Skip to main content

காடுவெட்டி குரு குடும்பப் பிரச்சனையின் பரபரப்பு பின்னணி... பா.ம.க.விற்கு கெட்டப் பெயர் ஏற்படுத்த முயற்சியா?  

Published on 01/06/2020 | Edited on 01/06/2020

 

pmk


பா.ம.க.வின் முக்கிய பிரமுகரும் வன்னியர் சங்கத் தலைவராக இருந்தவருமான முன்னாள் எம்.எல்.ஏ காடுவெட்டி குருவின் இரண்டாவது நினைவு நாளில் பா.ம.க. நிறுவனர் ராமதாஸ் தனது தைலாபுரம் தோட்டத்தில் அஞ்சலி செலுத்தினார். பா.ம.க.வினர் பலரும் அவரவர் இடங்களில் அஞ்சலி செலுத்தினர். அடுத்த நாள், காடுவெட்டியில் குருவின் மகனும் மருமகனும் கொடூரமாகத் தாக்கப்பட்ட நிகழ்வு அதிர்வை ஏற்படுத்தியது.
 


மே 26 ஆம் தேதி இரவு காடுவெட்டியில் சின்னபிள்ளை என்பவரது குடும்பத்தினருக்கும் குருவின் மகன் கனலரசன் தரப்பினருக்கும் மோதல் ஏற்ப்பட்டுள்ளது. இதில் கனலரசனுக்கு லேசான காயம். அவரை காப்பாற்ற சென்ற குருவின் மருமகன் மனோஜ்கிரண், அவரது அண்ணன் மதன்மோகனனுக்கு தலையில் அரிவாள் வெட்டு விழுந்தது. ஊர்மக்கள் இரு தரப்பையும் தடுத்து நிறுத்தியுள்ளனர். இல்லாவிட்டால் பெரிய விபரீதம் நடந்திருக்கும் என்கிறார்கள். வெட்டுப்பட்டவர்கள் தஞ்சை அரசு மருத்துவமனைக்குக் கொண்டு சென்று சிகிச்சையில் உள்ளனர். ஏன் இந்தத் திடீர் மோதல் எனக் காடுவெட்டியில் நாம் விசாரித்தோம்.
 

pmk


குருவின் சித்தப்பா மெய்யன்பன். இவரும் முன்னாள் இராணுவ வீரராக இருந்துள்ளார். இவருக்கு அதே ஊரைச் சேர்ந்த சின்னபிள்ளை என்பவரது சகோதரியைத் திருமணம் செய்துகொடுத்துள்ளனர். வாரிசுகள் இல்லாததால், சின்னபிள்ளை குரு இருதரப்புக்கும் மெய்யன்பனின் சொத்து சம்பந்தமான பிரச்சனை இருந்து வந்துள்ளது. அதோடு நிலத்திற்குச் செல்லும் பாதை சம்பந்தமாகவும் இருதரப்பினருக்கும் பிரச்சனை இருந்து வருகிறது.
 


இதுபோக, பா.ம.க தலைமையின் தூண்டுதலில் தங்கள் குடும்பத்தில் பிரச்சினை ஏற்படுவதாக குரு மகன் கலையரசன் குற்றம்சாட்டி, பல அரசியல் தலைவர்களிடமும் முறையிட்டு வந்தார். குருவை போலவே கனலரசனும் தன் பாதுகாப்புக்குச் சில இளைஞர்களைக் கூடவைத்துள்ளார். பெரும்பாலும் தனது அத்தை சந்திரகலா ஊரான பழஞ்சநல்லூரில் தங்கியிருப்பார். சந்திரகலா மகன் மனோஜ்கிரணுக்கு தனது சகோதரி விருத்தாம்பிகையை திருமணம் செய்து கொடுத்துள்ளது குறிப்பிடத்தக்கது.

