Skip to main content

“ஆண்ட கட்சிக்கும், ஆளுகின்ற கட்சிக்கும் சட்டசபையில் உறுப்பினர் இல்லாத காலமும் இருக்கிறது..” - ஜி.கே. வாசன்

Published on 09/07/2021 | Edited on 09/07/2021

 

TMC Leader G K Vaasan addressed press at trichy

 

“நீட் தேர்வு எழுதுவதற்கு தயாராக இருக்கும் மாணவர்களை, அரசியலுக்காக குழப்புவது நல்லதல்ல” என த.மா.கா. தலைவர் ஜி.கே. வாசன் தெரிவித்துள்ளார்..

 

திருச்சியில், செய்தியாளர்களைச் சந்தித்த த.மா.கா. தலைவர் ஜி.கே. வாசன், “அரசியல் கட்சிகளுக்குத் தேர்தலில் வெற்றி, தோல்வி சகஜம். கடந்த தேர்தலில், த.மா.கா. 6 தொகுதிகளில் போட்டியிட்டது. கூட்டணி தர்மத்தின்படி வெற்றிபெறுவதற்கான முயற்சி மேற்கொண்டோம். பல்வேறு காரணங்களால் வெற்றிபெற முடியவில்லை என்றாலும், தேர்தலுக்குப் பின், கட்சிக்குப் புத்துணர்வு கொடுக்க வேண்டும் என்பதற்காக சுற்றுப்பயணம் செய்துவருகிறேன். 

 

மூப்பனார் காலத்திலிருந்து குடும்பமாகவும், கட்டுப்பாடான கட்சியாகவும் த.மா.கா. உள்ளது. த.மா.காவுக்கு சைக்கிள் சின்னம் கிடைப்பதில் சட்டச் சிக்கல் தொடர்கிறது. கடந்த தேர்தலில், 10 தொகுதிகளிலாவது போட்டியிட வேண்டும் என்பது அனைவரின் விருப்பமாக இருந்தாலும், 6 தொகுதிகள்தான் கிடைத்தது. ஆண்ட கட்சிக்கும், ஆளுகின்ற கட்சிக்கும் சட்டசபையில் உறுப்பினர் இல்லாத காலமும் இருக்கிறது. தேர்தல் இலக்கல்ல; லட்சியம்தான் இலக்கு. 

 

வாய்ப்பு இல்லை என்பதற்காக, உயிரோட்டமான கட்சி அமைதியாக இருந்துவிட முடியாது. பயணித்துக்கொண்டே இருக்க வேண்டும். எதிர்பார்ப்பு இருந்தால்தான் ஏமாற்றம் வரும். சட்டசபை தேர்தல் முடிவுக்குப் பின், அதிமுக கூட்டணியிலிருந்து வெளியேறவில்லை. த.மா.காவும் அந்தக் கூட்டணியில் இருக்கிறது என்பதில் மாற்றுக் கருத்து இல்லை. 

 

பெட்ரோல், டீசல் விலை உயர்வால் அனைத்து தரப்பு மக்களும் பாதிக்கப்பட்டுள்ளனர். மத்திய, மாநில அரசுகள் விலை உயர்வைக் கட்டுப்படுத்த தேவையான வழி வகைகளைக் கையாள வேண்டும். கரோனா வைரஸ் 3வது அலை வந்தாலும், சமாளிப்பதற்கான கட்டமைப்புகளை உறுதிப்படுத்த வேண்டும். அரசியல் கட்சி போன்ற அமைப்புகளில் பொறுப்பில் இருப்பவர்கள் விடுவித்துக்கொள்வது, அவரவர் தனிப்பட்ட முடிவு. பொறுப்பில் இருப்பவர்கள் விலகுவதை, இளைஞர்களுக்கு வழிவிடுவதாக கருதுகிறேன். 

 

மேட்டூர் அணையில் இருந்து, குறுவை சாகுபடிக்கு திறக்கப்பட்டுள்ள தண்ணீர் நாகை, திருவாரூர் போன்ற கடைமடை பகுதி மாவட்டங்களுக்குச் சென்று சேரவில்லை. நெல்மணிகள் விதைப்பு செய்து, 20 நாட்களாகியும் முளைக்கவில்லை என்று விவசாயிகள் கவலையில் உள்ளனர். தமிழக அரசு, கடைமடை பகுதிக்குத் தண்ணீர் சென்றடைய தகுந்த நடவடிக்கை எடுக்க வேண்டும். 

 

நீட் தேர்வு விவகாரத்தில், அப்பாவி மாணவர்களை, அரசியல் கட்சிகள் வஞ்சிக்கக் கூடாது. தேர்வு நடத்தினால், எழுதுவதற்குத் தயாராக இருக்கும் மாணவர்களையும், பெற்றோர்களையும் அரசியலுக்காக குழப்புவது நல்லதல்ல” என்று அவர் தெரிவித்தார்.

