Skip to main content

ஐந்து கோப்புகளில் முதலமைச்சர் மு.க. ஸ்டாலின் கையெழுத்து!

Published on 07/05/2021 | Edited on 07/05/2021

 

Signature of Chief Minister MK Stalin in five files!

 

தமிழகத்தின் முதலமைச்சராக மு.க. ஸ்டாலின் பதவியேற்றுக்கொண்டார். சென்னை ஆளுநர் மாளிகையில் நடந்த நிகழ்ச்சியில் மு.க. ஸ்டாலினுக்கு தமிழக ஆளுநர் பன்வாரிலால் புரோஹித் பதவிப் பிரமாணமும், ரகசிய காப்புப் பிரமாணமும் செய்துவைத்தார். அதேபோல், முதல்வர் மு.க. ஸ்டாலினுடன் 33 அமைச்சர்களும் பதவியேற்றுக்கொண்டனர். இதையடுத்து முதலமைச்சர் மு.க. ஸ்டாலின் மற்றும் புதிய அமைச்சர்கள் ஆளுநருடன் குழு புகைப்படம் எடுத்தனர். 

 

பின்னர், முதலமைச்சர் மு.க. ஸ்டாலினுக்கும் புதிய அமைச்சர்களுக்கும் ஆளுநர் மாளிகையில் தமிழக ஆளுநர் பன்வாரிலால் புரோஹித் தேநீர் விருந்து அளித்தார். அப்போது, முதலமைச்சர் மு.க. ஸ்டாலின், அமைச்சர் துரைமுருகன், ஆளுநர் ஆகியோருடன் அதிமுகவின் ஒருங்கிணைப்பாளர் ஓ. பன்னீர்செல்வமும் தனபாலும் அருகருகே அமர்ந்து தேநீர் அருந்தினர். 

Signature of Chief Minister MK Stalin in five files!

 

அதைத் தொடர்ந்து, சென்னை கோபாலபுரத்தில் உள்ள இல்லத்துக்குச் சென்ற முதலமைச்சர் மு.க. ஸ்டாலின், முன்னாள் முதல்வர் கலைஞரின் திருவுருவப் படத்திற்கு மலர் தூவி மரியாதை செலுத்தினார். அப்போது உணர்ச்சிவசப்பட்டு முதலமைச்சர் கண்கலங்கினார். பின்பு, தாயார் தயாளு அம்மாளிடம் முதலமைச்சர் மு.க. ஸ்டாலின் ஆசிபெற்றார். 

 

அங்கிருந்து மெரினாவிற்குச் சென்ற மு.க. ஸ்டாலின் முன்னாள் முதல்வர்கள் அண்ணா, கலைஞர் நினைவிடங்களில் மலர்தூவி மரியாதை செலுத்தினார். மேலும், அமைச்சர்களும் மலர்தூவி மரியாதை செலுத்தினர். அதன் தொடர்ச்சியாக, சென்னை வேப்பேரியில் உள்ள பெரியார் நினைவிடத்துக்குச் சென்ற மு.க. ஸ்டாலின் மற்றும் அமைச்சர்கள் மலர்தூவி மரியாதை செலுத்தினர். 

Signature of Chief Minister MK Stalin in five files!

 

பின்னர், சென்னை தலைமைச் செயலகத்துக்குச் சென்ற முதலமைச்சர் மு.க. ஸ்டாலினுக்கு காவல்துறை சார்பில் அணிவகுப்பு மரியாதை கொடுக்கப்பட்டது. அதைத் தொடர்ந்து, முதல்வர் அறைக்குச் சென்ற மு.க. ஸ்டாலினுக்கு அமைச்சர்கள் பூங்கொத்து கொடுத்து வாழ்த்து தெரிவித்தனர். பின்பு, முதல்வர் இருக்கையில் அமர்ந்து பணிகளைத் தொடங்கிய மு.க. ஸ்டாலின் ஐந்து கோப்புகளில் கையெழுத்திட்டார். 

 

Signature of Chief Minister MK Stalin in five files!

 

முதலமைச்சர் கையெழுத்திட்ட அந்த ஐந்து கோப்புகள் என்னென்ன என்பது குறித்து பார்ப்போம்!

