மேற்கொண்டு வருகின்றனர்.

ஆந்திரா மற்றும் தெலுங்கானாவில் வனப்பகுதிகளில் இருந்து கடத்தி வரப்படும் கஞ்சா தமிழ்நாடு, கர்நாடகா பகுதிகளுக்குள் நுழைந்து மாநில இளைஞர்களைப் போதைக்கு அடிமையாக்கி வருகிறது. இதனைத் தடுக்க காவல்துறை பெரும் முயற்சிகள் எடுத்தாலும் கஞ்சா கடத்தி வருவதற்காக அனுப்பப்படும் குருவிகளுக்குத் தரப்படும் ஆயிரக்கணக்கான ரூபாய் பணம் அவர்களை இந்த தொழிலைக் கச்சிதமாகச் செய்யவைக்கிறது. 

Next Story

சாராயம் காய்ச்சி குடித்த நபர்கள் மருத்துவமனையில் அனுமதி!

Published on 12/07/2024 | Edited on 13/07/2024
People admitted to hospital after drinking liquor

செங்கல்பட்டு மாவட்டம் மதுராந்தகம் அருகே மழுவங்கரணை கிராமத்தைச் சேர்ந்தவர் தேவன்(65).  அடுப்புக்கரி வியாபாரம் செய்து வரும் இவர் தன்னிடம் வேலை செய்யும் தொழிலாளர்களுக்காக சாராயம் காய்ச்சி வந்ததாகக் கூறப்படுகிறது. இது குறித்த தகவல் மேல்மருவத்தூர் காவல் ஆய்வாளர் ஏழுமலைக்குத் தெரியவர, உடனடியாக  மதுவிலக்கு அமல் பிரிவு போலீசாருடன் தேவன் வீட்டிற்குச் சென்று சோதனை நடத்தியுள்ளார்.

சோதனையில்  சாராயம் காய்ச்சுவதற்காக வைத்திருந்த ஊறல் மற்றும் காய்ச்சி வைத்திருந்த 20 லிட்டர் சாராயத்தைக் கைப்பற்றினர். மேலும் தேவனை போலீசார் கைது செய்து விசாரணை நடத்தியபோது, சாராயத்தைக் காய்ச்சி தன்னிடம் வேலை செய்யும் மணி, பெருமாள், அய்யனார், ராதா கிருஷ்ணன், மதுரை ஆகிய 5 பேருக்கு குடிக்கக் கொடுத்ததாகத் தெரிவித்தார்.

இதனைத் தொடர்ந்து மருத்துவ குழுவினர் அதில் 3 பேரை  பிடித்து முழு மருத்துவ பரிசோதனை செய்தனர். மூவருக்கும் எந்த பாதிப்பு ஏற்படவில்லை என்று  மருத்துவர்கள் தெரிவித்தனர். இருப்பினும் முன்னெச்சரிக்கைக்காக அவர்கள் செங்கல்பட்டு அரசு மருத்துவமனையில் அனுமதிக்கப்பட்டு கண்காணிக்கப்பட்டு வருகின்றனர். எஞ்சியுள்ள 2 பேருடன் சேர்த்து 5 பேரும் நலமுடன் இருப்பதாகத் தெரிவிக்கப்பட்டுள்ளது.