Skip to main content

ரயிலில் விழுந்து கர்ப்பிணி பெண் பலியான சம்பவம்; தெற்கு ரயில்வே விளக்கம்!

Published on 03/05/2024 | Edited on 03/05/2024
Description of Southern Railway on Pregnant woman Incident after falling from train

சென்னையில் இருந்து தென்காசி மாவட்டம் சங்கரன்கோவில் பகுதியில் உள்ள தனது தாய் வீட்டிற்கு வளைகாப்பிற்காக கொல்லம் விரைவு ரயிலில் சென்னையைச் சேர்ந்த சுரேஷ் என்பவரின் மனைவி கஸ்தூரி (வயது 21) என்ற பெண் பயணித்துள்ளார். இவர் 7 மாத கர்ப்பிணியாக இருந்துள்ளார். இவர் பயணித்த இந்த ரயில் கடலூர் மாவட்டம் விருத்தாசலம் அருகே சென்று கொண்டிருந்த போது கஸ்தூரிக்கு வாந்தி வந்ததால் காற்றோட்டமாக ரயிலின் கதவு ஓரத்தில் நின்று வாந்தி எடுக்க முற்பட்டபோது ரயிலில் இருந்து தவறி விழுந்தாக கூறப்படுகிறது.

இதனையடுத்து அவரது உறவினர்கள் ரயிலின் அபாயச் சங்கிலியைப் பிடித்து இழுத்து ரயிலை நிறுத்த முயற்சித்தபோது அபாய சங்கிலி வேலை செய்யாததால் சுமார் 10 நிமிடங்கள் கழித்து 8 கி.மீ. தூரம் தள்ளிச் சென்று ரயில் நின்ற இடத்திலிருந்து பின்னோக்கி வந்து கர்ப்பிணியை அவரது உறவினர்கள் தேடியுள்ளனர். அதன் பின்னர் சுமார் 2 மணி நேர தேடலுக்குப் பின் உளுந்தூர்பேட்டை அருகே கர்ப்பிணி கஸ்தூரி சடலமாக மீட்கப்பட்டார். நாளை மறுநாள் (05.05.2024) வளைகாப்பு நடக்க இருந்த நிலையில் கர்ப்பிணி தவறி விழுந்து உயிரிழந்தது அவரது உறவினர்களிடம் பெரும் சோகத்தையும், அதிர்ச்சியையும் ஏற்படுத்தியுள்ளது.

இந்த நிலையில், இந்தச் சம்பவம் குறித்து விசாரணை நடைபெற்று கொண்டிருப்பதாக தெற்கு ரயில்வே விளக்கம் அளித்துள்ளது. இது குறித்து தெற்கு ரயில்வே கூறியதாவது, ‘கொல்லம் ரயிலில் இருந்து கர்ப்பிணி பெண் தவறி விழந்து உயிரிழந்தது வருத்தம் அளிக்கிறது. இந்தச் சம்பவம் குறித்து விசாரணை நடைபெற்று வருகிறது. மேலும், ரயில்களில் பயணிகளின் பாதுகாப்பை உறுதி செய்யவும், ரயில் பாதுகாப்பு உபகரணங்கள் செயல்படுகிறதா? எனவும், ரயில் பாதுகாப்பு அம்சங்களை ஆராய்வதற்கான விசாரணையும் நடைபெற்று கொண்டிருக்கிறது. அனைத்து ரயில்களிலும் பாதுகாப்பு அம்சங்கள் சரிவர இயங்குகிறதா எனக் கண்காணிக்க உத்தரவு பிறப்பிக்கப்பட்டுள்ளது’ எனவும் தெரிவித்துள்ளது. 

சார்ந்த செய்திகள்

 

Next Story

கடலூர் மத்தியச் சிறையில் இரு கைதிகளுக்கு இடையே மோதல்

Published on 11/07/2024 | Edited on 11/07/2024
Clash between two inmates in Cuddalore Central Jail

கடலூர் மத்திய சிறையில் இரு கைதிகளுக்கு இடையே மோதல் ஏற்பட்டுள்ளது பெரும் பரபரப்பு ஏற்பட்டுள்ளது.

