Skip to main content

மதிப்பெண்கள் அடிப்படையில் மாணவர்களின் தேர்ச்சி முடிவுகளை வெளியிடும் அரசாணையை ரத்து செய்ய தலைமையாசிரியர்கள் கழகம் வலியுறுத்தல்

Published on 20/06/2020 | Edited on 20/06/2020

 

  exam

 


தமிழ்நாடு மேல்நிலைப் பள்ளி தலைமையாசிரியர்கள் கழகத்தின் மாநிலத் தலைவர் மா.ரவிச்சந்திரன் வெளியிட்டுள்ள அறிக்கையில் கூறியிருப்பதாவது, 

 

"தமிழக அரசானது கரோனோ தொற்று தடுப்பு சூழ் நிலையை கருத்தில் கொண்டு பத்து மற்றும் மேல்நிலை முதலாமாண்டு பொதுத் தேர்வுகளை ரத்து செய்து கொரோனோ தொற்று நோயிலிருந்து மாணவச் செல்வங்களை பாதுகாத்து வரலாற்று சிறப்புமிக்க அரசாணையை வெளியிட்டமைக்கு எமது அமைப்பு மனமார்ந்த வாழ்த்துக்களையும், பாராட்டுகளையும் தெரிவித்து கொள்கிறோம். 
அதே வேளையில், தமிழக அரசானது காலாண்டு மற்றும் அரையாண்டு தேர்வுகளின் மதிப்பெண்கள் அடிப்படையில் தேர்ச்சி முடிவுகளை வெளியிடுவதை மறுபரிசீலனை செய்ய வேண்டும். ஏனெனில் பெரும் பகுதியான தனியார் பள்ளிகளில் மாணவர்கள் கற்றல் - கற்பித்தல் மற்றும் தேர்வு முறைகள் என்பது குறைந்த பாடப்பகுதியை கொண்ட UNIT TEST, தனியார் நிறுவனத்திடம் வாங்கப் பட்ட கேள்வி தாட்களை கொண்ட தேர்வு முறை மற்றும் விரிவாக பாடம் நடத்தும் முறையை தவிர்த்து, மாறாக NEET தேர்வுக்கான பயிற்சி அளித்தல் போன்ற முறைகளை கையாண்டு வருகின்றனர், இவர்கள் காலாண்டு மற்றும் அரையாண்டு தேர்வுகளை கையாளுவது என்பது மிகக் குறைவான நிலையே ஆகும். 


மேலும், சில தனியார் பள்ளிகள் சமீப காலமாக காலாண்டு மற்றும் அரையாண்டு தேர்வு மதிப்பெண்களை சட்டவிரோதமான வழிகளை கையாண்டு திருத்துவதற்கான முயற்சியை எடுத்து வருகிறது என்று காட்சி ஊடகங்களிலும் அச்சு ஊடகங்களிலும், சமூக வலைதளங்களிலும் செய்திகள் வெளிவந்து கொண்டுள்ளது.         


அரசு மற்றும் அரசு உதவிபெறும் பள்ளிகளில் பயின்று வரும் பத்து மற்றும் மேல்நிலை முதலாமாண்டு மாணவர்களுக்கு கடந்த ஆண்டு தமிழக அரசால் வழங்கப்பட்டு வரும் ஒரு சில விலையில்லா பாட புத்தகம் அரையாண்டு தேர்வு முடியும் நிலையில் வழங்கப்பட்டு வந்தது , அதோடு பத்தாம் வகுப்பு தேர்வு முறையில் மாற்றம் செய்யப்பட்ட காலச் சூழ்நிலை கொண்ட ஆண்டு என்பது குறிப்பிடத்தக்கது. 


அதோடு மட்டுமல்லாமல் அரசு பள்ளிகளில் விலையில்லா பாடப் புத்தகம் வழங்கும் வரை மாணவர்களுக்கு குறிப்பெடுத்து படிக்க வேண்டுமென்று அரசு அறிவுறுத்திய காலம் என்பதும் குறிப்பிடதக்கது.
மேலும் அரசு பொதுத் தேர்வு காலங்களில் மாற்று திறனாளி மாணவர்களுக்கு "சொல்வதை எழுதுபவர்" ஒருவரை மாவட்டத் தேர்வுத்துறையானது நியமனம் செய்து தேர்வு எழுதுவது வழக்கம். 


