Skip to main content

வரதட்சணை கேட்டு அடித்த ஆயுதப்படை வீரர்; தமிழக பெண்ணிற்கு நேர்ந்த சோகம்

Published on 31/12/2022 | Edited on 31/12/2022

 

Dowry abuse of paramilitary soldier; Tragedy for Tamil Nadu girl

 

சென்னை காரம்பாக்கம் பகுதியைச் சேர்ந்தவர் முத்துசெல்வன். இவரது மகள் நிவேதா. 23 வயதான நிவேதாவிற்கு கடந்த 2018 ஆம் ஆண்டு ஆந்திராவைச் சேர்ந்த சங்கர் என்பவருடன் திருமணம் நடந்தது. சங்கர் மத்திய தொழில் பாதுகாப்புப் படை காவலராகப் பணிபுரிகிறார்.

 

இத்தம்பதிக்கு 3 வயதில் நேகா என்ற பெண் குழந்தை உள்ளது. இந்நிலையில் நிவேதாவிடம் சங்கர் வரதட்சணையாக பணம் மற்றும் நகைகளைக் கேட்டுள்ளார். சங்கரும் அவரது குடும்பத்தாரும் தொடர்ந்து வரதட்சணை கேட்டு கொடுமை செய்து நிவேதாவை அடித்துத் துன்புறுத்தியுள்ளனர். மேலும் விவாகரத்து பெற்று சென்றுவிடுமாறும் நிவேதாவினை மிரட்டியுள்ளனர்.

 

இதனைத் தொடர்ந்து நிவேதா தனது தாயிடம் முறையிட்டுள்ளார்.ஆந்திரா சென்ற நிவேதாவின் தாய் அவரை தனது வீட்டிற்கு அழைத்து வந்துள்ளார். இதனால் மன வேதனையில் இருந்த நிவேதா நேற்று மாலை வீட்டில் தூக்கிட்டு தற்கொலை செய்து கொண்டார்.

 

தகவல் அறிந்து அங்கு சென்ற காவல்துறையினர் உடலை மீட்டு பிரேதப் பரிசோதனைக்கு அனுப்பி வைத்தனர். தொடர்ந்து வீட்டில் சோதனை செய்த காவல்துறையினர் நிவேதா தன் கைப்பட எழுதிய கடிதத்தையும் கண்டெடுத்தனர். அதில், “கணவர் வரதட்சணை கேட்டு துன்புறுத்துவதால் தற்கொலை செய்து கொள்கிறேன்” என எழுதி வைத்திருக்கிறார்.

 

இதனை அடுத்து சங்கர் மற்றும் அவரது குடும்பத்தினரை காவல்துறையினர் விசாரணை செய்ய திட்டமிட்டுள்ளனர்.

 

 

சார்ந்த செய்திகள்

 

Next Story

கொடுமைக்கு உள்ளான பெண்; கலங்கி நிற்கும் குடும்பம் - சிக்கிய அ.தி.மு.க நிர்வாகி 

Published on 24/02/2024 | Edited on 24/02/2024
Woman complaints against  AIADMK executive, alleging issue dowry

அதிமுகவின் முன்னாள் சட்டமன்ற உறுப்பினர் கே.பி.கந்தன். இவரது மகன் கே.பி.கே.சதீஸ்குமார். இவர், சென்னை பெருநகர மாநகராட்சியின் 182 வது வார்டு மாமன்ற உறுப்பினராக இருந்து வருகிறார். இவருக்கும் அம்பத்தூரைச் சேர்ந்த ஸ்ரீ காந்த் என்பவரது மகள் ஸ்ருதி பிரியதர்ஷினிக்கும் கடந்த 2018 ஆம் ஆண்டு திருமணம் நடைபெற்றது. இந்தத் திருமணத்தின் போது சுமார் 600 சவரன் தங்கம், வெள்ளி நகைகள், 2 சொகுசு கார்கள் ஆகியவை கே.பி.கந்தன் குடும்பத்தினருக்கு வரதட்சணையாக கொடுக்கப்பட்டுள்ளது. இந்தத் தம்பதியர் ஆரம்பகாலத்தில் மகிழ்ச்சியோடு வாழ்ந்து வந்துள்ளனர். ஆனால், கடந்த சில மாதங்களாக இந்தத் தம்பதியருக்குள் கருத்து வேறுபாடு ஏற்பட்டதாக சொல்லப்படுகிறது. ஆனால், இந்தக் கருத்து வேறுபாடு வரதட்சனை காரணமாக ஏற்பட்டுள்ளது என்பது தற்போது தெரியவந்துள்ளது.

