Skip to main content

தலித்துகள் மீது தொடரும் தாக்குதல்! நடவடிக்கை எடுக்காவிட்டால் போராட்டம் வெடிக்கும்: சிபிஎம் எச்சரிக்கை

Published on 14/02/2018 | Edited on 14/02/2018
communist


தலித்துகள் தொடர்ந்து தாக்குதல் தொடுப்பவர்கள் மீது காவல்துறை முறையான நடவடிக்கை எடுக்காவிட்டால் போராட்டம் வெடிக்கும் என மார்க்சிஸ்ட் கம்யூனிஸ்ட் கட்சியின் மாநில செயற்குழு உறுப்பினர் ஏ.லாசர் எச்சரித்தார்.

இதுகுறித்து நேற்று புதுக்கோட்டையில் செய்தியாளர்களுக்கு அவர் அளித்த பேட்டியில்,

கொலை, கொள்ளை, வழிப்பறி என புதுக்கோட்டை மாவட்டத்தில் தொடாந்து சமூகவிரோதச் செயல்கள் அதிகரித்து வருகிறது. சாதி ஆதிக்க வெறியர்களால் தலித்துகள் மீதான தாக்குதல் சமீப காலங்ளில் அதிகரித்துள்ளது. தஞ்சாவூர் மாவட்டம் வெட்டுவாக்கோட்டையைச் சேர்ந்த எங்கள் கட்சியின் மாவட்டக்கு உறுப்பினர் ஆர்.வாசு. இவர் புதுக்கோட்டை மாவட்டம் ஊரணிபுரத்தில் இரு தரப்பினரிடையே ஏற்பட்ட பிரச்சினையை பேசித் தீர்த்து வைத்ததற்காக சாதி ஆதிக்க வெறியர்கள் கொலைவெறியுடன் தாக்கியுள்ளனர். வாசு தலித் என்பதன் காரணமாகவே இத்தகைய தாக்குதல் தொடுக்கப்பட்டது. பாதிக்கப்பட்ட வாசு கொடுத்த புகார் மனுமீது நடவடிக்கை எடுப்பதற்கு மாறாக வாசு உள்ளிட்ட தலித்துகள் மீதும் பொய்வழக்குப் பதிவுசெய்து பழிவாங்குகிறது காவல்துறை.

பழைய கந்தர்வகோட்டையில் மாட்டுப் பொங்கல் திருவிழாவில் பிற்படுத்தப்பட்ட வகுப்பினரின் மாடுகளை அவிழ்த்து விட்ட பிறகே தலித்துகள் அவிழ்த்துவிடுவது வழக்கமாக இருந்துள்ளது. கடந்த பொங்கலன்று பிற்படுத்தபட்ட வகுப்பினரின் ஒரிரு மாடுகள் பாக்கி இருக்கும்போது வெடிச்சத்ததைக் கேட்டு மிரண்டதால் தலித் வீட்டில் நின்ற ஒரு மாடு அவிழக்கப்பட்டது. இதனால், ஆத்திரமடைந்த சாதி வெறியர்கள் தலித்துகளின் வீடுகளுக்குள் புகுந்து கொலைவெறித் தாக்குதல் தொடுத்துள்ளனர். இந்த வழக்கில் இரண்டு தரப்பினரிடமும் புகார் பெற்றுக்கொண்டு சமாதானமாகப் போகும்படி காவல்துறையினர் கட்டப் பஞ்சாயத்துப் பேசுகின்றனர்.

இதேபோல, புதுக்கோட்டையை அடுத்து மேலூர் கிராமத்தில் பொங்கல் திருவிழாவை ஒலிபெருக்கி வைத்து தலித்துகள் கொண்டாடியதைப் பொருத்துக்கொள்ள முடியாமல் சாதி வெறியர்கள் தாக்குதல் தொடுத்துள்ளனர். இதிலும் காவல்துறையினரின் நடவடிக்கை பாரபட்சமாகவே இருந்துள்ளது. அன்னவாசல் ஒன்றியம் பேயால் வலையபட்டியில் நடைபெற்ற அன்னதான விழாவில் தலித் இளைஞர்கள் கைலியை மடித்துக்கட்டித் திரிந்ததற்காக அவர்களை அரை நிர்வாணமாக்கி தாக்கியுள்ளனர்.

