Skip to main content

ஆத்தூர் விவசாயியை கொலை செய்தது ஏன்? பிடிபட்ட சாராய வியாபாரி பகீர் வாக்குமூலம்!

Published on 08/12/2021 | Edited on 08/12/2021

 

 Attur  farmer case Confession of captured liquor dealer
சுப்ரமணி

 

ஆத்தூர் அருகே வாரிசு இல்லாத சொத்தை அபகரிக்கும் திட்டத்துடன் விவசாயியைக் கொலை செய்த வழக்கில் கைது செய்யப்பட்டுள்ள சாராய வியாபாரி உள்ளிட்ட முக்கிய குற்றவாளிகள் பரபரப்பு வாக்குமூலம் அளித்துள்ளனர்.

 

நாமக்கல் மாவட்டம், நாமகிரிப்பேட்டை அருகே உள்ள அரியாக்கவுண்டன்பட்டியைச் சேர்ந்தவர் சுப்பு என்கிற சுப்ரமணி (74), விவசாயி. இவருக்கு சேலம் மாவட்டம் ஆத்தூர் அருகே உள்ள கல்பகனூரில் 6 ஏக்கர் விவசாய நிலம் உள்ளது. திருமணம் செய்துகொள்ளாமல் தனியாக ஒரு வீட்டில் வசித்துவந்தார் சுப்ரமணி. இந்நிலையில், தனது நிலத்தை ஆத்தூரைச் சேர்ந்த சாராய வியாபாரியான பெருமாள் (55) என்பவருக்கு, கடந்த மார்ச் மாதம் 1.26 கோடி ரூபாய்க்கு விற்பனை ஒப்பந்தம் செய்துள்ளார். இதற்காக அப்போது பெருமாள், முன்பணமாக 10 லட்சம் ரூபாயை சுப்ரமணிக்கு கொடுத்து, நிலத்தை தன் பெயரில் ஒப்பந்தம் செய்துகொண்டார். சில நாட்களில் எஞ்சியுள்ள முழு தொகையையும் செட்டில்மெண்ட் செய்து விடுவதாகவும் தெரிவித்திருக்கிறார்.

 

இந்த வியாபாரம் முடிந்த சில நாட்கள் கழித்து, அதாவது கடந்த மார்ச் மாதம் 23ஆம் தேதி சுப்ரமணி திடீரென்று மாயமானார். அவருடைய விவசாய நிலத்தைக் குத்தகைக்கு எடுத்துள்ள இந்திய கம்யூனிஸ்ட் கட்சியைச் சேர்ந்த கண்ணன் என்பவர், நிலத்தை விற்பனை ஒப்பந்தம் செய்துகொண்டதில் சுப்ரமணிக்கும், பெருமாளுக்கும் தகராறு ஏற்பட்டதாகவும், அவர் மாயமானதில் சந்தேகம் இருப்பதாகவும் நாமகிரிப்பேட்டையில் வசித்துவரும் சுப்ரமணியின் தம்பி மகள் கனகத்திடம் தெரிவித்துள்ளார். 

 

tt
பெருமாள்

 

இதையடுத்து, தனது பெரியப்பாவைக் கண்டுபிடித்துக் கொடுக்குமாறு உயர் நீதிமன்றத்தில் கனகம், ஆட்கொணர்வு மனுத்தாக்கல் செய்தார். ஆரம்பத்தில் இந்த வழக்கை விசாரித்துவந்த நாகிரிப்பேட்டை காவல் நிலைய காவல்துறையினர், பின்னர் சம்பவ இடம் ஆத்தூர் சரகத்திற்கு உட்பட்டது என்பதால், வழக்கு விசாரணையை ஆத்தூர் காவல் நிலையத்திற்கு மாற்றினர். ஆத்தூர் காவல்துறையினர் நடத்திய தீவிர விசாரணையில், விவசாயி சுப்ரமணி காணாமல் போகவில்லை; அவர் கொலை செய்யப்பட்டிருப்பது தெரியவந்தது. 

 

th
ராமதாஸ்

 

அவருடைய நிலத்தை விற்பனை ஒப்பந்தம் செய்துகொண்ட பெருமாள்தான் இந்தக் கொலைக்கு மூளையாக செயல்பட்டிருப்பதும் தெரியவந்தது. சுப்ரமணிக்கு நேரடி வாரிசுகள் இல்லாததால், அவருடைய நிலத்தை மேற்கொண்டு பணமே கொடுக்காமல் மொத்தமாக வளைத்துப் போட்டுக்கொள்ள திட்டமிட்டிருக்கிறார் பெருமாள். தனது திட்டத்திற்கு உதவும்படி, அவருடைய கூட்டாளிகளான ராமதாஸ் (27), அறிவழகன், சக்திவேல், தினேஷ், முஸ்தபா ஆகியோரிடம் கேட்டுள்ளார். காதும் காதும் வைத்தமாதிரி காரியத்தைக் கச்சிதமாக முடித்துக்கொடுத்தால் ஒவ்வொருவருக்கும் தலா 3 லட்சம் ரூபாய் கொடுப்பதாகவும் ஆசை வார்த்தை கூறியுள்ளார்.