இது தொடர்பாக பாதிக்கப்பட்ட ஸ்ரீகாந்த் குடும்பத்தினர் காவல்துறையில் புகார் கொடுத்துள்ளனர். அந்த புகார் மனுவில், என் பெயர் ஸ்ரீகாந்த் . எனக்கு 58 வயது ஆகிறது. நான் அம்பத்தூரில் மரக்கடை வைத்து வியாபாரம் செய்கிறேன். கட்டுமானத் தொழிலும் செய்து வருகிறேன். என் மகள் ஸ்ருதி பிரியதர்ஷினி மருத்துவராக பணியாற்றி வருகிறார். அவருக்கு திருமணம் செய்ய வேண்டி வரன் பார்க்கும்பொழுது அதிமுகவைச் சேர்ந்த முன்னாள் சட்ட மன்ற உறுப்பினர் கே.பி. கந்தன் அவருடைய மகன் கே.பி.கே. சதீஷ்குமார் வரன் சம்பந்தமாக என்னிடம் தொடர்பு கொண்டார்கள். இருவீட்டாரும் பேசி சம்மதித்து திருமணம் முடிவானது. கே.பி.கந்தன் மற்றும் அவருடைய மனைவி சந்திரா சார்பாக நிறைய நபர்கள் வருவார்கள். அதனால் திருமண நிச்சயதார்த்தம் கிண்டியில் உள்ள பிரபல சொகுசு விடுதியில் நடத்த வேண்டும் என்றும், நிச்சயதார்த்தத்திற்கு மண மகனுக்கு ரேடோ வாட்ச், வைர பிரேஸ்லட், தங்க செயின், வைர மோதிரம் போட வேண்டும் என்றும் திருமணத்திற்கு பெண்ணிற்கு குறைந்த பட்சம் 1000 சவரன் தங்க நகைகளும் மாப்பிள்ளைக்கு 100 சவரன் தங்க நகைகளும் இரண்டு விலை உயர்ந்த கார்களும் வரதட்சணையாகவும், அதனைத் தொடர்ந்து திருமணம் அடையாரில் உள்ள ராமசந்திர கன்வென்சன் சென்டர்-ல் நடத்த வேண்டும் என்றும் நிர்பந்தித்தனர். 

நான் 1000 சவரன் தங்க நகை மட்டும் என்னால் செய்ய முடியாது என்றும், பெண்ணுக்கு 500 சவரனும், மாப்பிள்ளைக்கு 100 சவரனும் வரதட்சணையாக தருகிறேன் என்றும், மற்றவைகள் அவர்கள் வரதட்சணையாக கேட்டபடி செய்கிறேன் என்று தெரிவித்த பின்பு கடந்த 2018 ஆம் ஆண்டு பிப்ரவரி 26 ஆம் தேதி நிச்சயதார்த்தமும், ஏப்ரல் 25 ஆம் தேதி திருமணமும் நடந்தது. கே.பி. கந்தன் வரதட்சணையாக கேட்டபடி ஆடி கார் மற்றும் பி.எம்.டபில்யூகார் அதன் மதிப்பு 1.65 கோடி மற்றும் தங்க நகை 600 சவரன், வெள்ளி 20 கிலோ ஆகியவைகள் வரதட்சணையாக கொடுக்கப்பட்டு சீர்வரிசையாக கட்டில், பீரோ மற்றும் வீட்டு உபயோகப் பொருட்கள் ஆகியவற்றை கொடுத்தேன் என்று அந்த மனுவில் கூறியுள்ளார். 