கடலூர் கேப்பர் மலையில் மத்திய சிறைச்சாலை உள்ளது. இங்கு 1500க்கும் மேற்பட்ட விசாரணை மற்றும் தண்டனை கைதிகள் அடைக்கப்பட்டுள்ளனர். இங்கு சென்னை திருவல்லிக்கேணியைச் சேர்ந்த அழகுமுத்து என்பவரும், நெய்வேலி அருகே உள்ள வடக்குத்து பகுதியைச் சேர்ந்த கோபி என்பவரும் கடந்த ஒரு வருடமாக விசாரணைக் கைதிகளாக  அடைக்கப்பட்டுள்ளனர்.

இந்நிலையில் இன்று (ஜூலை. 11) இருவருக்கும் இடையே வாக்குவாதம் ஏற்பட்டு, ஒருவரை ஒருவர் தாக்கிக் கொண்டதாகக் கூறப்படுகிறது. இதைப் பார்த்த சிறை காவலர்கள் அங்கு சென்று இருவரையும் விலக்கி விட்டனர். அதன் பின்னர் இருவரையும்  தனித்தனி அறையில் காவலர்கள் அடைத்தனர். காயம் அடைந்த கைதி கோபிக்கு உங்கள் சிறை மருத்துவமனையில் சிகிச்சை அளிக்கப்படுகிறது. இது குறித்து கடலூர் முதுநகர் போலீசார் விசாரணை நடத்தி வருகின்றனர். இந்தச் சம்பவம் கடலூர் மத்திய சிறையில் பரபரப்பை ஏற்படுத்தியது.

Next Story

மார்க்சிஸ்ட் கட்சியின் மாநில செயலாளரின் சகோதரர் மறைவு; அரசியல் கட்சி தலைவர்கள் அஞ்சலி!

Published on 10/07/2024 | Edited on 10/07/2024
State Secretary of the Marxist Party Bro Tribute to political party leaders

மார்க்சிஸ்ட் கம்யூனிஸ்ட் கட்சியின் தமிழகத்தின் மாநில செயலாளர் கே. பாலகிருஷ்ணனின் தம்பி கே. ராதாகிருஷ்ணன் (வயது 66). இவர் சிதம்பரம் அருகே அண்ணாமலை நகர் பேரூராட்சிக்கு உட்பட்ட திடல்வெளி பகுதியில் வசித்து வந்தார். இவர் உடல் நலக்குறைவால் தஞ்சாவூர் அரசு மருத்துவக் கல்லூரி மருத்துவமனையில் சிகிச்சை பெற்று வந்தவர் நேற்று (09.07.2024) மாலை சிகிச்சை பலனின்றி உயிரிழந்தார். இவரது உடல் அவரது வீட்டில் அஞ்சலிக்காக வைக்கப்பட்டது. இதனை அறிந்த தமிழக முதல்வர் மு.க ஸ்டாலின், முதல்வரின் தனிச் செயலாளர் தினேஷ், திராவிடர் கழக தலைவர் கி. வீரமணி, இந்திய கம்யூனிஸ்ட் கட்சியின் மாநில செயலாளர் முத்தரசன் ஆகியோர் தொலைப்பேசியில் தொடர்பு கொண்டு கே. பாலகிருஷ்ணனுக்கு ஆறுதல் கூறினார்கள்.

மேலும் தமிழக வேளாண் மற்றும் உழவர் நலத்துறை அமைச்சர் எம் ஆர் கே பன்னீர்செல்வம், மார்க்சிஸ்ட் கம்யூனிஸ்ட் கட்சியின் அரசியல் தலைமை குழு உறுப்பினர் ஜி. ராமகிருஷ்ணன், மத்திய குழு உறுப்பினர் உ. வாசுகி, மாநில செயற்குழு உறுப்பினர்கள் எம். குணசேகரன் கே சாமுவேல்ராஜ், விக்கிரவாண்டி தொகுதி முன்னாள் சிபிஎம் சட்டமன்ற உறுப்பினர் ஆர். ராமமூர்த்தி, சிபிஎம் கீழ் வேளூர் சட்டமன்ற உறுப்பினர் நாகை மாலி, கடலூர் மாவட்ட செயலாளர் கோ.மாதவன், தஞ்சை மாவட்ட செயலாளர் சின்னை பாண்டியன், விழுப்புரம் சுப்பிரமணியன், நாகப்பட்டினம் மாரிமுத்து, மயிலாடுதுறை சீனிவாசன், திருவாரூர் சுந்தரமூர்த்தி, கள்ளக்குறிச்சி ஜெய்சங்கர், மாதர் சங்க மாநிலத் தலைவர் வாலண்டினா, மாநில குழு உறுப்பினர் சுகந்தி. தீண்டாமை ஒழிப்பு முன்னணி மாநில தலைவர் செல்லக்கண்ணு, கடலூர் மாவட்ட செயற்குழு உறுப்பினர்கள் ஆறுமுகம் உதயகுமார் மருதவாணன் ராமச்சந்திரன் திருவரசு சுப்புராயன் ராஜேஷ் கண்ணன், தேன்மொழி ரவிச்சந்திரன் ஆகியோர் தங்களது ஆறுதல்களைத் தெரிவித்தனர். 