மாறாக காலாண்டு மற்றும் அரையாண்டு தேர்வு காலங்களில் மாவட்ட கல்வித்துறை அதிகாரிகள் மாற்று திறனாளி மாணவர்கள் தேர்வு எழுதுவதற்கு மேற்கண்ட நடைமுறையை பின்பற்றவில்லை என தெரிய வருகிறது. 


மேலும், பல மாணவர்கள் தனித் தேர்வர்களாக பத்தாம் வகுப்பு தேர்வினை எழுதுவதால், அவர்களுக்கு காலாண்டு மற்றும் அரையாண்டு தேர்வு எழுத வாய்ப்பில்லாத காரணத்தினாலும் அனைத்து மாணவர்களையும் சமமாக பார்க்க வேண்டியது ஒரு அரசின் கடமை என்பதாலும் இப்பொழுது கையாளும் முறை தவறான ஏற்ற இறக்கங்களை மாணவர்களிடத்தில் ஏற்படுத்தி, தாழ்வு மனப்பான்மையை இளம் வயதில் ஏற்படுத்தும் என்பதை கருத்தில் கொள்ள வேண்டும். 

 

கடந்த ஆண்டில், அரசுப் பள்ளிகளில் ஆயிரக்கணக்கான ஆசிரியர் காலிப் பணியிடம் நிரப்பாமல் இருக்க, அந்த பாடப்பகுதியின் காலாண்டு மற்றும் அரையாண்டு தேர்வுகளின் மதிப்பெண்கள் என்பது மிக குறைந்த, சொற்ப மதிப்பெண்களே பெற்றிருக்க முடியும் என்பதால் இந்த மதிப்பெண்களை மாணவர்களின் தேர்ச்சிக்கு கணக்கில் எடுத்துக் கொள்வது பொருத்தமாக இருக்காது. 


மேலும், கல்வி மற்றும் மாணவர்களின் மதிப்பெண்களை காசாக்கும் தனியார் பள்ளிகளின் கற்றல் கற்பித்தல் மற்றும் தேர்வு முறைகளையும், ஆசிரியர்கள் காலி பணியிடங்களுடன் புத்தகம் இல்லாமல் குறிப்பெடுத்து பாடம் கற்று தேர்வு எழுதி குறைந்த மதிப்பெண்களை பெற்றுள்ள அரசு பள்ளி மாணவர்களின் தரநிலையை தமிழக அரசு சமநிலையில் கணக்கிடுவது அரசின் மீது நம்பகத்தன்மையை உருவாக்காது. 


எனவே தமிழக அரசு மற்றும் அரசு தேர்வுத்துறை இயக்ககம், இந்த ஆண்டை கொரோனோ தொற்று தடுப்பு ஆண்டாக கருத்தில் கொண்டு மதிப்பெண் அட்டை (MARK SHEET) வழங்குவதற்கு பதிலாக, தேர்ச்சி அட்டை (PASS CERTIFICATE) யை வழங்க வேண்டும் என்றும், 


இவர்களின் 11ம் வகுப்பு சேர்க்கையில் போட்டி ஏற்படுகின்ற போது பின்வருவனவற்றை கருத்தில் கொண்டு முன்னுரிமை வழங்கலாம் என எமது அமைப்பு கருதுகிறது. 


1.அதே பள்ளியில் படித்தவர், 
2.மாணவர்களின் விருப்பம், 
3.NODEL CENTRE மாணவன்,  
4.அரசின் இட ஒதுக்கீடு, 
5.பள்ளிக்கு அருகாமையில் வசிப்பவர், 
6.விளையாட்டில் திறமையானவர், 
7.பிற திறமை பெற்றவர்கள்
மற்றும் 8. NCC, JRC, OTHER SCHOOL CLUB ACTIVITIES என கணக்கிடலாம். 

 

பத்தாம் வகுப்பு தேர்ச்சி பெற்ற மாணவன் தொழிற்க் கல்வி (POLY TECH,  ITI) படிப்பு சேர்க்கையில் மேலே குறிப்பிட்டுள்ள விதிமுறைகளுடன் தொழிற்கல்வி நிறுவனம் மதிப்பெண் தேர்வுகளை தவிர்த்து, அந்த நிறுவனத்திற்கென குறைந்தபட்ச விதிமுறைகளை அரசே வகுத்து தர வேண்டும். 
அதனால் தமிழக அரசானது பத்து மற்றும் முதலாமாண்டு மேல்நிலைக் கல்வி மாணவர்களின் தேர்ச்சியை மதிப்பெண்கள் அடிப்படையில் வழங்காமால்,வருகை சான்று அடிப்படையில், அனைவரும் தேர்ச்சி என்ற அறிவிப்புடன் தேர்ச்சி அட்டை வழங்க நடவடிக்கை எடுக்க வேண்டுமாய் மாநிலக் கழகம் சார்பாக கேட்டுக்கொள்கிறோம்" இவ்வாறு அந்த அறிக்கையில் கூறப்பட்டுள்ளது. 

