Skip to main content

பழனி முருகன் கோவிலுக்கு செல்ஃபோன் கொண்டுவரத் தடை!

Published on 05/09/2020 | Edited on 05/09/2020

 

cell phone restriction on Palani Murugan temple


கரோனா வைரஸ் அச்சுறுத்தல் காரணமாக கோவில்களில் தரிசனம் செய்யும் பக்தர்களுக்கு அனுமதி மறுக்கப்பட்ட நிலையில், தற்போது சமூக இடைவெளியைப் பின்பற்றி கோவிலில் வழிபட அனுமதி அளிக்கப்பட்டுள்ளது.
               

அதன்படி முருகனின் அறுபடை வீடுகளில் ஒன்றான பழனிமுருகன் கோவிலில் தற்போது முருக பக்தர்கள் சாமி தரிசனம் செய்து வருகின்றனர். அவ்வாறு வரும் பக்தர்கள் முன் அனுமதிச் சீட்டு பெற்று, முருகனை தரிசித்து வருகின்றனர். மேலும் படிப்பாதை நுழைவுப் பகுதியில் மருத்துவக் குழுவினர் காய்ச்சல், சளி உள்ளிட்டவை பரிசோதனை செய்து பக்தர்களை அனுமதித்து வருகின்றனர். இந்த நிலையில் வருகிற 7 ஆம் தேதி முதல் மாவட்டங்களுக்கு இடையே பஸ் போக்குவரத்து தொடங்க உள்ளதால் வெளி மாவட்டங்களில் இருந்து அதிக அளவில் பக்தர்கள் பழனிக்கு வர வாய்ப்பு உள்ளது. இதைத் தொடர்ந்து கோவில் நிர்வாகம் சார்பில் வசதிகள் செய்வது குறித்து அவ்வப்போது அதிகாரிகள் ஆய்வு செய்து நடவடிக்கை எடுத்து வருகின்றனர்.

              

இதுகுறித்து கோவில் ஊழியர்கள் சிலரிடம் கேட்டபோது, திங்கட்கிழமை முதல் வெளி மாவட்டங்களுக்கு இடையே பஸ்கள் இயக்கப்படுவதால் அதிக பக்தர்கள் முருகனை தரிசிக்க வருவார்கள். தற்போது அடிவாரத்திலிருந்து மலைக் கோவிலுக்குச் செல்வதற்காக மின் இழுவை ரயில் அடைக்கப்பட்டதால், பக்தர்கள் படிப்பாதை வழியே சென்று வருகின்றனர். இந்த நிலையில் ஒரு நாளைக்கு சுமார் 1,500 பக்தர்கள் வீதம் தரிசனத்திற்கு அனுமதிக்கப்பட்டு வருகின்றனர். தற்போது மழைக்காலம் தொடங்கி உள்ளதால் பக்தர்கள் நலன்கருதி பாதை வழி மாற்றம் செய்யப்பட்டுள்ளது. அதன்படி அடிவாரத்திலிருந்து குடமுழக்கு அரங்கு வழியே படிப்பாதை செல்லவும், தரிசனம் முடிந்துத் திரும்பி வரும் பக்தர்கள் பாத விநாயகர் கோவில் வெளியே வருவதற்கும் பாதை மாற்றப்பட்டு வருகிறது. இதனால் பக்தர்கள் மழையில் நனைவது தடுக்கப்படும். இதற்காக ஆங்கங்கே தடுப்புகள் வைக்கப்பட்டு விற்பனை தொடங்கப்பட்டுள்ளது. அதுபோல் விரைவில் அதிக அளவில் பக்தர்கள் செல்லவும் நடவடிக்கை எடுக்கப்பட்டு வருகிறது என்றனர்.

 

பழனி கோவில் வளாகப் பகுதியில் செல்ஃபோன் பயன்படுத்தத் தடை விதிக்கப்பட்டுள்ளது. ஆனாலும் பக்தர்கள் செல்ஃபோனை கோவிலுக்குக் கொண்டு சென்று வருகின்றனர். இந்த நிலையில் கோவில் வளாகத்தில் செல்ஃபோன் பயன்படுத்துவதை தடுக்கும் வகையில் கோவிலுக்குள் உள்ள பகுதிகளில் செல்ஃபோனை வாங்கி அதைப் பாதுகாத்து தரிசனம் முடிந்து பெற்றுச் செல்லும் வகையில் நடவடிக்கை எடுக்கப்பட்டுள்ளது. இதற்காக மின் இழுவை ரயில் நிலையம், படிப்பாதை விநாயகர் கோவில் ஆகிய இடங்களில் செல்ஃபோன் வைக்கும் சிறிய அறைகள் அமைக்கப்பட்டுள்ளதாக கோவில் அதிகாரி ஒருவர் தெரிவித்தார்.
 