சம்பவத்தன்று கனலரசனின் நண்பர் குறுங்குடியைச் சேர்ந்த அருண்குமார் என்பவர் காடுவெட்டியில் குரு வீட்டிற்கு பைக்கில் வந்துள்ளார். அப்போது சின்னபிள்ளை என்கிற சுப்பிரமணியன், இவரது மகன் ஐயப்பன், சின்னபிள்ளையின் தம்பி காமராஜ், இவரது மகன் சதீஷ்குமார் ஆகியோர் அருண்குமாரை வழிமறித்து அவரது பைக் சாவியைப் பிடுங்கிக்கொண்டு விரட்டியுள்ளனர். இந்தத் தகவலை அருண்குமார் கனலரசனுக்கு செல்போன் மூலம் தகவல் சொல்ல... கனலரசன் தன் அத்தை மகன்களுடன் வீட்டில் இருந்து வெளியில் வந்து சின்னபிள்ளை தரப்பினரிடம் விசாரிக்க, இருதரப்பிற்கும் பிரச்சனை ஆகியுள்ளது. திடீரென்று சின்னபிள்ளை தரப்பினர் அரிவாளால் கனலரசனை வெட்டப்போக, அதை அவரது அத்தை மகன்கள் சூழ்ந்து நின்று தடுக்கும்போது மதன்மோகனுக்குத் தலையில் வெட்டு, கனலரசனுக்கு காலில் அடி. ஊர் மக்கள் ஓடிவந்து இருதரப்பையும் தடுத்துள்ளனர்.

மாவட்ட எஸ்.பி. சீனிவாசன் உத்தரவின் பேரில் காடுவெட்டி பகுதியில் பலத்த போலீஸ் பாதுகாப்பு ஏற்பாடு செய்துள்ளார். இது சம்பந்தமாக மீன்சுருட்டி போலீசில் இருதரப்பு புகாரிலும் வழக்குப் பதிவு செய்துள்ளனர். சின்னபிள்ளை தரப்பில் சதீஷ்குமார் கனலரசன் தரப்பினரால் சண்டையின் போது காயம் ஏற்பட்டுள்ளதாகக் கூறி, அரியலூர் அரசு மருத்துவமனையில் வெளிநோயாளியாக சிகிச்சை பெற்றுள்ளார் என்பது குறிப்பிடதக்கது.
 

http://onelink.to/nknapp


இது குறித்து மீன்சுருட்டி போலீசாரிடம் கேட்டபோது, "கனலரசன் கொடுத்த புகார் மீது சின்னபிள்ளை சதீஷ்குமார் ஆகிய இருவரும் கைது செய்யப்பட்டுள்ளனர். சின்னபிள்ளை கொடுத்த புகாரின் அடிப்படையில் கனலரசன், மதன்மோகன், மனோஜ்கிரண், அருண்குமார் உட்பட ஐந்துபேர் மீது வழக்குப் பதிவு செய்யப்பட்டுள்ளது. இதில் அருண்குமாரை கைது செய்துள்ளோம். வழக்கில் சம்பந்தபட்ட மற்றவர்கள் தலைமறைவாக உள்ளனர். அவர்களைத் தேடிவருகிறோம்'' என்றனர்.

சம்பவத்தன்று மறுநாள் குருவின் தயார் கல்யாணி, மீன் சுருட்டி காவல் நிலையத்துக்கு எதிரெ நின்றுகொண்டு தங்கள் குடும்பத்தை வாழவிடாமல் சதி செய்கிறார்கள் என்றும், அதேபோல் குருவின் சகோதரி செந்தாமரை, எங்கள் குடும்பத்திற்கு எதிராகப் பிரச்சனைகள் உருவாக காரணம் பா.ம.க. தலைமை தூண்டுதல் என்றும் கூறினர். இதுபற்றி பா.ம.க. முக்கிய பிரமுகர்களிடம் கேட்ட போது, பா.ம.க. மற்றும் வன்னியர் சங்க வளர்ச்சிக்கு குரு அதிக அளவில் உழைத்துள்ளார். அவர்மீது கட்சித்தலைமையும் கட்சிகாரர்களும் மிகுந்த மரியாதை வைத்துள்ளனர். அதைக் கெடுக்கும் விதத்தில் அவரது குடும்பத்தினர் தங்கள் சொந்த பிரச்சினைகளுக்காக பா.ம.க. தலைமை மீது தொடர்ந்து அவதூறு பரப்பி வருகின்றனர் என்கிறார்கள் பா.ம.க. முன்னோடிகள்.