 

 

சார்ந்த செய்திகள்

 

Next Story

பொதுத் தேர்வில் தமிழில் 100 சதவீத மதிப்பெண் பெற்ற மாணவர்கள் கவனத்திற்கு; தமிழக அரசு முக்கிய அறிவிப்பு

Published on 17/05/2024 | Edited on 17/05/2024
Tamil Nadu Government Important Announcement on students who scored 100 percent marks in Tamil in public examination

தமிழ்நாட்டில்  2023 - 24 ஆம் கல்வியாண்டுக்கான 10 ஆம் வகுப்பு மற்றும் 12ஆம் வகுப்புக்கான பொதுத் தேர்வுகள் முடிவுகள் சில தினங்களுக்கு முன் வெளியாகின. இதில் ஏராளமான மாணவ, மாணவியர்கள் தேர்ச்சி பெற்றிருந்தனர். இந்த நிலையில், 10, 12ஆம் வகுப்பு பொதுத்தேர்வில் தமிழில் 100 சதவீத மதிப்பெண்கள் பெற்ற மாணவர்களுக்கு அரசு சார்பில் பாராட்டு விழா நடத்தப்படவுள்ளதாக தமிழக அரசு தெரிவித்துள்ளது. 

இது குறித்து தமிழக அரசு வெளியிட்டுள்ள அறிவிப்பில், ‘அரசுப் பள்ளிகள் வறுமையின் அடையாளம் அல்ல. அவை பெருமையின் அடையாளம் என்பதைத் தொடர்ந்து பறைசாற்றும் விதமாக இந்தக் கல்வியாண்டின் 10 மற்றும் 12ஆம் வகுப்பு அரசுப் பொதுத் தேர்வு முடிவுகள் அமைந்துள்ளன. தமிழ்நாடு முழுவதிலும், இந்த ஆண்டு மார்ச்-ஏப்ரலில் நடைபெற்ற, மேல்நிலைப் பள்ளிகளுக்கான அரசுப் பொதுத் தேர்வுகளில் 12ஆம் வகுப்பில் 94.56 சதவீத மாணவ மாணவியர் தேர்ச்சி பெற்றுப் புதிய சாதனைப் படைத்துள்ளனர். அரசுப் பள்ளிகளில் மட்டும் 91.02 சதவீதம் மாணவ மாணவியர் தேர்ச்சியடைந்துள்ளனர். குறிப்பாக தமிழ்நாட்டின் பல்வேறு மாவட்டங்களிலும் உள்ள 397 அரசு மேல்நிலைப் பள்ளிகள் இந்த ஆண்டில் 100 சதவீதத் தேர்ச்சி விழுக்காட்டை எய்தி மாபெரும் சாதனைப் படைத்துள்ளன. மேலும், தமிழ்ப் பாடத்தில் மட்டும் 35 மாணவ மாணவியர் 100 சதவீத மதிப்பெண்களைப் சிறப்பாகத் தேர்ச்சி பெற்றுள்ளனர்.

அதேபோல உயர்நிலைப் பள்ளிகளுக்கான 10ஆம் வகுப்பு அரசுப் பொதுத்தேர்வுகளில் மாநிலம் முழுவதும் 91.55 சதவீத மாணவ மாணவியர் தேர்ச்சிபெற்று மாபெரும் சாதனைப் படைத்துள்ளனர். இதில், அரசுப் பள்ளிகளில் மட்டும் 87.90 சதவீத மாணவ மாணவியர் தேர்ச்சி பெற்றுள்ளனர். பல்வேறு மாவட்டங்களிலும் உள்ள 1,364 அரசு உயர்நிலைப் பள்ளிகள் இந்த ஆண்டில் 100 சதவீதத் தேர்ச்சியைப் பெற்றுச் சிறந்துள்ளன. தமிழ்ப் பாடத்தில் மட்டும் 8 மாணவ மாணவியர் 100 சதவீத மதிப்பெண்கள் பெற்றுள்ளனர் என்பது குறிப்பிடத்தக்கது. 1,364 அரசு உயர்நிலைப் பள்ளிகளும், 397 அரசு மேல்நிலைப் பள்ளிகளும் என மொத்தம், 1,761 பள்ளிகள் 10 மற்றும் 12 ஆம் வகுப்பு அரசுப் பொதுத் தேர்வுகளில் இவ்வாண்டில் 100 சதவீதத் தேர்ச்சிகள் பெற்றுள்ளன. பள்ளிக் கல்வித் துறை வரலாற்றில் இது ஒரு மகத்தான சாதனையாகும்.

