Skip to main content

வாழைப் பழத்தையும் விட்டுவைக்காத நஞ்சு... 

Published on 22/11/2019 | Edited on 22/11/2019

மருத்துவரிடம் போனதும் அவர் சொல்லும் முதல் அறிவுரை, நிறைய பழங்களை சாப்பிடச் சொல்லுங்கள் என்று. அதில் தான் நம் உடலுக்கு தேவையான சத்துகளும், நோய் எதிர்ப்பு சகத்திகளும் இருக்கிறது. தெம்பில்லை என்று அதற்காக ரசாயனம் கலந்த பல பல டானிக்குகளை வாங்கி குடிப்பதைவிட பழங்களை சாப்பிடலாம் என்று சொல்வது வழக்கம்.
 

chemicals are being used in banana for ripening


அதே போல உறவினர்கள், நண்பர்கள், என்று யாரைப் பார்க்கப் போனாலும் அவர்களுக்கு பழங்களை வாங்கிக் கொண்டு போய் கொடுத்துவிட்டு நலம் விசாரித்து வருவதும் வழக்கம். ஆனால் சமீப காலமாக பழங்கள் சாப்பிடுவதை பொதுமக்கள் தவிர்த்து வருகின்றனர். காரணம் சத்துக்காக பழங்களை சாப்பிட்டது அந்தக் காலம் இப்ப நோய் உற்பத்திக்காக சாப்பிடுவது போல ஆகிவிடுகிறது என்கிறார்கள்.

அனைத்துப் பழங்களும் பளிச்சென்று கவர்ச்சியாக இருக்கவும், பிஞ்சிலேயே பழம் போல காட்டவும் இப்படி ரசாயனம் கலவையை பழங்களில் காய்களில் தெளித்து அவற்றை விற்பனைக்கு கொண்டு வந்து குவித்து வைக்கிறார்கள். இந்தப் பழங்களை சாப்பிடும் போது வயிற்று வலியில் தொடங்கி பல பல உபாதைகள் ஏற்படுகிறது.

அதனால் தான் தவிர்க்க முடியாத நேரங்களில் மட்டும் பழங்கள் வாங்குகிறோம். வாங்கும் பழங்களை நல்ல தண்ணீரில் கொஞ்ச நேரம் ஊர வைத்து கழுவிய பிறகு சாப்பிட வேண்டியுள்ளது. குழந்தைகள் பழங்களைப் பார்த்ததும் அப்படியே எடுத்து கடிப்பதால் எதாவது செய்யுமோ என்ற அச்சம் உள்ளது என்கிறார்கள் பழப்பிரியர்கள்.

ரசாயனம் கலக்காத பழங்களாக பலா, வாழைப் பழங்கள் இருந்து வந்தது. ஆனால் தற்போது அவற்றிலும் ரசாயனம் எனும் விஷம் கலக்கப்படுவதை கானொளிகள் மூலம் காணமுடிகிறது.

அதாவது வாழைப் பழங்களை முன்பு பெரிய கிடங்கில் வைத்து காற்று போகாமல் மூடி அதற்குள் புகையை செலுத்தி ஒரு நாள் முழுவதும் புகையை அந்த கிடங்கிற்குள் சேமித்து வைத்து அடுத்த நாள் பிரித்து வாழைத் தார்களை எடுத்து தண்ணீர் தெளித்து வைத்தால் கொஞ்சம் கொஞ்சமாக பழமாகும்.  ஒரு சணல் சாக்கில் வாழைத் தாரை கட்டிவைத்து அதற்குள் சாம்பிராணி புகை போட்டு வைத்தால் அடுத்த நாள் பழுக்க தொடங்கும்.

ஆனால், கடந்த சில வருடங்களாக விவசாயிகள் வாழைத் தாரை கமிசன் கடைகளுக்கு கொண்டு வரும் வரை காயாக உள்ளது. அதன் பிறகு வாங்கிச் செல்லும் வியாபாரிகள் லாரியில் ஏற்றும் போதும், சில்லரை பழ வியாபாரிகள் கடைகளில் வாழைத் தார்களை இறக்கி வைக்கும் போது ரசாயனம் கலந்த கலவையை வாழைக்காய்களில் தெளித்து வைத்துவிடுவதால் சில மணி நேரத்திலேயே அனைத்து காய்களும் மஞ்சள் வண்ணத்தில் பழமாக தெரிகிறது.

