Skip to main content

பிப்.21ல் திருச்சிக்கு ஆய்வு செய்ய வரும் ஆளுனர்! - எதிர்ப்புக்கு தயார் ஆகும் தி.மு.க.!

Published on 14/02/2018 | Edited on 14/02/2018
dmk condemn


இதுநாள் வரை தமிழக அரசியலில் ஆளும் கட்சியின் உயர் பொறுப்பில் உள்ள முதல்வர், அமைச்சர், எம்.எல்.ஏக்கள் ஆகியோர் தான் தமிழகத்தை ஆய்வு செய்து கொண்டிருந்தனர். ஆனால் சமீப காலமாக புதிய திருப்பமாக தமிழக ஆளுநர் பன்வாரிலால் புரோகித் பல்கலைகழகங்களுக்கு பட்டமளிப்பு விழாவிற்கு கலந்து கொள்ளும் போது, அப்படியே மாநில அரசின் நிர்வாகம் சம்மந்தப்பட்ட, தூய்மை இந்தியா திட்டப்பணிகள் எப்படி செயல்படுகிறது என்றும் ஆய்வு செய்து சரிவர பணி செய்யாத அதிகாரிகளை கண்டிக்கவும் செய்கிறார்.

இது மாதிரியான செயல் மாநில அரசின் உரிமைகளை பாதிக்கும் செயல் என்று தி.மு.க. உள்ளிட்ட எதிர்கட்சிகள் தங்களின் கண்டணத்தை பதிவு செய்தது. இதில் தி.மு.க. மட்டும் ஒருபடி மேலே போய் ஆளுநருக்கு எதிர்ப்பு தெரிவிக்கும் வண்ணம் கருப்புக்கொடி காட்டி தங்கள் கண்டனத்தை பதிவு செய்து வருகிறார்கள். அந்த வரிசையில் திருச்சியில் வரும் பிப்ரவரி 21ம் தேதி தமிழக ஆளுநர் பன்வாரிலால் புரோகித் ஆய்வு செய்ய உள்ளார்.

பாரதிதாசன் பல்கலைக்கழகத்தில் நடைபெறும் பட்டமளிப்பு விழாவில் பங்கேற்கும் ஆளுநர் திருச்சி செல்கிறார். இதனையடுத்து தூய்மை இந்தியா திட்டத்தின் பணிகளை திருச்சி மாவட்டம் திருவெறும்பூர் உள்ளிட்ட இடங்களில் ஆய்வு செய்ய உள்ளதாக தகவல் தெரிவிக்கப்பட்டுள்ளது.

கடந்த முறை தஞ்சாவூர் பகுதிக்கு செல்லும் ஆளுநர் செல்லும் போது, திருச்சிக்கு வந்த அவரை திருச்சி எம்.பி.சிவா வரவேற்ற போது தி.மு.க. கட்சிக்குள் விமர்சனத்தை உண்டாக்கியது.

இந்நிலையில் தற்போது, திருச்சி வரும் ஆளுநருக்கு வலுமையான எதிர்ப்பை காண்பிப்பதற்காக தி.மு.க. தலைமையுடன் திட்டமிட்டு இருப்பதாக தகவல் வெளியாகி உள்ளது.

- ஜெ.டி.ஆர்

 

சார்ந்த செய்திகள்

Next Story

தி.மு.க. பிரமுகர் மீது கொடூரத் தாக்குதல்!

Published on 29/02/2024 | Edited on 29/02/2024
Chengalpattu Katangulathur dmk executive incident

செங்கல்பட்டு மாவட்டம் காட்டாங்குளத்தூர் வடக்கு ஒன்றிய தி.மு.க. செயலாளராக இருந்து வருபவர் ஆராவமுதன். இவர் மீது அடையாளம் தெரியாத மர்ம கும்பல் ஒன்று நாட்டு வெடிகுண்டு வீசி அரிவாளால் வெட்டியுள்ளனர். இந்தத் தாக்குதல் சம்பவத்தில் ஆராவமுதனின் கை மற்றும் தலைப்பகுதியில் காயம் ஏற்பட்டுள்ளது. இதனையடுத்து மர்ம கும்பல் அங்கிருந்து தப்பிச் சென்றுள்ளனர். அதே சமயம் படுகாயம் அடைந்த ஆராவமுதன் சிகிச்சைக்காக சென்னையில் உள்ள மருத்துவமனைக்கு அனுப்பி வைக்கப்பட்டுள்ளார்.

இந்தத் தாக்குதல் சம்பவத்தில் ஈடுபட்டவர்கள் மீது ஓட்டேரி போலீசார் வழக்குப்பதிவு செய்து தீவிரமாகத் தேடி வருகின்றனர். நாட்டு வெடிகுண்டு வீசி தி.மு.க நிர்வாகி அரிவாளால் வெட்டப்பட்ட சம்பவம் மக்கள் மத்தியில் அதிர்ச்சியையும் பரபரப்பையும் ஏற்படுத்தியுள்ளது. 