இத்தனை வெற்றிகளுக்கும் காரணம் தமிழ்நாடு முதலமைச்சர் மு.க.ஸ்டாலின் பள்ளிக் கல்வி வளர்ச்சியில், கொண்டுள்ள பேரார்வமும் அக்கறையுமே ஆகும். குறிப்பாக தமிழ்நாடு முதலமைச்சர் மாணவ மாணவியரின் முன்னேற்றத்திற்காகப் பள்ளிக் கல்வித் துறையில் முதலமைச்சரின் காலை உணவுத் திட்டம், புதுமைப்பெண் திட்டம், தமிழ்ப் புதல்வன் திட்டம், பேராசிரியர் க.அன்பழகனார் பள்ளி மேம்பாட்டுத் திட்டம், நான் முதல்வன் திட்டம், நம்ம ஸ்கூல் நம்ம ஊரு பள்ளி திட்டம், மாபெரும் தமிழ்க் கனவுத் திட்டம், 7.5 சதவீத இட ஒதுக்கீடுகளால் கல்லூரிகளில் சேரும் மாணவ மாணவியரின் உயர்கல்விச் செலவை அரசே ஏற்கும் திட்டம்.

முதலான பல்வேறு மாணவர் மையத் திட்டங்களை அறிமுகப்படுத்தி சிறப்பாகச் செயல்படுத்தி வெற்றிகள் படைத்து வருகிறது. மேலும், தமிழ்நாடு முதலமைச்சர் மு.க.ஸ்டாலின் 7.5 சதவீத இட ஒதுக்கீடுகளால் கடந்த ஆண்டில் கல்லூரிகளில் சேர்ந்துள்ள 28,601 அரசுப் பள்ளி மாணவியரின் கல்விக் கட்டணங்களை பாராட்டியுள்ளார் என்பதும் மிகவும் குறிப்பிடத்தக்கது. தமிழ்நாடு முதலமைச்சர் மு.க.ஸ்டாலினின் வழிகாட்டுதலின்படி, இந்த ஆண்டின் அரசுப் பொதுத் தேர்வுகளில் 100 சதவீதத் தேர்ச்சிகள் கண்டு சாதனைப் படைத்துள்ள அரசு உயர்நிலை, மேல்நிலைப் பள்ளிகளின் தலைமை ஆசிரியர்களையும், தமிழ்ப் பாடத்தில் 100 சதவீத மதிப்பெண்கள் பெற்றுள்ள மாணவ மாணவியர் அனைவரையும் சென்னைக்கு அழைத்துப் பாராட்டும் வகையில் சீர்மீகு விழா தமிழ்நாடு அரசின் சார்பில் சென்னையில் விரைவில் நடத்தப்படவுள்ளது’ எனத் தெரிவித்துள்ளது. 

Next Story

10ஆம் வகுப்பில் தேர்ச்சி பெறாத மாணவர்களுக்கு முக்கிய அறிவிப்பை வெளியிட்ட அரசு தேர்வுகள் இயக்ககம்!

Published on 11/05/2024 | Edited on 11/05/2024
important notice to students who have not passed class 10

தமிழ்நாட்டில்  2023 - 24 ஆம் கல்வியாண்டுக்கான 10 ஆம் வகுப்பு பொதுத் தேர்வு கடந்த மார்ச் மாதம் 26 ஆம் தேதி (26.03.2024) தொடங்கி ஏப்ரல் மாதம் 8 ஆம் தேதி வரை நடைபெற்றது. இதற்காக மாநிலம் முழுவதும் 4 ஆயிரத்து 107 தேர்வு மையங்கள் அமைக்கப்பட்டன. மாணவர்கள், தனித் தேர்வர்கள், சிறைக் கைதிகள் என மொத்தம் 9 லட்சத்து 38 ஆயிரம் பேர் தேர்வு எழுதத் தகுதி பெற்றிருந்தனர். முதல் நாளில் தமிழ் உள்ளிட்ட மொழிப் பாடங்களுக்கான தேர்வு நடைபெற்றது.