ஆலங்குடியை அடுத்து மேலநெம்பக்கோட்டை, வெள்ளாகுளம் உள்ளிட்ட இடங்களில் சாதி மறுப்புத் திருமணம் செய்த தம்பதியரை பிரித்து வைக்கும் முயற்சியில் ஆதிக்க சாதியினர் தொடர்ந்து ஈடுபட்டு வருகின்றனர். வட மாநிலங்களில் ‘காப’ என்ற பெயரில் காதலர்களை சித்திரவதை செய்வது, அபராதம் விதிப்பது, கொலை செய்வது நடைமுறையாக உள்ளது. இதேபோல, புதுக்கோட்டை மாவட்டம் ஆலங்குடி பகுதியில் ‘நாடு’ என்ற பெயரில் இத்தகைய கொடுமைகளை அரங்கேற்றும் நடவடிக்கை இருப்பது தெரிய வருகிறது.

சாதிமறுப்பு திருமணம் செய்தவர்களைப் பாதுகாக்கும் விதமாக கடந்த 2012-ல் நாடாளுமன்றத்தில் காங்கிரஸ் அரசு தாக்கல் செய்து, கிடப்பில் போடப்பட்டுள்ள புதிய சட்ட திருத்த மசோதாவை மத்திய அரசு நிறைவேற்ற வேண்டும். சட்டத்திற்குப் புறம்பாக செயல்படும் நபர்கள்மீது காவல்துறையினர் உறுதியான நடவடிக்கை எடுக்க வேண்டும். காவலத்துறை முறையான நடவடிக்கை எடுக்கவில்லையென்றால் மார்க்சிஸ்ட் கம்யூனிஸ்ட் கட்சி மக்களைத் திரட்டி போராட்டம் நடத்தும் என்றார்.

மேலும், செய்தியாளர்களின் கேள்விக்கு பதிலளித்த அவர், கடந்த ஆண்டு விவசாயிகளுக்கு போதுமான அளவிற்கு நிவாரணம் வழங்கவில்லை. இதில், விவசாயத் தொழிலாளர்கள் கடுமையான பாதிப்புக்கு உள்ளாகினர். நிகழாண்டிலும் தமிழகம் கடுமையான வறட்சியை சந்தித்து வருகிறது. தேசிய ஊரக வேலை உறுதித் திட்டத்தில் முறையாக வேலையும், சம்பளமும் வழங்க தமிழக அரசை வலியுறுத்தி மார்ச் மாதம் பல்வேறு அமைப்புகளை இணைத்துக்கொண்டு மாவட்ட ஆட்சியர் அலுவலகங்கள் முன்பாக போராட்டத்தில் ஈடுபடத் திட்டமிட்டு உள்ளோம்.

மறைந்த முதல்வர் ஜெயலலிதா குற்றவாளி என்று நீதிமன்றம் தீர்ப்பு அளிக்கப்பட்டுள்ளதால் தான் அவரது படத்தை தமிழக சட்டப்பேரவையில் வைத்ததற்கு எதிர்க்கிறோம். அவரோடு குற்றம் சாட்டப்பட்டவர்கள் சிறையில் இருக்கின்றனர். ஜெயலலிதா உயிருடன் இல்லையென்பதால் சிறையில் இல்லை. அவ்வளவுதான். குற்றவாளிகளில் ஆண், பெண் எனப் பிரித்துப்பார்க்க முடியாது. ஜெயலலிதாவின் படத்தை வைப்பதன் மூலம் தவறான முன்னுதாரணத்தை ஏற்படுத்தி விடக்கூடாது என்பதற்காகவே எதிர்க்கிறோம் என்றர். பேட்டியின் போது கட்சியின் மாவட்டச் செயலாளர் எஸ்.கவிவர்மன், செயற்குழு உறுப்பினர் ஏ.ஸ்ரீதர், தீண்டாமை ஒழிப்பு முன்னணி மாவட்டத் தலைவர் சி.ஜீவானந்தம், செயலாளர் சி.அன்புமணவாளன் உள்ளிட்டோர் உடனிருந்தனர்.

- இரா.பகத்சிங்

சார்ந்த செய்திகள்

Next Story

“வெந்ததைத் தின்பது, வாயில் வந்ததைப் பேசுவது..” - ஆளுநருக்கு கனகராஜ் கண்டனம்

Published on 30/01/2024 | Edited on 30/01/2024
CPM Kanagaraj condemn on Governor Ravi's Keezhvenmani comment

தமிழ்நாடு ஆளுநர் ஆர்.என்.ரவி, பல்வேறு நிகழ்ச்சிகளில் பங்கேற்பதற்காக கடந்த 28ம் தேதி நாகப்பட்டினம் சென்றார். தொடர்ந்து, கீழ்வேளூர் ஒன்றியம் கீழவெண்மணியில் உள்ள தியாகிகள் நினைவு இல்லத்துக்குச் சென்றார். அங்கு, கீழ்வெண்மணியில் 1968-ல் நடந்த படுகொலையின்போது, துப்பாக்கி குண்டுபட்டு காயமடைந்து, உயிர் பிழைத்த மார்க்சிஸ்ட் கம்யூனிஸ்ட் கட்சி உறுப்பினர் தியாகி ஜி.பழனிவேலை சந்தித்தார்.  