State Secretary of the Marxist Party Bro Tribute to political party leaders

அதே போன்று திமுக முன்னாள் எம்எல்ஏ சரவணன், கடலூர் கிழக்கு மாவட்டக் கழக பொருளாளர் கதிரவன், கடலூர் முன்னாள் சட்டமன்ற உறுப்பினர் இள.புகழேந்தி, அண்ணாமலை நகர் பேரூராட்சி தலைவர் பழனி, உள்ளிட்ட கட்சியினர். அதிமுக முன்னாள் அமைச்சர் எம் சி சம்பத், சிதம்பரம் சட்டமன்ற உறுப்பினர் கே ஏ பாண்டியன் குமராட்சி ஒன்றிய செயலாளர் சுந்தரமூர்த்தி மற்றும் கட்சியினர்.  காங்கிரஸ் கட்சியின் முன்னாள் மாநில தலைவர் கே எஸ் அழகிரி, விருதாச்சலம் சட்டமன்ற உறுப்பினர் ராதாகிருஷ்ணன், தெற்கு மாவட்ட தலைவர் செந்தில்நாதன், மாநில செயலாளர் சித்தார்தன், விடுதலை சிறுத்தைகள் கட்சியின் விழுப்புரம் தொகுதி எம்பி ரவிக்குமார், காட்டுமன்னார்கோவில் தொகுதி சட்டமன்ற உறுப்பினர் சிந்தனை செல்வன், மாவட்ட செயலாளர் அரங்க. தமிழ் ஒளி, மேற்கு மாவட்ட செயலாளர் மணவாளன், முன்னாள் மாவட்ட செயலாளர் பால.அறவாழி, செல்லப்பன் ஆகியோர் தங்களது ஆறுதல்களைத் தெரிவித்தனர்.

மேலும் தேமுதிக மாநில துணை பொதுச் செயலாளர் உமாநாத், மாவட்ட அவை தலைவர் பாலு, துணை செயலாளர் பானுச்சந்தர், பாட்டாளி மக்கள் கட்சியின் வன்னியர் சங்க மாநில தலைவர் பு.த அருள்மொழி, விவசாய அணி மாநில துணை செயலாளர் சஞ்சீவி, உழவர் பேரியக்க மாநில தலைவர் ஆலயமணி, இந்திய கம்யூனிஸ்ட் கட்சியின் மாநில நிர்வாகக்குழு உறுப்பினர் மணிவாசகம் வட்ட செயலாளர் தமிம்முன் அன்சாரி, மாவட்ட துணை செயலாளர் சேகர், மூவேந்தர் முன்னேற்ற கழக தலைவர் ஸ்ரீதர் வாண்டையார் உள்ளிட்ட கட்சியினர், மனிதநேய ஜனநாயக கட்சியின் தலைவரும் முன்னாள் நாகை சட்டமன்ற உறுப்பினருமான தமிம்முன் அன்சாரி, மாநில துணை செயலாளர்கள் நெய்வேலி இப்ராகிம், அமித் ஜாபர், இந்திய ஜனநாயக வாலிபர் சங்க மாநில செயலாளர் ஏ வி சிங்காரவேல். உள்ளிட்ட அனைத்து கட்சி தலைவர்கள், நிர்வாகிகள், பொதுமக்கள், உறவினர்கள், நண்பர்கள் என அனைத்து தரப்பினரும் கலந்து கொண்டு அவரது உடலுக்கு மலர் வைத்து அஞ்சலி செலுத்தினார்கள். இதனைத் தொடர்ந்து மாலையில் அதே பகுதியில் உள்ள இடுகாட்டில் அவரது உடல் அடக்கம் செய்யப்பட்டது.