Skip to main content

நான் சொல்றதைத்தான் கேட்கணும், இல்லன்னா பதவியை பறிச்சிடுவேன்... திமுக தலைவர் ஸ்டாலினுக்கு சென்ற தகவல்!

Published on 13/01/2020 | Edited on 13/01/2020

திருவண்ணாமலை மாவட்டம், பெரணமல்லூர் ஊராட்சி ஒன்றியத்தில் மொத்தம் 16 கவுன்சிலர் வார்டுகள். இதில் 8 வார்டுகளில் தி.மு.க. தனித்து வெற்றி பெற்றுள்ளது. அ.தி.மு.க. 1, பா.ம.க. 4, சுயேட்சை, அ.ம.மு.க., தே.மு.தி.க. தலா 1 இடங்களில் வெற்றி பெற்றுள்ளார்கள். இந்நிலையில், தி.மு.க.வின் பெரணமல்லூர் கிழக்கு ஒ.செ. ராமசாமி, தான் பதவி வகிக்கும் கிழக்கு பகுதியில் வெற்றிபெற்ற மூன்று தி.மு.க. கவுன்சிலர்களை அ.தி.மு.க.வுக்கு ஆதரவாக அழைத்துச் சென்றார். இதற்காக அவருக்கு மட்டும் அமைச்சர் சேவூர்.ராமச்சந்திரன் தரப்பில் இருந்து 30 லட்ச ரூபாய் தரப்பட்டுள்ளது. இதனால் தி.மு.க.வின் பலம் 5 ஆக குறைந்தது.
 

dmk



ஜனவரி 6-ந் தேதி பதவியேற்புக்கு அ.தி.மு.க. ஒ.செ. செல்வராஜ், தே.மு.தி.க. மா.செ. தெள்ளார் கோபி, பா.ம.க. ஒ.செ.வுடன் தி.மு.க. ஒ.செ. ராமசாமி ஒரே காரில் வந்து இறங்கி, தன் பக்கம் நின்ற தி.மு.க. கவுன்சிலர்கள் மூன்றுபேரை பதவியேற்புக்கு அனுப்பிவைத்தார். பதவியேற்கும்போது அங்கிருந்த தி.மு.க. முன்னாள் எம்.எல்.ஏ. பாண்டுரங்கன் தலைமையிலான தி.மு.க.வினர், அணி மாறிய தி.மு.க. கவுன்சிலர்களிடம் கேள்வி எழுப்பினர். நான்தானே சீட் வாங்கித் தந்தேன். "நான் சொல்றதைத்தான் கேட்கணும், இல்லன்னா பதவியை பறிச்சிடுவேன்னு ஒ.செ. சொன்னார்' என அப்பாவியாய் சொல்லினர். "அந்தாளால் ஒண்ணும் பண்ண முடியாது, கட்சித் தலைமை நினைத்தால்தான் எதுவும் செய்ய முடியும்' எனச்சொல்ல, பதவி ஏற்றுக்கொண்ட பின், பிரச்சினைக்குரிய 3 தி.மு.க. கவுன்சிலர்களில் இருவர் பாண்டுரங்க னுடன் சென்றனர். ஒரு தி.மு.க. பெண் கவுன்சிலர் மட்டும் அ.தி.மு.க. பக்கம் போன தி.மு.க. ஒ.செ. ராமசாமியுடன் சென்றார். போலீஸார் அவர்களை பத்திரமாக அனுப்பி வைத்தனர்.