 

முதலில், ரேஷன் அரிசி குடும்ப அட்டைதாரர்களுக்கு கரோனா நிவாரண நிதி ரூபாய் 4,000 வழங்குவதற்கான கோப்பில் முதலமைச்சர் கையெழுத்திட்டார். அதன்படி, முதல் தவணையாக ரூபாய் 2,000 மே மாதத்திலேயே வழங்கப்பட உள்ளது. 2.07 கோடி குடும்ப அட்டைத்தாரர்களுக்கு ரூபாய் 4,153.39 கோடி செலவில் நிவாரண தொகை வழங்கப்பட உள்ளது. 

 

அடுத்ததாக, மே 16ஆம் தேதி முதல் ஆவின் பால் விலை லிட்டர் ஒன்றுக்கு ரூபாய் 3 குறைக்கப்படும் கோப்பில் முதலமைச்சர் கையெழுத்திட்டார்.

 

Signature of Chief Minister MK Stalin in five files!

 

தமிழகத்தில் சாதாரண கட்டண அரசுப் பேருந்துகளில் அனைத்து மகளிரும் கட்டணமில்லாமல் பயணிக்கும் கோப்பில் முதலமைச்சர் கையெழுத்திட்டார். அதன்படி, அரசுப் பேருந்துகளில் அனைத்து மகளிரும் கட்டணமின்றி நாளை (08/05/2021) முதல் பயணம் செய்யலாம். 

 

தனியார் மருத்துவமனைகளில் கரோனா சிகிச்சைப் பெறும் மக்களின் கட்டணத்தை தமிழக அரசே ஏற்கும் கோப்பில் முதலமைச்சர் மு.க. ஸ்டாலின் கையெழுத்திட்டுள்ளார். அதன்படி, காப்பீட்டுத் திட்டத்தின் கீழ் தனியார் மருத்துவமனை கட்டணத்தை அரசே ஏற்க உள்ளது. 

 

Signature of Chief Minister MK Stalin in five files!

 

மனுக்கள் மீது 100 நாட்களுக்குள் தீர்வு காண 'உங்கள் தொகுதியில் ஸ்டாலின்’ திட்டத்தை செயல்படுத்த புதிய துறையை உருவாக்குவதற்கு வகை செய்யும் கோப்பில் முதலமைச்சர் கையெழுத்திட்டார். 

 

இதனிடையே, முதலமைச்சராக பதவியேற்றுள்ள மு.க. ஸ்டாலினுக்கு பிரதமர் நரேந்திர மோடி தனது ட்விட்டர் பக்கத்தில் வாழ்த்து தெரிவித்துள்ளார். 

 

 

சார்ந்த செய்திகள்

 

Next Story

நள்ளிரவு வரை 8 மாவட்டங்களுக்கு மழை அலர்ட்

Published on 23/07/2024 | Edited on 23/07/2024
Rain in 8 districts till midnight

தமிழகத்தில் கடந்த மே,  ஏப்ரல் மாதங்களில் கோடை வெயில் வாட்டி வதைத்து வந்தது. இத்தகைய சூழலில் தான் கடந்த ஒரு மாதத்திற்கும் மேலாகத்  தமிழகத்தில் மேற்குத் தொடர்ச்சி மலை மாவட்டங்கள் மற்றும் வட மாவட்டங்களில் பரவலாக மழை பெய்து வருகிறது.

அதன் ஒரு பகுதியாக நீலகிரியில் கடந்த ஒரு வாரமாக பல இடங்களில் கனமழை பொழிந்து வருகிறது. அதன்படி நீலகிரி மாவட்டத்தில் உள்ள குன்னூர், கோத்தகிரி, கூடலூர் உள்ளிட்ட பகுதிகளில் கனமழை பொழிந்து வருகிறது. இதனால் தாழ்வான பகுதிகளில் வெள்ள நீர் சூழ்ந்து வருகிறது. சில இடங்களில் வெள்ளப்பெருக்கும் ஏற்பட்டுள்ளது.