இதனையடுத்து 10 ஆம் வகுப்பு மாணவ, மாணவிகள் எழுதிய தேர்வின் விடைத்தாள் திருத்தும் பணி நடைபெற்று முடிந்தன. அதனைத் தொடர்ந்து மாணவர்கள் பெற்ற மதிப்பெண்களை இணையதளத்தில் பதிவேற்றும் பணியும் நிறைவு பெற்றது. இத்தகைய சூழலில் 10 ஆம் வகுப்பு பொதுத் தேர்வை எழுதிய அரசுப் பள்ளி, அரசு உதவி பெறும் பள்ளி மற்றும் தனியார் பள்ளிகளைச் சேர்ந்த மாணவ, மாணவிகள் எனப் பலரும் முடிவுகளை எதிர்பார்த்து மாணவர்கள் காத்திருந்தனர். 

அதன்படி, 10 ஆம் வகுப்பு முடிவு பொதுத் தேர்வு முடிவுகள் வெளியாகியுள்ளது சென்னையில் உள்ள பேராசிரியர் அன்பழகன் கல்வி வளாகத்தில் அமைந்துள்ள அரசுத் தேர்வுகள் இயக்கத்தில் 2023 - 24 ஆம் கல்வியாண்டுக்கான 10 ஆம் வகுப்பு பொதுத் தேர்வு முடிவுகள் நேற்று (10.05.2024) காலை 9.30 மணியளவில் வெளியிடப்பட்டன. மாணவர்கள் தங்கள் தேர்வு முடிவுகளை www.tnresults.nic.in, www.dge.tn.gov.in, https//results.digilocker.gov.in ஆகிய இணையதள முகவரியில் அறிந்து வந்தனர். வெளியான தேர்வு முடிவுகளின் படி, தமிழகம் முழுவதும் தேர்வு எழுதியவர்களில் 91.55 சதவீதம் பேர் தேர்ச்சி அடைந்துள்ளனர். தேர்வு எழுதிய 8 லட்சத்து 94 ஆயிரத்து 264 பேரில் மாணவிகள் 4 லட்சத்து 22 ஆயிரத்து 591 பேரும், மாணவர்கள் 3 லட்சத்து 96 ஆயிரத்து 152 பேரும் தேர்ச்சி அடைந்தனர்.

important notice to students who have not passed class 10

அதனைத் தொடர்ந்து இந்தப் பொதுத் தேர்வில் தோல்வியடைந்த மாணவர்களுக்கான உடனடி மறுதேர்வு தொடர்பான அறிவிப்பு இன்று (11.05.2024) வெளியாகும் என அறிவிக்கப்பட்டிருந்தது. இந்நிலையில் 10-ஆம் வகுப்பு பொதுத்தேர்வில் தேர்ச்சி பெறாத மாணவர்களுக்காக துணைத் தேர்வு அட்டவணை வெளியிடப்பட்டுள்ளது. அதில் 10ஆம் வகுப்பு பொதுத் தேர்வில் தேர்ச்சி பெறாத மாணவர்கள் துணை தேர்வுக்கு வரும் 16ஆம் தேதி முதல் ஜுன் 1ஆம் தேதி வரை விண்ணப்பிக்கலாம் எனத் தெரிவிக்கப்பட்டுள்ளது. விண்ணப்பிக்க தவறும் மாணவர்கள் ஜுன் 4ஆம் தேதி முதல் ஜுன் 6ஆம் தேதி வரை ஆன்லைனில் விண்ணப்பிக்கலாம் எனத் தெரிவித்துள்ளது. மேலும், அறிவியல் பாட செய்முறைப் பயிற்சி வகுப்பிற்கு மே 16ஆம் தேதி முதல் 25ஆம் தேதி வரை விண்ணப்பிக்க வேண்டும் என்று கூறப்பட்டுள்ளது. 10ஆம் வகுப்பில் தேர்ச்சி பெறாத மாணவர்களுக்கு ஜுலை 2ஆம் தேதி முதல் ஜுலை 8ஆம் தேதி வரை துணைத் தேர்வு நடக்கவிருக்கிறது எனவும் அறிவுறுத்தப்பட்டுள்ளது.