இந்த தகவல் தி.மு.க. மா.செ. எ.வ.வேலுவுக்கு சொல்லப்பட்டது. அவர் அந்த பெண் கவுன்சிலரின் கணவருக்கு போன்செய்து பேசினார். அந்தப் பெண் கவுன்சிலரின் கணவர் தனது மனைவியை வரவைத்தார். 8 தி.மு.க. கவுன்சிலர்களுடன், சுயேட்சையாக போட்டியிட்டு கவுன்சிலராக வெற்றிபெற்ற தி.மு.க. காமாட்சி இணைந்தார். 9 கவுன்சிலர்களும் தி.மு.க. தரப்பில் சேர்மன் வேட்பாளராக அறிவிக்கப்பட்டுள்ள இந்திராஇளங்கோவன் கட்டுப்பாட்டில் விடப்பட்டனர். 9 கவுன்சிலர்களுடன் தி.மு.க. தரப்பு பாண்டிச்சேரியில் சூட் ரூம் போட்டு பாதுகாப்பாக இருந்து வருகிறது. மீதியுள்ள 7 கவுன்சிலர்களுடன் திருநள்ளாறில் ரூம் போட்டு தங்கினார் அ.தி.மு.க. ஒ.செ. செல்வராஜ். அங்கிருந்து ஒரு கவுன்சிலர் எஸ்கேப்பாகி தி.மு.க.வின் எல்லைக்குள் வந்துவிட்டார். அ.தி.மு.க. பலம் தற்போது 6-ஆக குறைந்துள்ளது. "சேர்மன் தேர்தலின்போது பாருங்க, அதிசயம் நடக்கும்' என அ.தி.மு.க. இப்போதும் சவால் விட்டுக்கொண்டுள்ளது.


இதே மாவட்டம், ஜம்னாமத்தூர் ஊராட்சி ஒன்றியத்தில் மொத்தம் 7 கவுன்சிலர் வார்டுகள். இதில் 3 வார்டுகளில் அ.தி.மு.க.வும், 2 வார்டுகளில் தி.மு.க.வும், 1 வார்டில் தே.மு.தி.க.வும், 1-ஆவது வார்டில் சுயேட்சையும் வெற்றிபெற்றனர். சுயேட்சையாக வெற்றி பெற்றவர் தி.மு.க.வுக்கு சாதகமாக திரும்பிவிட்டார். அப்படியிருந்தும் அ.தி.மு.க., தே.மு.தி.க. ஆதரவுடன் 4 கவுன்சிலர்கள் என முன்னிலையில் இருந்தது. அ.தி.மு.க. சார்பில் போட்டியிட்டு வெற்றி பெற்ற காளி என்கிற கவுன்சிலர், தனக்கு துணைசேர்மன் பதவி வேண்டும் என கேட்டுள்ளார். இதனை ஜம்னாமத்தூர் அ.தி.மு.க. ஒ.செ. வெள்ளையன் மறுத்ததோடு, காளியை மோசமாக பேச காளி கோபமாகிவிட்டார். இதனை அறிந்த தி.மு.க. நிர்வாகிகள் காளியிடம் பேசியதும் காளி தலைமறைவாகிவிட்டார். "தி.மு.க.வினர்தான் கடத்திவிட்டார்கள்' என ஒ.செ. வெள்ளையன் குற்றம்சாட்டினார்.

கடந்த ஜனவரி 6-ந் தேதி ஜம்னாமத்தூர் ஊராட்சி ஒன்றிய அலுவலகத்தில் வெற்றி பெற்றவர்கள் பதவிப் பிரமாணம் செய்துகொண்டனர். பதவி யேற்புக்கு வந்த கவுன்சிலர் காளியை, வெள்ளையன் ஆட்கள் தாக்க முயன்றனர். அவரை போலீஸார் பாதுகாப்பாக பதவியேற்க வைத்து அவரது வீட்டுக்கு அனுப்பிவைத்தனர்.
 

 