 

இதற்கு ஒப்புக்கொண்ட அவர்கள், பெருமாளுடன் கூட்டு சேர்ந்து கடந்த மார்ச் 23ஆம் தேதியன்று சுப்ரமணியை, சிவங்காபுரம் சக்திவேலுக்கு சொந்தமான கரும்பு தோட்டத்திற்குப் பலவந்தமாக தூக்கிச்சென்று கை, கால்களைக் கட்டிப்போட்டு மிரட்டியுள்ளனர். நிலத்திற்கு முழு தொகையும் கொடுத்துவிட்டதுபோல முத்திரைத்தாளில் எழுதி, அதில் கையெழுத்துப் போடுமாறு மிரட்டியுள்ளனர். 

 

th
சக்திவேல்

 

இந்த மிரட்டலுக்கு சுப்ரமணி மசியாததால், அவரைக் கயிற்றால் கழுத்தை இறுக்கிக் கொலை செய்துள்ளனர். பின்னர் சடலத்தை, சக்திவேலின் தோட்டத்து நிலத்தில் புதைத்துவிட்டு ஒன்றும் தெரியாததுபோல் அவரவர் வழக்கமான வேலைகளில் ஈடுபட்டுவந்திருப்பது விசாரணையில் தெரியவந்தது. இந்த வழக்கில் சம்பந்தப்பட்ட ராமதாஸ், அறிவழகன் ஆகிய இருவரும் முதற்கட்டமாக கைது செய்யப்பட்டனர். அவர்கள் மூலமாக சடலம் புதைக்கப்பட்ட இடத்தில் ஜே.சி.பி. இயந்திரத்தின் உதவியுடன் பல இடங்களில் தோண்டிப் பார்த்தும் சடலம் மட்டும் கிடைக்கவில்லை. 

 

தலைமறைவாக இருந்த பெருமாள், சக்திவேல், தினேஷ், முஸ்தபா ஆகியோரை காவல்துறையினர் தேடிவந்த நிலையில், கடந்த மூன்று நாட்களுக்கு முன்பு ஆத்தூர் குற்றவியல் நீதித்துறை நடுவர் ரங்கராஜன் முன்னிலையில் தினேஷும், ஆத்தூர் ஊரக காவல் நிலைய ஆய்வாளர் ரஜினிகாந்த் முன்னிலையில் முஸ்தபாவும் சரணடைந்தனர். சம்பவ இடத்திற்கு முஸ்தபாவை அழைத்துச் சென்ற காவல்துறையினர், அவர் கைகாட்டிய இடங்களில் எல்லாம் தோண்டிப் பார்த்தும் சடலம் கிடைக்கவில்லை. இதனால் காவல்துறையினர் ஏமாற்றமடைந்தனர். 

 

 Attur  farmer case Confession of captured liquor dealer

 

இந்நிலையில், காவல்துறைக்குப் போக்குக் காட்டிவந்த சாராய வியாபாரி பெருமாள், சக்திவேல் ஆகிய இருவரையும் டிச. 5ஆம் தேதி இரவு காவல்துறையினர் கைது செய்தனர். அவர்கள் இருவரும் காவல்துறையில் அளித்துள்ள பகீர் வாக்குமூலம் வருமாறு: 

 

“சுப்ரமணி கொலை வழக்கில் ராமதாஸ், அறிவழகன் ஆகிய இருவரும் காவல்துறையிடம் சிக்கிக்கொண்டதால், எப்படியும் அவர்கள் எங்களைக் காட்டிக்கொடுத்துவிடுவார்கள் என பயந்தோம். சடலம் கிடைத்துவிட்டால் நிச்சயமாக நாங்கள் தப்பிக்க முடியாது என்பதால், ராமதாஸும் அறிவழகனும் பிடிபட்ட அன்று, இரவோடு இரவாக சக்திவேலின் தோட்டத்தில் புதைக்கப்பட்ட சுப்ரமணியின் சடலத்தைத் தோண்டி எடுத்தோம். அப்போது சடலம் முற்றிலும் சிதைந்து வெறும் உடைந்த எலும்புத் துண்டுகள்தான் கிடைத்தன. அவற்றை எல்லாம் சாக்கு மூட்டையில் கட்டி எடுத்துச்சென்று, ராமநாயக்கன்பாளையம் வசிஷ்ட நதியில் வீசிவிட்டோம். அழுகிப்போன சதைகளும் கொஞ்சம் கிடைத்தன. அவற்றை சக்திவேலுக்குச் சொந்தமான விவசாய கிணற்றில் போட்டுவிட்டு தலைமறைவாகிவிட்டோம். நீதிமன்றத்தில் சரணடைய திட்டமிட்டிருந்த நிலையில், எங்களைக் காவல்துறையினர் கைது செய்துவிட்டனர்.” இவ்வாறு வாக்குமூலத்தில் கூறியுள்ளனர். 

