Skip to main content

'வாகனங்கள் மூலம் காய்கறிகள், பழங்கள் விற்பனை'- தமிழக அரசு ஏற்பாடு!

Published on 23/05/2021 | Edited on 23/05/2021

 

 

complete lockdown tn govt vegetables and fruits peoples

கரோனா தடுப்பு நடவடிக்கையாக, தமிழகத்தில் நாளை (24/05/2021) முதல் தளர்வுகளற்ற முழு ஊரடங்கு அமலுக்கு வரவுள்ள நிலையில், பொதுமக்களுக்கு வாகனங்கள் மூலம் காய்கறிகள் மற்றும் பழங்களை விற்பனை செய்ய தமிழக அரசு ஏற்பாடு செய்துள்ளது. 

 

தமிழக அரசு இன்று (23/05/2021) வெளியிட்டுள்ள செய்திக் குறிப்பில், "தமிழக வேளாண்மை மற்றும் உழவர் நலத்துறை அமைச்சர் எம்.ஆர்.கே.பன்னீர்செல்வம் இன்று (23/05/2021) கரோனா முழு ஊரடங்கினைத் தொடர்ந்து பொது மக்களுக்கு காய்கறி மற்றும் பழங்கள் விற்பனை செய்வது தொடர்பாக வேளாண்மை உற்பத்தி ஆணையர், அரசு முதன்மைச் செயலாளர் மருத்துவர் வே.கோபால். இ.ஆ.ப., வேளாண்மை மற்றும் உழவர் நலத்துறை இயக்குநர் வ.தட்சிணாமூர்த்தி இ.ஆ.ப., வேளாண்மை விற்பனை மற்றும் வேளாண் வணிகத்துறை இயக்குநர் க.வீ.முரளிதரன் இ.ஆ.ப. மற்றும் உயர் அலுவலர்களுடன் ஆய்வுக் கூட்டம் மேற்கொண்டு கீழ்க்கண்ட நடவடிக்கைகள் மேற்கொள்ளப்பட்டுள்ளது.

 

தமிழகத்தில் உள்ள மக்கள் தொகை சுமார் 7 கோடி. காய்கறி மற்றும் பழங்கள் தேவை தினந்தோறும் சுமார் 18,000 மெட்ரிக் டன் என எதிர்பார்க்கப்படுகிறது. சென்னையைப் பொறுத்தவரை தினந்தோறும் 1500 மெட்ரிக் டன் அளவிற்கு காய்கறிகள் மற்றும் பழங்கள் தேவைப்படும். சென்னை மாநகரத்தில் மட்டும் அனைத்து மண்டலங்களிலும் 1610 வாகனங்கள் மூலம் தினந்தோறும் 1160 மெட்ரிக் டன் அளவிற்கு காய்கறிகள் மற்றும் பழங்கள் விநியோகம் செய்ய ஏற்பாடுகள் செய்யப்பட்டுள்ளன.

 

தமிழகத்தின் ஏனைய பகுதிகளில் 2770 வாகனங்கள் மூலம் 2228 மெட்ரிக் டன் அளவிற்கு காய்கறிகள் மற்றும் பழங்கள் விற்பனைக்கு கொண்டு செல்ல ஏற்பாடு செய்யப்பட்டுள்ளது. இப்பணிகளுக்கு தேவையான காய்கறிகள் மற்றும் பழங்கள் அருகில் உள்ள விவசாயிகளிடம் இருந்து நேரடியாக கொள்முதல் செய்து விநியோகம் செய்யப்படும்.

 

தமிழகத்தில் காய்கறிகள் மற்றும் பழங்கள் விநியோகம் தொடர்பான தகவல் தெரிந்துக் கொள்ள 044 2225 3884 என்ற தொலைபேசி எண்ணை பொதுமக்கள் பயன்படுத்திக் கொள்ள ஏற்பாடு செய்யப்பட்டுள்ளது. இப்பணிகளைக் கண்காணித்திட தலைமையகத்தில் தோட்டக்கலை, வேளாண்மை, வேளாண்மை விற்பனைத் துறை சேர்ந்த அலுவலர்கள் அடங்கிய ஒரு குழு அமைக்கப்பட்டுள்ளது.