இந்நிலையில் தமிழகத்தில் நள்ளிரவு வரை 8 மாவட்டங்களில் மிதமான மழை பெய்ய வாய்ப்பு இருக்கும் என சென்னை வானிலை ஆய்வு மையம் அறிவித்துள்ளது. சென்னை வானிலை ஆய்வு மையத்தின் அறிவிப்பின்படி தமிழகத்தில் நள்ளிரவு ஒரு மணி வரை சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் மிதமான மழைக்கும் கோவை, நீலகிரி, திருப்பூர், தேனி ஆகிய நான்கு மாவட்டங்களில் லேசான மழைக்கு வாய்ப்புள்ளதாக அறிவிக்கப்பட்டுள்ளது.  

Next Story

“நிதிநிலை அறிக்கையில் மொத்தமாக தமிழகம் புறக்கணிக்கப்பட்டுள்ளது” - கே.பாலகிருஷ்ணன்

Published on 23/07/2024 | Edited on 23/07/2024
K. Balakrishnan said Tamil Nadu has been totally neglected in the financial report

சிதம்பரத்தில்  மார்க்சிஸ்ட் கம்யூனிஸ்ட் கட்சியின் அலுவலகத்தில் ஒன்றிய அரசின் நிதிநிலை அறிக்கை குறித்து செவ்வாய்க்கிழமை(23.7.2024) மாலைமார்க்சிஸ்ட் கம்யூனிஸ்ட் கட்சியின் மாநில செயலாளர் கே.பாலகிருஷ்ணன் செய்தியாளர்களை  சந்தித்தார். 

அப்போது பேசிய அவர், “மத்திய அரசு நிதி அமைச்சர் நிர்மலா சீதாராமன் இந்த ஆண்டுக்கான நிதிநிலை அறிக்கையை நாடாளுமன்றத்தில் தாக்கல் செய்துள்ளார். புதிய அரசு, புதிய நிதிநிலை அறிக்கையாக இருக்கும் என எதிர்கட்சியினர் உள்ளிட்ட அனைவரும் எதிர்பார்தனர். ஆனால் இதில ‘அரசும்  புதுசா தெரியல,  திட்டங்களும் புதுசா இருக்கிற மாதிரி தெரியல, மொந்தையும் பழசா இருக்கு, கல்லும் பழசா இருக்கிற மாதிரி தான் உள்ளது’. இந்த நிதிநிலை அறிக்கையில் விவசாயிகள் உற்பத்தி செய்த பொருள்களுக்கு நியாயமான விலை வழங்கக்கூடிய பாதுகாப்பு சட்டம் இயற்ற வேண்டும் என நீண்ட நாட்களாக கோரி வருகிறோம். இதற்காக விவசாயிகள் பல கட்ட போராட்டங்களை நடத்தி வருகிறார்கள்.  அவை இந்த பட்ஜெட்டில் இடம் பெறவில்லை.  ஏற்கனவே 2 கோடி பேருக்கு வேலை தருவதாக கூறினார்கள், தற்போது அதிகமாக வேலை வாய்ப்பு அளிப்போம் என கூறியுள்ளார்.

வேலை கொடுக்கும் திட்டங்களுக்கு பதிலாக, வேலைக்கான பயிற்சி கொடுப்போம் என அறிவிக்க முடியுமே தவிர, வேலைவாய்ப்புகளை உருவாக்குவது, வேலை இல்லாத இளைஞர்களுக்கு வேலை கொடுப்பது என்பது குறித்து குறிப்பிடவில்லை. அதே போன்று குறிப்பாக தமிழ்நாடு முதல்வர் ஸ்டாலின் மெட்ரோ உள்ளிட்ட பல வளர்ச்சி திட்டங்களுக்கு நிதி ஒதுக்குமாறு கோரினார். குறிப்பாக துறைமுகத்திலிருந்து திருவெற்றியூர் வரை பறக்கும் சாலைக்கு நிதி ஒதுக்கீடு செய்ய கோரினார். ஆனால் தமிழ்நாட்டிற்கான எந்த ஒரு திட்டத்திற்கும் நிதி ஒதுக்கவில்லை.

