Skip to main content

தாலி கட்டும் நேரத்தில் மயமான மணப்பெண்; திடீர் மணப்பெண்ணுடன் நடந்த திருமணம்

Published on 18/09/2023 | Edited on 20/09/2023

 

bn

 

தாலி கட்டும் நேரத்தில் மணப்பெண் வெளியேறியதால் உறவினர்களிடையே மோதல் ஏற்பட்ட சம்பவம் கடலூரில் நிகழ்ந்துள்ளது.

 

கடலூர் மாவட்டம் பண்ருட்டி அருகே உள்ள புத்தாண்டு குப்பம் பகுதியைச் சேர்ந்த 23 வயது இளைஞருக்கும் கள்ளக்குறிச்சி மாவட்டம் உளுந்தூர்பேட்டை அருகே உள்ள ஒரு கிராமத்தைச் சேர்ந்த இளம் பெண்ணுக்கும் இருதரப்பு உறவினர்களும் பெற்றோர்களும் சேர்ந்து பேசி முடித்து நிச்சயம் திருமணம் செய்யப்பட்டது. அதன்படி நிச்சயிக்கப்பட்ட திருமணம் உளுந்தூர்பேட்டையில் உள்ள ஒரு தனியார் மண்டபத்தில் நேற்று காலை நடைபெற இருந்தது. இருவீட்டு பெற்றோர்களும் திருமண அழைப்பிதழ் அச்சடித்து உறவினர், நண்பர்களுக்கு வழங்கி அவர்கள் அனைவரும் மண்டபத்திற்கு முதல் நாளே வந்துவிட்டனர்.

 

திருமண நிகழ்ச்சியின் ஒரு பகுதியாக முதல்நாள் இரவு திருமண மண்டபத்தில் மணமக்களுக்கு வரவேற்பு நிகழ்ச்சி சிறப்பாக நடைபெற்றது. மேடை ஏறிய மணமக்களை உறவினர்களும் நண்பர்களும் வாழ்த்தினர். வரவேற்பு நிகழ்ச்சியில் அனைவரும் ஆடிப்பாடி சந்தோஷமாக இருந்தனர். மணமகள் மற்றும் உறவினர்கள் திருமண மண்டபத்திலே தங்கி இருந்தனர். காலையில் தாலி கட்டும் நேரம் நெருங்கியதை அடுத்து பெற்றோர்களும் உறவினர்களும் திருமண ஏற்பாடுகளை செய்தனர். இதற்காக அதிகாலை 4 மணி அளவில் மணமேடைக்கு மணப்பெண்ணை அலங்கரித்து அழைத்து வருவதற்காக அவரது அறைக்கு சென்றனர்.  அங்கே மணப்பெண்ணை காணவில்லை. இதனால் அனைவரும் அதிர்ச்சியடைந்தனர்.

 

பல இடங்களில் மணப்பெண்ணை தேடி அலைந்தனர். மணப்பெண் கிடைக்கவில்லை. மணமகளுக்கு மாப்பிள்ளை பிடிக்கவில்லை என்றும் அதனால் மணமகள் மண்டபத்தில் இருந்து காணாமல் போனதாக தெரிய வந்தது. தாலி கட்டும் நேரத்தில் மணமகள் எங்கே போனார் என்று மணமகன் வீட்டார் கேட்க, இரு வீட்டு உறவினர்களுக்கு இடையே தகராறு ஏற்பட்டு அது மோதலாக மாறியது. அங்கிருந்த இருதரப்பு முக்கியஸ்தர்களும் அவர்களை அமைதிப்படுத்தினர். அடுத்து அங்கு திருமணத்துக்கு வந்திருந்த உறவினர் ஒருவரின் பெண்ணை பேசி முடித்து அதே மண்டபத்தில் மணமகனுக்கு திருமணம் செய்து வைக்க முடிவு செய்தனர். உடனடியாக அந்த பெண் மண்டபத்திற்கு வரவழைக்கப்பட்டார். அந்தப் பெண்ணின் சம்மதத்துடன் அந்த திடீர் மண பெண்ணுக்கும் மாப்பிள்ளை எதிர்பாராத திருமணம் நடந்தது. அதன் பின்னர் திருமண மண்டபத்தில் அமைதி திரும்பியது. திருமணத்திற்கு வந்திருந்த அனைவரும் விருந்து சாப்பிட்டு மணமக்களை வாழ்த்தி விட்டு சென்றனர். தாலி கட்டும் நேரத்தில் மணப்பெண் மாயமான சம்பவம் உளுந்தூர்பேட்டை பகுதியில் பெரும் பரபரப்பை ஏற்படுத்தி உள்ளது.