வியாபாரிகள் தங்களின் பணத் தேவைக்காக காய்களையும் அவசரமாக ரசாயனம் தெளித்து பழமாக்குவதால் பாதிப்பு அந்தப் பழங்களை வாங்கிச் சாப்பிடும் குழந்தைகள், பொதுமக்களுக்கு தான் என்பதை அவர்கள் உணரவில்லை. அதனால் வாழைப் பழங்கள் வாங்கவும் பொதுமக்கள் யோசிப்பதால் வாழை உற்பத்தி விவசாயிகளின் நிலை தான் வேதனையாக உள்ளது.


புதுக்கோட்டை மாவட்டத்தில் ஆலங்குடி தொகுதியில் உள்ள கீரமங்கலம், வடகாடு, மாங்காடு, அணவயல், புள்ளாண்விடுதி, கருக்காக்குறிச்சி, கொத்தமங்கலம், மறமடக்கி உள்ளிட்ட சுமார் 50 கிராமங்களில் பிரதான விவசாயம் வாழை. வாழை விவசாயத்தை வைத்து வாழ்ந்த குடும்பங்கள் ஏராளம்.

கஜா புயல் ஒட்டுமொத்தமாக விவசாயம், மரங்களை அழித்துவிட்ட நிலையிலும் இந்த விவசாயிகளின் ஒரே நம்பிக்கையாக இருந்தது வாழை. சில வருடங்கள் வாழை விவசாயம் செய்தால் இழந்ததை கொஞ்சம் மீட்கலாம் என்று நினைத்து கடந்த ஆண்டைவிட புயலுக்கு பிறகு அதிகமான விவசாயிகள் வாழை பயிரிட்டனர்.

தற்போது அறுவடைக்கு வாழைத்தார்கள் வருகிறது. ஆனால் விலையோ கடும் வீழ்ச்சி ஒரு கிலோ ரூ. 5 க்கு கூட வாங்க வியாபாரிகள் வரவில்லை. பல வாழைத்தார் கமிசன் கடைகளை விடுமுறையும் விட்டு சென்றுவிட்டனர். காரணம் வாழைப் பழங்களிலும் ரசாயனம் தெளிக்கப்படுவது குறித்த பயத்தால் வாழைப்பழங்களையும் சாப்பிடும் மக்களின் எண்ணிக்கை குறைந்துவிட்டது என்கிறார்கள் விவசாயிகள்.

சமீப காலமாக சமூக வலைதளங்களில் வாழைத் தார்களை பழுக்க வைக்க ரசாயனம் தெளிக்கும் வீடியோ வேகமாக பரவிவருகிறது. இதனைப் பார்க்கும் ஒவ்வொருவரும் வாழைப்பழங்களையும் தவிர்க்க தொடங்கியுள்ளனர்.

ஒரு சில வியாபாரிகள் பணத்தாசையில் இப்படி ரசாயனம் தெளிப்பதால் ஒட்டுமொத்தமாக வாழை விவசாயிகள் படுபாதாளத்திற்கு தள்ளப்பட்டுள்ளனர். மேலும், இவற்றை எல்லாம் கண்டுபிடித்து நடவடிக்கை எடுக்க வேண்டிய உணவு பாதுகாப்பு துறை தூரமாக நின்று வேடிக்கை பார்த்துக் கொண்டிருக்கிறது என வேதனை தெரிவிக்கின்றனர் விவசாய மக்கள்.

 

சார்ந்த செய்திகள்

 

Next Story

லஞ்சம் கேட்டதால் விவசாயி தீக்குளிப்பு; தி.மலையில் பரபரப்பு

Published on 02/07/2024 | Edited on 02/07/2024
 Farmer tried to set himself on fire after asking for bribe; There is excitement in T. Malai

தனது நிலத்திற்கு சிட்டா மற்றும் அடங்கல் கொடுக்க கிராம நிர்வாக அலுவலர் லஞ்சம் கேட்டதால் விவசாயி உடலில் பெட்ரோல் ஊற்றி தீக்குளிக்க முயன்ற சம்பவம் திருவண்ணாமலையில் பரபரப்பை ஏற்படுத்தியுள்ளது.

