Skip to main content

சாலையில் காயவைக்கப்பட்ட தானியங்கள்... வழுக்கிவிழுந்து பெண் உயிரிழப்பு... 

Published on 14/09/2020 | Edited on 14/09/2020

 

Ariyalur incident women passed away
மாதிரி படம் 


அரியலூர் மாவட்டம் சிலுப்பனூரைச் சேர்ந்த ரவி என்பவரது மனைவி சாந்தி (46)  இவருக்கு கடந்த சில நாட்களாக உடல்நிலை சரியில்லாததால், அவரது மகன் அமுதரசன் தனது டூவீலரில், சிலுப்பனூரில் இருந்து விருத்தாசலம் வழியாக புதுச்சேரி மருத்துவமனைக்கு அழைத்துச் சென்றார். அப்போது, விருத்தாசலம் புறவழிச்சாலையில் உள்ள தனியார் திருமண மண்டபம் அருகே நீண்ட தூரத்திற்கு கம்பு கதிர்கள் சாலையில் அடிப்பதற்காக பரப்பி வைத்துள்ளனர். அமுதரசன் ஓட்டிச் சென்ற பைக் அந்த கம்பு கதிர்கள் மீது ஏறிச் சென்றது. 


கம்பின் வழுவழுப்புத்தன்மையால் டூவீலர் வழுக்கிவிட்டது. இதனால் பைக் நிலைத்தடுமாறி கீழே சாய்ந்தது. பைக்கில் இருந்து கீழே விழுந்தார் சாந்தி. அந்தநேரம் பார்த்து சேலம் நோக்கிச் சென்ற அடையாளம் தெரியாத லாரி ஒன்று சாந்தி மீது பலமாக மோதியது. இதில் சம்பவ இடத்திலேயே சாந்தி உயிரிழந்துள்ளார். அமுதரசன் அதிர்ஷ்டவசமாக உயிர் தப்பியுள்ளார். இதுகுறித்து தகவலறிந்த விருத்தாசலம் போலீசார் சம்பவ இடத்திற்கு விரைந்துசென்று சாந்தியின் உடலைக் கைப்பற்றி பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்த புகாரின்பேரில் போலீசார் விசாரணை நடத்தி வருகிறார்கள். 


மேலும், இதேபோன்று விருத்தாசலம்- உளுந்தூர்பேட்டை, விருத்தாசலம்- தொழுதூர், விருத்தாசலம்- ஜெயங்கொண்டம், விருத்தாசலம்- சிதம்பரம், விருத்தாசலம்- கடலூர், விருத்தாசலம்- சேலம் இப்படி விருத்தாசலத்தில் இருந்து வெளியூர் செல்லும் பெரும்பாலான சாலைகளிலும் அந்தந்த பகுதியில் உள்ள கிராம விவசாயிகள் தங்கள் விளைநிலத்தில் விளைந்த நெல் மணி, சோளம், கேழ்வரகு, கம்பு, எள் ஆகிய தானிய கதிர்களைச் சாலையில் உலர வைக்கின்றனர். அதன்மீது வாகனங்கள் தொடர்ந்து சென்று வருவதால் அதன் சக்கைகள் சாலையிலேயே விடப்படும். எஞ்சிய தானியங்களைக் காற்றில் தூற்றி சுத்தம் செய்வதை வழக்கமாகக் கொண்டுள்ளனர். 
 

தானியங்களைத் தூற்றும்போது அதன் தூசுகள் வாகனம் ஓட்டிச் செல்பவர்கள் கண்களில் பட்டு வாகன விபத்துகள் ஏற்பட்டு பல உயிரிழப்பு ஏற்படுகிறது. அதேபோல் தானியங்களைச் சாலையில் பரப்பி அதற்கு தடுப்பு நடவடிக்கையாக பெரிய பெரிய கற்களைச் சாலையின் குறுக்கே கண்டபடி வைக்கிறார்கள். இந்தக் கற்கள் மீது வாகனம் மோதி விபத்து, உயிரிழப்புகள் ஏற்படுகின்றன. தானியங்களை சாலையில் காய வைத்து அதன் கதிர்களை அடிப்பதால் அதன் மீது ஏறிச் செல்லும் இருசக்கர வாகனங்கள், தானியங்களின் வழுவழுப்பினால் நிலைதடுமாறி விபத்துகள் ஏற்படுவது ஒரு தொடர் சம்பவமாக நடைபெற்று வருகிறது.

 

Ad

 

சாலையில் தானியம் காயவைப்பதாலும் அதை அடித்து தூற்றுவதாலும் பல உயிரிழப்புகள் ஏற்படுகிறது. இதைக் கட்டுப்படுத்த வேண்டும். எனவே சாலையை ஆக்கிரமித்து தானியங்களைக் காயவைப்பதும், அதை அடித்து தூற்றுவதும் சட்டப்படி குற்றம் என்பதை விவசாயிகள் உணர வேண்டும் எனக் கூறுகிறார்கள் வாகன ஓட்டிகள். 

 

 

 

சார்ந்த செய்திகள்

 

Next Story

மூடநம்பிக்கை;‘பேரனைக் கொன்ற தாத்தா’ - விசாரணையில் வெளியான பகீர் தகவல்!

