Skip to main content

கிரிக்கெட் ரசிகர்களுக்கு மட்டுமல்ல சினிமா ரசிகர்களுக்கும் பிடிக்கும்! - 83 விமர்சனம்

Published on 26/12/2021 | Edited on 27/12/2021

 

83 - Not only cricket fans but also cinema fans love it!

 

கிரிக்கெட் உலகில் இன்று இந்தியா தலை நிமிர்ந்து நிற்கிறது என்றால் அதற்கான விதை போடப்பட்ட ஆண்டு 1983! அந்த ஆண்டுதான் இந்தியா முதல் முதலில் கிரிக்கெட் உலக கோப்பையை கபில்தேவ் தலைமையில் வென்றது. அந்த வரலாற்று நிகழ்வை அப்படியே நம் கண்முன் கொண்டு வந்துள்ளது 83 திரைப்படம்.

 

1983- ஆம் ஆண்டு இந்தியா உலக கோப்பை போட்டியில் கலந்து கொள்வதற்காக லண்டன் சென்றபோது வழக்கம்போல் லீக் சுற்றுகளோடு வெளியேறிவிடும் என்றே எதிர்பார்க்கப்பட்டது. ஆனால் அந்த கணிப்புகளை எல்லாம் தவிடுபொடியாக்கி இந்தியா எப்படி உலகக் கோப்பையை கையில் ஏந்தியது என்பதை அப்படியே கண்முன் நிறுத்தியுள்ளார் இயக்குனர் கபீர் கான். அந்த கால மைதானங்கள், அப்போது வாழ்ந்த ரசிகர்கள், அன்றைய கலாச்சாரம் என அத்தனை நிகழ்வுகளையும் சரியான கலவையில் கலந்து அதே சமயம் அழுத்தமான திரைக்கதையின் மூலம் ரசிக்கவும் வைதுள்ளார். 80ஸ், 90ஸ், 2கே என அத்தனை கிரிக்கெட் ரசிகர்களும் ரசிக்கும்படியான திரைக்கதையை திறன்பட கையாண்டு பாராட்டு பெற்றுள்ளார். 

 

குறிப்பாக, கிரிக்கெட் சம்பந்தப்பட்ட காட்சிகளை அமைத்த விதமும், களத்துக்கு உள்ளேயும், களத்துக்கு வெளியேயும் நடந்த நிகழ்வுகளை நெகிழ்ச்சி கலந்து ரசிக்கும்படி அமைத்துள்ளதும் படத்திற்கு மிகப்பெரிய பலமாக அமைந்துள்ளது. அதேபோல் அந்த உலகக் கோப்பை போட்டியில் இந்தியா ஜிம்பாப்வே அணிகள் மோதிய ஆட்டம் மட்டும் தொலைக்காட்சிகளில் ஒளிபரப்பு செய்யப்படவில்லை. கேமராமேன்களின் ஸ்டிரைக் காரணமாக அந்த போட்டியில் கபில்தேவ் அடித்த 175 ரன்கள் என்ற சாதனையை நேரில் பார்த்த ரசிகர்களை தவிர்த்து இதுவரை யாரும் பார்த்ததில்லை. அந்த ஏக்கத்தை இந்த படம் தனித்துள்ளது. அதேபோல் கிரிக்கெட் தவிர்த்து அந்த காலகட்டத்தில் நடந்த அரசியல் நிகழ்வுகளும், சச்சின் டெண்டுல்கர் சம்பந்தப்பட்ட காட்சியும் படத்துடன் ஒன்றி ரசிக்கும்படி அமைந்துள்ளது.

83 - Not only cricket fans but also cinema fans love it!

படத்தின் இன்னொரு ப்ளஸ் ஆக அமைந்துள்ளது கதாபாத்திர தேர்வு. அன்று விளையாடிய 11 பேருடனும் அப்படியே நாம் ரிலேட் செய்து கொள்ளும்படியான நடிகர்களை தேர்வு செய்து, அவர்களும் சிறப்பான பங்களிப்பை அளித்துள்ளது நாஸ்டால்ஜிக் நினைவுகளை தூண்டியுள்ளது. கபில்தேவ் ஆக நடித்திருக்கும் ரன்வீர்சிங் படம் முழுவதும் நம் கண்களுக்கு வெறும் கபில்தேவ் ஆக மட்டுமே தெரிகிறார். அந்த அளவுக்கு கதாபாத்திரத்துடன் ஒன்றி நடிப்பிலும் சரி, உடல் மொழியிலும் சரி அமர்க்களப்படுத்தி யுள்ளார். இவர் அந்த முன் பற்களைக் காட்டிக் கொண்டு பேசும் காட்சிகள் எல்லாம் அப்படியே கபில்தேவ் கண் முன் நிற்கிறார்.