 

 Attur  farmer case Confession of captured liquor dealer

 

இதையடுத்து அவர்கள் கூறியபடி வசிஷ்ட நதியில் சுப்ரமணியின் எலும்புத்துண்டுகள் கிடைக்கிறதா என காவல்துறையினர் தேடிப்பார்த்தனர். நதியோரமாக கரை ஒதுங்கிய ஒரு சாக்குமூட்டையைப் பிரித்து பார்த்தபோது ஏராளமான எலும்புகள் துண்டுத் துண்டாகக் கிடப்பது தெரியவந்தது. எனினும், கொல்லப்பட்ட நபரின் மண்டை ஓடு மட்டும் கிடைக்கவில்லை. சேகரிக்கப்பட்ட எலும்புக்கூடுகளுக்கு, அந்த இடத்திலேயே சேலம் அரசு மருத்துவக் கல்லூரி மருத்துவமனை சட்டம் சார்ந்த மருத்துவர் கோகுலகண்ணன் தலைமையில் உடற்கூராய்வு செய்யப்பட்டது. 

 

சுப்ரமணியின் மண்டை ஓடு கிடைக்காததால், கைப்பற்றப்பட்ட எலும்புத் துண்டுகள் அவருடையதுதானா என்பது உடனடியாக கண்டுபிடிக்க முடியவில்லை. சில எலும்புத்துண்டுகள் மரபணு பரிசோதனைக்காக புனேயில் உள்ள தடய அறிவியல் ஆய்வுக்கூடத்திற்கு அனுப்பி வைக்கப்பட உள்ளது. கிட்டத்தட்ட 8 மாதங்களுக்கு முன்பு காணாமல் போனதாகச் சொல்லப்பட்ட விவசாயி, கொலை செய்யப்பட்டார் என்பதையும், கொலையாளிகளையும் காவல்துறையினர் திறம்பட துப்புதுலக்கியுள்ளனர். ஆளில்லா சொத்துக்காக நடந்த இந்தக் கொலை சம்பவம் ஆத்தூர் சுற்றுவட்டாரத்தில் பெரும் பரபரப்பை ஏற்படுத்தியுள்ளது.

 

 

சார்ந்த செய்திகள்

Next Story

கொலை வழக்கிலிருந்து திமுக முன்னாள் எம்.எல்.ஏ விடுதலை

Published on 26/02/2024 | Edited on 26/02/2024
Ex-DMK MLA acquitted in case

கொலை வழக்கிலிருந்து திமுக முன்னாள் எம்எல்ஏ ரங்கநாதன் விடுதலை செய்யப்பட்டுள்ளார்.

சென்னை கொளத்தூர், காந்திநகர் பகுதியைச் சேர்ந்தவர் மாற்றுத்திறனாளி புவனேஸ்வரன். மெக்கானிக் தொழில் செய்து வந்த புவனேஸ்வரன் கடந்த 2012 ஆம் ஆண்டு ஜூலை மாதம் மர்ம கும்பல் ஒன்றால் வெட்டிப் படுகொலை செய்யப்பட்டார். போலீசார் வழக்குப்பதிவு செய்து விசாரணை மேற்கொண்டதில் நிலத்தகராறு தொடர்பாக இந்த கொலை சம்பவம் நடந்தது தெரியவந்தது.

இந்த வழக்கில் சையது இப்ராஹிம், செல்வம், முரளி உள்ளிட்டோருக்கு எதிராக விசாரணை நீதிமன்றத்தில் குற்றப்பத்திரிகை தாக்கல் செய்யப்பட்டது. அதைத்தொடர்ந்து இந்த வழக்கில் வில்லிவாக்கம் தொகுதி முன்னாள் எம்எல்ஏ ரங்கநாதன் தூண்டுதலின் பேரில் தன்னுடைய மகன் கொலை செய்யப்பட்டதாகவும், தாக்கல் செய்யப்பட்ட குற்றப்பத்திரிக்கையில் அவருடைய பெயர் இல்லை எனவே இதை ரத்துசெய்து, இந்த வழக்கை சிபிஐ விசாரிக்க வேண்டும் என புவனேஸ்வரனின் தந்தை சென்னை உயர்நீதிமன்றத்தில் மனுத்தாக்கல் செய்திருந்தார்.

