Skip to main content

மழையால் மந்தமான வியாபாரம்; வெறிச்சோடிய கனி மார்க்கெட்

Published on 21/05/2024 | Edited on 21/05/2024
Business dulled by rain; A deserted cloth market

தமிழகத்தில் கடந்த ஒரு மாதத்திற்கும் மேலாகக் கோடை வெயில் வாட்டி வதைத்து வந்தது. இத்தகைய சூழலில் கடந்த ஒரு சில வாரங்களாகக் கோடை மழை பொழிந்து வருகிறது. அதே சமயம் தமிழகத்தின் பல இடங்களில் கனமழையும் பொழிந்து வருகிறது.

வானிலை ஆய்வு மையம் இன்று (21.05.2024) வெளியிட்டுள்ள அறிவிப்பில், 'தென்மேற்கு வங்கக்கடலில் நிலவும் வளிமண்டல கீழடுக்குச் சுழற்சி நாளை (22.05.2024) குறைந்த காற்றழுத்த தாழ்வுப் பகுதியாக உருவாக வாய்ப்பு உள்ளது. மேலும் இது வடகிழக்கு திசையில் நகர்ந்து மே 24 ஆம் தேதி காற்றழுத்த தாழ்வு மண்டலமாக மாறும். அதனைத் தொடர்ந்து இந்தக் காற்றழுத்த தாழ்வு மண்டலம் மேலும் வலுப்பெறக்கூடும். எனவே கோயம்புத்தூர், திருப்பூர், திண்டுக்கல் மற்றும் தேனி ஆகிய 4 மாவட்டங்களில் இன்று (21.05.2024) மிகக் கனமழைக்கு வாய்ப்பு உள்ளது' எனத் தெரிவித்துள்ளது. இந்நிலையில் மழை பொழிவால் ஈரோட்டில் ஜவுளி வியாபாரம்  மந்தமடைந்துள்ளது.

ஈரோடு பன்னீர்செல்வம் பார்க் அருகே ஈரோடு ஜவுளி சந்தை (கனி மார்க்கெட்). செயல்பட்டு வருகிறது. இங்குத் தினசரி கடைகள் மற்றும் வாரச்சந்தைகள் நடைபெற்று வருகிறது. இங்கு நடைபெறும் வாரச்சந்தைத் தென்னிந்திய அளவில் புகழ்பெற்றது. திங்கட்கிழமை மாலை தொடங்கி செவ்வாய்க்கிழமை மாலை வரை வாரச்சந்தை நடைபெறும். இதற்காகக் கேரளா, ஆந்திரா, கர்நாடகா, மகாராஷ்டிரா போன்ற வெளி மாநிலங்களில் இருந்தும் தமிழ்நாட்டின் பல்வேறு பகுதிகளில் இருந்தும் நூற்றுக்கணக்கான வியாபாரிகள் வந்து துணிகளைக் கொள்முதல் செய்து செல்வார்கள். திங்கட்கிழமை இரவு விடிய விடிய ஜவுளி சந்தை வியாபாரம் விறுவிறுப்பாக நடைபெறும். மற்ற இடங்களை விட இங்கு துணிகளின் விலை மிகவும் குறைவு என்பதால் வியாபாரிகள் போட்டிப் போட்டு வாங்கிச் செல்வார்கள்.

பொதுமக்களும் அதிக அளவில் வந்து செல்வார்கள். கடந்த சில நாட்களாக ஈரோடு ஜவுளி சந்தை வியாபாரம் சுறுசுறுப்பு இல்லாமல் இருந்து வருகிறது. பாராளுமன்றத் தேர்தல் காரணமாக ஜவுளி சந்தை வியாபாரம் சற்று தொய்வாக இருந்தது. அதன் பிறகு கோடை வெயில் தொடங்கியதும் காட்டன் தொடர்பான துணிகள் வியாபாரம் நன்றாக இருந்தது. இந்நிலையில் தற்போது தமிழகம் மட்டுமின்றி பல்வேறு மாநிலங்களில் பரவலாக மழை பெய்து வருகிறது. மழை எதிரொலியாக இன்று கூடிய ஜவுளி வாரச்சந்தை வெறிச்சோடி காணப்பட்டது. பெரும்பாலும் வெளிமாநில வியாபாரிகள் மழை காரணமாக வரவில்லை. ஆந்திரா, கேரளாவில் இருந்து ஒரு சில வியாபாரிகள் மட்டும் வந்திருந்தனர். தற்போது தமிழகம் முழுவதும் பரவலாக மழை பெய்து வருவதால் தமிழகத்தின் பல்வேறு பகுதிகளில் இருந்து ஜவுளி வியாபாரிகள் இன்று சந்தைக்கு வரவில்லை. இதனால் இன்று மொத்த வியாபாரம், சில்லறை வியாபாரம் மந்தமாக நடைபெற்றது. சில்லறை வியாபாரம் 25 சதவீதமும், மொத்த வியாபாரம் 20 சதவீதம்  மட்டுமே நடைபெற்றதாக ஜவுளி வியாபாரிகள் தெரிவித்தனர். இன்னும் ஓரிரு வாரங்களில் நிலைமை சீராகி ஜவுளி வியாபாரம் சுறுசுறுப்பாக நடைபெறும் என வியாபாரிகள் நம்பிக்கைத் தெரிவித்துள்ளனர்.