 

 

சார்ந்த செய்திகள்

 

Next Story

“தேர்தல் நடத்தை விதிகளை தளர்த்த வேண்டும்” - த.மா.கா கோரிக்கை

Published on 22/04/2024 | Edited on 22/04/2024
TMc demand Election rules should be relaxed

மக்களவைத் தேர்தல் ஏப்ரல் 19ஆம் தேதி முழுமையாக முடிவடைந்த மாநிலங்களிலும், விரைவில் தேர்தல் முடியும் மாநிலங்களிலும் தேர்தல் நடத்தை விதிகளை (எம்சிசி) தளர்த்த வேண்டும் என  தமிழ் மாநில காங்கிரஸ் இளைஞர் அணி தலைவர் ஈரோடு யுவராஜா வலியுறுத்தியுள்ளார்.

இது தொடர்பாக அவர் வெளியிட்டுள்ள அறிக்கையில், “21 மாநிலங்களில் உள்ள 102 மக்களவைத் தொகுதிகளுக்கு நடைபெற்ற முதல்கட்டத் தேர்தலில் தமிழகம், புதுச்சேரி மற்றும் சிறிய மாநிலங்களில் தேர்தல் முழுமையாக நிறைவடைந்துள்ளது. முதல் கட்டத்துக்குப் பிறகு, ஏப்ரல் 26, மே 7, மே 13, மே 20, மே 25 மற்றும் ஜூன் 1 ஆகிய தேதிகளில் அடுத்த கட்ட வாக்குப்பதிவு நடைபெறும். 543 மக்களவைத் தொகுதிகளுக்கான மக்களவைத் தேர்தல் முடிவுகள் ஜூன் 4ஆம் தேதி வெளியாகிறது. தேர்தல் ஆணையத்தின் விதிகளின்படி, முழு முடிவும் வெளியாகும் வரை எம்.சி.சி. இருக்கும்.

எனவே, எம்சிசியை ரத்து செய்ய இன்னும் 3 முதல் 5 நாட்கள் ஆகும். அதுவரை ஒட்டுமொத்த நிர்வாகமும் முடங்கும். தேர்ந்தெடுக்கப்பட்ட எம்.எல்.ஏக்கள், உள்ளாட்சித் தலைவர்கள், பல்வேறு அரசு, மற்றும் கூட்டுறவு நிறுவனங்களின் நிர்வாகிகள் எந்த முடிவும் எடுக்கவோ, பொதுமக்கள் குறைகளைக் கேட்கவோ முடியவில்லை. வாராந்திர மக்கள் குறைதீர்ப்பு, மாதாந்திர விவசாயிகள் குறைதீர்க்கும் நாள் கூட்டம், அரசு விழாக்கள், புதிய பணிகளுக்கான பூமி பூஜை, நிறைவேற்றப்பட்ட திட்டப்பணிகள் தொடக்க விழா, புதிய அறிவிப்புகள் மற்றும் புதிய திட்டங்கள், பொதுமக்களுக்கு நலத்திட்டங்கள் விநியோகம், பொதுமக்கள் மனுக்கள் பரிசீலனை, டெண்டர் அழைப்பு போன்றவை நடக்கவில்லை. தேர்தல் நிலுவையில் உள்ள மாநிலங்களில் MCC விதிகளை அமல்படுத்துவது நியாயமானது. ஆனால் தேர்தல் முடிந்த மாநிலங்களில் எம்சிசியை அமல்படுத்துவது நியாயமானதல்ல. எம்.சி.சி தளர்வு மற்றும் தேர்தல் முடிந்த மாநிலங்களில் இயல்பான நிர்வாகம் ஆகியவை தேர்தல் நடைபெறும் மாநிலங்களில் தேர்தல் செயல்முறையை பாதிக்காது, ஏனெனில் இங்கு திமுக  ஆட்சி வெளியிடும் அறிவிப்பு அண்டை மாநிலங்களின் தேர்தலில் தாக்கத்தை ஏற்படுத்தாது.

மாநிலத்தில் 45 நாட்கள் நிர்வாகம் தேக்கம் அடைந்திருப்பது மக்களை, குறிப்பாக அரசாங்க உதவியை நாடும் ஏழை மற்றும் ஏழை மக்களைப் பாதிக்கும், மேலும் தேர்தல் ஆணையத்தின் மீது வெறுப்பை ஏற்படுத்தும். ஏற்கனவே, ஏப்ரல் 19ம் தேதி இரவு 7 மணிக்கும் நள்ளிரவுக்கும் அறிவிக்கப்பட்ட இறுதி வாக்குப்பதிவு சதவீதத்தில் தேர்தல் ஆணையம் செய்த குழப்பம்  மற்றும் முறையான ஆவணங்கள் இல்லை என்ற பெயரில் அப்பாவி பொதுமக்களிடம் இருந்து கோடிக்கணக்கான ரூபாய்களை பறிமுதல் செய்தது, பணம் ரூ.50000 உச்சவரம்பு நிர்ணயம் செய்வது குறித்து இங்குள்ள மக்கள் வேதனை அடைந்துள்ளனர்.  எனவே, மருத்துவமனை, கல்லூரி சேர்க்கை, திருமணம், சொத்துப் பதிவு, வர்த்தகம் மற்றும் தொழில்துறை போன்றவற்றுக்கு பணத்தை எடுத்துச் செல்வதில் தேர்தல் விதிமுறைகள்  பொதுமக்களின் இயல்பு வாழ்க்கையை பாதித்துள்ளன. எனவே  த.மா.கா  இளைஞர் அணி சார்பாக  தேர்தல் ஆணையத்திடம் தேர்தல் நடத்தை விதிகளை தளர்த்துமாறு கேட்டுக்கொள்கிறேன்" எனக் கூறியுள்ளார்.