திருவண்ணாமலை அடுத்த தேவனாம்பட்டு கிராமத்தில் செயல்பட்டு வரும் கிராம நிர்வாக அலுவலகத்தில் ஊதிரம்பூண்டி கிராமத்தை சேர்ந்த விவசாயி ராமகிருஷ்ணன் என்பவர் தனது நிலத்துக்கான சிட்டா மற்றும் அடங்கல் கேட்டு மனு கொடுத்துள்ளார்.

ஊதிரம்பூண்டி கிராமத்தில் விவசாயி ராமகிருஷ்ணனுக்கு நான்கு ஏக்கர் விவசாய நிலம் உள்ளதாக கூறப்படுகிறது. நான்கு ஏக்கரில் ஆட்டுப் பண்ணை வைத்து விவசாயம் செய்து வருகிறார். கடந்த ஒரு மாதமாக தேவனாம்பட்டு கிராம நிர்வாக அலுவலர் காந்தி என்பவரிடம் சிட்டா மற்றும் அடங்கல் கேட்டு மனு கொடுத்துள்ளார். அந்த மனுவின் மீது எந்த நடவடிக்கையும் எடுக்காமல் கிராம நிர்வாக அலுவலர் கிடப்பில் போட்டுள்ளார்.

இந்நிலையில் இன்று மீண்டும் விவசாயி ராமகிருஷ்ணன் கிராம நிர்வாக அலுவலர் காந்தியை நேரில் சந்தித்து தனது நிலத்திற்கு சிட்டா மற்றும் அடங்கல் கொடுக்கும்படி வலியுறுத்தியுள்ளார். அதெல்லாம் கொடுக்க முடியாது, பணம் தந்தால் தான் வேலை நடக்கும் என சொன்னதோடு ஒருமையில் பேசியதால் மனமுடைந்த விவசாயி கிராம நிர்வாக அலுவலகத்திற்கு வெளியே தனது உடலில் பெட்ரோல் ஊற்றி தீக்குளித்துள்ளார்.

அவரின் அலறல் கேட்டு அக்கம் பக்கத்தில் இருந்தவர்கள் ஓடிவந்து உடலில் தீப்பற்றி எரிந்ததை கண்டு தீயை அணைத்து உடனடியாக வாழையிலை, வாழை சாறு உள்ளிட்டவற்றை உடல் மீது ஊற்றி திருவண்ணாமலை அரசு மருத்துவக்கல்லூரி மருத்துவமனைக்கு அழைத்து வந்து சிகிச்சைக்காக அனுமதித்தனர். அங்கு சிகிச்சை அளித்த மருத்துவர்கள் உடனடியாக வேலூர் சி.எம்.சி மருத்துவமனைக்கு மேல் சிகிச்சுக்காக அனுப்பி வைத்துள்ளனர்.

விவசாயி ராமகிருஷ்ணன் சிட்டா மற்றும் அடங்கல் கேட்டு கிராம நிர்வாக அலுவலர் காந்தி கொடுக்க மறுத்ததால் தீக்குளித்த சம்பவம் பெரும் பரபரப்பை ஏற்படுத்தி உள்ளது. மேலும் சம்பவம் குறித்து கலசப்பாக்கம் காவல் நிலைய போலீசார் வழக்குப்பதிவு செய்து விசாரணை மேற்கொண்டு வருகின்றனர்.

லஞ்சம் கேட்டு கிராம நிர்வாக அலுவலர் விவசாய நிலத்திற்கு சிட்டா மற்றும் அடங்கல் கொடுக்க மறுத்ததால் பெட்ரோல் ஊற்றி தீக்குளித்த சம்பவம் பெரும் பரபரப்பை ஏற்படுத்தியுள்ளது.