 

காய்கறிகள் மற்றும் பழங்கள் விநியோகத் தொடரை மேலும் விரிவுபடுத்திட நின்சாகார்ட், வே கூல், பழமுதிர் நிலையம், தமிழ்நாடு வாழை உற்பத்தியாளர் இணையம், அஹிம்சா விவசாயிகள் உற்பத்தியாளர்கள் நிறுவனம் போன்றவற்றையும் ஈடுபடுத்திட நடவடிக்கை எடுக்கப்பட்டுள்ளது. 

 

தமிழகம் முழுவதும் 194 குளிர்பதன இடங்கள் 18,527 மெட்ரிக் கொள்ளளவில் உள்ளன. அதில் தற்பொழுது சுமார் 3000 மெட்ரிக் டன் மட்டுமே விளைப்பொருட்கள் சேமிப்பு செய்யப்பட்டுள்ளது. மீதமுள்ள சுமார் 15527 மெட்ரிக் டன் கொள்ளளவை அருகில் உள்ள விவசாயிகள் தங்களது விளைப்பொருட்களை சேமித்து வைக்கலாம்.

 

உள்ளாட்சித்துறை மற்றும் கூட்டுறவுத்துறையுடன் இணைந்து உள்ளாட்சி அமைப்புகள் மூலமாகவும் காய்கறிகள் மற்றும் பழங்கள் விநியோகம் செய்ய ஏற்பாடுகள் செய்யப்பட்டுள்ளன. மக்களின் அன்றாட காய்கறிகள் மற்றும் பழங்கள் தேவையைப் பூர்த்திச் செய்திட தமிழக முதல்வர் வழங்கியுள்ள அறிவுரைப்படி தமிழகம் முழுவதும் விரிவான பல்வேறு ஏற்பாடுகள் செய்யப்பட்டுள்ளன.  தினமும் காலை 06.00 மணி முதல் மதியம் 12.00 மணி வரை பொதுமக்களுக்கு காய்கறி மற்றும் பழங்கள் விற்பனை செய்யப்படும்." இவ்வாறு அரசின் செய்திக் குறிப்பில் தெரிவிக்கப்பட்டுள்ளது.

 

சார்ந்த செய்திகள்

 

Next Story

கிராமிய கலையைக் கற்றுத்தர அரசு புதிய முயற்சி; மகிழும் நாட்டுப்புற கலைஞர்கள்!

Published on 23/07/2024 | Edited on 23/07/2024
Government new initiative to teach rural art

வட தமிழ்நாட்டில் தெருக்கூத்து பிரபலம், கொங்குமண்டத்தில் வள்ளிக்கும்மி பிரபலம், மத்திய மண்டல மாவட்டங்களில் சாமியாட்டம், கரகாட்டம் பிரபலம். தென்மாவட்டங்களில் வில்லுப்பாட்டு, கரகாட்டம், கிராமியப்பாட்டு பிரபலம். ஒரு காலத்தில் ஆடி மாதம் வந்தாலே தெருக்கூத்து நடைபெறாத வடமாவட்டங்களே இருக்காது. பிறந்தநாள் விழாவுக்கு கிருஷ்ணர் பிறப்பு கூத்தும், ஒருவர் இறந்துவிட்டாள் கர்ண மோட்சம் நாடகமும் நடத்துவார்கள். திருவிழா நடைபெறும் நாட்களில் கொங்கு மண்டல மாவட்ட கிராமங்களில் வள்ளி கும்மி ஆட்டம் ஆடுவார்கள். இப்போது திருவிழா என்றாள் அறைகுறை ஆடைகளுடன் மேடை நடனங்களும், இசைக்கச்சேரிகளும் சிறிய கிராமங்கள் வரை நடக்கின்றன.  