காடுவெட்டி குரு சின்ன பிள்ளை குடும்பங்கள் ரத்தஉறவு உள்ளவர்கள். குரு இருந்தவரை அவரோடு நெருக்கமாகவே இவர்கள் அனைவரும் இருந்துள்ளனர். குரு மறைவுக்குப் பிறகு மோதல் போக்கு தலையெடுத்துள்ளது. இவர்கள் பிரச்சனை இப்போதைக்கு முடிவுக்கு வருவதுபோல் தெரியவில்லை. பிரச்சனைகள் மேலும் மேலும் அதிகரிக்கும் நிலை உள்ளது என்கிறார்கள் அப்பகுதி மக்கள்.


 

 

சார்ந்த செய்திகள்

Next Story

“தமிழ்நாட்டில் பறவைக்காய்ச்சலைத் தடுக்க முன்னெச்சரிக்கை நடவடிக்கைகள் வேண்டும்” - அன்புமணி

Published on 22/04/2024 | Edited on 22/04/2024
“Precautionary measures should be taken to prevent bird flu in Tamil Nadu says Anbumani

தமிழ்நாட்டில் பறவைக்காய்ச்சலைத் தடுக்க முன்னெச்சரிக்கை நடவடிக்கைகள் வேண்டும் என பாமக தலைவர் அன்புமணி இராமதாஸ்  வலியுறுத்தியுள்ளார்.

இது தொடர்பாக அவர் வெளியிட்டுள்ள அறிக்கையில் “கேரளத்தில் பறவைக் காய்ச்சல் வேகமாக பரவி வரும் நிலையில்,  தமிழ்நாட்டிற்குள்ளும் பறவைக் காய்ச்சல் பரவி விடுமோ என்ற அச்சம் மக்களிடம் ஏற்பட்டுள்ளது.  தமிழ்நாட்டிற்குள் பறவைக் காய்ச்சல் பரவாமல் தடுக்கத் தேவையான முன்னெச்சரிக்கை நடவடிக்கைகள் அனைத்தையும்  தமிழக அரசின் கால்நடைப் பராமரிப்புத் துறை  மேற்கொள்ள வேண்டும்.

கேரளத்தில் இருந்து தமிழ்நாட்டிற்குள்  வரும் சரக்கு வாகனங்களை சோதனையிட்டு  கிருமி நாசினி தெளிக்கும் பணி நேற்று முதல் தொடங்கப்பட்டுள்ளது. ஆனால், அது பெயரளவில் மட்டும் தான் மேற்கொள்ளப்படுவதாகவும், பெரும்பான்மையான வாகனங்கள் மீது கிருமிநாசினி தெளிக்கப்படுவதில்லை என்றும், அதற்குத் தேவையான மனிதவளம் இல்லை என்றும் குற்றச்சாட்டுகள் எழுந்துள்ளன.  அதேபோல், கோவை, தேனி மாவட்டங்களையொட்டிய எல்லைப் பகுதிகளில் இத்தகைய பணிகள் எதுவும்  மேற்கொள்ளப்படவில்லை என்றும் கூறப்படுகிறது. இந்தக் குற்றச்சாட்டுகள் குறித்து ஆய்வு செய்து குறைகள் அனைத்தும் களையப்பட வேண்டும்.

பறவைக் காய்ச்சல் தாக்குதலில் இருந்து தற்காத்துக் கொள்ள என்னென்ன  நடவடிக்கைகளை மேற்கொள்ள வேண்டும் என்பது குறித்து தமிழ்நாட்டு மக்களுக்கு விழிப்புணர்வு ஏற்படுத்தவும் தமிழக அரசு நடவடிக்கை மேற்கொள்ள வேண்டும்  என்று வலியுறுத்துகிறேன்” எனக் குறிப்பிட்டுள்ளார்.