 

 

சார்ந்த செய்திகள்

 

Next Story

பழனி கோயில் நிர்வாகத்தைக் கண்டித்து அனைத்து கடைகளையும் அடைத்து போராட்டம்!

Published on 13/07/2024 | Edited on 13/07/2024
struggle against the management of Pazhani temple by closing all shops

பழனி மலை அடிவாரத்தில் கடந்த சில மாதங்களாக ஆக்கிரமிப்பு அகற்றம் என்ற பெயரில் வணிக கடைகள் அகற்றப்பட்டு வருகின்றன. மேலும் கிரிவலப் பாதையில் தனியார் வாகனங்கள் செல்ல தடை விதிக்கப்பட்டு தடுப்புகள் அமைக்கப்பட்டுள்ளது. தொடர்ந்து தேவஸ்தான நிர்வாகம் பழனி நகரில் வசிக்கும் மக்களுக்கும் வணிகர்களுக்கும் இடையூறு செய்வதை கண்டித்து பழனி நகர் மன்றம் இன்று கடையடைப்பு போராட்டத்திற்கு அழைப்பு விடுத்திருந்தது. 

அதை தொடர்ந்து நகர் மன்ற உறுப்பினர்களின் அழைப்பை ஏற்று வணிகர் சங்கங்கள் கடையடைப்பு போராட்டத்திற்கு ஆதரவு தெரிவித்து இன்று கடைகளை அடைத்துள்ளனர். பேருந்து நிலையம், காந்தி மார்க்கெட், ரயில்வே சாலை , சன்னதி வீதி உள்ளிட்ட நகரில் அனைத்து இடங்களில் உள்ள கடைகளும் அடைக்கப்பட்டுள்ளன. மேலும் உணவுகள், தங்கும் விடுதிகள்,  இயங்காததால் வெளியூரிலிருந்து பழனி முருகன் கோயிலுக்கு வந்த பக்தர்கள் பலரும் சிரமம் அடைந்துள்ளனர். காலை 6:00 மணி முதல் மாலை 6 மணி வரை கடை அடைப்பு போராட்டம் நடத்த முடிவு செய்தப்பட்டுள்ளது. அனைத்து கடைகளும் அடைக்கப்பட்டுள்ளதால் பொதுமக்களின் இயல்பு வாழ்க்கை பாதிக்கப்பட்டுள்ளது. தேவஸ்தான நிர்வாகம் பழனி நகர மக்கள் மற்றும் வணிகர்களுக்கு இடையூறு ஏற்படுத்தும் நடவடிக்கைகளை கைவிட வேண்டும் என வலியுறுத்தி கவன ஈர்ப்பு போராட்டம் இன்று நடைபெற்ற வருகிறது. 

இந்த நிலையில் பழனி முருகன் கோயிலுக்கு சாமி தரிசனம் செய்ய வந்த பக்தர்களுக்கு கோயில் நிர்வாகம் சார்பில் அன்னதானம் வழங்கப்பட்டு வருகிறது. மேலும் மலையடி வாரத்தில் பிரட், பிஸ்கட், பழங்கள், குழந்தைகளுக்கு தேவையான பால் ஆகியவற்றை விலை இல்லாமல் வழங்கவும் கோயில் நிர்வாகம் ஏற்பாடு செய்துள்ளது. பழனி கோயில் தேவஸ்தான நிர்வாகத்தை எதிர்த்து நகர மன்றம் சார்பில் நடத்தப்படும் கடையடைப்பு போராட்டத்தால் பழனியில் இயல்பு வாழ்க்கை பாதிக்கப்பட்டுள்ளது. அதோடு பழனி முருகனை தரிசிக்க வரும் பக்தர்களும் பாதிப்படைந்து வருகிறார்கள்.

Next Story

வல்லக்கோட்டை முருகன் திருக்கோயிலில் நடிகர் சரத்குமார் தரிசனம்!