Published on 17/06/2024 | Edited on 17/06/2024
Ariyalur district near Jayangondam Utkotai village boy child incident

அரியலூர் மாவட்டம் ஜெயங்கொண்டம் அருகே உள்ளது உட்கோட்டை கிராமம். இங்கு வசித்து வந்தவர் வீரமுத்து. இவரது மகள் சங்கீதாவுக்கும் கும்பகோணம் அருகே உள்ள சுந்தர பெருமாள் கோயில் கிராமத்தைச் சேர்ந்த பாலமுருகன் என்பவருக்கும் கடந்த ஓர் ஆண்டுக்கு முன்பு திருமணம் நடைபெற்றது. இத்தகைய சூழலில்தான் சமீபத்தில் இத்தம்பதியருக்கு ஆண் குழந்தை பிறந்துள்ளது.

இதனையடுத்து கடந்த 14 ஆம் தேதி (14.06.2024) இரவு நேரத்தில் யாரோ துணியில் சுற்றி குளியல் அறையில் உள்ள வாளி நீரில் போட்டுள்ளனர். இது குறித்து காவல்துறையினருக்கு தகவல் தெரிவித்தனர். அதனைத் தொடர்ந்து சம்பவ இடத்திற்கு வந்த காவல்துறையினர், குழந்தையின் சடலத்தைக் கைப்பற்றி பிரேதப் பரிசோதனைக்காக  அரசு மருத்துவமனைக்கு அனுப்பி வைத்தனர். மேலும் குழந்தை இறப்பு குறித்து தீவிர விசாரணை மேற்கொண்டு வந்தனர்.

இந்நிலையில் மூட நம்பிக்கையில் பேரனை தாத்தா கொன்றது தெரியவந்துள்ளது. குழந்தை சித்திரை மாதத்தில் பிறந்ததால், உயிருக்கு ஆபத்து மற்றும் கடன் பிரச்சனை ஏற்படும் என்ற மூடநம்பிக்கையில் கொலை செய்துவிட்டு, நாடகமாடியுள்ளது போலீசார் நடத்திய விசாரணையில் கண்டுபிடிக்கப்பட்டுள்ளது. பிறந்து 38 நாட்களே ஆன பச்சிளம் ஆண் குழந்தையைத் தண்ணீர் பேரலில் மூழ்கடித்துக் கொடூரமாக கொன்ற குழந்தையின் தாத்தா வீரமுத்து கைது செய்யப்பட்டுள்ளார். இந்தச் சம்பவம் அப்பகுதியில் பெரும் பரபரப்பையு ஏற்படுத்தியுள்ளது. 

Next Story

காதலி சென்ற பேருந்தை நிறுத்த பெட்ரோல் குண்டு வீசிய காதலன்!

Published on 30/05/2024 | Edited on 30/05/2024
boyfriend who threw a petrol  to stop the bus of his girlfriend

அரியலூர் மாவட்டம் ஜெயங்கொண்டத்திலிருந்து மீன்சுருட்டி, பாப்பாக்குடி, வழியாக நரசிங்கப்பாளையம் கிராமத்திற்கு அரசு பேருந்து ஒன்று இயக்கப்படுகிறது. வழக்கம்போல் நேற்று அந்தப் பேருந்து பயணிகளுடன் நரசிங்க பாளையம் கிராமத்தை நோக்கி சென்றுகொண்டிருந்தபோது பேருந்து நிறுத்தம் அருகே பிரேம்குமார்(25) என்ற இளைஞர் ஒருவர் கையில் பெட்ரோல் குண்டுடன் பேருந்தை நோக்கி வந்துள்ளார். இதனை சுதாரித்துகொண்ட ஓட்டுநர் பேருந்தை நிறுத்தியுள்ளார்.

இதனைத்தொடர்ந்து, பேருந்து மீது பிரேம்குமார் பெட்ரோல் குண்டை வீச அது நாளாபுறமும் வெடித்து சிதறியது. இதனால் பேருந்தில் பயணித்த பயணிகள் இறங்கி ஒடினர். இது குறித்த தகவலின் பேரில் சம்பவ இடத்திற்கு வந்த போலீசார், பிரேம் குமாரை மடக்கி பிடித்து விசாரணை நடத்தினர். அதில், அதே ஊரைச் சேர்ந்த ஒரு பெண்ணை பிரேம் குமார் காதலித்து வந்திருக்கிறார். அந்தப் பெண்ணும் அவரை காதலித்ததாக கூறப்படுகிறது. ஆனால் இருவருக்கும் கருத்துவேறுபாடு ஏற்பட்டு அந்தப் பெண் பிரேம்குமாரிடம் பேசுவதை நிறுத்தியுள்ளார். இதனால் பிரேம்குமார் கடும் ஆத்திரத்தில் இருந்துள்ளார்.

இந்த நிலையில் அந்தப் பெண் பேருந்து நிறுத்தத்தில் நின்ற பேருந்தில் ஏறியுள்ளார். அவரை அந்த பேருந்தில் ஏற விடாமல் தடுக்கவே பேருந்து முன்பு பெட்ரோல் குண்டை வீசியதாக ஒப்புக்கொண்டுள்ளார். இதனைத் தொடர்ந்து மீன்சுருட்டி போலீசார் பிரேம்குமாரை கைது செய்து விசாரணை நடத்தி வருகின்றனர்.