 

 

 

சார்ந்த செய்திகள்

 

Next Story

கடல் அலையில் சிக்கி ஐடி ஊழியர்கள் இருவர் உயிரிழப்பு

Published on 21/07/2024 | Edited on 21/07/2024
2 Chennai IT employees lose their live in Parangipet sea wave


சிதம்பரம், பரங்கிப்பேட்டை அருகே சாமியார்பேட்டை கடற்கரைக்கு ஞாயிற்றுக்கிழமை மதியம் கூடுவாஞ்சேரியில் உள்ள ஜோ.கோ கார்ப்பரேசன் ஐடி கம்பெனியில் பணிபுரியும் கணினி பொறியாளர்கள் ஷாம் சுந்தர் (26) கோகுல் பிரசாத் (26) பொள்ளாச்சியைச் சேர்ந்த இவர்கள் கூடுவாஞ்சேரியில் தங்கி பணி செய்து வருகிறார்கள்.  

இவர்களுடன் 2 ஆண் மற்றும் 2  பெண் நண்பர்கள் என மொத்தம் 6 பேர் பாண்டிச்சேரியில் இருந்து கார் மூலம் பிச்சாவரம் சுற்றுலா தளத்திற்கு சென்று படகு சவாரி செய்துவிட்டு பின்னர் சாமியார் பேட்டை கடற்கரைக்கு குளிக்க வந்துள்ளனர்.அப்போது ஷாம் சுந்தர் மற்றும் கோகுல பிரசாத் ஆகியோர் கடல் அலையில் சிக்கி அடித்து சென்றுள்ளனர். இதனைப் பார்த்தவர்கள் அவர்களை மீட்டு 108 அவசர ஊர்தி மூலம் பரங்கிப்பேட்டை அரசு மருத்துவமனைக்கு அழைத்துச்சென்றனர். அப்போது மருத்துவர்கள் பரிசோதனை செய்து இருவரும் ஏற்கனவே இறந்து விட்டதாக கூறினர். இதுகுறித்து புதுச்சத்திரம் காவல் நிலையத்தில் வழக்குப்பதிவு செய்து விசாரணை செய்து வருகின்றனர்.

Next Story

கொடூரக் கொலை; விரலை வைத்து குற்றவாளியைத் தூக்கிய போலீஸ் - அதிரவைக்கும் வாக்குமூலம்

Published on 20/07/2024 | Edited on 20/07/2024
Accused in Cuddalore family case arrested in Chennai
சங்கர் ஆனந்த் -  சாகுல் அமீது

கடலூர் மாவட்டம் காராமணிக்குப்பம் பகுதியைச் சேர்ந்தவர் சுகந்தகுமார்(43) இவர் தனது தாய் கமலேஸ்வரி(60) மற்றும் 10 வயது மகனுடன் காராமணிக்குப்பம் பகுதியில் வசித்து வருகிறார். சுகந்தகுமாருக்கு இரு திருமணமாகி இரண்டு மனைவிகளையும் பிரிந்து தாய் மற்றும் 2வது மனைவிக்குப் பிறந்த 10 வயது மகனுடன் வாழ்ந்து வருகிறார். இந்த நிலையில் கடந்த 15 ஆம் தேதி சுகந்தகுமார், கமலேஸ்வரி, 10 வயது மகன் மூவரும் வெட்டிக்கொன்று எரிக்கப்பட்டு சடலமாகக் கிடந்துள்ளனர். பின்பு வீட்டில் இருந்து துர்நாற்றமும், புகையும் வெளி வந்ததால் அருகே இருந்தவர்கள் போலிசாருக்கு தகவல் கொடுத்துள்ளனர். 