இவ்வாறு திருமணம் பற்றி விபரமாக கூறியிருக்கும் ஸ்ரீகாந்த், திருமணம் நடந்த பிறகு சிறிது காலம் மாப்பிள்ளையும், என் மகளும் சந்தோஷமாகத் தான் இருந்தார்கள். அதன் பிறகு அதே வீட்டில் கணவருடன் வசிக்கும் மாப்பிள்ளையின் சகோதரி இந்துமதி, மாப்பிள்ளையின் அம்மா ஆகியோர் திருமணத்திற்கு வரதட்சணையாக கேட்ட 1000 சவரன் நகையை போடவில்லை என்று என் மகளை வார்த்தையால் கொடுமைப் படுத்தியுள்ளனர். இவர்களின் கொடுமை தாங்காமல் என் மகள் என்னிடம் பலமுறை நேரில் வரும் பொழுதும் தொலைபேசியின் வாயிலாகவும் தெரியப்படுத்தியுள்ளார். நான் இதை கே.பி. கந்தனுக்கு தெரியப்படுத்தி என் மகளைப் பார்த்துக் கொள்ளுமாறும், கொடுமைப் படுத்த வேண்டாம் என்றும் நீங்கள் கேட்ட நகைகளை கொடுத்து விடுகிறேன் என்றும் கூறியிருந்தேன். என் மகளின் ஆடி மாதத்தின்போது மாப்பிள்ளை, அம்மா வற்புறுத்தலின் பேரில் என் மகளுக்கு வைரத்தில் தாலி செயினும், மாப்பிள்ளைக்கு வெள்ளியில் சாப்பிடும் தட்டு, டம்ளர் ஆகியவைகளையும் கொடுத்தேன். என் மகளின் முதல் திருமணம் நாள் அன்று என் மருமகனுக்கு ஒரு பெல்ட் அன்பளிப்பாக கொடுத்தேன். அவர் ஏன் தங்க நகை கொடுக்கவில்லை என்று என் மகளை அடித்து தகராறு செய்தார். அந்த சமயம் என் மகள் 5 மாத கர்ப்பிணியாக இருந்தார். இந்நிலையில் என் மகளுக்கு பெண் குழந்தை பிறந்தது. பிறந்தது பெண் குழந்தை என்பதால் என் மகளின் கணவர் வீட்டில் யாருக்கும் சந்தோஷம் இல்லை. அதை காரணமாக வைத்து என் மருமகன், அவருடைய அம்மா, தங்கை பலமுறை வார்த்தையால் கொடுமைப்படுத்தி என் மகள் தற்கொலை செய்து கொள்ள முயலும் அளவிற்கு கொடுமை செய்துள்ளனர்.

இது குறித்து தகவல் அறிந்து, நான் மாப்பிள்ளையின் தந்தை கே.பி.கந்தனிடம் கூறியபோது, அவர் அவரின் வீட்டாரை கண்டிக்காமல் என் மகளை மிரட்டி இங்கு நடப்பதை எல்லாம் ஏன் உன் தந்தையிடம் சொல்கிறாய்? இன்னொரு முறை உன் தந்தை என்னிடம் பஞ்சாயத்திற்கு வந்தால் உன் குடும்பத்தையே அடியோடு ஒழித்து விடுவதாக கூறியதாக என் மகள் என்னிடம் தொலைபேசி வாயிலாக தெரிவித்தார். இதன் பிறகு மே மாதம் 2021-ல் என் மகளை என் மகளின் கணவர், மாமியார், என் மகள் கணவரின் சகோதரி இந்துமதி ஆகியோர் அடித்து கொடுமைப்படுத்தியுள்ளனர். அவரை மருத்துவமனைக்கு கூட அழைத்து செல்லாமல் எங்கே அழைத்து சென்றால் புகார் ஆகி விடுமோ என்று என் மகளின் கணவரின் சகோதரி இந்துமதி மருத்துவர் என்பதால் அவரே மருத்துவம் பார்த்து மருந்து கொடுத்துள்ளார். இந்நிலையில் என் மகளையும், குழந்தையையும் 2021 ஆம் வருடம் மே மாதம் 9 ஆம் தேதி வீட்டை விட்டு வெளியே தள்ளிவிட்டதன் காரணத்தினால் என் மகள் Cab மூலமாக என் வீட்டிற்கு வந்துவிட்டார். என் மகளை சேர்த்து வைக்க கே.பி.கந்தனிடம் நான் பலமுறை பேசியும் எந்த பலனும் இல்லை. அவர்கள் விவாகரத்து வேண்டி பொய்யான தகவலை சேர்த்து வழக்கு தொடுத்து அது குடும்ப நீதிமன்றத்தில் நிலுவையில் உள்ளது. என் மகளை வீட்டை விட்டு அவர்கள் அனுப்பும்போது அவருடைய துணி மற்றும் நகைகள், செல்போன் ஆகியவைகளை மாப்பிள்ளையின் வீட்டிலேயே வைத்துவிட்டார்.