இதனால் எங்காவது நாட்டுப்புற கலைகள் நடந்தால் அந்த வீடியோவை சமூக வலைத்தளங்களில் ஆச்சர்யத்துடன் பார்க்கின்றனர் இன்றைய இளம் தலைமுறையினர். இதனால் நாட்டுப்புற கலைஞர்கள் வழக்கொழிந்து வருகிறார்கள் என்கிற குற்றச்சாட்டு பல ஆண்டுகளாக உள்ளது. அதற்கு முக்கிய காரணம் நாட்டுப்புற கலைஞர்களுக்கு சரியான ஊதியம் இல்லை என்பதாகும். அதே நேரத்தில் இந்த கலைகளை கற்று தருவதற்கான பயிற்சி மையங்கள் என்பது தமிழ்நாட்டில் அந்தளவுக்கு இல்லை என்பது குறிப்பிடதக்கது. இரண்டு, மூன்று பேர் மட்டுமே இதற்கான பயிற்சி தருகிறார்கள். மற்றப்படி பார்த்தும், கேட்டும் கற்றுக்கொள்ளும் கலைகளாகவே இவை இருக்கின்றன.

பரதநாட்டியத்துக்கு கல்லூரிகள், இசை பயிற்சி கூடங்கள் இருப்பதுப்போல் நாட்டுப்புற கலைகளுக்கு இல்லை. தெருக்கூத்து, நாடகம் போன்றவற்றுக்கு ஒரு சிலர் மட்டும் பயிற்சி பள்ளி வைத்து நடத்துகிறார்கள். மற்றபடி தெருக்கூத்து கற்றுக்கொள்ள வேண்டும், கோல்கால் ஆட்டம் ஆடவேண்டும், புரவியாட்டம் ஆடவேண்டும், வள்ளிக்கும்மி ஆடவேண்டும், கோல்கால் ஆட்டம் ஆடவேண்டும் என ஆசைப்படுபவர்களுக்கு கற்றுத்தர பயிற்சி மையங்கள் இல்லை என்கிற ஏக்கம் இருந்துவந்தது.

இது குறித்த கோரிக்கை கலைபண்பாட்டுத்துறைக்கு அமைச்சராகவுள்ள செய்தித்துறை அமைச்சர் மு.பெ.சாமிநாதன் மூலமாக தமிழ்நாடு முதலமைச்சர் மு.க.ஸ்டாலின் கவனத்துக்கு சென்றது. அது குறித்து அதிகாரிகள் மற்றும் அறிஞர்களுடன் நடந்த கலந்தாலோசனையில் தமிழ்நாட்டில் உள்ள 17 மாவட்ட இசைப்பள்ளிகள், 5 இசைக்கல்லூரிகள், 3 மையங்களில் கிராமிய கலைகள் கற்றுத்தரலாம் என முடிவு எடுக்கப்பட்டது. இது குறித்து அதிரடியாக தகவல்கள் இசைக்கல்லூரி, இசைப்பள்ளிகளுக்கு அனுப்பிவைக்கப்பட்டது.

வட தமிழ்நாட்டில் விழுப்புரம், திருவண்ணாமலை, கள்ளக்குறிச்சி, காஞ்சிபுரம் மாவட்டங்களில் தெருக்கூத்து கலை பிரபலம் என்பதால், தெருக்கூத்து, பெரியமேளம், பம்பை, கிராமிய பாடல்கள் பாடுவது குறித்த பயிற்சிகள் அளிக்க ஏற்பாடு செய்யப்பட்டுள்ளன. தென்மாவட்டங்களில் வில்லுப்பாட்டு கரகாட்டம், கொங்கு மண்டலத்தில் உள்ள மாவட்டங்களில் வள்ளிக்கும்மி, துடும்பாட்டம், காவடியாட்டம், ஜிக்காட்டம், கோல்கால் ஆட்டம், புரவியாட்டம், டெல்டா மாவட்டங்களில் புலியாட்டம், கரகாட்டம், சாமியாட்டம், தப்பாட்டம் கற்றுத் தருவதற்கான பயிற்சி வகுப்புகள் கடந்த வாரத்தில் தொடங்கப்பட்டு உள்ளன.