 

தமிழக வீரர் கிருஷ்ணமாச்சாரி ஸ்ரீகாந்த் வேடத்தில் நடித்திருக்கும் நடிகர் ஜீவா தனக்கு கொடுத்த கதாபாத்திரத்திற்கு நியாயம் செய்யும்படி சிறப்பான பங்களிப்பை வழங்கியுள்ளார். இவர் கண்ணை சிமிட்டி கொண்டு பேசும் காட்சிகளில் அப்படியே ஸ்ரீகாந்தை கண்முன் நிறுத்தி உள்ளார். அதேபோல் களத்துக்கு உள்ளேயும் வெளியேயும் ஸ்ரீகாந்த் உடல் மொழியை பக்காவாக பிடித்து சிறப்பாக நடித்துள்ளார். 

 

கபில் தேவின் மனைவியாக நடித்திருக்கும் தீபிகா படுகோன் சிறிது நேரமே வந்தாலும் மனதில் பதியும்படி நடித்துள்ளார். இவரது கதாபாத்திரம் படத்திற்கு புத்துணர்ச்சி அளித்துள்ளது. இந்திய கிரிக்கெட் அணியின் மேலாளராக நடித்திருக்கும் பங்கஜ் த்ரிபாதி நிறைவான நடிப்பை அழகாக வெளிப்படுத்தி சென்றுள்ளார். இந்திய கிரிக்கெட் வாரியத்தின் அன்று இருந்த பொருளாதார நிலைமையை இவரின் கதாப்பாத்திரம் உணர்த்தும் வகையில் அமைந்துள்ளது. 

 

மற்றபடி அணியில் விளையாடிய சுனில் கவாஸ்கர், ரவிசாஸ்திரி, பல்விந்தர் சிங் சாந்து, மதன்லால், மொகிந்தர் அமர்நாத், யஷ் பால் ஷர்மா, ரோஜர் பின்னி, சந்தீப் பாட்டீல், சயத் கிர்மானி கதாபாத்திரங்களுக்கு ஆளுக்கு ஒரு காட்சி முக்கியத்துவம் கொடுக்கப்பட்டுள்ளது. அதேபோல் இந்த கதாபாத்திரங்களில் நடித்திருக்கும் நடிகர்களும் அந்த கதாபாத்திரமாகவே மாறி சிறப்பான நடிப்பை வெளிப்படுத்தியுள்ளனர். 

83 - Not only cricket fans but also cinema fans love it!

இந்தப் படத்தின் இன்னொரு மிகப்பெரிய பலம் படத்தின் மேக்கிங். ஒளிப்பதிவும் பின்னணி இசையும் படத்திற்கு மிகப்பெரிய பலமாக அமைந்து படத்தை பிரம்மாண்டமாக காட்டியுள்ளது. குறிப்பாக கிரிக்கெட் மைதான சம்பந்தப்பட்ட காட்சிகள், வீரர்களுக்குள் நடந்த உணர்ச்சிபூர்வமான காட்சிகள் ஆகியவைகள் சிறப்பாக வர ஒளிப்பதிவும், பின்னணி இசையும் சரியான பங்களிப்பை வழங்கியுள்ளது. 

 

கிரிக்கெட் போட்டிகளை படமாக்கிய விதம், வீரர்களுக்குள் நடந்த நெகிழ்ச்சியான தருணங்கள் என படத்தில் ரசிப்பதற்கான பல விஷயங்கள் நிறைந்திருக்கின்றன. அதனாலேயே 83 திரைப்படம் தவிர்க்கமுடியாத திரைப்படமாக மாறியுள்ளது.

 

சார்ந்த செய்திகள்

Next Story

தொடங்கியது '2024 தேர்தல் திருவிழா'- தேதிகள் அறிவிப்பு

Published on 16/03/2024 | Edited on 16/03/2024
'2024 Election Festival' begins- dates announced

2024 ஆம் ஆண்டு நாடாளுமன்ற மக்களவைப் பொதுத்தேர்தல் தேதி தற்போது அறிவிக்கப்பட்டுள்ளது. முன்னதாகவே நாடாளுமன்ற தேர்தலை முன்னிட்டு அரசியல் கட்சிகள் சார்பில் தேர்தல் பணிகளை மேற்கொள்வதற்காக பல்வேறு குழுக்கள் அமைக்கப்பட்டு தீவிர ஆலோசனை நடத்தப்பட்டு வருகிறது.