dmk



இந்நிலையில் வீடியோ ஒன்றை வெளியிட்டுள்ள கவுன்சிலர் காளி, "என்னை ஒருபக்கம் அ.தி.மு.க.வும் இழுக்குது. மற்றொரு பக்கம் தி.மு.க.வும் இழுக்குது. நான் இரண்டு பக்கத்தில் யார் பக்கம் போகணும்கிறதை அமைச்சர், எம்.எல்.ஏ., கலெக்டரை சொல்லச் சொல்லுங்க. அவுங்க சொல்றதை கேட்டுக்கறேன். இரண்டு பக்கமும் என்னை கொலை செய்யப் பார்க்கறாங்க. என் உயிருக்குப் பாதுகாப்பில்லை; அதனால் எனக்கு போலீஸ் பாதுகாப்பு வேண்டும்' எனப் பேசி வீடியோ வெளியிட்டுள்ளார். இதனை காவல்துறையினருக்கும் கோரிக்கையாக எழுதித் தந்தார். அதனால் கவுன்சிலர் காளி வீட்டுக்கு போலீஸ் பாதுகாப்பு போடப் பட்டுள்ளது. தி.மு.க., அ.தி.மு.க. இரண்டு தரப்பும் விடாமல் காளியிடம் மறைமுகமாக பேச்சுவார்த்தை நடத்தின.

"என் மகள் ஜீவா சேர்மனாவதற்கு ஓட்டுப் போட்டு ஜெயிக்க வைக்க லன்னா நீங்க யாரும் மலையிலயே இருக்க முடியாது'' என ஒ.செ. வெள் ளையன், கவுன்சிலர்களை மிரட்ட மிரண்டுபோயுள்ளனர் அ.தி.மு.க., தே.மு.தி.க. கவுன்சிலர்கள்.


 

சார்ந்த செய்திகள்

 

Next Story

‘தாயா பிள்ளையா இருந்தாலும் வாயும் வயிறும் வேறு..’ - காவிரி விவகாரத்தில் அமைச்சர் பதில்

Published on 15/07/2024 | Edited on 15/07/2024
duraimurugan said Karnataka on Cauvery will be taken in consultation with cm stalin

வேலூரில் ஊரகப் பகுதிகளில் அரசு நிதி உதவி பெறும் தொடக்கப்பள்ளிகளில் முதலமைச்சரின் விரிவு படுத்தப்பட்ட காலை உணவு திட்டத்தை காட்பாடி அடுத்த கிறிஸ்டியன்பேட்டை பகுதியில் உள்ள நிதியுதவி தொடக்கப்பள்ளியில் நீர்வளத்துறை அமைச்சர் துரைமுருகன் துவக்கி வைத்தார். இதில் வேலூர் மாவட்டத்தில் செயல்பட்டு வரும் 68 ஊரக அரசு நிதியுதவிபெறும் பள்ளிகளில் 1-5-ம் வகுப்புகளில் பயிலும் 1296-மாணவர்கள், 1244-மாணவிகள் மொத்தம் 2540 மாணவ மாணவிகள் இத்திட்டத்தில் பயன்பெறுகின்றனர்.

பின்னர் அமைச்சர் துரைமுருகன் அளித்த பேட்டியில், “தமிழகத்திற்கு அதிகமான தண்ணீர் தேவைப்பட்டாலும் அத்தியாவசிய தேவைக்காக ஒரு டிஎம்சி நீரை தமிழகத்திற்க்கு வழங்க வேண்டும் என காவேரி ஒழுங்காற்று குழு கர்நாடக அரசுக்கு உத்தரவிட்டது. ஆனால் ஒரு டிஎம்சி யை கூட தர மாட்டேன் என அடம்பிடித்தார்கள். நாங்கள் நிலைமைகளை விளக்கி நீதிமன்றத்தில் எடுத்துக் கூறினோம். அதன் பிறகும் அந்தப் போக்கில் இருந்து கர்நாடக அரசு மாறாமல் ஒரு டிஎம்சி வழங்க முடியாது என மறுத்துவிட்டு 8 ஆயிரம் கன அடி தருகிறோம் எனச் சொல்கிறார்கள்.