Next Story

'அப்பாவி மக்களை இன்னல்களுக்கு ஆளாக்குவதையும் அனுமதிக்க முடியாது'- ராமதாஸ் கருத்து

Published on 21/04/2024 | Edited on 21/04/2024
 'Innocent people can't be allowed to suffer' - Ramadoss opined

உலகின் மிகப்பெரிய ஜனநாயக திருவிழாவான இந்திய நாட்டின் 18ஆவது நாடாளுமன்ற தேர்தல் நாடு முழுவதும் களைகட்டி வருகிறது. அதன்படி முதற்கட்டமாக நேற்று முன்தினம் (19.04.2024) தொடங்கி வரும் ஜூன் 1 ஆம் தேதி வரை 7 கட்டமாக வாக்குப்பதிவு நடைபெறவுள்ளது.

முதற்கட்டமாக தமிழகம் உள்ளிட்ட 21 மாநிலங்கள் மற்றும் யூனியன் பிரதேசங்களில் உள்ள 102 இடங்களுக்கு நேற்று முன்தினம் வாக்குப்பதிவு நடைபெற்றது. இந்நிலையில் தேர்தல் நடத்தை விதிமுறைகள் ஜூன் 6ஆம் தேதி வரை தொடரும் என தேர்தல் ஆணையம் அறிவித்துள்ளதற்கு பாமக நிறுவனர் ராமதாஸ் எதிர்ப்பு தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், 'தமிழ்நாடு மற்றும் புதுவையில் மக்களவைத் தேர்தல்கள் அமைதியாக நடத்தி முடிக்கப்பட்டுள்ள நிலையில், தமிழ்நாட்டில் தேர்தல் நடத்தை விதிகள் ஜூன் 6 ஆம் நாள் வரை தொடரும் என்று தலைமைத் தேர்தல் அதிகாரி அறிவித்திருப்பது அதிர்ச்சியை ஏற்படுத்தியுள்ளது. தமிழ்நாட்டில் தேர்தல் நடத்தை விதிகளுக்கு எந்தத் தேவையும் இல்லாத நிலையில், அதை தொடர்வது மக்களுக்கு பாதிப்புகளையே ஏற்படுத்தும்.

தமிழ்நாட்டில் மக்களவைத் தேர்தல்கள் நியாயமாகவும், நேர்மையாகவும் நடத்தப்பட வேண்டும் என்பதற்காகத் தான் நடத்தை விதிகள் நடைமுறைப்படுத்தப்பட்டன. தமிழ்நாட்டில் தேர்தல்கள் நடத்தி முடிக்கப்பட்டு விட்ட நிலையில், இனி நடத்தை விதிகளுக்கு எந்தத் தேவையும் இல்லை. இந்தியாவின் பிற மாநிலங்களில் இன்னும் தேர்தல்கள் நடத்தப்படவில்லை என்பதற்காக தமிழ்நாட்டில் நடத்தை விதிகளை இன்னும் நடைமுறைப்படுத்திக் கொண்டிருப்பதில் எந்த அர்த்தமும் இல்லை. ஒருவேளை ஒரே கட்டமாக மக்களவைத் தேர்தல் நடத்தப்பட்டிருந்தாலோ அல்லது தமிழ்நாட்டில் கடைசி கட்ட வாக்குப்பதிவு நடத்தப்பட்டிருந்தாலோ வாக்குப்பதிவு முடிந்த சில நாட்களில் வாக்கு எண்ணிக்கை நடத்தி முடிவுகள் அறிவிக்கப்பட்டிருக்கும். அத்துடன் தேர்தல் நடத்தை விதிகளும் முடிவுக்கு வந்திருக்கும். தமிழ்நாட்டில் முதல் கட்ட வாக்குப்பதிவு  நடத்தப்பட்டது என்ற ஒரே காரணத்திற்காக மற்ற மாநிலங்களிலும் வாக்குப்பதிவு முடிவடையும் வரை தமிழக அரசும், மக்களும் தேவையற்ற கட்டுப்பாடுகளை சுமந்து கொண்டு வாட வேண்டிய தேவையில்லை.