பட்ஜெட்டில் உள்ள 62 பக்கங்களில் ஒரு இடத்தில் கூட தமிழ்நாடு என்ற பெயரே இல்லை. தமிழ்நாட்டை மொத்தமாக புறக்கணிக்கப்பட்டுள்ள நிதி நிலை அறிக்கையாக உள்ளது. நிதிநிலை அறிக்கையின்  குறிக்கோள் என்னவென்றால் கூட்டணி கட்சிகளான ஆந்திரா, பீகார் மாநிலத்திற்கும் பல திட்டங்களுக்கு பகிரங்கமாக நிதி ஒதுக்கி திருப்தி படுத்தியுள்ளது. ஆட்சி பறிபோய் விடும் என்ற ஆபத்து ஏற்படும் என்பதால் நிதி ஒதுக்கப்பட்டுள்ளது. கடனில் சிக்கி தவிக்கும் நலிவுற்றுள்ள சிறு, குறு மற்றும் நடுத்தர தொழில் முனைவோர் தொழில்களுக்கு போதிய நிதி ஒதுக்கப்படவில்லை. வாங்கிய கடனுக்கு வட்டியை கூட கட்ட முடியவில்லை. அந்த வட்டியைக் கூட தள்ளுபடி செய்யப்படவில்லை. எனவே விவசாயிகள், தொழிலாளர்கள், இளைஞர்கள், கிராமப்புற வளர்ச்சி ஆகியவற்றிற்கான போதுமான அளவு நிதி ஒதுக்கப்படவில்லை.

மத்திய அரசு பட்ஜெட்டில் விவசாயிகள் மற்றும் ஏழை, எளிய, நடுத்தர மக்களுக்கான நிவாரண திட்டங்கள் எதுவும் இடம்பெறவில்லை. கார்ப்பரேட் நிறுவனங்கள் மீது செல்வ வரி விதித்து வசூலித்து அதனை ஏழை, எளிய மக்களுக்கு நிவாரணம் வழங்க வேண்டும் என மார்க்சிஸ்ட் கம்யூ கட்சி உள்ளிட்ட கட்சிகள் கோரிக்கை விடுத்துள்ளோம்.  உலகம் முழுவதும் இந்த கோரிக்கை எழுந்துள்ளது. ஜி-20 மாநாட்டில் கூட அந்த தீர்மானம் நிறைவேற்றப்பட்டுள்ளது. ஆனால் மத்திய அரசு அந்நிய நாட்டின் கார்ப்பரேட் நிறுவனத்தின் வரி 40 சதவீதத்தை, 35 ஆக குறைத்துள்ளது வருத்தமாக உள்ளது.

தமிழ்நாடு அரசு மின் கட்டண உயர்வை திரும்ப பெற வேண்டும். திமுக அரசு பல நல்ல திட்டங்களை செயல்படுத்தி வருவதில் எந்த மாற்று கருத்தும் இல்லை. மத்திய அரசின் நிர்பந்தத்தின் பேரில் தமிழ்நாட்டில் மின் கட்டண உயர்வு 3வது முறையாக உயர்த்தப்பட்டுள்ளது. இது தமிழ்நாடு அரசுக்கு நல்ல பெயரை தராது என்பதால் இதனை தமிழ்நாடு அரசு திரும்ப பெற வேண்டும். மின்கட்டண உயர்வை  திரும்பெற வலியுறுத்தி ஜூலை 24 இன்று  மார்க்சிஸ்ட் கம்யூனிஸ்ட் கட்சிகள் சார்பில் தமிழகம் முழுவதும் ஆர்ப்பாட்டம் நடைபெறுகிறது” என்றார். இவருடன் கட்சியின் கடலூர் மாவட்ட செயலாளர் கோ.மாதவன், மாவட்ட செயற்குழு உறுப்பினர் ஆர்.ராமச்சந்திரன் நகர செயலாளர் எஸ்.ராஜா, மாவட்டக்குழு உறுப்பினர் பி.வாஞ்சிநாதன், சிதம்பரம் நகர மன்ற துணைத் தலைவர் எம்.முத்துக்குமாரன் உள்ளிட்டோர் உடன் இருந்தனர்.