தகவலின் பேரில் சம்பவ இடத்திற்கு வந்த போலீசார் வீட்டிற்குள் சென்று மூவர் உடலையும் கைப்பற்றி பிரேதப்பரிசோதனை செய்ய மருத்துவமனைக்கு அனுப்பி வைத்தனர். மேலும் சுற்றியிருந்தவர்களிடம் போலீசார் விசாரணை நடத்தியதில், சுகந்தகுமாரின் எதிர்வீட்டில் வசிக்கும் சங்கர் ஆனந்த் மீது போலீசாருக்கு சந்தேகம் ஏற்பட்டுள்ளது. அவரை போலீசார் நோட்டமிட்டதில் சங்கர் ஆனந்த் திடீரென தலைமறைவாகியுள்ளார். மேலும் சங்கர் ஆனந்தின் கையில் ஒரு விரலில் வெட்டுப்பட்டுக் கட்டுப்போட்டிருந்ததும் போலீசாருக்கு கூடுதல் சந்தேகத்தையும் கொடுக்க, தலைமறைவாக இருந்த ஆனந்தை செல்போன் சிக்னல் மூலம் தேடினர். அதில் சென்னை மறைமலைநகர் பகுதியில் பதுங்கி இருந்த சங்கர் ஆனந்த் மற்றும் அவரது நண்பர் சாகுல் அமீது இருவரையும் போலீசார் கைது செய்தனர். 

போலீசார் நடத்திய விசாரணையில் சங்கர் ஆனந்த், எனது அம்மாவிற்கும் சுகந்தகுமாருக்கும் திருமணத்தை மீறிய உறவு இருந்ததாக ஊரில் பலரும் பேசினர். அதனால் மனமுடைந்த எனது தாய் ரயில் முன் பாய்ந்து தற்கொலை செய்துகொண்டார். இதற்காக சுகந்தகுமாரை பழிவாங்க வேண்டும் என்று நினைத்தேன். ஆனால் அவர் பெங்களூரில் பாதி நாளும் வீட்டில் பாதி நாளும் வேலை பார்த்து வந்தார்.

இந்த நிலையில் அவரது மகனை அழைத்துக் கேட்டபோது அவன் என்னை மரியாதை இல்லாமல் திட்டினான். அதனால் அவனை நான் அடித்ததை அவனது பாட்டி கமலேஸ்வரியிடம் கூறி அவர், என்னைக் கடுமையாகத் திட்டினார். காரி துப்பி அசிங்கப்படுத்தினார். இதனைத் தொடர்ந்து சுகந்த குமாரைத் தீர்த்துக்கட்ட முடிவு செய்ய  நானும் எனது கூட்டாளிகளும் சேர்ந்து 13 ஆம் தேதி இரவு சுகந்தகுமார் வீட்டின் கதவைத் தட்டினோம். அப்போது கதவைத் திறந்த சுகந்தகுமாரை வெட்டி கொலை செய்தேன் பதிலுக்கு அவர் என் கை விரலை  வெட்டிவிட்டார். பின்பு எங்களைத் தாக்க வந்த கமலேஸ்வரியையும் கொலைசெய்தேன். 10 வயது சிறுவனை வெளியேவிட்டால் மாட்டிக்கொள்வோம் என்று கூறி அவனையும் கழுத்தை அறுத்து கொலை செய்தேன்.

பின்பு மறுநாள் பக்கத்து வீட்டு வழியாகத் தப்பித்துச் சென்றோம். ஆனால் துர்நாற்றம் வந்தால் மாட்டிக்கொள்வோம் என்று 14 ஆம் தேதி   நண்பர் சாகுல் அமீதிடம் பெட்ரோல் வாங்கி வரச்சொல்லி மீண்டும் வந்து மூன்று பேரின் உடலிலும் ஊற்றி எரித்துவிட்டேன். பின்னர் வீட்டிலிருந்த நகை, பணம் ஆகியவற்றை கொள்ளையடித்துச் சென்றுவிட்டோம். இதனிடையே சுகந்தகுமார் வெட்டியதில் எனது கட்டை விரல் பாதி துண்டாகித் தொங்கிக்கொண்டிருந்தது. அதனை வெட்டி புதரில் வீசிவிட்டு சென்னைக்கு வந்து தலைமறைவாகிவிட்டேன்” என்று வாக்குமூலம் அளித்துள்ளார் இதனைத் தொடர்ந்து கொலைவழக்குப் பதிவு செய்த போலீசார் இருவரிடமும் விசாரணை நடத்தி வருகின்றனர்.