தேர்தல் ஆணையர்களாக ஞானேஷ்குமார், சுக்பீர் சந்து ஆகியோர் நேற்று முன்தினம் பதவி ஏற்று கொண்டனர். அதே நேரம் நாடு முழுவதும் தேர்தலுக்கான அனைத்து ஏற்பாடுகளையும் தேர்தல் ஆணையம் செய்து முடித்துள்ளது. தயார் நிலையில் மின்னணு வாக்கு இயந்திரங்கள் உள்ளன. தொடர்ந்து தேர்தல் தேதி பற்றி முடிவெடுப்பதற்கான தேர்தல் ஆணையர்கள் கூட்டம் நேற்று முன்தினம் நடைபெற்ற நிலையில், கூட்டத்தில் எடுக்கப்பட்ட முடிவின்படி இன்று (16/03/2024) பிற்பகல் 3 மணிக்கு தேர்தல் தேதி அறிவிக்கப்பட இருப்பதாக தகவல்கள் வெளியாகி இருந்தது.

அதன்படி இதற்கான செய்தியாளர் சந்திப்பு டெல்லியில் உள்ள இந்திய தேர்தல் ஆணைய அலுவலகத்தில் நடைபெற்றது. கூட்டத்தில் இந்திய தலைமை தேர்தல் ஆணையர் ராஜீவ் குமார் உரையாற்றுகையில், ''மக்களவைத் தேர்தலுக்கு தேர்தல் ஆணையம் முழுமையாக தயாராகி உள்ளது. 2024-ல் மட்டும் 60 நாடுகளில் தேர்தல் நடைபெறுகிறது. ஒட்டுமொத்த உலகிற்கே இது தேர்தல் ஆண்டு. ஜம்மு காஷ்மீர் சட்டப்பேரவைக்கு தேர்தல் நடத்த வேண்டிய அவசியம் உள்ளது. இந்த தேர்தலில் மொத்தமாக 986.88 கோடி பேர் வாக்களிக்க உள்ளனர். 2019 ஆண்டு நாடாளுமன்றத் தேர்தலை விட 6 சதவிகிதத்திற்கு அதிகமான வாக்காளர்கள் இந்த தேர்தலில் வாக்களிக்க உள்ளனர்.

சுமார் 20 கோடி இளம் வாக்காளர்கள் இந்த தேர்தலில் வாக்களிக்க உள்ளனர். 1.50 கோடி பணியாளர்கள் தேர்தல் பணியில் ஈடுபடுத்தப்பட உள்ளனர். 55 லட்சம் மின்னணு வாக்கு இயந்திரங்கள் பயன்படுத்தப்பட உள்ளது. நூறு வயதை கடந்த 2.18 லட்சம் பேர் மக்களவைத் தேர்தலில் வாக்களிக்க உள்ளனர். ஆள்பலம், பணபலம், வதந்தி, நடத்தை விதிமீறல் ஆகிய நான்கும் தேர்தல் ஆணையத்திற்கு சவாலாக உள்ளது. நான்கு பலத்தை கட்டுப்படுத்தி அமைதியான முறையில் தேர்தலை நடத்த நடவடிக்கை எடுக்கப்படும். ஆள்பலத்தை பயன்படுத்தி முறைகேடு செய்வதை தடுக்க தேவையான அளவு பாதுகாப்புப் படையினர் ஈடுபடுத்தப்படுவர். 50% வாக்கு சாவடிகளில் நடைபெறும் வாக்குப்பதிவு இணைய வழியில் நேரலை செய்யப்படும். எல்லைகளில் ட்ரோன் மூலம் கண்காணிப்பு பணிகள் மேற்கொள்ளப்படும். தேசிய, மாநில, மாவட்ட எல்லைகளில் சோதனை சாவடிகள் அமைக்கப்படும். சமூக வலைத்தளங்களில் அரசியல் கட்சியினர் பொறுப்புடன் நடந்துகொள்ள வேண்டும்.பொய்ச் செய்திகளை உருவாக்கி வெளியிடுவோர் மீது கடும் நடவடிக்கை எடுக்கப்படும். நாடு முழுவதும் தேர்தல் நடத்தை விதிகள் உடனடியாக அமலுக்கு வந்தது'' என்றார்.