இதனை விசாரித்த சென்னை உயர்நீதிமன்றம், குற்றப்பத்திரிக்கையில் முரண்பாடுகள் இருப்பதால் அதனை ரத்து செய்து சிபிஐ விசாரணை நடத்த 2014 ஆம் ஆண்டு உத்தரவிட்டது. அதன் பிறகு முறையாக விசாரணை செய்யப்பட்டு திமுக முன்னாள் எம்எல்ஏ ரங்கநாதன், சையது இப்ராஹிம், செல்வம், சதீஷ், முரளி, குமார், தணிகாசலம் உள்ளிட்ட 12 பேர் மீது சிறப்பு நீதிமன்றத்தில் குற்றப்பத்திரிகை தாக்கல் செய்யப்பட்டது.

சென்னை மாவட்ட ஆட்சியர் அலுவலகத்தில் உள்ள எம்எல்ஏ, எம்பிக்கள் மீதான வழக்குகளை விசாரிக்கும் சிறப்பு நீதிமன்றம் மன்றத்தில் விசாரணை நடைபெற்றது. இந்நிலையில் இந்த வழக்கில் நீதிபதி தீர்ப்பளித்துள்ளார். அதில் முன்னாள் எம்எல்ஏ உட்பட அனைவரும் விடுதலை செய்யப்படுவதாக தெரிவிக்கப்பட்டுள்ளது. அரசு தரப்பில் சாட்சிகள் முழுமையாக நிரூபிக்கப்படவில்லை எனக் கூறி நீதிபதி கே.ரவி தன்னுடைய தீர்ப்பில் குறிப்பிட்டுள்ளார்.

Next Story

மருத்துவரை 18 முறை அரிவாளால் வெட்டிய சம்பவம்; விசாரணையில் வெளிவந்த திடுக்கிடும் தகவல்

Published on 26/02/2024 | Edited on 26/02/2024
A doctor was slashed 18 times with a sickle in maharashtra

மகாராஷ்டிரா மாநிலம், நாசிக் மாவட்டத்தைச் சேர்ந்தவர் கைலாஷ் ரதி (48). இவர், பஞ்ச்வதி பகுதியில் உள்ள ஒரு தனியார் மருத்துவமனையில் மருத்துவராக பணியாற்றி வந்தார். இந்நிலையில், கைலாஷ் ரதி, கடந்த 23ஆம் தேதி அன்று இரவு நேர பணியில் ஈடுபட்டுக் கொண்டிருக்கும் போது செல்போனில் பேசிக் கொண்டிருந்தார். 

அப்போது, அந்த மருத்துவமனைக்குள் அத்துமீறி ஒரு மர்ம நபர் உள்ளே நுழைந்து, மறைந்திருந்து கைலாஷ் ரதியைக் கடுமையாகத் தாக்கியுள்ளார். மேலும், அவர் தான் மறைத்து வைத்திருந்த அரிவாளால் கைலாஷ் ரதியை சரமாரியாக வெட்டியுள்ளார். இதில் படுகாயமடைந்த கைலாஷ், ரத்த வெள்ளத்தில் கீழே விழுந்தார். இவரது அலறல் சத்தம் கேட்ட அங்கிருந்தவர்கள், அங்கு விரைந்து வந்தனர். ஆனால், அவர்கள் வருவதை உணர்ந்த அந்த நபர், அங்கிருந்து தப்பி ஓடியுள்ளார். இந்த தாக்குதலில் படுகாயமடைந்த கைலாஷ் மருத்துவமனையில் தீவிர சிகிச்சை பெற்று வருகிறார். 

இந்த சம்பவம் குறித்து தகவல் அறிந்து விரைந்து வந்த போலீசார், மருத்துவமனையில் வைக்கப்பட்டிருந்த சிசிடிவி கேமரா காட்சிகளை ஆய்வு செய்தனர். அதில், தாக்குதல் நடத்திய அந்த நபர் அந்த மருத்துவமனையில் பணியாற்றி வந்த முன்னாள் ஊழியரின் கணவர் என்பது தெரியவந்தது. இதனையடுத்து, இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வந்தனர்.

அந்த விசாரணையில், மருத்துவமனையில் பணிபுரிந்து வந்த பெண் முன்னாள் ஊழியர் 12 லட்ச ரூபாய்க்கு மேல் முறைகேடு செய்ததால் சமீபத்தில் வேலையில் இருந்து நீக்கப்பட்டுள்ளார். மனைவியை வேலையை விட்டு நீக்கியதால் ஆத்திரமடைந்த கணவர், மருத்துவமனைக்குள் அத்துமீறி நுழைந்து மருத்துவரை அரிவாளால் 18 முறை சரமாரியாக வெட்டியுள்ளார் என்பது தெரியவந்தது. இந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.