Skip to main content

நகைக் கடன் தள்ளுபடி சான்றிதழ் வழங்க லஞ்ச வேட்டை; கூட்டுறவுச் சங்க செயலாளர் மீது வழக்கு!      

Published on 04/09/2023 | Edited on 04/09/2023

 

case  filed against  secretary of the cooperative society who asked for a bribe

 

சேந்தமங்கலம் அருகே, நகைக்கடன் தள்ளுபடி சான்றிதழ் வழங்க லஞ்சம் வசூலித்த கூட்டுறவுச் சங்க செயலாளர் மீது லஞ்ச ஒழிப்புப் பிரிவு காவல்துறையினர் வழக்குப் பதிவு செய்துள்ளனர்.    

 

நாமக்கல் மாவட்ட கூட்டுறவுச் சங்கங்களின் துணைப் பதிவாளர் கர்ணன். இவர், மூன்று நாள்களுக்கு முன்பு மாவட்ட லஞ்ச ஒழிப்புப் பிரிவு  காவல்துறையில் ஒரு புகார் அளித்தார். அதில் கூறியுள்ளதாவது: சேந்தமங்கலம் பேளுக்குறிச்சியில் உள்ள தொடக்க வேளாண்மைக் கூட்டுறவுக் கடன் சங்கத்தில் கோவிந்தராஜ் (55) என்பவர், கடந்த 2021ம் ஆண்டு முதல் பொறுப்பு செயலாளராகப் பணியாற்றி வருகிறார். தமிழகத்தில் உள்ள கூட்டுறவுக் கடன் சங்கங்களில், 2021 மார்ச் 31ம் தேதி வரை 5 பவுனுக்குக் கீழ் நகை அடமானக் கடன் பெற்றவர்களுக்கு முழுமையாகக் கடன் தள்ளுபடி செய்து தமிழக அரசு உத்தரவிட்டது. இதன்படி, பேளுக்குறிச்சி கூட்டுறவு கடன் சங்கத்தில் 311 பேர் இந்தத்  திட்டத்தில் பயனாளிகளாகக் கண்டறியப்பட்டனர்.     

 

இந்த சங்கத்தின் உறுப்பினர் யுவராணி என்பவர், 30 கிராம் நகையை அடமானம் வைத்து, கடந்த 29.1.2021ம் தேதி 89 ஆயிரம் ரூபாய் கடன் பெற்றிருந்தார். அவர், கடன் தள்ளுபடி சான்றிதழ் கேட்டு, சங்க செயலாளர் (பொறுப்பு) கோவிந்தராஜை அணுகியுள்ளார். அப்போது அவர், 4 ஆயிரம் ரூபாய் லஞ்சம் கொடுத்தால், நகை அடமானக் கடன் தள்ளுபடி சான்றிதழை உடனடியாக கொடுத்து விடுவதாகக் கூறியுள்ளார். யுவராணியிடம் மட்டுமின்றி, கீர்த்தனா, சந்திரா, சீனிவாசன், சிலம்பரசன் ஆகிய உறுப்பினர்களிடமும் லஞ்சம் கேட்டுள்ளார்.     

 

மேலும், 28.3.2022ம் தேதி, கந்தசாமி என்ற உறுப்பினருக்கு கடன் தள்ளுபடி சான்றிதழ் வழங்க 1500 ரூபாய் லஞ்சம் வசூலித்துள்ளதாகவும்,  துணைப் பதிவாளர் கர்ணன் தனது புகாரில் கூறியிருந்தார். இந்த புகாரின் பேரில் லஞ்ச ஒழிப்புப் பிரிவு டிஎஸ்பி சுபாஷினி நடத்திய முதல்கட்ட விசாரணையில், கோவிந்தராஜ் மீதான புகாரில் முகாந்திரம் இருப்பது தெரிய வந்தது. இதையடுத்து அவர் மீது லஞ்சம் கேட்டு மிரட்டியதாக வழக்குப்பதிவு செய்யப்பட்டு, விசாரணை நடந்து வருகிறது. இந்த சம்பவம் கூட்டுறவுத்துறை வட்டாரத்தில் பெரும் பரபரப்பை ஏற்படுத்தி உள்ளது.  

