Skip to main content

சயனைடு கலந்த குளிர்பானம் கொடுத்து இளம்பெண் கொலை; பூசாரியின் திடுக்கிடும் வாக்குமூலம்!

Published on 20/11/2023 | Edited on 20/11/2023

 

Arrested priest gives sensational confession connection with  young girl case

 

சேலம் அருகே, சயனைடு கலந்த குளிர்பானம் கொடுத்து இளம்பெண்ணைக் கொன்றது ஏன் என கைதான கோயில் பூசாரி திடுக்கிடும் வாக்குமூலம் அளித்துள்ளார். 

 

சேலம் மாவட்டம் தாரமங்கலம் அருகே உள்ள சேடப்பட்டியைச் சேர்ந்தவர் பசவராஜ் (38). கல் உடைக்கும் தொழிலாளி. இவருடைய மனைவி செல்வி (28). பசவராஜ், கடந்த சில மாதங்களாகப் பெங்களூருவில் தங்கியிருந்து கல் உடைக்கும் வேலை செய்து வருகிறார். வழக்கமாக மாலையில் தனது மனைவியுடன் பசவராஜ் அலைப்பேசியில் தொடர்பு கொண்டு பேசுவார். 

 

இந்நிலையில், நவ. 15 ஆம் தேதி அவர் எப்போதும்போல் செல்வியின் அலைப்பேசிக்கு தொடர்பு கொண்டுள்ளார். அவர் எடுக்கவில்லை. அலைப்பேசி அணைத்து வைக்கப்பட்டிருந்தது தெரிய வந்தது. அன்றைய தினம் வீட்டிலிருந்து வெளியே சென்ற செல்வி, அதன்பின் வீடு திரும்பவில்லை என்பது தெரிய வந்ததை அடுத்து பசவராஜ், மனைவியைக் காணவில்லை என தாரமங்கலம் காவல்நிலையத்தில் புகார் அளித்தார். காவல்துறையினர் வழக்குப்பதிவு செய்து செல்வியைத் தேடி வந்தனர். நவ. 17 ஆம் தேதி மாலை, சேலம் திருமலைகிரி அருகே பெருமாம்பட்டியில், பெரியாண்டிச்சி அம்மன் கோயில் அருகில் உள்ள முட்புதரில் செல்வியின் சடலம் அழுகிய நிலையில் கண்டெடுக்கப்பட்டது.     

 

சடலத்தைக் கைப்பற்றிய காவல்துறையினர் கூராய்வுக்காக சேலம் அரசு மருத்துவமனைக்கு அனுப்பி வைத்தனர். முதல்கட்ட விசாரணையில்,  பெரியாண்டிச்சி அம்மன் கோயில் பூசாரி குமார்(42) என்பவர்தான், செல்வியைக் கொலை செய்து, சடலத்தை முட்புதருக்குள் வீசியிருப்பது தெரிய வந்தது. இதையடுத்து அவரைக் காவல்துறையினர் கைது செய்தனர். பசவராஜுக்கும் செல்விக்கும் பத்தாண்டுகளுக்கு முன்பு திருமணம் நடந்துள்ளது. அவர்களுக்கு அடுத்தடுத்து இரண்டு குழந்தைகள் பிறந்து  இறந்துவிட்டன. இதனால் மன அழுத்தத்திற்கு ஆளான செல்வி, அதிலிருந்து விடுபட, இன்ஸ்டாகிராம் சமூக வலைத்தளத்தில் விதவிதமான  ஆடைகளை அணிந்து கொண்டு, சினிமா பாடல்களுக்கு நடனமாடி காணொளி பதிவுகளை வெளியிட்டு வந்துள்ளார். இன்ஸ்டாவில் இவரை  2000க்கும் மேற்பட்டோர் பின்தொடர்கின்றனர்.     

 

இது ஒருபுறம் இருக்க, தனக்கு அடுத்த குழந்தையாவது நல்லமுறையில் பிறக்க வேண்டும் என்று கோயில் கோயிலாகச் சென்று வேண்டிக் கொண்டு இருந்துள்ளார். இந்தநிலையில்தான், பெருமாம்பட்டி பெரியாண்டிச்சி அம்மன் கோயிலில் வேண்டினால் குழந்தை பாக்கியம்  கிடைக்கும் என்று சிலர் சொல்லியுள்ளனர். அதை நம்பிய செல்வி, கடந்த நான்கு ஆண்டுகளாக பெரியாண்டிச்சி அம்மன் கோயிலுக்கு சென்று வந்துள்ளார். அந்தக் கோயில் பூசாரி குமார்,  அவருக்கு நல்லபடியாக குழந்தை பிறக்கும் என அருள்வாக்கு சொல்லி இருக்கிறார். மேலும் அவர், வாரந்தோறும் புதன், வெள்ளிக்கிழமைகளில் கோயிலில் விளக்கு ஏற்றி வழிபட வேண்டும் என்றும் பரிகாரம் கூறியுள்ளார். இதனால் அடிக்கடி அந்தக் கோயிலுக்கு செல்வி சென்று வந்ததில், அவருக்கும் பூசாரி குமாருக்கும் நெருக்கமான தொடர்பு ஏற்பட்டுள்ளது. 