ஒரு டிஎம்சி என்பது 11 ஆயிரத்தி 574 கனஅடி ஆகும். கர்நாடகாவில் தண்ணீர் இருக்கிறது. கே.ஆர்.எஸ் ஆணையில் 105 ஆடி தண்ணீர் உள்ளது. கபினியில் 64 அடி தண்ணீர் உள்ளது. இது போன்று நமக்கு தண்ணீர் தரும் கர்நாடகாவில் உள்ள 4 அணைகளில் போதுமான தண்ணீர் உள்ளது. இதுவரை(15.07.2024)  4,047 கன அடி தான் மேட்டூருக்கு தண்ணீர் வந்துள்ளது. தற்போது அங்கு மழை பெய்து வருவதால் அதிகமான தண்ணீர் வந்து கொண்டிருக்கிறது. இந்த விவகாரத்தில் தமிழகம் அடுத்த நடவடிக்கை எடுப்பது குறித்து முதல்வருடன் ஆலோசித்து பின்னர் முடிவு எடுக்கப்படும். இதில் கர்நாடக மேல்முறையீடு செய்தால் ரொம்ப நல்லது. அது நமக்கு தான் கை கொடுக்கும். மேலும் கர்நாடகா தண்ணீர் கொடுக்கிறோம் என சொன்னாலும், கொடுக்க மாட்டேன் என்று சொன்னாலும் மழை அதிகமாக பெய்தால் தண்ணீர் வந்து தான் ஆகணும்” என்றார்.

இதையடுத்து, கூட்டணியில் அங்கம் வகிக்கும் முதல்வர் ஸ்டாலின் காவேரி விவகாரத்தில் தமிழக மக்களையும் தமிழக விவசாயிகளையும் பற்றி கவலைப்படாமல் உள்ளார் என எதிர்க்கட்சி தலைவர் எடப்பாடி பழனிசாமி கூறியிருந்தது குறித்து கேட்டதற்கு, “ எடப்பாடி பழனிசாமிக்கு காவேரி விவகாரம் குறித்து அதிகமாக தெரியாது. அவர்கள் ஆட்சியில் மட்டும் கேட்ட உடனேயே தண்ணீர் வந்து விட்டதா?  கூட்டணி என்பது வேறு, அவர்களின் பிரச்சனை வேறு. தாயாக இருந்தாலும் பிள்ளையாக இருந்தாலும் வயிறு வேறு கர்நாடகாவிற்கு உள்ள உரிமையை அவர்கள் கேட்கிறார்கள். தமிழகத்திற்கு உள்ள உரிமையை நாம் கேட்கிறோம். நீதிமன்றம் மூலமாக தீர்வு காணப்படும். இறுதி முடிவு உச்ச நீதிமன்றத்தின் கையில் தான் உள்ளது. நான் மிக நீண்ட காலமாக காவேரி விவகாரத்தை கையாண்டு வருகிறேன் இதில் உள்ள எல்லா பிரச்சனை குறித்தும் எனக்கு தெரியும்” என்றார்.

ஆம்ஸ்ட்ராங் கொலை வழக்கு தொடர்பான என்கவுண்டரில் சந்தேகம் உள்ளதாக எதிர்க்கட்சிகள் குற்றம்சாட்டியிருந்தது குறித்து கேட்டதற்கு, “இன்வெஸ்டிகேஷனில் உள்ளது” என்றார்.

முன்னதாக அவர் பேசுகையில், “காமராஜர் படிக்காதவராக இருந்தாலும், ஏழை மாணவர்களுக்கு கல்வி கொடுத்ததால் அவரது பிறந்த நாளை கல்வி வளர்ச்சி நாளாக அறிவித்த கலைஞர் காமராஜர் கொண்டு வந்த மதிய உணவு திட்டத்தில் இரண்டு முட்டைகளை போட்டு சத்துணவாக மாற்றினார். அன்றைக்கு காமராஜர் பிள்ளைகள் படிக்க மதிய உணவு திட்டத்தை கொண்டு வந்தார். அன்றைக்கு காமராஜருக்கு ஏற்பட்ட ஞானோதயம் போல் இன்று முதல்வர் ஸ்டாலினுக்கு ஏற்பட்டு காலை உணவு திட்டம் தொடங்கப்பட்டது. இந்த மாவட்டத்தில் உள்ள காலை உணவு திட்டம் செயல்படுத்தப்படும் பள்ளிகளை திடீர் ஆய்வு செய்ய உள்ளேன்” எனத் தெரிவித்தார். 