Published on 29/04/2024 | Edited on 29/04/2024
Actor Sarathkumar Darshan at Vallakottai Murugan Temple

காஞ்சிபுரம் மாவட்டம் திருப்பெரும்புதூர் அடுத்த வல்லக்கோட்டையில் அருள்மிகு சுப்பிரமணிய சுவாமி திருக்கோயில்  உள்ளது. இங்கு தல விருட்சமாக பாதிரி மரம் உள்ளது. இந்த மரத்தின் மலர்களைப் பற்றி இரண்டாயிரம் ஆண்டுகளுக்கு முற்பட்ட சங்க கால நூல்கள் சிறப்பாக தெரிவிக்கின்றன. இது சித்திரை மாதம் மட்டுமே மலரும் தன்மையுடையது. இந்த மரத்தின் அருகில் புராண காலத்தில் முருகப்பெருமான் பகீரத மன்னனுக்கு காட்சியருளி அவனுக்கு மீண்டும் அரசாட்சியை வழங்கியதாக இத்திருக்கோயிலின் தல வரலாறு கூறுகிறது. அதனால் இங்கு வந்து வணங்குவோருக்கு உயர்ந்த பதவிகள், வளமான செல்வங்கள், சொந்த வீடு ஆகியன கிடைப்பதாக பக்தர்கள் நம்பிக்கையுடன் தெரிவிக்கின்றனர்.

இந்த திருக்கோயிலுக்கு செவ்வாய், வெள்ளி மற்றும் அரசு விடுமுறை நாட்களில் ஏராளமான பக்தர்கள் வருகின்றனர். மேலும் சினிமா நடிகர்கள் உள்ளிட்ட கலைத்துறையைச் சேர்ந்தவர்கள் பலரும் வந்து வல்லக்கோட்டை முருகப்பெருமானை வழிபட்டு புகழடைகின்றனர். அந்த வகையில், நேற்று (28-04-24) ஞாயிறு விடுமுறை நாளையொட்டி ஆயிரக்கணக்கான பக்தர்கள் அதிகாலை முதற்கொண்டே திருக்கோயிலுக்கு வந்து வரிசையில் நின்றனர். காலை 6 மணிக்கு மூல மூர்த்திகளுக்கும் உற்சவருக்கும் பால் அபிஷேகம் நடைபெற்றது. இதனைத்தொடர்ந்து கருவறையில் உள்ள மூலவர் சுப்பிரமணியசுவாமிக்கு பலவித மலர் மாலைகளால் சிறப்பு அலங்காரம் செய்யப்பட்டிருந்தது. 

உற்சவர் முருகப்பெருமானும் சிறப்பு அலங்காரத்தில் சஷ்டி மண்டபத்தில் பக்தர்களுக்கு காட்சியருளினார். இதனிடையே, காலையில் நடிகர் சரத்குமார் வருகைதந்து முருகப்பெருமானை பக்தியுடன் வணங்கினார். முருகப்பெருமானுக்கு நடைபெற்ற அபிஷேகத்திலும் கலந்துகொண்டு தரிசித்தார். பின்னர், ஒவ்வொரு சந்நிதியாக சென்று வணங்கினார். அவருக்கு திருக்கோயில் நிர்வாகத்தின் சார்பில் பிரசாதம், வஸ்திரம், மாலைகள், முருகன் படம் ஆகியன வழங்கப்பட்டன.

Actor Sarathkumar Darshan at Vallakottai Murugan Temple

விடுமுறை நாளையொட்டி காஞ்சிபுரம், செங்கல்பட்டு, சென்னை ஆகிய மாவட்டங்களில் இருந்து ஐந்தாயிரத்திற்கும் மேற்பட்ட பக்தர்கள் வந்து நேர்த்திக்கடன் செலுத்தி வல்லக்கோட்டை முருகப்பெருமானை வழிபட்டனர். திருக்கோயிலுக்கு வந்திருந்த பக்தர்களுக்கு திருக்கோயில் நிர்வாகத்தின் சார்பில் பிரசாதம், மோர், குடிநீர் ஆகியவற்றை இணை ஆணையர இரா.வான்மதி, உதவி ஆணையர் பொ.லட்சுமிகாந்த பாரதிதாசன் ஆகியோர் அறிவுரையின் பேரில் திருக்கோயில் நிர்வாக அதிகாரி சோ.செந்தில்குமார் வழங்கினார்.