இந்நிலையில் என் மாப்பிள்ளை என் மகளின் அலைபேசியை உபயோகித்து அதில் உள்ள இன்ஸ்டாகிராமில் என் மகள் மருத்துவம் படிக்கும்போது அவரின் வகுப்பு தோழருடன் பேசியதை எல்லாம் எடுத்து என் மகளை அவமான படுத்த வேண்டி என் மகள் பிரிந்து இரண்டு வருடம் கழித்து தற்பொழுது இந்த சங்கதிகளை ஒரு மனுவாக நீதிமன்றத்தில் சமர்ப்பித்ததோடு அல்லாமல் என்னுடைய உறவினர்களுக்கும் தெரியப்படுத்தி எங்கள் நன் மதிப்பை களங்கப்படுத்தியுள்ளார்கள். என் மகள் சேர்ந்து வாழவேண்டும் என்பதனால் நான் இது நாள் வரை என் மருமகன் சதீஷ்குமார் என் மருமகனின் தந்தை கே.பி. கந்தன், தாயார் சந்திரா, சகோதரி இந்துமதி ஆகியோர் மேல் எந்த வித புகாரும் காவல் நிலையத்திலோ, நீதிமன்றத்திலோ தெரிவிக்காமல் இருந்தேன். தற்போது நான் கே.பி. கந்தனிடம் நேரிடையாக சென்று இது குறித்து கேட்டேன். அப்போது பேசிய அவர், என் பெண்ணிற்கு மேலும் 500 சவரன் நகை தர வேண்டும் என்றும், அவரின் மகனின் வியாபாரத்திற்கு 10 கோடி ரூபாய் கொடுக்க வேண்டும் என்றும் கூறினார். மேலும், தான் கேட்டதை தரவில்லை என்றால் உன் மகள் வாழமுடியாது என்றுக் கூறி என்னை மிரட்டி அனுப்பிவிட்டார்.

என் மகளை வரதட்சணை கொடுமை செய்து வாழவிடாமல் என் வீட்டிற்கு அனுப்பிவிட்ட சதீஷ்குமார், அவரின் தந்தை கே.பி.கந்தன், தாயார் சந்திரா, அவருடைய மகள் இந்துமதி ஆகியோர் மீது வரதட்சணை கொடுமை வழக்கு பதிவு செய்து சட்டப்படி நடவடிக்கை எடுக்குமாறு மிகத் தாழ்மையுடன் கேட்டுக் கொள்கிறேன். இவ்வாறு அந்த மனுவில் கூறப்பட்டுள்ளது. முன்னாள் எம்.எல்.ஏ கே.பி.கந்தன் குடும்பத்தினர் வரதட்சணை கேட்டு தனது மகளை கொடுமைப்படுத்தியதாக புகார் கொடுத்திருக்கும் சம்பவம் பெரும் பரபரப்பை ஏற்படுத்தியுள்ளது. இதனையடுத்து, இது குறித்து விரைவில் விசாரணை தொடங்கப்படும் என எதிர்பார்க்கபடுகிறது.