 

 

சார்ந்த செய்திகள்

 

Next Story

சார் பதிவாளர் வீட்டில் புதைக்கப்பட்ட பணம்; லட்சக்கணக்கில் தோண்டி எடுத்த லஞ்ச ஒழிப்புத்துறை

Published on 21/06/2024 | Edited on 21/06/2024
13 lakhs in cash, documents were seized from house of subRegistrar

வேலூர் மாவட்டம் காட்பாடியில் உள்ள சார்பதிவாளர் அலுவலகத்தில் நேற்று இரவு வேலூர் லஞ்ச ஒழிப்பு துறையினர் திடீர் சோதனை மேற்கொண்டனர். இரவு 7.30 மணி முதல் அதிகாலை 4.00 மணி வரை நடைபெற்ற திடீர் சோதனையில் கணக்கில் வராத 2 லட்சத்து 14 ஆயிரம் ரூபாய் பறிமுதல் செய்யப்பட்டது. இந்தத் திடீர் சோதனையின் போது வேலூர் மாநகராட்சி கவுன்சிலர் ஒருவர் உள்ளே பணத்தோடு இருந்ததும் அந்தப் பணம் பறிமுதல் செய்யப்பட்டதும் குறிப்பிடத்தக்கது. 

இது தொடர்பாக வழக்கு பதிவு செய்யப்பட்ட நிலையில் காட்பாடி சார் பதிவாளர் (பொறுப்பு) நித்தியானந்தத்துக்கு சொந்தமான திருவண்ணாமலை மாவட்டம் கண்ணமங்கலத்தில் உள்ள வீட்டில் காலை முதல் வேலூர் லஞ்ச ஒழிப்புத்துறை சோதனை மேற்கொண்ட நிலையில் உரிய ஆவணங்கள் இல்லாத 13 லட்சத்து 97 ஆயிரம் ரொக்கப்பணம், 80 சவரன் தங்க நகைகள் தொடர்பான ஆவணங்கள், வங்கி கணக்குகள் உள்ளிட்ட முக்கிய ஆவணங்களை பறிமுதல் செய்தனர். இதில் 12 லட்சம் ரூபாய் ஒரு பிளாஸ்டிக் கவரில் சுற்றி வீட்டுக்கு பின்புறம் மண்ணில் புதைக்கப்பட்டு இருந்து தோண்டி எடுக்கப்பட்டுள்ளது. இது தொடர்பாக வேலூரில் லஞ்ச ஒழிப்புத்துறையினர் தொடர் விசாரணை மேற்கொண்டு வருகின்றனர். 

13 lakhs in cash, documents were seized from house of subRegistrar

மேலும் காட்பாடி சார் பதிவாளர் அலுவலகத்தில், காட்பாடி வட்டத்துக்கு உட்பட்ட சுமார் 200 ஏக்கர் அரசு நிலத்தை பத்திர பதிவு செய்ய முயன்றதாக 262 முறையற்ற பத்திரங்கள் கண்டுபிடிக்கப்பட்டுள்ளதாகவும் கூறப்படுகிறது.

Next Story

அப்பாவையே அடித்துக்கொன்ற மகன்; விசாரணையில் அதிர்ச்சி

Published on 15/06/2024 | Edited on 15/06/2024
The son who attacked his father, shocked in the investigation

சொத்துக்காக தந்தையை மகனும் மருமகனும் சேர்ந்து கொலை செய்த சம்பவம் நாமக்கல்லில் பரபரப்பை ஏற்படுத்தி இருக்கிறது.

நாமக்கல் மாவட்டம் மல்லசமுத்திரம் பகுதியில் வசித்து வந்தவர் செல்வம். பேருந்து ஓட்டுனரான செல்வத்தைக் காணவில்லை என அவருடைய மருமகள் சசிகா கடந்த மூன்றாம் தேதி காவல் நிலையத்தில் புகார் அளித்திருந்தார். இது தொடர்பாக போலீசார் வழக்குப்பதிவு செய்து விசாரணை மேற்கொண்டு வந்தனர். விசாரணையில் சொத்து பிரச்சனை காரணமாக மகனும் மருமகனும் ஒன்று சேர்ந்து செல்வத்தை அடித்து கொலை செய்தது தெரிய வந்தது.

திருச்செங்கோடு அருகே திம்மராவுத்தம்பட்டி ஏரி பகுதியில் உள்ள தனியார் நிலத்தில் கொலை செய்த செல்வத்தின் உடலை புதைத்ததாக இருவரும் போலீசாருக்கு வாக்குமூலம் கொடுத்தனர். அதனடிப்படையில் அந்தப் பகுதிக்குச் சென்ற போலீசார் செல்வத்தின் உடல் புதைக்கப்பட்ட இடத்தில் இருந்து தோண்டி எடுத்து, உடலை பிரேதப் பரிசோதனைக்காக அனுப்பி வைத்தனர். இந்தச் சம்பவம் தொடர்பாக செல்வத்தின் மகன், மருமகன் மற்றும் கூலிப்படையைச் சேர்ந்த மூன்று பேர் என ஐந்து பேரை போலீசார் கைது செய்தனர். சொத்து தகராறு காரணமாக அப்பாவையே மகனும், மருமகனும் ஒன்று சேர்ந்து கொலை செய்தது அங்குப் பரபரப்பை ஏற்படுத்தியிருக்கிறது.