 

இந்த  பழக்கத்தின் அடிப்படையில் பூசாரியிடம் அவர் 30 ஆயிரம் ரூபாய் கைமாத்து வாங்கியிருந்தார். மேலும், செல்வி கோயிலுக்கு வந்து செல்லும்போதெல்லாம் இருவரும் தனிமையில் நெருக்கமாகவும் இருந்துள்ளனர் என்றும் சொல்லப்படுகிறது. கோயிலுக்கு அடிக்கடி வந்து செல்லும் பெண் பக்தர்களில் இருபதுக்கும் மேற்பட்டோரிடம் பூசாரி குமாருக்கு பாலியல் ரீதியான உறவு இருந்ததாகவும் காவல்துறை தரப்பு சொல்கிறது. இந்நிலையில் நவ. 15 ஆம் தேதி அந்தக் கோயிலுக்கு வந்த செல்வியை, தனது வீட்டிற்கு வருமாறு பூசாரி குமார் அழைத்துள்ளார். அதற்கு அவர்  மறுத்துள்ளார். இதனால் கோபம் அடைந்த குமார், தான் கொடுத்த பணத்தை உடனே திருப்பிக் கொடு அல்லது நான் கூப்பிட்ட இடத்துக்கு வா என்று நெருக்கடி கொடுத்துள்ளார். இதனால் அவர்களிடையே கடும் வாக்குவாதம் ஏற்பட்டுள்ளது.    

 

இதையடுத்து செல்வி அணிந்திருந்த நகைகளைப் பறித்துக்கொள்ள திட்டமிட்ட குமார், குளிர்பானத்தில் சயனைடு விஷம் கலந்து கொடுத்து செல்விக்குக் கொடுத்துள்ளார். அதை குடித்த சிறிது நேரத்திலேயே செல்வி உயிரிழந்துவிட்டார். அதன்பிறகு செல்வி அணிந்திருந்த 6 பவுன் தாலிக்கொடி, சங்கிலிகளை எடுத்துக் கொண்ட குமார், சடலத்தை அருகில் உள்ள முட்புதரில் வீசிவிட்டு தலைமறைவாகி விட்டார். அந்த நகைகளை சேலத்தில் உள்ள ஒரு அடகு கடையில் வைத்து 1.38 லட்சம் ரூபாய் வாங்கியுள்ளார். அந்தப் பணத்துடன், தனக்கு நெருக்கமான இன்னொரு தோழியை ஏற்காடுக்கு அழைத்துச் சென்று விடுதியில் அறை எடுத்து தங்கியதாக குமார் வாக்குமூலத்தில் தெரிவித்துள்ளதாக காவல்துறையினர் கூறுகின்றனர். குமாரின் அலைப்பேசி சிம் கார்டு சமிக்ஞைகளை வைத்து குமாரை காவல்துறையினர் கைது செய்துள்ளனர். கைது செய்யப்பட்ட குமாரை, ஓமலூர் நீதிமன்றத்தில் ஆஜர்படுத்திய காவல்துறையினர், பின்னர் சேலம் மத்தியச் சிறையில் அடைத்தனர்.  

 

 

சார்ந்த செய்திகள்

Next Story

கர்ப்பிணிப் பெண்ணின் வலி மிகுந்த பயணம்; நடுவழியில் நிறுத்தப்பட்ட ரயில்

Published on 02/03/2024 | Edited on 02/03/2024
 Cuddalore Collector praised doctor who delivered  pregnant woman who was in convulsions

திருவாரூர் மாவட்டத்தைச் சேர்ந்தவர்கள் திருமுருகன் - ஷியமாளா தம்பதியர். திருமுருகன் சென்னையில் ஒரு தனியார் நிறுவனத்தில் பணிபுரிந்து வருகிறார். இவரது மனைவி ஷியமாளா 9 மாத கர்ப்பிணி. பிரசவம் பார்ப்பதற்குச் சென்னையிலிருந்து திருவாரூர் வழியாகத் தங்கள் சொந்த ஊருக்கு ரயிலில் கணவர் அழைத்துச் சென்று கொண்டிருந்தார். அந்த ரயில் விழுப்புரம் கடந்த போது நிறைமாத கர்ப்பிணி ஷியமாளாவுக்கு வலிப்பு ஏற்பட்டு மிகவும் அவதிப்பட்டுள்ளார். 

மனைவிக்கு ஏற்பட்ட நிலை கண்டு திருமுருகன் துடித்துப் போனார். உடனடியாக அங்கிருந்த பயணிகள் இது குறித்து ரயில் காப்பாளரிடம் தொடர்பு கொண்டு தகவல் தெரிவித்தனர். உடனடியாக அருகில் மருத்துவமனை இருக்கும் ரயில் நிலையத்தில் ரயிலை நிறுத்துவதற்கு முடிவு செய்தனர். திருமுருகன் மருத்துவமனையில் சேர்க்க உதவுமாறு கேட்டுக் கொண்டார். கடலூரை நெருங்கிக் கொண்டிருந்தது ரயில், அதற்குள் 108 ஆம்புலன்ஸ்-க்கு தகவல் தெரிவிக்கப்பட்டு கடலூர் திருப்பாதிரிப்புலியூர் ரயில் நிலையத்தில் 108 ஆம்புலன்ஸை டிரைவர் பெஞ்சமின் பிராங்கிளின் தயாராக நிறுத்திவிட்டு சியாமளாவின் கணவர் திருமுருகனுக்கு தகவல் தெரிவித்தார்.