சார்ந்த செய்திகள்

 

Next Story

சென்னையில் பரவலாக மழை

Published on 18/06/2024 | Edited on 18/06/2024
nn

சென்னை சுற்றுவட்டாரப் பகுதிகளில் பரவலாக மழை பொழிந்து வருகிறது.

தமிழ்நாட்டில் 7 நாட்களுக்கு ஒரு இடங்களில் இடி மின்னலுடன் கூடிய மழைக்கு வாய்ப்பு இருக்கும் எனச் சென்னை வானிலை மையம் ஏற்கெனவே அறிவித்திருந்தது. வட தமிழக மாவட்டங்களில் குறிப்பாக உள் மாவட்டங்களில், மேற்குத் தொடர்ச்சி மலையை ஒட்டிய மாவட்டங்களில் மழை பெய்து வருகிறது. இந்நிலையில்  சென்னை மற்றும் அதன் சுற்றுவட்டாரப் பகுதிகளில் பரவலாக மழை பொழிந்து வருகிறது. சென்னை தியாகராய நகர், நுங்கம்பாக்கம், வள்ளுவர் கோட்டம், கீழ்ப்பாக்கம், சேத்துப்பட்டு, நுங்கம்பாக்கம், அயனாவரம், கோடம்பாக்கம் உள்ளிட்ட பகுதிகளில் பரவலாக மழை பொழிந்து வருகிறது. அதேபோல் சென்னை புறநகர்ப் பகுதிகளான பூந்தமல்லி திருவேற்காடு, ஆவடி, அம்பத்தூர், அனகாபுத்தூர், மதுரவாயில், போரூர், வளசரவாக்கம், குன்றத்தூர், மாங்காடு ஆகிய பகுதியில் பலத்த மழை பொழிந்து வருகிறது.

Next Story

பக்கெட்டுக்குள் தவறி விழுந்து 9 மாத குழந்தை உயிரிழப்பு

Published on 18/06/2024 | Edited on 18/06/2024
A 9-month-old baby lose their live after falling into a bucket

கோபிசெட்டிபாளையம் அருகே தண்ணீர் பக்கெட்டுக்குள் தவறி விழுந்து 9 மாத குழந்தை உயிரிழந்த சம்பவம்  பரபரப்பை ஏற்படுத்தியுள்ளது.

உத்தரப்பிரதேச மாநிலம், அலகாபாத் மாவட்டத்தைச் சேர்ந்தவர் பீம்(35). இவரது மனைவி ரீமா(32). இவர்களுக்கு ரோஷினி, ரட்சனா, ராணி, அமித் மற்றும் ராசி (9 மாத கைக்குழந்தை) இருந்தனர். இவர்கள் அனைவரும் ஈரோடு மாவட்டம் கோபிசெட்டிபாளையம் அடுத்துள்ள கெட்டிசெவியூர், பள்ளிபாளையத்தில் உள்ள தனியார் மில் குடியிருப்பில் தங்கி கடந்த 5 ஆண்டுகளாக பணியாற்றி வருகின்றனர்.

இந்நிலையில் நேற்று காலை கணவர் பீம் பால் வாங்குவதற்காக வெளியே சென்றுவிட்டார். வீட்டில் மனைவி மற்றும் குழந்தைகள் மட்டும் இருந்துள்ளனர். அப்போது துணிகளை துவைப்பதற்காக மனைவி ரீமா பிளாஸ்டிக் பக்கெட்டில் தண்ணீருடன் சோப்பு பவுடரை கலந்து வைத்துவிட்டு வீட்டிற்குள் சமையல் வேலை செய்து கொண்டிருந்தார். குழந்தை ராசி வீட்டிற்கு வெளியே இருந்துள்ளது. பின்னர் சமையல் வேலையை முடித்து விட்டு ரீமா வீட்டுக்கு வெளியே வந்து பார்த்தார்.  அப்போது குழந்தை ராசி சோப்பு தண்ணீர் பக்கெட்டிற்குள் தலைகீழாக விழுந்து கிடந்தது தெரியவந்தது.

இதைப் பார்த்து அதிர்ச்சியடைந்த ரீமா ஓடிச் சென்று  குழந்தையை தூக்கிய போது குழந்தை பேச்சு மூச்சு இன்றி இருந்தது. பின்னர் அக்கம் பக்கத்தினர் உதவியோடு உடனடியாக 108 ஆம்புலன்ஸ் மூலம் கோபிசெட்டிபாளையம்  அரசு மருத்துவமனைக்கு சிகிச்சைக்காக கொண்டு சென்றனர். அங்கு பரிசோதித்த டாக்டர்கள் ஏற்கனவே குழந்தை இறந்துவிட்டதாக கூறினர். இது குறித்து சிறுவலூர் போலீசார் வழக்குப்பதிவு செய்து விசாரணை நடத்தி வருகின்றனர். இந்த சம்பவம் அப்பகுதியில் சோகத்தை ஏற்படுத்தியுள்ளது.