இதற்காக திறமையான நாட்டுப்புற கலைஞர்களை கலை பண்பாட்டுத்துறையினர் தேர்வு செய்து அவர்கள் மூலமாக பயிற்சியைத் தொடங்கியுள்ளனர். பகுதிநேர நாட்டுப்புற கலைப்பயிற்சி என்கிற தலைப்பில் வாரத்தில் வெள்ளி – சனிக்கிழமை இரண்டு நாள் மட்டும் நடத்தப்படுகிறது. இந்தப் பயிற்சியில் 17 வயது நிரம்பிய யாரும் சேரலாம், அதிகப்பட்ச வயது வரம்பில்லை. பள்ளி படிப்பு 8 வது படித்து முடித்திருந்தால் தேர்வு எழுதவைக்கப்படுவர். படிக்கவில்லை என்றால் தேர்வு இல்லை. ஆனால் இருவருக்குமே சான்றிதழ் தருவோம் எனச்சொல்லப்பட்டுள்ளது. கிராமிய கலைகளை வளர்க்க தமிழ்நாடு அரசு திடீரென எடுத்துள்ள முயற்சி நாட்டுப்புற கலைஞர்களை மகிழ்ச்சியடைய செய்துள்ளது. 

Next Story

‘முற்றிலும் வதந்தியே..’ - ராமதாஸ் அறிக்கைக்குத் தமிழக அரசு விளக்கம்!

Published on 17/07/2024 | Edited on 17/07/2024
Tamil Nadu govt explanation for Ramdas report regarding online liquor sale

ஆன்லைன் வினியோக நிறுவனங்கள் மூலமாக வீடுகளுக்கே மதுவை கொண்டு சென்று விற்க திட்டமா? என்று பாமக நிறுவனர் ராமதாஸ் கண்டனம் தெரிவித்திருந்தார்.

இது தொடர்பாக அவர் வெளியிட்டுள்ள அறிக்கையில், “தமிழ்நாட்டில்  பீர், ஒயின், மணமூட்டப்பட்ட மதுவகைகள் போன்ற குறைந்த அளவில் ஆல்கஹால் கொண்ட மதுவகைகளை சொமாட்டோ, ஸ்விக்கி, பிக்பேஸ்கட் போன்ற ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்க தமிழக அரசு திட்டமிட்டிருப்பதாகவும், அதன் சாதக பாதகங்கள் குறித்து ஆன்லைன் வினியோக நிறுவனங்கள், மது உற்பத்தியாளர்கள் போன்றோருடன் கலந்தாய்வு செய்து வருவதாகவும் தி எகனாமிக் டைம்ஸ் நாளிதழ்  செய்தி வெளியிட்டுள்ளது.  இந்த செய்தியில் கூறப்பட்டுள்ள தகவல்கள் உண்மையா? வீடுகளுக்கே சென்று மது விற்க திட்டமிடப்பட்டுள்ளதா? என்பது குறித்து தமிழக அரசு விளக்கமளிக்க வேண்டும். ஒருவேளை இந்த செய்தி உண்மையாக இருந்தால் தமிழக அரசின் திட்டம் கடுமையாக கண்டிக்கத்தக்கது ஆகும்.

வீடுகளுக்கே கொண்டு சென்று மதுவை விற்பனை செய்வது என்பது மக்கள் நலனை விரும்பும் அரசுகளால் நினைத்துக் கூடப் பார்க்க முடியாத தீமை ஆகும். ஆனால், தமிழக அரசு அத்தகைய தீமையை செய்யாது என்று உறுதியாக கூற முடியவில்லை. அதற்கு காரணம், விளையாட்டு அரங்குகள், பன்னாட்டு நிகழ்வுகள், திருமண விழாக்கள் போன்றவற்றில் மதுவகைகளை வினியோகித்தல், மதுக்கடைகளில் காகிதக் குடுவைகளில் குறைந்த விலையில் மது விற்பனை செய்வது போன்ற புரட்சிகரமான திட்டங்களை அறிமுகம் செய்யத் துடித்த வரலாறு தமிழக அரசுக்கு உண்டு. அதனால்தான் இந்த செய்தியும் உண்மையாக இருக்குமோ? என்று நம்பத் தோன்றுகிறது.