Next Story

 வீராணம் ஏரி நிரம்பியது; விவசாயிகள் மகிழ்ச்சி

Published on 21/06/2024 | Edited on 21/06/2024
Farmers are happy as Veeranam lake is full

காட்டுமன்னார்கோயில் அருகே உள்ள வீராணம் ஏரி கடலூர் மாவட்டத்தில் மிகப்பெரிய நீர் ஆதாரமாகும். ஏரியின் முழு கொள்ளளவு 47.50 அடி ஆகும். இந்த ஏரி மூலம் கடலூர் மாவட்ட காவிரி டெல்டா பகுதிகளான காட்டுமன்னார்கோயில், சிதம்பரம், புவனகிரி வட்டப் பகுதிகளில் உள்ள 44 ஆயிரத்து 856 ஏக்கர் விளை நிலங்கள் பாசனம் பெருகிறது. 

இதனால் இந்த வட்டப் பகுதியில் உள்ள விவசாயிகள், விவசாய தொழிலாளர்களின் வாழ்வாதாரம் பாதுகாக்கப்பட்டு வருகிறது. ஏரியைச் சுற்றியுள்ள பல்வேறு கிராமங்களில் நிலத்தடி நீர்மட்டமும் உயர்ந்து உள்ளது. மேட்டூரில் இருந்து திறக்கப்படும் தண்ணீர் கும்பகோணம் அருகே உள்ள கீழ் அணையில் தேக்கப்பட்டு அதிலிருந்து வடவாறு வழியாக வீராணம் ஏரிக்கு அனுப்பி வைக்கப்பட்டு ஏரி நிரப்பப்படும்.

இந்த ஏரியிலிருந்து தொடர்ந்து தண்ணீர் சென்னை குடிநீருக்கு அனுப்பி வைக்கப்பட்டு வருகிறது. கடந்த ஒன்றரை மாதமாக ஏரிக்கு நீர்வரத்து இல்லாததாலும் கடும் வெயில் காரணமாகவும் தொடர்ந்து சென்னைக்கு தண்ணீர் அனுப்பி வைக்கப்பட்டதாலும் ஏரியின் நீர்மட்டம் வெகுவாக குறைந்து ஏரி வறண்டது. சென்னைக்கு தண்ணீர் அனுப்புவதும் நிறுத்தப்பட்டது. இதனைத் தொடர்ந்து சென்னைக்கு தண்ணீர் அனுப்பிடும் வகையில் தமிழக அரசு சிறப்பு உத்தரவு ஒன்றை பிறப்பித்தது. அதன்படி கடந்த மாதம் 17ம் தேதி மேட்டூரில் இருந்து வினாடிக்கு 2000 கன அடி தண்ணீர்  திறக்கப்பட்டது. அந்த தண்ணீர் கடந்த மாதம் 26 ஆம் தேதி கீழணைக்கு வந்து சேர்ந்தது. அன்றே கீழணையில் இருந்து வடவாறு வழியாக ஏரிக்கு தொடர்ந்து தண்ணீர் வீராணம் ஏரிக்கு அனுப்பி வைக்கப்பட்டு வருகிறது. இதனால் ஏரியின் நீர்மட்டம் கிடுகிடுவென உயர்ந்தது. 

வெள்ளிக்கிழமை ஏரியின் நீர்மட்டம் முழு கொள்ளளவான 47.50 அடியை எட்டி நிரம்பியது. கீழனையில் இருந்து ஏரிக்கு வினாடிக்கு 600 கன அடி தண்ணீர் வந்து கொண்டிருக்கிறது. சென்னைக்கு வினாடிக்கு 72 கன அடி தண்ணீர் அனுப்பி வைக்கப்பட்டு வருகிறது. ஏரியின் பாதுகாப்பை கருதி  விஎன்எஸ்எஸ்  வடிகால் மதகு வழியாக விநாடிக்கு150 கன அடி தண்ணீர் வெளியேற்றப்பட்டு வருகிறது. 9 அடி ஆழம் உள்ள கீழணையில் 4.1 அடி வரை தண்ணீர் உள்ளது. ஏரி நிறைந்ததால் விவசாயிகள் மகிழ்ச்சி அடைந்துள்ளனர். மேலும் விவசாய பாசனத்திற்கும் ஏரியில் இருந்து தண்ணீர் திறந்து விட வேண்டும் என்று விவசாயிகள் கோரிக்கை வைத்துள்ளனர்.