அதனைத் தொடர்ந்து வெளியிடப்பட்ட அறிவிப்பில், 7 கட்டங்களாக 2024 மக்களவை தேர்தல் நடைபெற உள்ளது. அதில் முதல் கட்டத்திலேயே தமிழகத்தில் மக்களவை தேர்தல் நடைபெற உள்ளது.  'மார்ச் 20 ஆம் தேதி வேட்புமனு தாக்கல், மார்ச் 27 வேட்புமனு தாக்கல் செய்ய இறுதி நாள்,  மார்ச் 28 வேட்புமனு மறுபரிசீலனை, மார்ச் 30 வேட்புமனு திரும்பப்பெற கடைசி நாள், தமிழகத்தில் ஏப்ரல் 19 ஆம் தேதி மக்களவை தேர்தல் நடைபெறுகிறது. ஜூன் 4 ஆம் தேதி (செவ்வாய் கிழமை) வாக்கு எண்ணிக்கை என விவரங்கள் அறிவிக்கப்பட்டுள்ளது. தமிழகத்தில் விளவங்கோட்டுக்கான இடைத்தேர்தலும் ஏப்ரல் 19 ஆம் தேதி நடைபெறும்' என அறிவிக்கப்பட்டுள்ளது.

தேர்தல் தேதிகள் அறிவிக்கப்பட்டதால் தேர்தல் நடத்தை விதிமுறைகள் அமலுக்கு வந்துள்ளது.

Next Story

‘புரிதல் இல்லாதவர்கள் பேசாமல் இருப்பது நல்லது’ - அமெரிக்காவுக்கு இந்தியா பதிலடி

Published on 15/03/2024 | Edited on 15/03/2024
India's response to America for CAA

பா.ஜ.க. தலைமையிலான மத்திய அரசால் கடந்த 2019 ஆம் ஆண்டு குடியுரிமை திருத்தச் சட்டம் (C.A.A.) கொண்டுவரப்பட்டது. அதில் கடந்த 2014 ஆம் ஆண்டு டிசம்பர் 31 ஆம் தேதிக்கு முன்னர் இந்தியா வந்தடைந்த வங்கதேசம், பாகிஸ்தான், ஆப்கானிஸ்தான் ஆகிய நாடுகளைச் சேர்ந்த இஸ்லாமியர் அல்லாதோருக்கு இந்தியக் குடியுரிமை வழங்கும் வகையில் மத்திய அரசு புதிய சட்டத் திருத்தத்தைக் கொண்டு வந்தது. இந்தக் குடியுரிமை திருத்தச் சட்டத்திற்கு எதிராக நாடு முழுவதும் கடுமையான எதிர்ப்பு கிளம்பியது. பெரிய அளவில் போராட்டங்களும் நடைபெற்றன.

அதாவது இந்த சட்டத்தில் வெளிநாடுகளில் இருந்து இந்தியாவில் குடியேறிய இந்துக்கள், சீக்கியர்கள் மற்றும் கிறிஸ்தவர்களுக்கு இந்திய குடியுரிமை வழங்க சி.ஏ.ஏ. வகை செய்கிறது. அதே சமயம் வெளிநாடுகளில் இருந்து இந்தியாவில் குடியேறும் இஸ்லாமிய மக்களுக்கு குடியுரிமை வழங்க வழிவகை செய்யப்படவில்லை. மேலும் தமிழகத்தில் உள்ள இலங்கைத் தமிழர்களுக்கு இந்திய குடியுரிமை வழங்கவும் சிஏஏ சட்டத்தில் வழிவகை செய்யப்படாததும் குறிப்பிடத்தக்கது. இதற்கிடையே கடந்த 2019 ஆம் ஆண்டு டிசம்பர் மாதம் நாடாளுமன்றத்தில் இச்சட்டம் நிறைவேற்றப்பட்டது. அதனைத் தொடர்ந்து குடியரசுத் தலைவர் இந்த சட்டத்திற்கு ஒப்புதல் வழங்கி இருந்தார். இந்நிலையில், குடியுரிமை திருத்தச் சட்டம் நேற்று முன்தினம் முதல் (11.03.2024) அமலுக்கு வந்ததாக மத்திய அரசு அறிவித்துள்ளது. இதற்கான அறிவிக்கையை மத்திய அரசு வெளியிட்டது. 