Next Story

‘என் மகள கொன்னுட்டாங்க..’; கண்ணீர் விடும் குடும்பத்தினர் - இளம்பெண்ணுக்கு நேர்ந்த சோகம்

Published on 26/12/2023 | Edited on 26/12/2023
Young girl lost their life due to dowry violence

திருவள்ளூர் மாவட்டம் பொன்னேரிக்கு அருகே அமைந்துள்ள ஜெகநாதபுரம் பகுதியைச் சேர்ந்தவர்கள் சேகர் - முத்துலட்சுமி தம்பதி. இந்த தம்பதியின் மகள் ஆர்த்தி என்கின்ற தனலட்சுமி. 20 வயதான இவர், கல்லூரி படிப்பை முடித்துள்ளார். இந்நிலையில், தனது மகளுக்குத் திருமணம் செய்து வைக்க வேண்டும் என முடிவெடுத்த சேகர் - முத்துலட்சுமி தம்பதி, அவருக்குத் திருமண வரன் பார்த்து வந்தனர். அதன்படி, தனலட்சுமிக்கும் பொன்னேரி அருகே சிறுவாக்கம் சாணார்பாளையம் கிராமத்தைச் சேர்ந்த பழனி என்பவரின் மகன் 24 வயதான முரளி கிருஷ்ணன் என்பவருக்கும் கடந்த ஜனவரி மாதத்தில் பெற்றோர்கள் முன்னிலையில் திருமணம் நடைபெற்றுள்ளது. அப்போது, அவர்கள் மாப்பிள்ளை வீட்டுக்கு குறைந்த அளவில் வரதட்சணை கொடுத்ததாகச் சொல்லப்படுகிறது.

இந்நிலையில், ஆரம்பத்தில் ஒற்றுமையாக வாழ்ந்த இவர்களது குடும்பத்தில் காலப்போக்கில் சிறு சிறு விரிசல்கள் ஏற்பட்டு வந்துள்ளது. அதற்கெல்லாம் பணம்தான் முக்கிய காரணம் என்று கூறப்படுகிறது. திருமணம் நடந்த சில மாதங்களிலேயே முரளி குடும்பத்தினர் தனலட்சுமிக்கு தொல்லை கொடுக்கத் தொடங்கினர். உன்னுடைய வீட்டிற்குச் சென்று மேலும் பணம் வாங்கிக்கொண்டு வா என தனலட்சுமியை தினந்தோறும் டார்ச்சர் செய்து வந்துள்ளனர். ஒருகட்டத்தில், குடி போதைக்கு அடிமையான முரளி தனது மனைவி தனலட்சுமியை அடித்து துன்புறுத்தியுள்ளதாகக் கூறப்படுகிறது. அப்போதெல்லாம் அக்கம்பக்கத்தில் உள்ளவர்கள், உறவினர்கள் என கணவன் மனைவி சண்டையை தீர்த்து வைப்பது வழக்கம். ஆனாலும், இவர்களுக்குள் தினந்தோறும் தகராறு நடந்துகொண்டே இருந்தது.

Young girl lost their life due to dowry violence

பெண்வீட்டார் கொடுத்த வரதட்சணை போதாது என்று தனலட்சுமியிடம் மீண்டும் பணம் கேட்டு முரளி மட்டுமின்றி அவரது தாய், தந்தை என அனைவரும் சேர்ந்துகொண்டு கொடுமை செய்துள்ளனர். இதனால் மனமுடைந்த தனலட்சுமி இதுகுறித்து தனது பெற்றோரிடம் கூறி கண்ணீர் விட்டு அழுதுள்ளார். இத்தகைய சூழலில், கடந்த சில நாட்களுக்கு முன்பு தனலட்சுமி தனது சகோதரனுக்கு வாட்ஸப்பில் ஒரு குரல் பதிவு அனுப்பியுள்ளார். அதில், ‘கணவன் வீட்டார் தன்னை கொடுமைப்படுத்துவதாகவும் இங்கிருந்தால் எந்த நேரமும் எனது உயிருக்கு ஆபத்து ஏற்படலாம். எனவே தந்தையுடன் வந்து தாய் வீட்டிற்கு அழைத்துச் செல்லுமாறு..’ தனலட்சுமி அந்த குரல் பதிவில் பேசியுள்ளார். இதைக் கேட்டவுடன் தனலட்சுமி குடும்பத்தார் மிகுந்த கலக்கத்தில் இருந்துள்ளனர்.