Next Story

'தேர்தல் பணியைவிட சிறுத்தையை பிடிப்பதே முதல் பணி'-ஜி.கே.வாசன்

Published on 05/04/2024 | Edited on 05/04/2024
'The first task is to catch the leopard rather than the election task' - GK Vasan speech

மயிலாடுதுறையில் சிறுத்தை நடமாட்டம் பொதுமக்கள் மத்தியில் பரபரப்பை ஏற்படுத்தி இருக்கிறது. இரவில் நடமாடும் சிறுத்தையை பிடிக்கும் பணி கடந்த மூன்று நாட்களாக நடைபெற்று வருகிறது.

மயிலாடுதுறை மாவட்டம் நகரப் பகுதியில் உள்ள செம்மங்குளத்தில் கடந்த செவ்வாய்க்கிழமை அன்று சிறுத்தை ஒன்று புகுந்தது. அந்த பகுதியில் சுற்றித் திரிந்த தெரு நாய்களை வேட்டையாடும் வகையில் சிறுத்தை ஓடும் சிசிடிவி காட்சிகள் சமூக வலைதளங்களில் வெளியாகி பரபரப்பை ஏற்படுத்தி இருந்தது. இது குறித்து போலீசாருக்கும், வனத்துறையினருக்கும் தகவல் கொடுக்கப்பட்டது. சிறுத்தையின் கால்தடத்தை வைத்து அதன் நடமாட்டத்தை வனத்துறையினர் உறுதி செய்தனர்.

தொடர்ந்து மூன்று நாட்களாக அந்த பகுதியில் இந்த சம்பவம் பெரும் பரபரப்பை ஏற்படுத்தி இருக்கிறது. வீட்டை விட்டு யாரும் வெளியே வர வேண்டாம் என வனத்துறை சார்பில் எச்சரிக்கைகள் விடுக்கப்பட்டு வருகிறது. மயிலாடுதுறை ஆரோக்கியநாதபுரம் பகுதியில் சிறுத்தை நடமாட்டம் இருப்பதாக தகவல்கள் வெளியான நிலையில் பாதுகாப்பு கருதி இன்று (04/04/2024) அந்த உள்ள 9  பள்ளிகளுக்கு விடுமுறை அறிவிக்கப்பட்டது.

சிறுத்தை தேடுதல் வேட்டையில் முதல் நாள் கேமராவில் சிக்கிய அந்த சிறுத்தை இரண்டாவது நாள் சிக்கவில்லை என வனத்துறை சார்பில் தெரிவிக்கப்பட்டுள்ளது. ஆரோக்கியநாதபுரம் பகுதியில் நேற்று இரவு வனத்துறையினர் பணியில் ஈடுபட்டுக்கொண்டிருந்த போது 100க்கும் மேற்பட்ட பொதுமக்கள் பின் தொடர்ந்ததால் சிறுத்தையை கண்டுபிடிக்கும் பணியில் கடும் பாதிப்பு ஏற்பட்டதாகவும், எனவே சிறுத்தையை பிடிக்கும் வரை வனத்துறையினரை பொதுமக்கள் பின் தொடர்ந்து இடையூறு செய்ய வேண்டாம் எனவும் கோரிக்கை வைக்கப்பட்டுள்ளது.

சிறுத்தையை தேடும் பணிக்கு கூடுதலாக போலீஸ் பாதுகாப்பு கேட்கவும் வனத்துறை முடிவு செய்துள்ளது. கூறைநாடு, செம்மங்குளம், ஆரோக்கியநாதபுரம், சித்தர்காடு என பல இடங்களுக்கு தொடர்ந்து நகர்ந்து கொண்டே இருப்பது வனத்துறையினருக்கு அதனை பிடிப்பதில் பெரும் சிக்கல் ஏற்பட்டுள்ளது என்றும் கூறப்படுகிறது.

பாராளுமன்ற தேர்தல் பரப்புரைகள் தீவிரமாக சென்று கொண்டிருக்கும் நிலையில் மயிலாடுதுறையில் சிறுத்தை நடமாட்டம் பொது மக்களுக்கு அச்சத்தை கொடுத்துள்ளது. இந்நிலையில் மயிலாடுதுறை பகுதியில் பிரச்சாரம் செய்ய வந்த தமிழ் மாநில காங்கிரஸ் கட்சியின் தலைவர் ஜி.கே.வாசன், 'தேர்தல் பணியை விட சிறுத்தையை பிடிப்பதே முக்கியம். ஏனென்றால் வாக்காளர்கள், பொதுமக்கள் அச்சமின்றி வாக்களிக்க வைப்பது அரசின் கடமை' என தெரிவித்தார்.