ரயில் காப்பாளர், கர்ப்பிணிப் பெண் சியாமளாவின் நிலைமையைக் கருதி கடலூர் திருப்பாதிரிப்புலியூர் ரயில் நிலையத்தில் அந்த ரயில் நிறுத்தம் இல்லாதபோதிலும் ரயிலை நிறுத்தினார். ரயிலில் மயக்க நிலையில் இருந்த ஷியாமாளாவை பயணிகள் உதவியுடன் ரயில்வே தண்டவாளத்தை கடந்து 108 ஆம்புலன்ஸ் வண்டியில் கொண்டு வந்து ஏற்றினர். அதற்குள் முன்னேற்பாடாக கடலூர் அரசு மாவட்ட தலைமை மருத்துவமனையின் மகப்பேறு மருத்துவர் மகேஸ்வரி ஷியாமளாவின் உடனடி பிரசவத்திற்கு தயார் நிலையில் இருந்தார்.

ஷியாமளா மருத்துவமனைக்கு கொண்டுவரப்பட்டு சிகிச்சை அளிக்கப்பட்டது. ஷியமாளா வலிப்பு நோய் ஏற்பட்டு மயக்க நிலையில் இருந்தபோதும் அமினா கொடுத்து பிரசவம் செய்ய ஏற்பாடுகள் செய்யப்பட்டது. குழந்தை இறந்து பிறந்தாலும் பரவாயில்லை என்று தாயையாவது காப்பாற்ற வேண்டும் என்ற முயற்சியில் மருத்துவர்கள் சிகிச்சை மேற்கொண்ட நிலையில், நல்லபடியாக குழந்தையும் பிறந்தது. தாயும் நலமுடன் உள்ளார். இதனைத் தொடர்ந்து கணவர் திருமுருகன் மருத்துவக்குழுவுக்கும் ஆம்புலன்ஸ் குழுவினருக்கும் கண்ணீர் மல்க நன்றி தெரிவித்தார்.

இது குறித்து அறிந்த கடலூர் மாவட்ட ஆட்சியர் அருண் தம்புராஜ் மருத்துவமனைக்கு விரைந்து, தாய் மற்றும் குழந்தை இருவரையும் பார்த்து நலம் விசாரித்தார். இக்கட்டான சூழ்நிலையில் திறம்படச் செயல்பட்டு இரு உயிரையும் காப்பாற்றிய மருத்துவர் மகேஸ்வரி அவரது குழுவினர் மற்றும் ஆம்புலன்ஸ் ஊழியர்களையும் பாராட்டினார்.

Next Story

ஐ.டி. ஊழியர் ஏமாற்றம்; லட்சக்கணக்கில் மோசடி

Published on 02/03/2024 | Edited on 02/03/2024
18 lakh rupees scam by IT employee claiming profit from stock trading

திருச்சி திருவானைக்காவல் அழகப்பா தெரு பகுதியைச் சேர்ந்தவர் ராமச்சந்திரன்(46) பெயர் மாற்றப்பட்டுள்ளது. இவர் சென்னையில் ஐ.டி. நிறுவனத்தில் என்ஜினியராக வேலை பார்த்து வருகிறார். இவர் தனது இன்ஸ்டாகிராம் பக்கத்தில் இருந்து பகுதி நேர வேலை என்ற ஒரு லிங்கை டவுன்லோட் செய்தார். அப்போது அதில் பங்கு வர்த்தகத்தில் முதலீடு செய்தால் அதிக லாபம் ஈட்டித் தருவதாகத் தெரிவிக்கப்பட்டிருந்தது. 

இதனை நம்பிய ராமச்சந்திரன், மோசடி நபர்கள் கூறிய 8 வங்கிக் கணக்குகளுக்கு பல்வேறு தவணைகளாக கடந்த 3 மாதத்தில் ரூ.18 லட்சத்து 45 ஆயிரம் பணத்தை அனுப்பி வைத்தார். பின்னர் அந்த மர்ம ஆசாமிகள் அவருக்கு லாபத் தொகையும் தரவில்லை. முதலீடு செய்த பணத்தையும் திரும்பத் தராமல் ஏமாற்றிவிட்டனர். பின்னர் தான் ஏமாற்றப்பட்டதை உணர்ந்து கொண்ட ராமச்சந்திரன், இதுகுறித்து ஆன்லைன் மூலமாக திருச்சி மாநகர சைபர் கிரைம் போலீசில் புகார் செய்தார். அதன் பேரில் இன்ஸ்பெக்டர் கன்னிகா வழக்குப் பதிவு செய்து விசாரணை நடத்தி வருகிறார்.