 'Innocent people can't be allowed to suffer' - Ramadoss opined

மக்களவைத் தேர்தலுக்கான அறிவிக்கை கடந்த மார்ச் 16 ஆம் நாள் வெளியிடப்பட்டது. மக்களவைத் தேர்தல் முடிவுகள் அறிவிக்கப்பட்ட பிறகு ஜூன் 6ஆம் நாள் தான் தேர்தல் நடைமுறைகள் முடிவுக்கு வரும் என்பதால், அதுவரை நடத்தை விதிகள் நடைமுறையில் இருக்கும். அதாவது தேர்தல் நடைமுறை என்ற பெயரில் தமிழ்நாடு அரசு நிர்வாகத்தை 83 நாட்களுக்கு முடக்கி வைப்பதையும், அதே காலத்திற்கு அப்பாவி மக்களை பல்வேறு வகைகளில் இன்னல்களுக்கு ஆளாக்குவதையும் அனுமதிக்க முடியாது.

நடத்தை விதிகள் நடைமுறையில் இருக்கும் போது ஆட்சியாளர்கள் புதிய திட்டங்கள் எதையும் அறிவிக்க முடியாது. மக்கள் அன்றாடம் எதிர்கொள்ளும் பிரச்சனைகளை தீர்ப்பது குறித்து அதிகாரிகளுக்கு எந்த வித ஆணைகளையும் பிறப்பிக்க முடியாது; அதிகாரிகளுடன் முதலமைச்சரோ, அமைச்சர்களோ ஆய்வுக்கூட்டங்களைக் கூட நடத்த இயலாது. கடைநிலை பணியாளர்கள் முதல் தலைமைச் செயலர் வரை அனைத்து நிலை அதிகாரிகளும் தேர்தல் ஆணையத்தின் கட்டுப்பாட்டில் தான் இருப்பார்கள். மொத்தத்தில் அரசு நிர்வாகம் என்பது செயல்பட முடியாத அளவுக்கு மொத்தமாக முடக்கப்பட்டிருக்கும். அதனால், மக்களுக்கான நலத்திட்ட உதவிகளைக் கூட அரசால் செய்ய முடியாத நிலை உருவாகும்.

தேர்தல் நடத்தை விதிகளால் மிகக்கடுமையாக பாதிக்கப்பட்டிருப்பது வணிகர்கள் தான். சில்லறை வணிகம் செய்யும் வணிகர்கள் அதில் கிடைத்தப் பணத்தை சந்தைக்கு கொண்டு சென்று தான் தங்களுக்குத் தேவையான பொருட்களை வாங்கி வர வேண்டும். அவ்வாறு வணிகர்கள் பணத்தைக் கொண்டு செல்லும் போது, அவர்களை மடக்கி சோதனை நடத்தும் பறக்கும் படையினர் வணிகர்களிடம்  ரூ.50 ஆயிரத்திற்கு மேல் ஒரு ரூபாய் கூடுதலாக இருந்தாலும் கூட மொத்தப் பணத்தையும் பறிமுதல் செய்கின்றனர். அதனால், கடந்த ஒரு மாதத்திற்கும் மேலாக வணிகர்கள் கடுமையான பாதிப்புகளுக்கு உள்ளானார்கள். அவர்களை மேலும் 45 நாட்களுக்கு பாதிப்புகளுக்கு உள்ளாக்குவது நியாயமற்றதாகும்.

எனவே, தமிழ்நாட்டில் மக்களவைத் தேர்தல் நடைபெற்று முடிந்து விட்ட நிலையில், மாநிலம் முழுவதும் தேர்தல் நடத்தை விதிகளை உடனடியாக தளர்த்த வேண்டும். மக்களுக்குத் தேவையான நலத் திட்டங்களை செயல்படுத்த  தமிழக அரசையும், வணிகத்திற்கு தேவையான பணத்தை தடையின்றி எடுத்துச் செல்ல வணிகர்களையும் தேர்தல் ஆணையம் அனுமதிக்க வேண்டும் என்று கேட்டுக் கொள்கிறேன்' என தெரிவித்துள்ளார்.