முன்னதாக தியாகி ஜி.பழனிவேல் செய்தியாளர்களைச் சந்தித்தபோது, “ஆளுநர் என்னைச் சந்திப்பதில் துளியும் விருப்பமில்லை” என்று தெரிவித்திருந்தார். 

CPM Kanagaraj condemn on Governor Ravi's Keezhvenmani comment

இந்நிலையில், கீழ்வெண்மணி குறித்து ஆளுநர் ஆர்.என்.ரவி, ஆளுநர் மாளிகை எக்ஸ் சமூகவலைதளப்பக்கத்தில், “நிர்வாக அக்கறையின்மை மற்றும் ஊழல் குற்றச்சாட்டால் நாகப்பட்டினம் மாவட்டத்தில் தகுதி வாய்ந்த ஏழை கிராமத்தினர் பிரதமரின் வீடு கட்டும் திட்டத்தின் பலனைப் பெற முடியாமல் போனது வருத்தமளிக்கிறது. பாட்டாளி வர்க்க சாம்பியனாக அழைத்துக்கொள்ளும் ஓர் அரசியல் கட்சியால் கீழ்வெண்மணி கிராமத்தில் சுற்றிலும் ஏழைகளின் ஓலை குடிசைகளுக்கு மத்தியில், படுகொலை செய்யப்பட்ட 44 ஏழைத் தொழிலாளர்களை நினைவுகூரும் வகையில் விலையுயர்ந்த கான்கிரீட் கட்டுமானம் ஒரு நினைவுச்சின்னமாக அமைந்திருப்பது முரணானது மட்டுமின்றி தியாகிகள் மற்றும் ஏழைகளுக்கு இழைக்கப்பட்ட கேலிக்குரிய அவமானமும் கூட" என்று தெரிவித்தார். இதற்கு பல்வேறு தரப்புகளில் இருந்தும் கண்டனங்கள் எழுந்துள்ளன. 

CPM Kanagaraj condemn on Governor Ravi's Keezhvenmani comment

இது தொடர்பாக சி.பி.எம். கட்சியின் மாநில செயற்குழு உறுப்பினர் கனகராஜ் நமக்கு அளித்த பேட்டியில், “வெந்ததைத் தின்பது, வாயில் வந்ததைப் பேசுவது என்பதை ஆர்.என்.ரவி தன்னுடைய வழக்கமாக வைத்திருக்கிறார். அவருக்கு தியாகத்தை பற்றியோ உயிர் தியாகங்கள் பற்றியோ எந்த அக்கறையும் கிடையாது. உயிர்களை பறிப்பதை ஒரு தத்துவமாக வைத்திருப்போரின் வழியில் வந்தவருக்கு இது புரியாது. 

சி.பி.எம். கட்சிக்கு அனைத்து மாவட்டங்களிலும் அலுவலகங்கள் உள்ளன. ஆனால், சி.பி.எம். கட்சியின் தலைவர்கள் பலரும், நல்ல வீடுகள் இல்லாமல், வாடகை வீட்டிலோ அல்லது மிகவும் எளிமையான வீட்டில் வசிப்பார்கள். இப்படி எளிமையான வீடுகளில் இருப்பவர்கள் எல்லாம் இணைந்து மாடிவீடு (கட்சி அலுவலகம்) கட்டியிருக்கிறீர்களா என்று கேட்டால், அது எவ்வளவு நகைப்புக்குரியது. தேசத்தின் நலனுக்காக தங்களை அர்ப்பணித்துக் கொள்கிறவர்களைப் பற்றிய மிகவும் அவதூறான பதிவு அது. 

வெண்மணியில் நாங்கள் கட்டியிருக்கும் நினைவு இல்லம் என்பது அவர்களின் வரலாற்றை பேசும். தொழிலாளர்களுக்கும், விவசாய தொழிலாளர்களுக்கும் அது வரலாற்றை கற்றுக்கொடுக்கும். அதனைக் கட்டடம் எனப் பார்க்கும் மனிதருக்கும், தங்களின் வாழ்வு சிறப்பதற்காக வாழ்வையே அர்ப்பணித்துக் கொண்டவர்களின் நினைவிடம் எனப் பார்ப்பவர்களுக்கும் வித்தியாசம் இருக்கிறது. 