இந்நிலையில், கடந்த 23 ஆம் தேதியன்று கடும் மன உளைச்சலுக்கு ஆளான தனலட்சுமி, வீட்டில் ஆள் இல்லாத சமயத்தில் தூக்கிட்டுத் தற்கொலை செய்து கொண்டதாகக் கூறப்படுகிறது. அதன்படி, மாப்பிள்ளை வீட்டிலிருந்து தனலட்சுமி குடும்பத்தாரை செல்போனில் தொடர்புகொண்டு நடந்த விஷயங்களை கூறியுள்ளனர். ஒருகணம், இதைக் கேட்டு அதிர்ச்சியடைந்தவர்கள் உடனடியாக முரளி வீட்டுக்கு வந்து தங்களுடைய மகளின் உடலைப் பிடித்துக்கொண்டு கண்ணீர்விட்டுக் கதறி அழுதனர். அதுமட்டுமின்றி, தனது மகள் தனலட்சுமியை வரதட்சணை கேட்டுக் கொடுமைப்படுத்தி கணவன் வீட்டார் கொன்றுவிட்டதாக சோழவரம் காவல் நிலையத்தில் பெண் குடும்பத்தினர் புகார் அளித்தனர்.  

அதன்பேரில், அந்தப் புகாரை எடுத்துக்கொண்ட போலீசார், உடனடியாக சம்பவ இடத்திற்கு விரைந்து உயிரிழந்த தனலட்சுமியின் உடலை மீட்டுப் பிரேதப் பரிசோதனைக்காக பொன்னேரி அரசு மருத்துவமனைக்கு அனுப்பி வைத்தனர். இந்நிலையில், இச்சம்பவம் குறித்து வழக்குப்பதிவு செய்த போலீசார் விசாரணை மேற்கொண்டு வருகின்றனர். அதே வேளையில், திருமணம் ஆன 11 மாதத்திலேயே இந்த மர்ம மரணம் நிகழ்ந்துள்ளதால் வருவாய் கோட்டாட்சியர் விசாரணை மேற்கொண்டு வருகிறார்.

Young girl lost their life due to dowry violence

இத்தகைய சூழலில், கோட்டாட்சியர் அலுவலக நுழைவு வாயிலில் குவிந்த தனலட்சுமியின் உறவினர்கள் மாப்பிள்ளை வீட்டாரை கைது செய்யக்கோரி தர்ணா போராட்டத்தில் ஈடுபட்டனர். மேலும் குற்றவாளிகளுக்கு காவல்துறையினர் சாதகமாக செயல்படுவதாகத் தெரிவித்து சாலை மறியல் போராட்டத்திலும் ஈடுபட்டனர். இதனால் அப்பகுதியில் பரபரப்பு ஏற்பட்டது. இதையடுத்து, ஸ்பாட்டுக்கு வந்த போலீசார், போக்குவரத்திற்கு இடையூறு ஏற்படுத்தாமல் கலைந்து செல்லுமாறு அறிவுறுத்தியதால் இரு தரப்புக்கும் இடையே வாக்குவாதம் ஏற்பட்டது.

இதற்கிடையில், இந்த வழக்கில் சட்ட ரீதியான நடவடிக்கை மேற்கொள்ளப்படும் என அதிகாரிகள் உறுதியளித்ததால் போராட்டத்தில் ஈடுபட்டவர்கள் அங்கிருந்து கலைந்து சென்றனர். தற்போது திருமணமான 11 மாதத்தில் மர்மமான முறையில் இளம்பெண் ஒருவர் உயிரிழந்த சம்பவம் பெரும் பரபரப்பை ஏற்படுத்தியுள்ளது.