மது, புகையிலை எதுவாக இருந்தாலும் நுகர்வோருக்கு எளிதில் கிடைக்காத வகையில் கட்டுப்பாடுகள் ஏற்படுத்தப்பட வேண்டும் என்பது தான் உலக சுகாதார நிறுவனத்தின் வழிகாட்டுதல் ஆகும். அதன் மூலம் தான் மது - புகையிலை ஆகியவற்றின் பயன்பாட்டை குறைக்க முடியும் என்பது உலக சுகாதார நிறுவனத்தின் நம்பிக்கை ஆகும். ஏற்கனவே தெருவுக்குத்தெரு மதுக்கடைகள் திறக்கப்பட்டிருப்பதால் தான் மாணவர்கள் மதுவை வாங்கிச் சென்று பள்ளிகளில் வைத்து அருந்தும் கொடுமை நிகழ்கிறது. வீடுகளுக்கே  மதுவை நேரடியாக கொண்டு வினியோகிக்க அனுமதித்தால் அதனால் ஏற்படும் விளைவுகளை நினைத்துக் கூடப் பார்க்க முடியாது.

போதை குறைந்த  மது வீடுகளுக்கே நேரடியாக வினியோகிக்கபட்டால், அது வீடுகளில் உள்ள குழந்தைகளையும், பெண்களையும் சுவைத்துப் பார்க்கத் தூண்டும். காலப்போக்கில்  வீட்டில் உள்ள பெண்களையும், பிள்ளைகளையும்  மதுவுக்கு அடிமையாக்கவே இந்த வழக்கம் வழிகோலும். ஒரு குடும்பத்தில் ஒருவர் மட்டுமே குடிக்கும் முறைக்கு முடிவுகட்டி குடும்பமே மது அருந்தும் கலாச்சாரத்தை உருவாக்கவே வீடு தேடு மதுவை கொண்டு சென்று கொடுக்கும் திட்டம் வழிவகுக்கும்.

தமிழ்நாட்டில் படிப்படியாக மதுவிலக்கை ஏற்படுத்துவோம் என்று வாக்குறுதி  அளித்த முதலமைச்சர் மு.க.ஸ்டாலின், மதுப்பழக்கத்தை ஊக்குவிக்கும் வகையிலான இத்தகைய திட்டங்களை அனுமதிக்கக் கூடாது.  மது வகைகளை ஆன்லைன் வினியோக நிறுவனங்கள் மூலமாக வீடுகளுக்கே கொண்டு சென்று விற்பனை செய்யும் திட்டம் இருந்தால் அதை தமிழக அரசு கைவிட வேண்டும்; இல்லாவிட்டால் மக்களைத் திரட்டி மாபெரும் போராட்டத்தை பாட்டாளி மக்கள் கட்சி நடத்தும்.” எனக் குறிப்பிட்டிருந்தார்.

இந்த நிலையில் ஆன்லைன் வினியோக நிறுவனங்கள் மூலமாக வீடுகளுக்கே மதுவை கொண்டு சென்று விற்பது தொடர்பான தகவலை தமிழக அரசு மறுத்துள்ளது. இது தொடர்பாக தமிழக அரசின் உண்மை சரிபார்ப்பு குழு வெளியிட்டுள்ள பதிவில், “இது முற்றிலும் வதந்தியே; அப்படி ஒரு திட்டமே இல்லை, அது தொடர்பாக பேச்சுவார்த்தைக் கூட நடைபெறவில்லை என டாஸ்மாக் நிர்வாக இயக்குநர் தெரிவித்துள்ளார். ஆன்லைன் விநியோக நிறுவனங்களால் மதுவை வீடுகளுக்கே கொண்டு சென்று விற்க சில மாநிலங்களில் அனுமதி வழங்கி வருவதால், தமிழ்நாட்டிலும் அனுமதி வழங்க இருப்பதாக தவறான தகவல் பரப்பப்படுகிறது” எனத் தெரிவித்துள்ளார்.