இந்த நினைவிடத்திற்கு பணம் கொடுத்தவர்கள் எல்லாம் எளிய மக்கள். அவர்கள், தங்கள் உணவுகளில் ஒரு பங்கை குறைத்துக் கொண்டும், தங்கள் பிள்ளைகளின் தேவைகளில் ஒரு பங்கை குறைத்துக் கொண்டும் ரூ. 5 முதல் பல ஆயிரம் ரூபாய் கொடுத்ததன் மூலம் இந்த நினைவிடம் எழுந்து நிற்கிறது. 

ஆர்.என். ரவி போன்றவர்களுக்கு சாவர்க்கர் தான் வீரர். ஆனால், எங்களைப் போன்றவர்களுக்கு வெண்மணி தியாகிகள் தான் வீரர்கள், அவர்கள் தான் எங்களுக்கு வழிகாட்டி.  

உழுபவர்களுக்கு நிலம் சொந்தம் என கட்சி முடிவு எடுத்தபோது, தன்னிடம் இருந்த நிலத்தை எல்லாம் கொடுத்தவர் நம்பூதிரிபாட். அவர் கட்சியின் பராமரிப்பில் தான் முதலமைச்சராக இருந்தார். இறக்கும் வரையிலும் அப்படித்தான் இருந்தார். இப்படித்தான் தோழர் சுந்தரய்யா இருந்தார். இதையெல்லாம் புரிந்துகொள்வதற்கான குறைந்தபட்ச அறிவும், தியாகம் குறித்தான புரிதலும் அவர்களுக்கு இருக்காது” என்று தெரிவித்தார். 

Next Story

அருந்ததியர்கள் வீட்டு மனைகள் அபகரிப்பு; மார்க்சிஸ்ட் கட்சி போராட்டம்

Published on 20/12/2023 | Edited on 20/12/2023
cpm struggle over the expropriation of Arunthathiyars' houses near Panruti

கடலூர் மாவட்டம், பண்ருட்டி வட்டம் திருவாமூர் ஊராட்சி, காமாட்சி பேட்டை கிராமம் இங்கு 1996 ஆம் ஆண்டு ஆதிதிராவிடர் நலத்துறையின் சார்பில் 83 நபர்களுக்கு குடிமனை பட்டா வழங்கப்பட்டது. இதில் 4 பேர் அருந்ததியர் இனத்தைச் சேர்ந்தவர்கள். இந்த நிலத்தை அபகரிக்கும் நோக்கத்துடன் சில தனி நபர்கள், அந்த இடத்தில் வீடு கட்ட விடாமல் தடுத்து வருகின்றனர்.

இதுகுறித்து துறை அதிகாரிகளிடம் பலமுறை புகார் தெரிவித்தும் கண்டுகொள்ளவில்லை. புதுப்பேட்டை காவல்துறையினரும் கண்டுகொள்ளவில்லை. இந்த நிலையில், தனிநபருக்கு துணைபோகும் வட்டாட்சியர் மற்றும் காவல்துறையினர் மீது உரிய நடவடிக்கை எடுக்க வலியுறுத்தி மார்க்சிஸ்ட் கம்யூனிஸ்ட் கட்சியின் சார்பில் வட்டாட்சியர் அலுவலகம் முன்பு ஆர்ப்பாட்டம் நடைபெற்றது.

சிபிஎம் பண்ருட்டி வட்டச் செயலாளர் எஸ்.கே. ஏழுமலை தலைமை தாங்கினார். மாவட்டச் செயலாளர் கோ. மாதவன், மாநிலக் குழு உறுப்பினர் எஸ்.ஜி. ரமேஷ் பாபு, மாவட்டச் செயற்குழு உறுப்பினர்கள் வி. உதயகுமார், வி. சுப்பராயன், மாவட்டக் குழு உறுப்பினர் டி. கிருஷ்ணன், பண்ருட்டி நகரச் செயலாளர் உத்தராபதி, நெல்லிக்குப்பம் பகுதி செயலாளர் எம். ஜெயபாண்டியன், வட்டக் குழு உறுப்பினர்கள் லோகநாதன், பன்னீர், முருகன், பூர்வ சந்திரன், வினோத்குமார், தமிழ்ச்செல்வன், தேவநாதன் உள்ளிட்டவர்கள் கலந்துகொண்டு நடவடிக்கை எடுக்க வலியுறுத்தி கண்டன கோஷங்களை எழுப்பினார்கள்.