மத்திய அரசு கொண்டு வந்திருக்கும் குடியுரிமை திருத்தச் சட்டத்திற்கு, பல்வேறு எதிர்க்கட்சிகள், தங்களது எதிர்ப்பை தெரிவித்து வருகின்றன. அந்த வகையில், கேரளா மாநில முதல்வர் பினராயி விஜயனும், தமிழக முதல்வர் மு.க.ஸ்டாலினும் தங்கள் மாநிலத்தில் சி.ஏ.ஏ சட்டம் அமல்படுத்தப்பட மாட்டாது என்று கூறி மத்திய அரசுக்கு கண்டனம் தெரிவித்தனர். இதற்கிடையில், சி.ஏ.ஏ சட்டத்தை ரத்து செய்வதில் சாத்தியம் இல்லை எனவும், அந்த சட்டத்தை நிறுத்தும் அதிகாரம் மாநில அரசுகளுக்கு இல்லை என மத்திய உள்துறை அமைச்சர் அமித்ஷா திட்டவட்டமாக கூறியிருந்தார். 
 

India's response to America for CAA

இதனைத் தொடர்ந்து, மத்திய அரசு கொண்டு வந்திருக்கும் சி.ஏ.ஏ சட்டத்திற்கு கவலை தெரிவிப்பதாக அமெரிக்கா கூறியது. இது குறித்து அமெரிக்காவின் வெளியுறவுத்துறை செய்தி தொடர்பாளர் மேத்யூ மில்லர் கூறுகையில், “குடியுரிமை திருத்தச் சட்டத்தின் அறிவிப்பு குறித்து விவரங்களை கடந்த 11 ஆம்  தேதி இந்தியா வெளியிட்டுள்ளது. இந்த அறிவிப்பு எங்களுக்கு கவலையளிக்கிறது. இந்த சட்டம் எவ்வாறு செயல்படுத்தப்படும் என்பதை நாங்கள் உன்னிப்பாகக் கண்காணித்து வருகிறோம். மத சுதந்திரத்திற்கான மரியாதை அளித்தல் மற்றும் அனைத்து சமூகங்களையும் சட்டத்தின் கீழ் சமமாக நடத்தப்படுவது தான் அடிப்படை ஜனநாயகக் கோட்பாடுகள்” என்று தெரிவித்தார்.

இந்த நிலையில், இந்த விமர்சனத்துக்கு இந்திய வெளியுறவுத்துறை அமைச்சகம் பதில் அளித்துள்ளது. இது குறித்து வெளியுறவுத்துறை செய்தி தொடர்பாளர் ரந்தீர் ஜெய்ஸ்வால், “குடியுரிமை திருத்தச் சட்டம் என்பது இந்தியாவின் உள்விவகாரம். சி.ஏ.ஏ என்பது குடியுரிமை வழங்குவது; குடியுரிமையைப் பறிப்பது அல்ல. எனவே இது அடிக்கோடிட்டுக் காட்டப்பட வேண்டும். இந்த சட்டம் நாடற்ற தன்மையின் பிரச்சினையைக் குறிக்கிறது. மனித கண்ணியத்தை வழங்குகிறது மற்றும் மனித உரிமைகளை ஆதரிக்கிறது. சி.ஏ.ஏ சட்டம் குறித்த அமெரிக்க வெளியுறவுத்துறையின் கருத்துக்கள் தவறானவை மற்றும் தேவையற்றவை என்று நாங்கள் கருதுகிறோம். டிசம்பர் 31, 2014 அன்று அல்லது அதற்கு முன் இந்தியாவுக்குள் நுழைந்த ஆப்கானிஸ்தான், பாகிஸ்தான் மற்றும் வங்காளதேசத்தைச் சேர்ந்த இந்து, சீக்கிய, புத்த, பார்சி மற்றும் கிறிஸ்தவ சமூகங்களைச் சேர்ந்த துன்புறுத்தப்பட்ட சிறுபான்மையினருக்கு இந்த சட்டம் பாதுகாப்பான புகலிடத்தை வழங்குகிறது.

India's response to America for CAA

துன்பத்தில் இருப்பவர்களுக்கு உதவும் ஒரு பாராட்டத்தக்க முயற்சியை வாக்கு வங்கி அரசியல் நோக்கில் மட்டும் பார்க்கக் கூடாது. இந்தியாவின் பன்மைத்துவ மரபுகள் மற்றும் பிராந்தியத்தின் பிரிவினைக்குப் பிந்தைய வரலாறு ஆகியவை குறித்து சரியான புரிதல் இல்லாதவர்கள் பேசாமல் இருப்பது நல்லது. இந்தியாவின் நலம் விரும்பிகள் இந்த நடவடிக்கை எடுக்கப்பட்ட நோக்கத்தை வரவேற்க வேண்டும்” என்று தெரிவித்தார்.