Next Story

உயர்நீதிமன்றத்தை நாடிய முன்னாள் அமைச்சர் எம்.ஆர்.விஜயபாஸ்கர்!

Published on 15/07/2024 | Edited on 15/07/2024
Ex-minister who approached the High Court MR  Vijayabaskar

கரூர் மாவட்டம் வாங்கல் குப்பிச்சிபாளையத்தைச் சேர்ந்த பிரகாஷ் என்பவர் கரூர் காவல் நிலையம் மற்றும் எஸ்.பி. அலுவலகத்தில் புகார் ஒன்றை அளித்திருந்தார். அதில், தோரணக்கல்பட்டி மற்றும் குன்னம்பட்டியில் தனக்கு சொந்தமான ரூ.100 கோடி மதிப்புள்ள 22 ஏக்கர் நிலத்தை அதிமுக முன்னாள் அமைச்சர் எம்.ஆர். விஜயபாஸ்கர் மற்றும் அவரது ஆதரவாளர்கள் தனது மனைவி மற்றும் மகளை மிரட்டி மோசடியாகப் பத்திரப்பதிவு செய்து உள்ளனர்' என்று கூறியிருந்தார். அதனைத் தொடர்ந்து இந்த வழக்கு சிபிசிஐடிக்கு மாற்றப்பட்டது.

இந்த வழக்கில் தனது பெயர் சேர்க்கப்படலாம் என்று கருதி முன்னாள் அமைச்சர் எம்.ஆர். விஜயபாஸ்கர் முன்ஜாமீன் கேட்டு கரூர் மாவட்ட முதன்மை அமர்வு நீதிமன்றத்தில்  மனுத்தாக்கல் செய்திருந்தார். இந்த மனு மீதான விசாரணை ஜூன் 25 ஆம் தேதி நடைபெற்றது. இதனையடுத்து நில அபகரிப்பு வழக்கில் எம்.ஆர். விஜயபாஸ்கரின் முன் ஜாமின் மனுவை நீதிபதி தள்ளுபடி செய்து உத்தரவிட்டிருந்தார். இதனால் தொடர்ந்து தலைமறைவாக உள்ள எம்.ஆர். விஜயபாஸ்கரை கைது செய்ய போலீசார் தீவிரம் காட்டிவரும் நிலையில் ஐந்து தனிப்படைகள் அமைக்கப்பட்டு அவரைப் பிடிக்க முயன்று வருகின்றனர். இதனையடுத்து கடந்த 2 ஆம் தேதி (02.07.2024) மீண்டும் ஒரு முன்ஜாமீன் மனுவைக் கரூர் முதன்மை அமர்வு நீதிமன்றத்தில் எம்.ஆர். விஜயபாஸ்கர் தாக்கல் செய்திருந்தார்.

அந்த மனுவில் தன்னுடைய தந்தைக்கு உடல்நிலை சரியில்லை. எனவே அவர் கோவையில் உள்ள தனியார் மருத்துவமனையில் சிகிச்சைக்காக அனுமதிக்கப்பட்டுள்ளார். அவரை உடனிருந்து கவனிக்க வேண்டி இருப்பதால் சிபிசிஐடி போலீசார் தன்னை கைது செய்யாமல் இருக்க முன்ஜாமீன் வழங்க வேண்டும்' எனத் தெரிவிக்கப்படிருந்தது. இந்த மனு மீதான விசாரணையின் போது இருதரப்பு வாதங்களையும் கேட்டறிந்த நீதிபதி சண்முகசுந்தரம் இந்த மனுவைத் தள்ளுபடி செய்து உத்தரவிட்டிருந்தார். இந்நிலையில் முன்ஜாமின் கோரி அதிமுக முன்னாள் அமைச்சர் எம்.ஆர்.விஜயபாஸ்கர் சென்னை உயர்நீதிமன்றத்தின் மதுரைக் கிளையில் மனுத்தாக்கல் செய்துள்ளார். மேலும் அவரது சகோதரரும் முன்ஜாமின் கோரி மனுத்தாக்கல் செய்துள்ளார்.