Next Story

திமுக விளம்பரத்தில் சீனக் கொடி; அமைச்சர் அனிதா ராதாகிருஷ்ணன் விளக்கம்

Published on 29/02/2024 | Edited on 29/02/2024
Minister Anitha Radhakrishnan on Chinese flag in DMK advertisement

இரண்டு நாள் சுற்றுப் பயணமாகத் தமிழகம் வந்திருந்த பிரதமர் மோடி, நேற்று(28.2.2024) இரண்டாவது நாளாகத் தூத்துக்குடியில் நடைபெற்ற பல்வேறு திட்டங்களுக்கான அடிக்கல் நாட்டு நிகழ்ச்சியில் கலந்துகொண்டார். இந்தியாவின் முதல் ஹைட்ரஜன் எரிபொருள் கப்பல் சேவையைத் தொடங்கி வைத்தார். அதேபோல் குலசேகரப்பட்டினத்தில் ராக்கெட் ஏவுதளத்திற்கு அடிக்கல் நாட்டினார். ரூபாய் 4,586 கோடி ரூபாய் மதிப்பிலான நான்கு சாலை திட்டங்களையும் தொடங்கி வைத்தார். 

“திமுகவின் தொடர் வலியுறுத்தல்கள் மூலமாக குலசேகரப்பட்டினத்தில் ராக்கெட் ஏவுதளம் அமைத்திடும் தலைவர் கலைஞர் அவர்களின் கனவு நனவாகியுள்ளது” என தூத்துக்குடி நாடாளுமன்ற உறுப்பினர் கனிமொழி தெரிவித்துள்ளார். இதனிடையே நாளிதழ் ஒன்றில் அமைச்சர் அனிதா ராதாகிருஷ்ணன் சார்பில் கொடுக்கப்பட்ட விளம்பரத்தில் இந்தியா ஏவுகணை முகப்பில் சீனாவின் தேசியக் கொடி இடம்பெற்றிருந்ததாக புகைப்படங்கள் சமூக வலைத்தளங்களில் பரவி வருகிறது. இதுகுறித்து நெல்லையில் நடைபெற்ற விழாவில் பேசிய மோடி, “குலசேகரபட்டினம் ராக்கெட் ஏவுதள திறப்பு விழாவில் திமுக ஒரு விளம்பரம் கொடுத்துள்ளது. அதில் சீன நாட்டின் கொடியுடன் கூடிய ராக்கெட் படத்தை போட்டுள்ளார்கள். இதிலிருந்தே இவர்களின் நாட்டுப் பற்று நன்றாகத் தெரிகிறது” என்றார். 

இந்த விவகாரம் பேசுபொருளாக மாறிய நிலையில் செய்தியாளர்களிடம் பேசிய கனிமொழி, “இந்த விளம்பரத்தை செய்த நபர் எங்கிருந்து இந்தப் படத்தைக் கண்டுபிடித்தார் என்று எனக்குத் தெரியவில்லை. சீனாவை இந்தியா எதிரி நாடாக அறிவிக்கவில்லை என்று நான் நினைக்கிறேன். சீன பிரதமரை நம் பிரதமர் இந்தியா அழைத்ததையும், அவர்கள் மகாபலிபுரம் சென்றதையும் பார்த்திருக்கிறேன். உண்மையை ஏற்க விரும்பாத காரணத்தால் பிரச்சினையை திசைதிருப்ப காரணங்களைத் தேடுகிறீர்கள்” எனத் தெரிவித்தார்.

இந்த நிலையில் இன்று செய்தியாளர்களைச் சந்தித்த அமைச்சர் அனிதா கிருஷ்ணன், “மன்மோகன் சிங் பிரதமராக இருந்தபோது குலேசேகரபட்டினத்தில் ஏவுதளம் அமைப்பதற்கு முதன்முதலாக குரல் கொடுத்தவர் கலைஞர். அவரைத் தொடர்ந்து தற்போதைய முதல்வர் ஸ்டாலினும் அதே கோரிக்கையை வைத்தார். இதையடுத்து கனிமொழி எம்.பி தொடர்ந்து நாடாளுமன்றத்தில் ஏவுதளம் அமைக்க குரல் கொடுத்ததோடு சம்பந்தப்பட்ட அமைச்சருக்கு கடிதம் எழுதியும் அணுகியும் வலியுறுத்தி வந்தார். இப்படியாகத் தொடர்ந்து இதற்காக குரல் கொடுத்து வந்தவர்களின் பங்களிப்பு மறைந்து விடக்கூடாது என்பதற்காகத்தான் விளம்பரம் செய்ய முடிவெடுத்தோம். அதில் இந்த விளம்பரத்தை தயார் செய்த நபர் இதுபோன்ற தவறுகளை செய்துவிட்டார்; நாங்களும் அதனை கவனிக்கவில்லை. மற்றபடி எங்களுக்கு எந்த உள்நோக்கமும் இல்லை. எங்கள் மனதிலும் இந்தியா குறித்த பற்றுதான் இருக்கிறது. நாங்கள் இந்தியாவில் சாதி, மத மோதல்கள் இல்லாமல் ஒற்றுமையாக இருக்க வேண்டும் என்று நினைப்பவர்கள்; சிறு தவறின் காரணமாக இது நடைபெற்றுள்ளது” என்றார்.